~Ms. Sashikümla Longkümer

~Ms. Sashikümla Longkümer

Tebilemtsü onük

Tejak o tejak na nguyotepa sayutsü aser angazükteptsübo doktsür nisung ana danga sadoka majurutetba, mejembitetba tekangshi mapang, saka tanübo media balala ajanga shisaluyim balala agütsüba aser angazükba mapang tajung ka nung, Yanglushidi Sensaksem Sabang (YSS) koba nung Aor tamanger tajungtem, laishir mongintem, arogo lenirtem, osang zülurtem, tesayurtem, shisashirtem aser lenirtem tajung aika mapang aben asen lokdi tebilemtsü (issues) balala lemsatepa arur. Taoba hepta kilir ayuba dak sentakba onük nung jembi, aser yangi tejembiba olen kar Khristan ka teinyaktsü lemsateper.

Nisung shingaia kilir mapa meinyaker. Saka sensaker kibong nungi koda masü timtem ajanga  tangar kidangi oa kilir mapa inyaktsüsa akümer. Kilir aika kiburi tajung kümdaktsüba otsü  lir, saka kari school nung züngdaktsütsü ta mesüzüka anir aotsü saka schooli meyoki ki mapa dang inyakdaktsür; kibur karibo alar aser shiruru jenjang nung yutsür. Kar kidangbo süoshi, chiyungtsü peria magütsür, kimalen mejangdaktsüba atalokba osang lir. Chisüng, tanung tera chiyungdaktsür anogo piyong mapa inyakdaktsür. Kilirji Tsüngremi Pa mesükba nung yangluba meimchir taküm ka, saka kiburi meima  mebenshiba, mezüngokba aser tashiyim mapa inyakba tatalokba aika ajangshia arudagi. Kiliri inyaktsübaji reprangdangra, normal hachira dang nungi tali agütsütsü langa inyaktsür, saka taah-bo inyakba yari magütsür. Kiburi meinyaknüba ajak inyakdaktsütsü, saka kibur karibo shiruru dak amai tila tanur daka sünga azükba ataloker.  Khristantemi kilir rishikangshia, züka, mapa tali inyakdakja ayuba ya tim asü masü? Ya temenen tulutiba masü no? Kilir exploitation anema arogoi kechi inyaktsü?  Yimdeni kechi inyaktsü? Taah koma agütsütsü? Kibur shirnoki kilir rishikangshir, azüker, malnourish süa yutsü parnok anema senso ka teinyaktsü kechisa? DAYO, MTLT, Watsü mungdang, Ao Senden, ABAM, yimtsüng yimden, lim arogo teinyaktsü kechisa? Laishibai kilir koma ayutsü iba indang kechi ashir? 

Kilir koba jenjang nung ayur?

Kilir ta kodang südir alar amai, mini, kanja ta menüja bilemer, lujaa repranger. Aseni sen talang agi alizüka ayuba oset-tsüset ka amai bilemer, aser machine mesüra shiruru amai mazüngi dang inyaka lidaktsüner. Nisung kar toushi marem, kidangi meyipa odi ta asüdang, kiburi nai aosu kwi chiyungogo, aji meyiptsür oang ta mezüngmeshia o tamajung ashiba otsü lir. Nisung shingai meimchir ayoktsü aser alitsü ozüngi memelar. Kilirtemji alar masü, saka nüchi taküm ka ka lir. Parnokji asen teyari nüngdakba agi bushia anir aru nungji “teyariteper” ta asü tajungba, saka iba ocet nung kilir aser teyariteper anaprongla meyoktepa  dang amshir.

Kilir ta kodang südir pa/laji nisung kar kidang ki mapa balala yaritepa mesüra tanur repranga alirtem ta ashitsü akok. Kuli balala ajanga tangar ka kidangi oa yaritepa alitsüsa akümer:

  1. Tsürabur maka-mait tangar kidang kilir akümba;
  2. Jila nung mapa makartem hachira amai inyakba; mapang tatakzük ita sen paika ya agütsütsü ta tangatetep nung inyakdaktsür;
  3. Yimtsüng nung alirtem mapa bushia arurtem, training balala agirtem kilir ama arua aliba; 
  4. Tsürabur den tangatetep nung school nung züngdaktsütsü ta anir aruba nisungtem;
  5. Tsürabur asü-ama ajurua tanur tangar kidang kilir mapa inyakba;
  6. Karbo tashiyim agi pur mesüra mesüzüka anir oa ayokba, ano aika.

