AROGO ASER LAISHIR-I YAMAI CLEAN ELECTION NUNG SHILEM AGIDAKTSÜNÜR

~ Ms. Esther (Osang zülur)

Tanü alima tensa tia bilemdanga nübur yimjung nung melitetba  ya asadanga shisa lemsatepba Yanglushidi Sensaksem Sabang (YSS) WhatsApp group ajanga ayongba shisatokden sensaksem koba Rongchii (April) 30^th 2021 aonung mapang 7:00 pm nungi tenzüka Zoom ajanga kaogo aser iba sentong nung o jembirtem WB. I. MEYIONEN JAMIR, Recipient of Governor’s Gold Medal (Meritorious Service) Inspector General of Police & Director (RTD) Nagaland Lokayukta aser DR. T. JAMEDI LONGKUMER, Gold Medalist, Master of Arts (Philosophy) Assistant Professor, Government College, Dimapur, Editor, E.W. Clark Ao-English Dictionary (2013). Achaayangertem: Rev. L. Lima Jamir, Dimapur & Rev. Aowabang Ozükum, Guwahati,liasü Iba sentong nung o jembirtemi jembiba sülen lokti sensaksem mapanga agia liasü aser item onük tongtibang kar yamai zülur:

Tanü arogoi Clean Election khuret bena lemsatepba mapang ka nung joko State Assembly election ana (2013 & 2018) mapang iba wadang kanga meranga arogo, laishir aser nüburtemi inyakogo aser nisung aikati Clean Election Campaign (CEC) ajanga election nung temelenshi bener aruba aser takok anguba indang jembir, saka Clean election activities aika conduct asü aser sensaksem/mensem jenti ayong saka tatem nungbo akhi tejen yimya nungdang nüburtemi vote agütsü. Shirnoki rongsen teimba indoka nüburtem vote alizük, shirnoki bangdak tashi teyari/support, sen aser kidong/yim/tsükong politics ajanga ngutet parnoki election nung takok angu. Seminar, workshop, interaction aser social media ajanga Naga nunger aikati clean election indang angashia metetogo südi saka metetbaji implement mesütet aser mapa küma meinyaktet. Theoretical knowledge metetba kisüngjibo amajok, implement mesütetba aser mamshitetba tashitemetet jibo tajangzük mali.

Tanü asen tendak: vote sen agi ayoker, mapa agütsütsü nangzükteper, temesepba yi jemteper, camp lapoker chiyongtepa kazüteper, senso candidate shimer, yimsüsür alizüker, senso candidate support masüba atema yimtsüngi maitdaktsür, yimtak nungi aridoker, senso nungi jentoker, vote magütsüdaktsür, voters slip malemer/rakzüka ayur, proxy vote agütsür, nisung teshimtet kari dang vote agütsür, booth capturing mapa inyaker, tashiyim mapa inyakteper, nisung tepseter. Tetemsü ochishir candidate doktsür candidate shibai sen teimba agütsür iba candidatejidang shimer. Ano ibala mesükba tamajung mapa jenti inyaker. Item ya India temzüngi memelaba dang masü, temenen mapa aser Lai tesayuba anema ta angatetdi.

Clean Election dak sendakba nung NBCC, ABAM aser Langpangkong Kaketshir Mungdangi mapa jenti inyaka arudagi aser Aor yimtsüng aika nung tetsürtemi kanga meranga yi meitba/apuba mapa küm aika inyaka arudar. Ajisaka tamajungba dang akümer. Lai tejangja mesayuba agi asü? Aroka shisadangtsü mapang ka.

