Imkongliba Memorial District Hospital (IMDH) Mokokchung nunga PSA oxygen plant amenoktsü asoshi maparen tenzükogo aser anogo ishika tsüngda nung renemtsü, ta Mokokchung CMO, Dr. Chubala Aier-i May 15 nü osangbenertem den CMO office nung jembidang metetdaktsü. Iba plant ya PM Cares Fund kübok aruba lir, ta angazüker.
PSA Oxygen Plant (Model: Medo 12.5) dak sentakba kol ajak Mokokchung tonga aruogo aser mapa tenzükogo, anogo 1/2 tsüngda nung machine jibo amenoktettsü. Iba kol capacity-ji 200 LPM (liter per minute) lir aser iba ya yipden 50 tashi nung amshitettsü, ta CMO-isa ashi.
Iba plant nung oxygen-ji refill mesütettsü saka yangi nungi indangindanga dang yipden shia jagi atsür aotsü kechiyong ibai direct system lir, ta Mokokchung CMO-i jangjashitsü. Ano Mokokchung atema talila 50 point arutsü lir, ta osang angazüker.
Iba kol ya amenoker külen ang, yiden 50 (50 point) atemaji yangi nungi atsür aotsü aser ano oxygen-ji ajung-majung (quality) tendangtsü atema Delhi-i bener yoktsü aser yang nung jagi osang tejangja ka arur külen ang iba ya mapa küma amshitettsü, aji oda, Delhi nungi osang arutsüba maparenji hopta ka shi agir, ta Absstem Technologies nungi arur Installation commission, Gurmed-i iba osangbener den jembidang metetdaktsü.
(Source: Tir Yimyim)
The Nokinketer 