Yanglushidi Sensaksem Sabang (YSS) nung züngsem asüba maongka ya-a ulura ta alinung ano onük jembitsü yimli agütsü nung pelashishia agüja aliba onük nung bilemdangtsü asoshi olen kar lemsateper. Agüja aliba onükji asen nüburi kanga sabuba onük aser maparen ka lir. Asen nüburtemi arogo meimba, arogo tenzükba nung shilem aginüba, arogo tenyaba aser tenzükba asoshi tenla tajung agütsüba, arogo den sendakba tentet ABAM, AIM, CTC, yamala aika, mulungsoa nungitba angudang kanga pelar aser Tsüngrem tenüng asanger. Anungji item nübu, shisatsü, tangatetba, sempet, aser rongsen timi ketdangsüa Tsüngrem sentsüwangshi, nüburtem tekümtet, tajangzük aser alima rangpen yimjung aser tesünep asoshi ketdang asütsü asoshi asenok ajak khuret lir.

Arogo  

 

Khrista Yisu ajanga Tsüngremi jatetba nüburtem dangji ekklesia ta Tasen Lai nung shi lir (Mati 16:17; 18:17; T. Mapa 5:11; 7:38; 8:1, 3; Rom 16, 1,4,5, 16, 23; 1 Korint 1:2; 4:17). Iba ya Greek aser Rom yimden yimli aser sobaliba nung amshiba ojang ka Tasen Lai zülurtemi apuzüka amshiba lir. Greek aser Rom yimden yimli lokti tentet nung ekklesia, English nung assembly, koba nung tetsürtem, lanurtem, tanurtem, ainer, sensaker, lemtalutar metendaktsü, saka tebur senso, takar aser tashitemetetertem dang züngok. Anungji Greek aser Rom nungeri ekklesia ta ajaba dang nungi Tasen Lai nung ekklesia ta amshiba tetezü aser tangatebaji kenyong balala lir. Tasen Lai nungbo ekklesia ta asüba nungji Yisu tenüng nung amanga tzü nung tzüsenertem ajak tetsür, tebur, tanur, tain, takar, sensaker, bendanger, alar, kilir, semloka alir, matamapensar, lemtalutar, Yihuda nunger, Samari nunger, Greek nunger, Rom nunger oda kin, kidong, oshioben balala ajak züngok. Aser parnok ajak saku aser kasa maongka aser yimli, tim temeten, agütsü. Anungji arogo, koba dang Lai nung ekklesia ta aja ibaji Greek aser Rom yimli nung ekklesia dang nungi kanga tepila tulu lir. Tasen Lai nung ekklesiaji radical democratic assembly of equals lir.

 

Pauli Galatia 3:27-28 nung ashiba ama, “Kechiyong nenok shirsa Khrista nung baptiogo, nenok Khrista dak sübuogo. Yihuda nungera masü, Grik nungera masü, alara masü, nüjia masü, tebura masü, tetsüra masü, kechiyong nenok ajak Khrista Yisu nung ka dang lir. Aser nenok Khrista nung ka dang lir. Aser nenok Khrista nübur süra ajangla nenok Abraham semchirtem lir aser tenangzükba amato nenok senmangertem lir.”

 

Ano Tasen Lai nung kanga sapua amshiba kaji arogoji nisung temang (body) ka den medamdanga lir. Kechi koda temang nung tenüktelen balala Tsüngremi shimteta ayu yamaji arogo nung tenüktelen ajakji Pai shimtet (1 Korint 12:1-31). Mezüng Korint 12 nung “temang” ta aiben shia lir aser iba jagi amangbapurtemji organically sendaktepa lir ta sayur. Yangi tekolakji (12:21) tanga temang shilem den tuluba mesüra temaba masü saka tanga temang shilem den saku aser ajakji kati ka dak metaloka lir (interdependent) ta sayur.

Ano arogoji “Khrista Temang” ta shia lir (Kol 1:18, 24; Eph 4:12; 5:23). Tetezü arogoji tenüktelen balala aika agi aküm aser shilem shiaji tongtibang maparen lir, aser maneni anir (Eph 4:12-16). Khristaji iba temang kümzüksang/tekümzüker aser temang nungji pa tekolak lir (Eph 1:22-23). Khristaji amangbapur shia madak tekolak aser Kibur lir aser arogo, ekklesiajipa temang lir. Khristantemji Khrista mang lir (Rom 12:4, 5; 1 Cor 6:15; 10:16, 17; 11:27; 12:12, 27).