Kilir kaji koda ayur? Koma ayutsü? Ozüngi kilir koma ayutsü melar? Asen lima ozüngi melaba ama kilir ayur masür? Taah koma agütsür? Khristan kati kilir koma ayutsü? Lai tesayuba kechi? Itemi kanga aroka shisadangtsü mapang ka.

Kilirji asen tsürabur mapang nungi yua aru.  Parnoki anitetba aika minister, govt. mapa nung tulur, tesayur, pastor,  tetsür pastor, lanur pastor ta adokdakja asen Aor akhümtsübua tesendaktep tajung nung aru.  Aikati pei chir ama meimba aser anebaluba mapa tajung kuli aika lir.  Kilir koma ayutsü ta asüdangdang, Pastor kati yamai langzü, “Ozü kidang Arunachal nungi jabaso tajung ka joko küm 7 buba alir. Khen danga kidangi modang, pai kidangi moner, küm ishika tejakdang nungi par tsürabur aser kinunger den ajuruteptsü khen danga or arung ta ashir saka pai moner. Tang jabasoji class 12 nung azünger. 1st & 2nd position dang ngua atur, class 10 nunga distinction subject 3 nung angu.  Sentep tekülemi kü kinungtsü tena külemi oa amener, pa lesson bushitsü mapang peria agütsür, sports asayatsü mapang agütsür, anungdanga pa mejangtsü mapang agiteta agütsür. Teti külemi langpang ka nung mener chiyunger, sarasadem mapang nung teti par tsürabur aser kinunger bilemteter. Itemji kibur teinyaktsütem lir.” Yangi kilir ka koda ayutsü tejangja angur. Khristan kati kilir kaji alar ama asü, saka pei chir amai meimtsüla aser benshitsü. Asenoki kodang kilir tajungtiba nung yudir aser meima anebaludir, iba jagi asen Ao kin tenüng atutsü aser Tsüngremi meyipa asen kibong aser kin moatsütsü. Nisung shiba, kibong shiri mesüra kin kobai meimchir mezüngmeshia amshir parnokji kodanga temoatsü mangutsü. Atakatem angutsü ta metetdi. Nisung shibai tangar akhüm metsübur, pa/laji shiangia akhüm metsübutsü. Aori tangar nem akhüm tsübudaktsüner, asenoki tangar tama akhümtsütsüla.

Aor kibongtem aika nung kilir tim mesüi yua lir. Asenok memelenshira tangari sendoktsü aser aiatai tia ajurutsü. Temulung shirangtsü otsü aika lir, saka tatishitsü ka-ana dang shiner. Tenzüker tajung kati yamai ashi, “Ni ABAM mission field Wancho, Arunachal nung aliba mapang ajuruba ka: `Wancho nunger tanur aika school züngdaktsütsü, tajung kümdaktsütsu ta shir asen Ao limai anir ao, saka timtem marem tanur karbo jena aruatokba ni ajuru. Parnoki ashi, nenok Aorsa tamajungba ta sür parnoki ajuruba  timtem aika ashi aser karibo onoka mezüngmeshi. Ni aliba kiburjibo mojing” ta ashi. Ano Pastor kati yamai zülu, “Town tulu nung asen Aor jenti alidak alir asünung ni tenük agi kilir tim mesüi ayuba jenti nguogo. Aortem temoatsü makai akümba ya kilir mechi nungia ta bilemer. Hau, aikati junga amshir, saka aikati shiruru jenjang nung doktsü aser shiruru dak azüker ama azüker. Pei azübo kanga anebalur, saka nisungbo anebalu masür, azü ayipdak yipdaktsür. Ni sannüker ka ama, tanur ya school züngdaktsütsü anir aru süra pei chir azüngba school nungji züngdakjang ta taka taiter aika dang shiogo, saka yamaji meinyaker. Süoshi magütsür, khen khenbo schooli meyoker, kaket peria malitsü, tiffin renema bener meyoker. Khen khenbo kiburi oset misplaced süa yur, auür tongja tejashi ajak senema temang ajunga nung strife adoka azükba nguogo.” Ibala dangji atakatem mapa ta ajar. Koda temulung shirangtsüka. Iba amai dang kilir dang inyak nungbo Tsüngremi atangji Aor merenshitsü. Arogo tenzükeria kasa, mesüra tamajungba kilir anema inyakba otsü lir. Shitakba tatalokba otsü ka: “Arogo/Mungdang nung tenzüker kar kidang Eastern Naga kin nungi asangur ka kidang yaritepa alitsü aser taah-ji school zünga tajung kümdaktsütsü ta sür anir aru. Tanubosangji kanga okrongseta ali, chi mapang shitak nung magütsü, chisüng dang chiyung, chi surobaji Tenzüker kibong jagi chiyungmar tanubosang nemji khen khenbo kecha magütsü; süoshi tajung keta mesemdang, tsüngsemji pa asoshi pongmang nung akshi den chiyunger ama, saka timtem arema pai kiburji tenzüker class 10 pass sür par limai meyipa ao. Küm ishika lir arogo nung Tenzüksangji tanubosanger yim len Revival agütsüi aotsüsa aküm. Tesüngmangtsüka sayutsüngi saka tanubosang jagi pa koma amshi, koma merenshia alaashia yutsü iba indangji par nüburtem dang kodang ashi, Tenzüker tajungji maakser meyipa aru. Pastorba/Revival speakerba kibong noksaji kanga jangratemtsükabo mali asü. Tsüngrem tenzüker kibong ama tilaketa tanubosangi majitet.” Yangi mapa aser sayutsüngiba meputetba aser taküm kuli ajanga mesayutetba sayur. Mapa metenra tamangji tasü ta metetdi.  Kasa mesükba tatalokba lenir kati yamai zülu, “Tsüngrem tenzüker kidang yariteptsü ayuba nisung mechi-mejemi toktsüba dang masü, tashi mangarji ta sür tenarong tutsüba nguogo”. Tajung kümdaktsütsü ta shia anir arua ayutsü, saka exam mapang nunga sünga lesson azüngtsü mapang tak ta magütsür, shirangdang anebalutsü melena “azümasen” ta jaa merenshia mapa inyakdaktsür. Asen chir dak kilir dak inyakba amaji tangar kiburi inyak nung naia koma bilemtsü? Nai temulung shiranga nüksü alua ajeptsü. Aori kilir dang benshiba ngua tangar ajeper. Tsüngremi parnok tajaba ola angashitsü aser Tsüngrem ain adoktsü.  Hoi, Aortem ner kidang kilir koma yua lir, khen shisadangtsü mapang. Neri meima anebaludar ma? Nüngdakba agi kilirji kidangi anir aru. Koba nükjidong, koma jembir anir aru yamaji inyaktsüla:

