Nagaland PWD Housing & Mechanical Minister, Tongpang Ozüküm-i May 7 nü Longmisa yimdak pa tsüngtong marui online (virtual) ajanga dang ‘Circular Road’ ka lapoktsüogo. Iba Circular Road-ji Longmisa süngküm nungi par yim ground tashi lir aser ibaji kilometre ka shi asütsü. Iba lenmang ya SRDP kübok 2020-21 kümsük atema aruba sen nungi yangluba lir.
Tanü Minister Tongpang Ozüküm-i iba lenmang lapokja jembidang, tsüngtong marui virtual yimya nung Longmisa yimdak sentong nung adenbaji pa atema mezüngbuba aser otsüsütsü ka asütsü, ta ashi. Kanga dang nüngdaka aliba iba circular lenmang renemtetba asoshi iba mapa achayanger den yimertem aser Longmisa Independent Party ajak dang meranga inyakba asoshi pelaba lemsatep.
Iba lenmang yanglutsü atema Nagaland Chief Minister, Neiphiu Rio-i Special Road Development Program (SRDP) sentong kübok senotsü teyari agütsüba asoshia pa dang pelaba metetdaktsü.
PDA yimyim “temelenshi arudar” ta asüba nung ajemdaker Nagaland tesem balala nung temelenshi balaka atalokdaki, yamaji iba lenmang yaa PDA yimyim ama inyakba maparen ka lir, ta ashi. Longmisa ya yim tulu, yamaji teinyaktsüjia jenti dang lir, saka mapa ajakji khenyongibo meinyakmatsü, anungji, nüngdakbatemji asenoki ka khen ka khen ta inyakyonga odi, ta paisa shisem.
Iba sentong nung Longmisa Village Council Chairman, Yashiemba Jamir-i mapang tatsüka agia jembidang, iba lenmang ya yimertem atema tongtibang aser kanga dang nungdakba ka liasü, sorkari agütsüba sen agi meperi Minister Tongpang Ozüküm-i sen inoksemer iba lenmang tajungtiba renemtsüba asoshi par kibong dang pelaba metetdaktsü.
Iba sentong nung Pangerzülu Jamir menden liasü. 24 Angetyongpang A/C Independent Party President – Nungshimangyang Ozüküm, Independent Party Longmisa Unit President – Nungshikaba Jamir, Longmisa Baptist Arogo Secretary – Sentitemjen Pongen aser yimsüsür – Nokentemjen Pongen parnokia sentong nung shilem balala agia liasü.
(Source: Tir Yimyim)
The Nokinketer 