Arogo nung Tenzükba Mapa

1. Tenzükba Mapa nung Khrista Tatishitsü

Arogo nung tenzükba mapa nung mezüngbuba nükmenji Yisu Khrista taküm lir. Pai kechi mapa inyak aser koma inyak yangji tenzükba mapaji amendaka lir. Arogo nung mapa tulu aser aika inyakaka Pa dak nungi pila ora ibaji meimchir sangrasangji tenzükba mapa ka dang asütsü. Yisu taküm aser pa jaklaliruji arogo, ekklesia tenzükba mapa asoshi tatishitsü tuluba aser tematiba lir. Arogo nung tenzükba, lenisüba, temeim mapa inyakba, teyari agütsüba, taneptsü mapa inyakba ano yamala aika, ajakji Yisui inyakba ama inyaktsüla. Iba ya angatettsü asoshi Mark 10:45 nung Yisui ashiba oji kanga tongtipang lir. Pai ashi, “atangji Nisung Chir-a sünga pei tenzükdaktsütsü atama masü, saka tenzüktsü aser aika alang pei taküm agütsütsü aru.”

Iba yagi Yisui sayuba aser mulungba tenzükba mapaji Yihuda nunger, Greek nunger aser Rom nunger yimsüsürtem, lenirtemi inyakba dang nungi kanga balala aser tepila lir ta sayur. Yisui kilir aser alar ka ama nütsüngtem tetsüng shidoktsüba jagi pa tenzükba mapaji kilir aser alar mapa ama lir ta tatishitsü sayuba lir. Iba ya pa sülen anidakertem ajaki iba amaji inyaktsü asoshi tatishitsü ka doktsüba lir (Yohan 13:14-15). Arogo nung kechi tenzükba mapa südir süaka iba tatishitsü nungi mepilatsüla.

Arogo nung tenyaba mapa, putir mapa aser tenzükba mapa (the threefold ministry of the ekklesia: apostolate, priesthood and servanthood/diaconate) ajakji Yisui tenyar ka ama, putir ka ama, aser kilir ka ama tenzükba mapa nung amendaka lir.

Temeim agi anebalua sama-a aliba santem kümzükba aser lenmang aibelena aoba santem tim lenmangi anir arua santem müsüba aser anükba, tenzükba mapa sayutsü asoshi Yisui pa sannüker tajung ta atishia sayu. Yisuji sannüker tulubaji lir (Ibri 13:20; Yohan 10:1-18). Paji Sannüker tongtibaji lir (1 Peter 5:4).

Arogo nung tenzükba mapaji kiliri tenzükba mapa ama lir kechiyong Yisui kilir ka ama tenzük (Mark 10:45; Lk 22:27; Yohan 13:1-11, 14ff.; Filipi 2:7). Khrista mang ama arogoi Yisui kechi inyak iba amaji maneni inyaktsüla aser lenisüba aser tenzükba ajak nung Yisu jakla ajizüka inyaktsüla. Tenzükba mapaji (diaconia) alar mapa lir. Pauli pa tenzükba mapaji alar mapa amai anagatet. Anungji pa ‘Khrista Yisu lar’ ta aiben zülu (Rom 1:1; Gal 1:10; Filipi 1:1; Tit 1:1). Arogo nung tenzükba mapaji kilir aser alar mapa ta kodang angateter iba nungji konang, tetoshi, tenügsang doktsür; pei taküm, rongsen, sempet, mapang ajak tenla agüja Khristai timtem toushi ajuruba ama  tenzüktsü akhanger (Mark 10:38; Kolosi 1:24; Filipi 3:10). Iba kilir aser alar ama tenzükba mapa inyakba jagi ochimashi mapa, tashiyim inyakyim, tangar ajemoka yutsüba yamala temenen mapatem anema Tsüngrem tenüng nung takutsüng adoka nokdakba lir. Ibaji ajanga temeim, yimjung, tesünep, ajak asoshi saku temeten, aser ochiba yimli aser lensisüba bener arur.

• Alima Yimden Yimli Yimya aser Inyakyim agi Arogo nung Tenzükba Mapa Amoksepba

Tenyartem sülen arogoji tebuteditem mesüra tamburtem, elders or presbyters, ketdangsüba küboki aru. Parnok dangji episcopoi, overseers, ta aja. Tebilem nung elders aser bishops ya kasa khuret abenba aser tenzükba asoshi amshi. T. Mapa 20:28 nung tamburtem episcopoi or overseers mapa inyaktsü asoshi ashir. Ao nung ‘sannükertem’ ta amshia lir. Tenyar Peteri paji tangar tamburtem den saku ta züngshi (sumpresbuteros, ‘külem tambur ka’ 1 Pet 5:1). Pauli Tita dang arogo nung tamburtem, presbuterous shimtsü mela (Tit 1:5). Tanabuba aser tasembuba Yohan shiti zülur jagi paji tambur ka ta ajar, presbuteros (2 Jn 1; 3 Jn 1). Item yagi sayur Tasen Lai mapang tashi nung presbyter/elder aser episcopos or bishop kasa jenjang nung liasü.

