~Amenla Mar
Yanglushidi Sensaksem Sabang (YSS) nung mapang shia arogo aser lokti nung temelenshi nungdakba benoka sensaksem agia arudagi. Lai tesayuba nungi tanü kiyimba pilaa aor ta angatetba iba dak sensaksem ka aka aser yangji kar aroka bilemdangtsü asoshi lemsateper. Iba den Laishibai sayuba ama koda temeshi kiyimba agitsüla kü tebilemba kar lemsateper. Iba sensaksem mapang teblemtsü lemsatepba ya lenirtemi mapa küma inyaktsü imlar.
Tsürabur tendak kiyimba yimya inyakyim tongmelang liasü. Alima ainba den külemi temeyokteb sobaliba balala den lisema aoba ajanga tanü Arogo, lokti aser kibong nung Kiyimba maparen nung tebilemtsü bener arutsüba ajangashia arudagi. Tanü globalized lima nung tangar sobaliba yak yakta angazüka benshiba putu ka nung asenok lir. Sobaliba ya dynamic, static masü, anungji teti melenshia aor, tejen yimya indoker aser tasen bendenloker. Yamaji sobaliba melenshiyonga arudagi. Aiben tamangertemi aibelena western culture ya Khristan culture, Lai tesayuba ama bilemer. Western culture aser Yisu Khristai tentetba culture-ji kenyongi balala. Tanü arogotem nung sati kuli agiba ya western culture atsünga oa inyakba aika angur, tat agi. ring amshiba, cake arangba, wedding dress süboba, item ya western culture lir. Ano tematiba Tsüngremi melaba mapa apuni na longjemba mapang temeshi Tenla kidang alima kentem (Pop/love song) tena Khristan kiyimba agiba asenoki ngua aruogo. Lai tesayuba kuli kechisa? Asen nübur asoshi ya apet asü mapet? Temelenshi nungdak asü menungdak? Shisadangtsü mapang tongogo ta bilemer.
Tanü Yimtsüng aser jila balala nung kibong akümba inyakyim tatsü agi yamai shisadangti. Arogotem nung Tenlaki mesademba dak atemer reception, car parking aser chiyungtsü tesem tesademba bushia ibala kuli balala amer Temeshi kulizüng Tenlaki dang masü wedding hall/park ama bushia oa sadia kulizüng agitepba ngua arudagi. Yabo tim masü ta bilemer. Tenzüker aser satir kibongi temeshi Tenlaki mepidoktsüla.
Sati benjong ulua agiba ajanga kija kibong, Arogo aser lokti nem tajangzük bener arutsüba kangrabo mangur. Hau, kiyir benjungji kibur mulungba nung agia arur. Saka tanü asen tendak, takar aser sensaker kecha tebendang mali, ajaki benjung tululu yanglutepba agia aoba yimya yabo temelenshi kar nungdak ta bilemer. Tesasatsükaji tanü tendak temeshi kiyimba ya Laishiba tesayuba nungi pilar tarutsü kibong tasen akümer rongsen bentenba mapang, mesüra satiba benjongji business ka ama küma aoba ajangshia arudagi. Sen lakh aika apua (anticipated budget) satitsü aser yamaji tejaoker dak nungi angutsü yimlar. Tatsü agi kibur expenditure indang shisadangdi. Wedding planner charges, wedding feast, beautician fees, card, wedding dress, ring, professional photographertem aser videographer charges, return gifts, reception/wedding hall aser tenla ki naro ano aika. Iba dak alaka kibong akümdang sobaliba dak sendakba shijebtem Tat. agi., Anükapang shijeb, Awazur shijip, kibur awashi shijeb aser shijeb nungja balala aika lepteter lemsatepba ajanga sentsü tulu tsüdaktsür. Atangji shidakba nungbo sadi benjong chiyongtsü atemabo ak shi kg ishika agi pirer saka ak metsü semerji shijeb nung aor. Wedding dress sen half lakh dak tali agi arüba (stitch) tu ken dang semerbo nungdak makai akümer. Noksatem aser video yanglubatem koda? Church, wedding hall aser arem leni oa tangokba noksatem charges balala agütsür saka hapta ka ana dang repangteperbo mangrang ponga toktsür. Item amala ajanga Kibong karbo tanur nubener küma sotenaka sadi sentsü moma kibong telongi aiba ngua arudagi, karbo balaogo. Sadi kotetika agi ta masü saka tongtipangbaji kibong tasen koda lionga aor ibaji ajak dang nungi tongtipangba ta kiyertemi metetdi.
