Co-Pastors Inyakyim

~ Narola McFayden

Okila

Iba ocet ajanga arogo nung toklang tenzükba, asen lima meinyakba, inyakyim tasen ka indang lemsateptsü Yanglushidi Sensaksem Sabang (YSS) nung maongka agütsüba asoshi kanga pelar. Asen lima arogotem nung tenzükba mapa lenisüba model ka dang küm noklangka tema amshia arur. Iba model ji pastor ka nem arogo nung tematiba menden agütsüa pastor ka kübok arogo mapa achaayangba ya lir. Laishiba nung nisung anana Yisu Osangtajung sayutsü yokba angur. Anungji Laishiba nung tenzükba aser tenzüktsü yokba otsü kar tamasa reprangshidi. Iba sülen Co-pastors ta asüba ya kechi aser tangar lima koma inyaker item idang asenok den lemsatepba ajanga tangazükba aser temelenshi adoktsü imlar.       

Tenzükba aser Tenzüktsü Yokba Indang Laishiba Nungi

Osangtajung sangdongba nung shilem tulu agiba apuani ka indang Tasen Lai nung zülua lir. Asenok aikati Priskila aser Akula na otsü ya angashir, saka züba-züba dang zünga, angar alitsü akok. Priskila aser Akula tena ya terok ben (T. Ken 18:2-3; 18:18; 18:26; Rom 16:3-4; I Korint 16:19; II Tim 4:19) Laishiba nung tenüng teta zülu-a lir. Pezüben Priskila tenüng mezüng zülua lir. Par putu shiba tongtibangba, pa/la tenüng tama zülu ta ashir. Laishiba nung kinungbo tenüng dangashi kinungtsübo tenüng aiben zülu-a mangur. Tetsür tenüng teta züluba Laishiba nung aikabo mali.     

Kechiba Priskila tenüng tama pezüben zülu, aji Laishiba nung rasa-a zülu-a mali. Saka tenüng züluyim yaki tazünger nem angatetdaktsünübaji, Priskila ya tasü tait, sempet aika aliba tetsür liasü. Pauli Priskila aser Akula naprongla pa den külem tenzükertem ta aja. Yamaji, Priskila aser Aquila tena teka amteper tanela anir aruba mapa inyak. Korint nung aliba arogo par kidang sentep. Yamajisa, Ephesus nung aliba arogo, Priskila aser Akula-er kidang sentep. Priskila aser Akulai Paul rongsen agi yariba dang masü, tenati Paul taküm asoshi parnok tekong tendaka timatem ta Rom 16:3-4 nung zülua lir. 

Ano, Apoloi tsüngro songa Yisu indang tasü ita jembiba angashia, Priskila aser Akulai Apolo anir aru aser Kibuba tesayuba lemang indang tali tejangjaba pa dang rateta sayu ta Tenyartem Mapa 18:24-26 nungji zülua lir. Anungji tenaprongla tesayur liasü ta Lai jaki jangjatsür.  

Priskila aser Akula nati Yisu Khrista Osangtajung sangdongba mapa nung teka amteper shilem agiba angur. Tena kati ka akhümbanga, mesüra ka yimjak nung aser kabo tezülen nungi dang inyakba indang magur. Tenati kati ka nungeta, ka kümer Yisu Osangtajung sangdongba mapa nung tasü ita inyak. Priskila aser Akula na nükjidong ka dang liasü aser iba nükjidongji Tsüngremi Yisu Khrista ajanga nüburtem atema kechi inyak iba Osangtajung indang nüburtem nem metetdaktsütsübaji liasü. 

