Mokokchung town nung aliba Nagaland Bible College (NBC) pur 39th aser 40th graduation service sentong parnok college campus Discovery Hall nung takok ngua kaogo. Yaküm Covid-19 wara ajanga alima ajunga shibangba agi iba sentong magiteti arur taküm ang küm ana batch reptepa agi.
Bachelor degree den masters degree balala nung taküm 2021 küm parnok metsü (20) aser yaküm 2020 batch nung parnok 13 ta ajak senteper 33 graduate süogo. Nagaland Bible College, Principal Dr. Sentila Ao ajanga degree balala nung takok angur kaketshir nem kuli kaket agütsü.
Iba sentong nung Nagaland Higher & Technical Education, Tribal Affairs Minister, Temjen Imna Along-a shilem agitsü jaok saka koda masü tsükdakradang maparen kar adoka medentet, saka pai salem o tajung tezüluba nung bener yokba tesayur kati telok dang zünga metetdaktsü.
Sentong nung Tsüngrem osang abener Nagaland Christian Revival Church (NCRC) Missionary at Large, Dr. Imcha Jamir-i takok angur kaketshirtem dang Joseph-i Tsüngrem dak tamang yur bendanga agütsüba aser tila küma ajemalu ajanga timtem balala koktetba ama, Tsüngremer wadang balala nung noktakdang, nenok dak Tsüngremi mapa inyakba jungkai adokba meteta tenzüktsü asoshi tayongzükba agütsü.
Wadang balala inyakdang timtem toushi aser reshikangshi jenti ajurutsü, aji saka, nenoki itemji shisa kaa langzütettsüsa aser Tsüngremi shimer yokba nübu ka ama tajungtiba agi tenzüktsü, paisa kaketshirtem ajungshia liasü.
Nagaland Bible College (NBC) ya Asia Theological Association (ATA) nung züngokba college ka lir. NBC ya Mokokchung Town kübok Artang Ward nung amenoka lir. Iba college nung certificate of theology, diploma of ministry, bachelor of ministry (B. Min.), master of ministry, master of divinity (M. Div.), diploma of theology, bachelor of theology (B. Th.) course-tem agütsür. Iba riju nung züngnürtemi iba number +919436607340, Email: nbcmokokchung@gmail.com mesüra iba website:iicsmokokchung.com/nbc nung tongteprateptsü akok.
The Nokinketer 