Item memerükba mapa tamajung anema Arogoi aser talisa Laishiri tim shilem magi odang ajia toktsütsü masü saka Tsüngrem tsüngdang temenen tongpang nung noktaker ama shilem agitsü aji kanga tongtibang.  Election dak sendakba mapa tamajung tamangertemi maneni inyakba jagi arogo tamakok sayur. Asen lokti nung temenen tongpang tulutibaji iba ya ka asütsü, kodang tamanger ka ama asenoki ochi jembitsü? Arogo aser Laishiri anir mapusora ano shiba dak yimlatsü? South African political liberation nung Theologian Bishop Desmond Tutu ama, shibai Nobel Peace Prize angu, ano America nunger Baptist Pastor Martin Luther King Jr. ama alima aser nübur temeden asoshi noktakba (Civil Rights Movement), teyanglushir ka ama asenok rongnung arogo nung tenzükertem talisa toklang tenzüker aser Laishirtemi shilem tajung agitettsübaji kanga dang tongtibang lir.

Otsüla-obula nunger par putu yimli yimsüsüba menden asoshi nübo shimtetba yimya nung kanga dang asüngteta inyaka aru. Rongsen agi yimsüsüba menden alizükba sobaliba khenyongi mali asü. Sen yong parnoki par principle yoka achiba mangashi. Anungji asen tsüraburtem ochishiba tanela senmang amangtsü tanü nungdaker

Akhi arogo sentsüwangshia meren-merena nübur ajaki akhümtsübua, asüngteta, tashi angaa alibato samaogo, nüburtem arogoi soita aliba (arogo grip) to melie kümogo. Tsüngrem tenzükeri anir Arogo menden nung alirtemi alima yimsüsür (politician) yim asüba agi asü? tenla tenji aginüdang par küboki yiadok asü? Nisung shia pei nungdak ataloknüdang arogo dang nungi yimsüsürji tuluba kümdaktsü asü? Arogoji Ochi represent asüba telok lir. Asenok lokti nung teyimlatsü ajak agi Arogoji süra, Arogo nungi tenzüka nüburi aser talisa tamangertemi tamang katettsüsa Ochiba dangi khen meyipdi. Iba ya Arogo aser Laishirtemi ret-reta agitsüla. Naga nunger tamanger jenjang jagi Arogo aser Laishirtem noksa sayur ta angatettsüla.

Tanü asen Aor yimtsüngtem nung Census figure aser Electoral Rollji yimtak malir teimba lir, RD household aser Administration nem House Tax agütsüba kilen balala, Job Card holdersji shitakba yimtak telidak pur dang nungi kanga agi teimba lir. Yimtak inflated figure paikaji koba agitsü? Item inyakyim ajak election dak sendaka lir. Alima temoatsü aginüdang koda Tsüngrem tsüngdang aibelener? Alima temoatsü dang nungi Tsüngrem temoatsüji tuluba ta tamanger shia nem angatetdaktsütsüji Arogo aser Laishir teinyaktsütem lir.

Asen lokti joko sen dak dang ranglokba lokti aser senji dang ajak aser tsüngrem tulutiba kümdaktsüogo. Ochishir, tangateter, shia meteter, nübur meimba nübu talang aser tetemsü süaka pa/la sen maliji madoktsü ta asenoki jembi tashi nung kodanga nisung tetemsü shingaia temulung ulua electioni maitsü. ‘Everything is politics but politics is not everything’ ta teti jembir. Anungji iba principle nung ajemdaker shinga anema masü, shinga tsütsü masü saka nübur ajungtsü asoshi Arogoi anir Election merüka agiba nung tongti shilem agitsü tangatetba lidaktsüner aser iba ajanga dang Clean election bener arutettsü. Lai nung Theological Perspectives on economics-ji tejangja angutsü. Tat. agi., Manna economy (Mat.6:25-34), theology of contentment (Phil.4:11; Heb.13:5); Love of money as the root of all evil (I Tim.6:10). Ibala mesükba nungi Laishirtemi tamangertem nem tangatetba agütsüdaktsüner.