Iba sülen küm noklang anabuba nungang arogo nung tenzükba mapa nung monarchical episcopate, i.e., the rule of one bishop, adok. Iba nungi tenzüka episcopos aser elders na tetsüngda tepila jangja jangja lemdang. Antioch nung Bishop Ignatius-i (c. 50-110) bishop kati dang arogo nung tashi aser tenzükba mapa inyakyim indang zülusema angur.

Arogo nung monarchical bishop ka jagi tangar tamburtem, elders, aser deacons madak tashi amshi. Yamaji arogo tenzükba menden ana, two-tiered ministry, i.e., presbyter/bishop and deacon nungi menden asem tentet, the three-tiered ministry, i.e., bishop, presbyter and deacon.

Arogo nung tekolak ka nem dang, i.e., one bishop aser Pope, tashi aser yimli ajak agütsüba inyakyim koda tentet ajak jembitsü mapang mali. Saka koda Yisui kilir tatishitsü nung tenzükba mapa tenteta doktsüba nungi aser arogo nung züngsem ajak saku ‘radical democratic assembly of equals of all believers’ nungi pilaba aser tenzükba mapa nung nisung ishikati dang tashi aser yimli amshiba ajanga arogo tenzükba mapa nung kechi teraksa bener aru iba indang onük kar shisemdi.

i). Iba ya ajanga arogo nung tenzükba mapa nung tenzüker ka dang temaba aser tongtipangba tarensen bener aru. The transformation of the ministerial structure into a predominantly hierarchical structure with higher and lower positions as on a ladder. Iba ama inyakyim nung nütsüng nüburtem, tetsürtem, tilartem, aenertem, sensakertem, kilirtem, aser alartem takidak maka kümdaktsü.

ii). Ka dang temaba aser tongti tatongsen jagi arogo nung Yisu Khristai sayuba tatishitsü kilir ama tenzükba mapa samadaktsü.

iii). Arogo nung kilir ama tenzükbaji teti asoshi konang ka ama masü saka khen atema dang; nai khen tila kümra na yakta temaba jenjangi atutsü ta sayu. The diaconate as the essential character of church ministry was reduced to a mere stepping stone in the ascent of a minister to the higher dignity in the hierarchy.

iv). Küm noklang asembuba nungbo arogo nung menden asem the three-tiered ministry, i.e., bishop, presbyter and deacon, tetsüngda tepila kanga sashia aküm. Anungji putir aser nübur tsüngda tepila tulu aküm. Iba tensa nung arogo tenzükertem shirnok tongti tatongsen menden nung züngsem parnok dang sacredos, ‘priest’ ta ajatsü tenzük.

v). Kodang arogo nung tenzükbaji tongti tatongsenren ka amai aküm, kilir ama tila kümer tanger küboki ia ajemalua tenzükbaji mezüngmeshi mapa ka ama bilem aser ajaki tuluba aser temaba jenjang atongtsü dang raktep.

vi). Oda oda makamaitertem aser tepetzük tia nung alirtem arogo tenzükba menden nung anioktsüji doktsür parnok yaritsü aser par khuret arogoi abentsü anenadok.

vii). Oda oda deacon, tenzükba mapa, i.e., the diaconate as a permanent form of ministry became superfluous in the ministerial structure of the church. Tangbo arogoji mapa, job, employment, white colour job angudak ang küma odar. Asenok tendak aiben deaconji kilir masü kibur ama akümer.

• Arogo Tenzükba Mapa aser Ainker Ola

Arogoji Tsüngremi Khrista Yisu nung jatetba purtem lir. Anungji arogo tenzükba mapa nung alimai ashiba aser aniba ama masü saka Tsüngremi ashiba angatsü tongtibangba lir. Arogoi Tsüngremi ashiba angatsüba dang masü saka Tsüngremi alima dang kechi ashir ibaji ochishia aser jangja jangja ayimoktsütsüla. Arogo ola ainkar ola ama yoktsü asoshi mezüngbuba nung arogo nung ochimashi ajak samadaktsütsüla. Iba nung Sannüketem/toklang tenzükertem aser Khrista nem bendanga agütsüba nütsüng nüburtem ajak tamang aser sarasadem agi nangri khanger Tsüngremer raraba sobutsü ajak sobutsüla (Eph 6:11). Tajemrepa nüburtem aser tepetzüktipa tia nung alirtem dangi aotsüla aser Khrista nung Tsüngrem osang tajung ashiba den külemi parnok ola angaa kechi ochi mashiba aser tim masüba agi temenen talenba nung asenok alir item anema parnok den külemi tamang agi raratsüla.

*****