Mokokchung Press Club-i May 6 nü lokti tebilemtsü khuret (social concern) ka ama Chuchuyimpang lushi nung aliba Fazl Ali College (FAC) semdanga yangji ketdangsüri anir tesayur aser kaketshir lenirtem den sensaksem tajung ka aka.
Iba sensaksem akaba mapang tesayur o kaketshir na tsüngda tesentaktep aser shisatsü sayuyim balala den college nung tawa tanü terenlok mapa inyakbatem aser ano tarutsü nung inyaktsüba mangdang akaba aser inyaka aoba mapang tsükdakradang ajurubatem kar angazüka liasü.
FAC ya Nagaland nung tejentiba college lir, ibai 1959 küm tenzük aser iba ya tenzükdang Aor kilen shia sen sarutepba par college otsü nung angur. FAC tenzüker küm 60 tema arudang iba college nungi lenmang balala nung nüngtugu nisung aika adokogo. Mapang ka iba college ya Naga nunger atema tongti kaket riju ka liasü. Akhi ama mesüaka tanüa kidanger district aika atema iba riju nungi kaket shisatsü angudak tzüpokdak tesem ka lir. Tajung kaji, FAC ya mezüng nungi sorkar senpong nungi dang masü saka mapa jenti nüburtemi saruteper aser tenla agüja yangerba college ka aser tanüa yamaji kija aser telok balalai iba college ajungtsü atema lenmang balala nungi teyari balala agüja nungitba riju ka lir.
Iba riju tenzüker küm 50 ajungba nüngtem national level nung college ka ta züngoktsü atema ‘accreditation’ jenjang atema meranga liasü aser tia junga Nagaland nung Govt. College rongnungbo mezüngbuba National Assessment and Accreditation Council (NAAC)-i 2009 kümto FAC nem ‘B’ Grade (Cumulative Grade Points Average 2.29) jenjang agütsü. Tanabena 2015 küm asadangba mapanga ‘B’ grade (CGPA 2.5) sa angu aser taküm 2021 ya NAAC ajanga tasembenbuba asadangtsüba küm lir. NAAC ajanga accreditation’ jenjang agütsüba college-tem küm 5 nung khen asadanger. NAAC-i aginüba ama tajungba kümer lira jenjang tajungba agütsür mesüra tamajungba kümer lira jenjang ajemtsür aser kanga mejungi alirtembo accreditation’ ji agienatoker. Aji NAAC inyakyim. Tang NAAC-i tasembuba asadangtsüba yabo tera balaka asütsü ta arentaka bilemer, kechiyong FAC purji NAAC-i aginüba ama nungdakba aika renema maliba angur aser college nung inyakertemia tera rataa bilemba ajiteter.
Ministry of Human Resource Development (Govt. of India) kübok Rashtriya Uchchatar Shiksha Abhiyan (RUSA) mapatong ajanga taoba mapang sen crore 3 arua 2018 küm FAC nung mapatong 2 inyak. Mapatong ka vocational nung amshi aser kaji college terenlok mapa nung amshi aser iba jagi Network Resource & Computer Centre ta sür ki asem amentepba ka asü. Iba kiji tsünglangba (basement) taktang dak alaka tanga temaba kitem (storey) anajibo mopung arudak kijiba (ventilation) maliba ajanga mamshiteti lir. RUSA ya higher education jenjang ajungkettsü atema state dangi yokba Centrally Sponsored Scheme (C.S.S.) ka lir.
Ano tanaben RUSA sentong küboksa 2019 küm college terenlok mapa inyaktsü atema sen crore 2 aru aser mezüngren (1st installment) jagi ki asütsü tenzükba tanü tashi merenemteter. Iba kiji süzük nung dang NAAC ajanga tuyubatem inyaka aotsü jenti kar, saka tang tashi kiji merenemteter aser yaktabo merenemtettsü ama angur.
RUSA nungi senji mezüngbo F.A.C Account-i ait saka ano kopi melii Department of Higher & Technical Engineering Wing dangi iba senji yokang (transfer asütsüla) ta order ka aru. Anungji, college-i iba senji Engineering Wing dangi transfer sütsü, ta osang tejangja ajanga kar angazüker. Iba senji Higher & Technical Engineering Wing dangi aobatsüba inyakyim tim asü masüar ajibo dept-i dang metet saka iba inyakyimjibo teti benshiba mapa ka masü ama bilemer.
Fazl Ali College nung junger ta reprangteteba kaji; Chuchuyimpang Village Council-i tang FAC campus nung Aor Arju ka yanglutsüdar. Iba Arju nungji akhi tsüraburi inyaka aruba teka mapa balala den otsüolem aser kentenmenü tapu balala aser Naga nunger sobaliba wazüka ayuba maparen jenti kaketshirtem nem angazükdaktsütsü nükjidong tulu lir.
Ano jangratemtsü rongnung kaji; alima kecha nunga maliba ka FAC nung lir, ibaji kechi ta süra, 2014 August nungi FAC nung Ao Oshi (MIL) agir. Ibaji tenzüker joko taküm August nungji tenet (7) abensatsü. FAC nung Ao Oshi Major/Honours subject ka ama agitettsüsa tang mapa teinyakdak lir, ta angazüker. Osang tajung kaji memunui FAC nung Ao Language translation centre ka lapoktsü achayangdar. Itemji lapokba ajanga Ao kaketkeno aser oshioben renlokba den lenla aisü nung tajangzüktsü angutsü imlar. Idenji FAC library nung Ao Literature section balaka ka tenzüktsü atema Mokokchung Village Council-i sen tenla tulu agütsüba angazüker.
Iba den FAC atema nisung kari tenla agüja tangji solar light 10 KW inokdar, student database den office management system aser learning management system-tem digitalization kümdaktsütsü inyakdar, library computerized asütsü maparen tenzükogo, yakta Botanical Garden ka tenzüktsü aser Digital Auditing Vide Tally Software amenoktsü. Tawa to Principal’s chamber, visitor’s lounge, H.A Chamber, Accounts & Establishment room tasen renemogo aser ano college nungji terenlok maparen tapu jenti inyaka aoba angur. FAC ya tarutsü nungbo course tapu balala agütsüba multidisciplinary institute ka kümdaktsütsü nükla lir aser jokola iba atema maparen tenzükatokogo aser iba mangdang nungji nübur nungi lenla balala nung teyaritep akhanger.
The Nokinketer 