Naga nunger candidatestemi election nung sen indokba indang Kohima based organization YouthNet-i parnok post-election study ajanga yamai ngutet:  Rs. 570 crore (2008 Assembly election), Rs 938 crore (2013 Assembly election), Rs 1061 crore (2018 Assembly election). Election Commission report nung zülua aliba agi Nagaland State Assembly election 2018 nung total votes 9,96,170 agütsü, anungji vote ka jenjangji approximately Rs 10,650 atoker. India lima nung election sen indokba aser vote ratio bushidangra Nagalandji teimtiba asütsü südi.

Clean election magitettsüsa nokdangba factorji senso/identity politics or self-centered politics lir. Asenok Naga nunger-i clan/village candidate nominate asüba aser yim bangdak tashi amshia yimer vote ajak iba candidate nem agütsüba ajanga democracy tamendakdak (foundation) raksatsür aser linük/nübur meimba lenisüba madoker. Saka Naga nungertemi senso/identity basis nung dang aiben asen representative shimtsü meranger aser yamaji kinunger, kidong, yimer, tsükong, tribe yamala mesükba nung shimer.

Naga lima nung Election merüka agitsü atema item teraksa inyakyim – Sen aser Senso – anaji indoktsü ajaki bangjema mulungtettsüla. Nisung ka-anati clean election agenda nung contest asütsü merangba ajanga Naga election culture memelenshitsü. Temelenshi bener arutsü atema nüburtem mindset melenshitsü nungdak aser arok ‘social consensus’ ajanga temerük inyakyim akanga renemtsüla. Iba temelenshi bener aruba nung Arogo aser Laishiri mapa tulu aser tongtipang inyaktsü lir.  

Mizoram nung clean election maparen takok ngua inyaka aruba indang kodang reprangdangdir, Mizoram nung Clean Election takok anguba otsü asenok ajaki meteta lir. Mizoram nung 2008 Assembly polls nungi tenzüka tanü tashi Mizo Arogo aser Laishir lenisüba nung clean election agia arudagi.

Rev. Lalbiakmawia, Mizo People’s Forum Mendenbuba, pai Mizoram clean election genesis indang media interview ka nung yamai ashiba agi onoki 2008 Assembly Election temulungjang nung yur 2006 küm The Mizo People’s Forum tenzük aser onoki nüburtem shirnokisa Mizoram nung yimjung maneni lidaktsüner item nisungtem aser parnok teyaritepji bushia inyaka liasü. Aser Political Party-temi aser nüburtemi ibaji angateta yang nungi temelenshi ka arutsü ta pela agizük.

Mizoram election nung sen (money) aser tashiyim (force) onsara amshiba nokdangtsü atema Mizo People’s Forum (MPF) tenzük aser Mizoram nung election merüka agitsü atema mapadong ajak iba bangdak-i anir inyaker.

MPF-i Mizoram nung election mapang political parties aser candidates ajak atema ‘level-playing ground’ yanglua yutsür aser item temzüng/ozüng tashi anga nüburtemi election nung shilem agir. MPFji official election watchdog (election commission ama) ka masü sür nung political parties aser nüburtemi kechiba akhümtsübua iba Forum-i ashi anga anidaker? Iba telangzübaji senior reporter kati Mizo daily newspaper ka nung yamai agütsü, “Apart from the fact that Church plays a big role in our Mizo society, the civil society groups are also respected a lot. They are considered to be the moral drivers of our society…so political parties cannot deny them easily, particularly not during an election.” Mizo Arogo aser lokti lenirtemji par lokti asoshi moral compass (libaliro lensayur) ama Mizo nungertemi agizüker – kechiyong parnoki par Arogo aser Civil Society jagi par nübur aser lima ajungtsü aser terenlok atema dang kechiserina mapa ajak inyaker ta metet aser yamaji temulung lemtettsüsa kuli ngua lir (Trust-capital in religious and social institutions is already present/cultivated).         

Mizoram Arogo aser Laishir lenisüba nung clean election takok ngua inyakba ama Naga lima nunga takok angutsü atema itemi nungdak ta bilemer:

Arogo aser Laishir lenisübaji nüburtemi agizüktettsüsa aser temulung lemtettsüsa asütsüla.