1987 nung Ongpangkong senso mungdangi satiba inyakyim asoshi ozüng tesashi ka yanglu. Ak tepseta, shijeb mamshitsü, card matoktsü, wedding dress marütsü, sempet shingai bener marutsü aser sentep Aonung (Bodbar & Honibar ) dang satitsü ta ozüng yanglu. Tatsü agi, saditang mei maputsü. Yamaji Ongpangkong arogotem nung küm ishika iba ozüng benshia certificate dang agizüka temeshi kiyimba kulizüng agizüka aru. Tatalokba ka: Ozü kibong bendanger ana ajurutepa sadiaka iba ozüng nung tashi anga-a kibong aküm. Sadinü asoshi süoshi tasen marü, cake marang, shijep mao aser sentsü matsü, tarurtema khuret magutsü. Iba mapang nungbo nisungtemi yimya tentet balaka ama mashi mashia belema liasü. Saka tang angateta arua, iba sadi yimyaji kangsa tajung liasü ta, kanga pelar. Saka iba ozüng takang küm ana/asem dang lirbo tashi mangai sati tululu ayonga satitep. Anungji sadir kibong dang yimdeni senchi achiba mapang liasü. Ano karbo satibo kanga tongmelang agi. Saka anogo ana-asem lirbo benjong tululu ayongtepa sempet benteba lüngsoteba aru. Ongpangkong Arogotem nung dang masü tanga Yimtsüngtem nunga kiyemer aser yimeryimsanger arok ajungtsü meji nung yamala ozüng yangluli raksali ano yangludangli ta arudagi. Atangji jijiba nung, sati nüji benjongji masü saka sati kuli tajung, nisung aser Tsüngrem tsüngdang agizükbajiang lir.
Tebilemtsü ka angubaji, tanü asen chirtem yagi tashi angadi ma!? Asenoki temzüng ozüng aika yanglua yuaka mekümdangra asen chirtemi “Para” church-i oa mesüra court nung saditsü ana nung lir, anungji ya kanga dang arok shisadangtsü wadang ka ta ajiteter. Arogo aser yimden, lokti balala longjemer shisakaa repangshimer ajak asoshi tajungtiba, Laishibai melaba ama lemteta benshia aotsü mapang tongogo.
Arogo nung Kiyimba yimya nung tebilemtsü onük jembidang itemi teinyaktsü kar jungdisü ta benokdanger. Itemi Arogo nung sannükeri anir toklang tenzükertem, linertem, Theological collage nung tesayurtem, Missionarytem shirnok Arogo aser lokti balala nung amoka tongbu apua inyaker parnok shisa opang lemsateba nung teinyaktsü aser rajemtsü nungdak ta ajitetba kar lemsateper.
- Temeshi kiyimbaji tenla kidang dang agitsü ta ABAM telemtetba lir. Iba telemtetbaji ajaki tashi anga inyaktsüla. Kari Tenlaki toktsür tanga tesem nung sadi agitsüsa kümra Pastor aser Arogoi kiyemer den tangateteba nung tesayuba tajung agia inyaktsüla saka pei pei mulungba nung masü Tenlaki nung agitsüla.
- Arogo nung pastorji ministerial licence akaba süra tanga Arogo nungi pastor anir arua magitsüi, lim Arogo Sannükeri sati kuli agütsütsüba tentetji tajungtiba.
- Engagement agiba mapang nung, benjung tulu agitepba masü, saka arogo office nung mesüra tenla kidang nisung telatet ka arua agütsütsüla. Iba ama yimya tajung benshiba ya ABAM kübok Arogotem aika nung benshia arudagi. Saka liromedema amshiba mangur.
- 4. Tenla ki naro inokba nung Arogoi tetuyuba kar agütsütsü tim, aji mesüra ki naro tali inoker shilem agir atema mesadem timtem agütsütsü ana nung lir. Pei bendanger benjong-bentsü ama mesang-meyonga inokba ajanga tekülem nung Tsüngrem akümtsübu tetushi tekülemba samadaktsür.
- Pre-marital counseling hapta ka bosa jilia agütsütsüla, Pre-marital aser post-marital counselling/class ya kanga nungdak, kechiaser tanela, sobaliba kibong aser apuani o Arogo tesendaktep ajak asoshi terenemba mapangji iba mapang ya lir. Arogo aika nung Bible study kiyimla aser kiyimsang den agia arudagi saka Arogo tiemba ka nung ken dang sarasademer süidaktsüba angur. Ibai teperi masü.