  1. Taah agütsütsü ta shir anir aru süra, ozüngi melala ama tim taah agütsütsüla, saka India temzüng anema child labourer mayutsüla.
  2. Schooli yoktsü, training agidaktsütsü ta tangatetep nung anir arua lira, aji shitak inyaktsüla
  3. Account nung security doktsütsüla
  4. Parnok sobaliba mezüngmeshi masütsüla; Aor tenüng agi memelentsütsüla
  5. Parnok dang tarutsü nükjidong sayutsüla
  6. Sobusolemtsü aser chiyungtsü peria agütsütsüla
  7. Tim lemang nung metongshia anitettsüla
  8. Sentep senchi nung shilem agia tendaktsütsüla
  9. Libaliro tajung nung anitettsüla
  10. Kotak lemang sayutsü

Itemji meinyaktetra kilir ayuba jagi asen dang atakatem arutsü. Temeim mapa ajanga dang kin ka ajungketer and temoatsü bener arutsür ta angatetdi.

Kilir ayuba ajanga teraksa

Aor aikati kilir ayubaji konang, takar ta sayur amai bilemer. Hai mini, kanja ta tangari tenzükdaktsübaji asüküma bilemer. Tanur nem kecha mapa meinyakdaktsüi mini-kanja yur tenzükdaktsübaji jangratemtsüka amai bilem, saka kilir dak metaloker aliba kibong nungji timtem aika ajurutsü aser ngua arudaki. Kar yamai shiner:

  • Tanuri sorochiok mesütettsü, kibong kar nungbo süngoa meyanglutetba tanur lir.
  • Tsürabur aikati kilir ayubaji chirnur anisüngzük asoshi ta bilemer, saka kibong nung jala jabasotemi mapa mashibaji lendong. Iba jagi azümesen tentetdaktsür. Pei chir alar jenjangi yoker ta tsüraburi metettsüla.
  • Chirnur nungi dignity of labour samar.
  • Tangar dak metaloker yintetba jagi khuret mebentettsü, lokti nung teraksa bener arutsütsü.
  • Nisung kaji süng-lung nungi tsüktetba masü, pa/la kin ka, yim, kidong, kinunger ta ali nungji nisung ka dak meshimejungi amshira nübur aser kin ka tsüngda tsükchitep, tesempatep adoktsü.
  • Kibur shirnoki kilir madak tashiyim amshia lendongi yoker, par/lar kin, yim, kidong, kinunger ajunga dangi maksü bener arutsür ta metettsüla.  Tanü Aor tangari majinübaji kuli kaji kilir junga anebalu masüba ya ta metettsüla.
  • Kibong nung apuani tsüngda mangatetep aser temulung melemtep adokdaktsüba jenti ajangshia arudagi.  Kibong kar nungbo kilirtemi mapa ajak tempangadokerji mapa mali tajungtiba agi renemteter kazütepdang kinungbu aser kinungtsü tsüngda mangatetep aser mulung malem adokba otsü lir.