NBCC/ABAM-i ayongba clean election campaign principles aser practices-ji nüburtemi tamang katettsüsa asütsüla, aser Khrista ochiba, temeshiba, tekümtet, yimjung, temeim, temulung lemtetba, ajemaluba, tazüokba, tashi aser shisatsü nüburtemi ngutettsüsa inyaktsüla.  Efesa 6 nung zülua aliba ama, abensa asen Arogoi aser Laishiri subotsü subo nung dang CEC wadang jeta takok ngua inyaktettsü.

Aor lokti ameta lenirtemi Election merüka agitsü telemtetba agitsüla. Aser ibala ama ‘social contract’ (arok lokti telemtetba) ka meyanglu nungbo temelenshi bener arutsü makoktsü. Meimchir mulungjang nung temenen tera alibaji atsüteta indoktsü mulungtet nungdang tajung inyaktsü lemang lapoktsü. Iba ‘tekümtet’ mozüji Arogo aser Lashirtemi Temeshi Laishiba nungi Tanela Temeshi leniba aser tashi nung nüburtem nem agütsütsüla. Kodang civil societies, political parties aser nüburtemi (general public) election agiba yimya merüktettsüla ta angateta iba mapa nung shilem agitsü (participate) mulunga kümdir idangjiang clean election campaign takok angutsü.  

Mizo People’s Forum ama clean election maparen/agenda implement süa monitoring mapa inyaktsü atema organized body ka tentettsü nungdaker.

Mizoram nung CEC takok anguba tongtibang reasonji Arogoi nungita yariba Mizo People’s Forum-i ochi/upright aser tebendang maliba/impartial leadership agütsüba ajanga lir. Mizo Arogo lenirtemji nüburtemi akhümtsübur kechiyong parnoki Tsüngrem tsübur aser Temeshi Laishiba tesayuba ama taküm alir, anungjiang Mizo Arogo ajanga koba alima teraksa asoshi rarar yangji rongsen akar aser tongtibang nisungtemia akümtsübua agizüker.

CEC Achaayangba bangdak tamendakdak kar alitsü nundaker aser itemji yamai asütsü akok:

• Arogo Mungdang ajanga iba CEC bangdak tentettsü.
• Iba bangdak-i political parties aser stakeholders ajak den sensaksema/consultation agia election related ground rules and regulations latettsü aser ajak asoshi election tokteptsü atema kasa inyakyim lateta yutsütsü (create a level playing ground for all candidates and parties without any partiality or preference).
• CEC bangdak-i political parties ajak den equi-distance maintain asütsü aser shinga anema mesüra support süa meinyaktsü aser mejembitsü (The clean election campaign must not support or voice out against any party).
• CEC bangdakji principle-grounded initiative ka asütsü – election nung tashiyim aser sen amshiba anema noktakba people’s movement ka asütsü (Rejection of violence, threat, identity-politics and inducement).
• CEC-ji Democracy tongshi ‘honest and fair election’ (ochi aser liromedem election) Naga lima nung meraketa akangakanga tentetdaktsütsü merangba bangdak ka asütsü. Linük senso (citizen) shirnoksa election nung shilem agitsü temsüa ali (voter mesüra candidate ama) parnok ajak kecha tetsübu aser tenokdangba mali-i pei shisa tajung amshia (through informed personal choice) shilem agitettsübaji CEC nükjidong asütsüla.

Arogo tenzükertem, Laishirtem ano temulunger kija shiai item ya nangzüktet nungbo kanga ajungtsü: 

1. Party aser candidate ajak matsüngdang kasa litetba,
2. Election dak sentakba nung shinga nungia teyari kecha magizüktsü,
3. Tenoktangba liaka-meliaka kü meyong vote-bo nisa agütsütsü,
4. Ochi aser tesünep nung election agitsü atema nüngdakba nübu tenlatsü,
5. Ochi aser tesünep nung election agitsü atema teti sarasademtsü,
6. Item teinyaktsü temulungtetba sayua küm ka jilia par kima nisan temesüng songa ayutsü.