- Tetsürtemi teberem sü, asen Aotsür national sü agir sadiba ajungshitsü junger. Tamalen Watsü Mungdangi iba ama pei süoshi agitsü telemtetba tajung agiba belemteter. Item ama mapa tajung tu tanaben meyiba benshi nung koda!?
- Shijeb agütsüba yimya ya melenshitsü Arogo, yimden, watsü aser senden balalai shisadanger lemang tajungba ka sayutet nung tapet asütsü südi.
- Ao Mungdangi (ABAM) kibong tasen akümba dak sendakteba koba telemtetba latetja ali iba nung Arogotem ajak uniform sa benshitsü nungdak. Tat. agi., Lar labonger masütsüla, Arogo nung züngsem tajung aliba asütsüla, asüngteta aliba taküm, etc etc. küm tatem mungdang generali tatsü talang ajak jembiteper lokti agizüka lemtet asü nung iba nung maibeleni benshitsü junger. Mungdang lemtetji ajak asoshi ta angatetdi.
- Aoli Arogo kar nungbo talisa Arogo tulu nung satitsü anogo Arogoi züngzüker kenu yongi kibong pongu/terok külemi Arogoi sadija arudagi. Iba ajanga lalushibongba, lokti nem timtem agütsüba ano sentsü atsüba aika nungi kümzüker. Arogo kar nungbo Arogoi satitsü condition agütsüba nung shiri agizükteta saditer, Temeshi kulizüng tajung agizükba den Arogoi süngo tajung renemja tarur ajak peridakja chia jemdaktsür. Iba ya kanga dang mera taket yimli tajung maparen lir. Iba amala inyakyim tajung yabo yim saseb nung lim Arogo dak apet benshi nung koda !?
- Ao Arogotem kar nung satidang Deacon board nungi nisung ka /ana shimteta sadi benjong dak sendakba Arogo telemtetba kechi inyaktsüla aser kechi meinyaktsüla (do’s and don’t) zülur agütsür. Iba ozüng nung aibelenra certificate meyiba meshiadoktsü ta sign südaktsür. Iba temelaba aser tangatetep nung ajemdaker kiyer benjong agibaji kanga mera taket tenükshitsü aser mangatebtep aika nungi kümzüker.
- Sadi anogo nung dang masü saka tanga mapang nung tamanger shia nem aeir ka aser asanger ka koda asüngteta lia Laishibai melaba ama Tsüngrem O dak ajemdaker kibong tasen akümtsü, Pastor mesüra tapet nisungi Laishiba tesayuba tajung mapang apir angateta sayutsüngba ajanga aika ajangzüktettsü.
Tatemsa, tanü putu tendak bendang li tesem balala nung prokshia alitsüsa akümer. Iba ama tensa nung tebilemtsü ajurubaji mungdang ajanga Arogoi koba marriage certificate agütsü ibai legal maparen aika nung magir. Tat. agi, passport yangluba aser renewal ama, visa yangluba, foreign lima nung mapa inyaktsü temelaba meshiba maparen nung Arogo marriage certificate agibo mabensatsür, anungji court nung marriage registration asütsüsa akümer. Akok nungbo tarutsü lanurtem asoshi Arogoi agütsüba certificatejia legally agizüktettsüsa maparen kar bushitettsü, Mungdang ajanga ‘Marriage Registrar’ jenjang nung arogo Pastorji yutsütsüsa tapet asütsü asü masü, Indian Christian Marriage Act, 1872 den medemdanga, asenok tendak apettsü asü? ta khen arok aroka shisadanger lemang bushitsü nungdak ta bilemer.
Mezüng sadi-ji Tsüngremi Adam aser Eva nungi tenzük (Lipok 2:22). Anungji dang Lai tesayubaji Tsüngremi kechi lungjemdaktsü aji nisungi tepiladaktsü (Mat.19:6) ta shia lir. Saka sadi benjung yabo meimcher yimya tentet ka dang, iba nung nungdakbatem bendenloktsü aser tajangzük makabatem indoktsü ajakji meimchier dak tashi lir. Kibong ka tenteta aobaji; Lokti ka, Arogo ka aser alima ka raloka aor. Kibong ka ajanga lokti asoshi tajangzük aser teraksa bener arutsür. Anungji amangbabur kibong tasen shia Laishiba O nung amenloker sadi kuli agiba yimya tajung agia kibong tenzükra akümli tepiyong ner kibong temoatsü asütsü. Iba oset azünger ajak Tsüngremi tangatetba tasen agüjangma.
*****
The Nokinketer 