Anungji kilir ayuba nung takoksa aika lir ta angatetdi.  Hau, kibong kar nung apuani anaprongla officei aoba agi tanur reprangtsü aser ki mapa inyaktsü nungdaktsü. Saka kodang kilir yudir, kiburtem teinyaktsü kechi, parnok koma anepalutsü, koma meima benshitsü, kilir ka koma anitettsü tejangja angateter ayutsüla.

Kilir ayuba nungi DAYO, MTLT, Watsü Mungdang, Ao Senden, ABAM, Yimtsüng Yimden, lim arogotem teinyaktsü aika lir aser tim talenba ozüng yanglu nung ajungtsü ta jembia arudagi aser aji tim. Saka ya metetdi: Lokti balalai ozüng jenti yanglutsü akok; ozüngjia tongtibang saka meima tangar  chir ka asen chir ama amshitsübaji asen kibong telung nungi adoktsüla. Pa/laji asen chir den kasa ta bilema mapa agi meinyakra ozüng kisüng jagi mekümtettsü. Kilirtem jatena arogoi ministry agütsüba jagi dangbo ano mepiri. Kibur tama melenshitsüla. Asenok kilir amshiba yimya ya British colonizers yimya den kasa dang tanüa lir. Sahib aser memsahib attitude ya melenshitsüla.  Iba mulungsentsü ya memelenshi tashi, tila maküm tashi Aor tsükchir dang tali züintsü. Melenshitsü mapang tongogo.

Lai Tesayuba?

Tanü kilir ayuba yimya ya modern day slavery system ta ashitsü akok.  Am I a slave owner? Nai kilir dang temeim mapa inyakdar ma? ta asüngdangtsü mapang tongogo. Tsüngremi meimchir ajak Pa mesükba nung yanglu, tetezü meimchir taküm shiaji senti aser akhümtsübutsü tim. Tsüngremi yangluba nisung ka alar ama rishikangshia ayutsübaji Laishiba memelar. Alar tia nung melidaktsünüba agi Tsüngremi Israel nunger Ijip, Babilon, Persia lima alar talenba nungi anitet. Nisung ka sentsüh yong alar kümakasa küm tenetbuba nung aser Jubilee küm nüchi küma yoktsü mela kechiaser nisung ka teti asoshi alar süa yutsütsü ozüngi memela. Laishibai alar, kilir aser aener dang koda meima benshitsü  tejangja shia angur.  Tazüngkunem 24:14 nung ashir, “Nai ne linük yimtitem nung alir ne adianu süshia, aener süshia, sensaker, anüngakonger aser shiba ayanger lir pa/la mekangshitsüla.”  Tetezü, asen tajangzük mechi tangar kilir dak züka mapa tashiyim agi inyakdaktsübaji tai. Tim taah magütsüi ayubaji tai. Tasen Lai nunga Kolosi 4:1 nung yamai ashir, “Kiburtem, kotak nung Kibur ka lir ta nenoki meteta kilirtem dang timi ochishia benshiang.” Kilir dang ochi aser tim mapa meinyaktetra, asen tamang amajok, sayutsüngi, sarasadem amajok. Anungji kilir ka alashia, meketmesemi aser tashiyim amshia ayutsübaji temenen aser Laishibai tesayuba masü ta angatetdi.

Otem

Ao arogo küm 150 ajungba benjong amungtsü renemba mapang ka. Jubilee ta asübaji temenen takokba meshiba küm aser alar nüchi küma yokba küm. Asen Aor temoatsü aginüra kilir anema tashiyim inyaka aruba mapatem  atema tatok meshiba küm südaktsüdi. Taküm melenshiba, sahib-memsahib temulungsentsü, pioneer ta bilemba asüküm, mezümeküm, teyaksang melenshiba küm ka südaktsüdi. Yamaji süra Tsüngremi moatsütsü.  Aener, bendanger, kilir dang ochi meinyaktetra jubileemung jenjang kecha maka akümtsü. Kilir dang ajungba mission inyakdi ta ayongzüker. 

*****