Polling day-nü mesüra matongdang kongsa tashiyim mapatem adokdir Arogo nung lenirtemi aser Laishirtemi par kima songa aliba nisan temesüngji atsüteta bener timtem adokdak tesem jagi oa, Lai zünga, ken tena sarasadema aser sayutsüngia jajadaktsüner.

Party worker-tem mesüra supporter-tem matsüngdang parnok tim masüba mapatem anema Arogo aser Laishirtem lokti aser kijaia mapang nung pei tamang sayuteta Yisu Khrista tenüng nung tasü ita ola adokdaktsüner.

ABAM-i Aoer candidate ajak jar  mensem akadang candidate shia nem yamai nangzükdaktsütsüla: Ni election nung takok angutsü atema Tsüngremi mulungba dang inyaktsü, anungji ni:

1. kü opposition candidate(s) anema tim mesüi meinyaktsü,
2. yi mamshitsü
3. sen mamshitsü aser
4. injang, bomb mamshitsü.

Iba kübok candidate aser party tenüng zülur sign südaktsütsüla.

Kodang election campaign tatsükba tatsükba kümdir aser petsaprong tenzükdir, Arogo tenzükertem aser Laishirtemi yimtong süa procession aotsü. Iba mapang nung placard aser slogan item mesükba  “Yimden yimsürji Tsüngremi dang shimteter,” “Tsüngrem tsübuba lenir dang shimtsüla”, “Tsüngrem atakatem tsübudi” ta asüba amalatem amshitsü akok.

Election Commission anema, alima temzüng ozüngi melaba anema inyakbatemji tuteta sayutsüba Arogo aser Laishirtem mapaji asütsüla. Kokra 2022 tetenzüklen Ao Arogotem nung ABAMi anir  Election dak sendakba sentep ka dang masü, saka Sermon Series asemben-pezüben sentep nung amangbapur nem tangatetba agütsütsü asoshi sendong atonga agitsübaji tongtibang lir.

Tanü Election koda junga, merüka agitettsü iba indang jembir. Aji saka Arogoi iba kija dak rangloker mapa inyakra ajibo kodanga tabensa masütsü. Anogo shia tamanger ka libaliruba nung ochi, temerük, jakla, yimya yimpong, asüngteta litetba, tatishitsü taküm khuli sayutetba tamanger ayaktem mali tashi tebilemtsü lir. Sannükertemi aser Tsüngrem tenzükertemi pei santem mesütsü nungloktsüba mamatsüla, santem tenüng teta metettsüla, santem kong samadar metettsüla. Nütsüng nübur dang Tsüngrem O teratet sayutsüla. Aser züzüa sarasadem mesüi masü saka tenela nung nüktsü yima prokang. Arogo ta asüba nung ajak dena lir. Tamangertem tamakok asoshi asenok ajaki sarasadema bilemdanger tajungtiba inyaktsü Tsüngrem nungi tangatetba shisatsü meshidi.

Clean Election Campaign-ji asenok Aortemi Naga nunger lenmang tasen kati anir aotsü maongka tulu ka asen madang Tsüngremi yutsüa lir ama bilemer. Küm 150 tejaklen asen kin-i tamangba aser shisaliok lenmang tasen mesemteta tasü ita Naga kin ajak anir apusoba ama, tanü asen jakdang iba kasa lenisüba mapa election wadang nung inyaktsü anüngdaka lir. ABAM 150th anniversary 2022 küm amungtsü aser 2023 küm State Assembly election agitsü – iba election-ji Mokokchung district nung Clean Election principle nung agitetra koda tesüngmangtsü aser jangratemtsü ka asütsü!