Yisu Khrista iba lima nung alidang mapa ajakji Pa kisüngi inyakteta liasü. Yisui mopung o tsüsem arütsü, aser mopung aser tsüsemi tashi anga (Matt 8:23-27). Pa tonga maoyonga Yisui o dang jembiba ajanga yim tanga ka nung shiranga alir anebtsü (Matt 8:5-13). Yamaji Yisui shinga teyari meteni Pa kisüngi inyakdi sürbo ajak kokteta liasü. Saka nisungi meyimlaba nüburtem Yisui aja aser parnoki pa sülen anitaka pai inyakba mapa ajia, angazükdaktsü (on-the-job training/apprenticeship). Aser Osangtajung sangdongtsü Yisui parnok nüburtem dangi yok. Mark 6:7 nung Yisu nütsüngtem anana Osangtajung sangdongtsü yok ta zülua lir. Nütsüngtem kati ka ajongshitepba, metongshitepba, tongzüktepba tenzüktsü mechi parnok kija masü anana yok. Yisui, tetenzük nungi Osangtajung sangdongba mapa nung kija-i masü, kar den teka amtepber külemi inyaktsüba sayuba angur. Iba tesayuba ama Osangtajung sangdongba mapa nung Paul aser Barnaba, Paul aser Silai külemi inyakba angur.  

Tejen lai nung asenoki Mosa aser Aron na otsü kanga junga meteta lir. Mapa ka inyaktsü mechi Tsungremi sempet balala aketba nübo ana amshi. Mosa kisüngi iba mapa mekoktet, ano Aron kisüngia iba mapaji mokoktet, saka tena lungjemer Yihuda nunger alar tia nungi anitet. Tsüngrem mapa inyaktsü ya nisung ka kija mapa ta masü, lemsatepba yaritepba inyakba angur.   

Asen tsürabur denomination koba American Baptist Church USA (ABCUSA) lir iba denomination kübok Arogotem nung tetsür ordain süa Senior Pastor inyaktsü 1892 nungi tenzük. Aji dang masü ABCUSA Arogotem nung joko küm aika co-pastors inyakba dang masü arogo ka nung apuani kati küm 30 co-pastors inyakba lir. Iba amaji, alima tesem aika nung nisung kati dang senior pastor inyakba model melenshia aoba angur. Süra co-pastors ya kechi?

Co-Pastors ta asüba ya kechi? 

Co-pastors tetezü Arogo tenzükba mapa nung lenisüba temaba jenjangji nisung ka nem dang masü, ana nem kasa agütsüba dang co-pastors ta ajar. Tetenzük nungbo co-pastoring ji nisung anati dang inyaka tenzük. Tanübo nisung pezü mesüra pungu (4 to 5) co-pastors inyakba angur. Co-pastors tebur ana, asem, mesüra pezü jenjang ka dang ta sür inyaker. Ano tetsür ka tebur ka, mesüra tebur ka tetsür ana da inyaker. USA (tanga lima aika nung)  nung tesabutiba-ji apuani (husband and wife) co-pastors jurabaji lir. Arogo aikati pastor bushidang apuani na prongla theology zünger sempet tajung aliba kibong ajurur. Anungji iba amala kibongji arogo atema temoatsü ta angateta anaprongla jenjang ka nung tenzüktsü ajar.  

Co-Pastors jagi tetenzük nungi parnok nisung ana, asem, pezü, pungu süaka parnok ajak ola aser tashi (voice and authority) ka dang ta tangatetba nung tenzüker. Tetezü, parnok rongnung shinga temaba mesüra tekübokba ta mali, ajak jenjang sako ta angateta tenzüker. Co-Pastors ajak nem arogoi kasa tashi (equal authority) aser tenzüktsü ajaba khuret agütsür (equal responsibilities).   

Aikati yamaji koda sür inyaktettsü ta bilema alitsü südi. Teinyakdangeri-ang co-pastors inyakyimjibo tajungba meteta alinung ni apuani co-pastors parnok 34 dangi survey ka yok. Parnok dang tasüngdangba item pezü ya asüngdanga liasü: (1) Co-Pastors inyakyim nung tenzükba maongka aser tetsükdaktsü kechisa? (2) Co-Pastors tsüngda mapa kechi koda lemsa bener aor? (3) Co-Pastors tenzükba mapa nung arrtsü kechisa alatsü tim? (4) Co-Pastors aginür arogopurtem temetettsü kechisa? Parnok telangzüba nung ajemdaker asenok den item tongtibang inyakyim lemsateper. 

Co-Pastors Mapa nung Maongka aser Tetsükdaktsü (Opportunities and Challenges)  

Mezüngbuba nung Co-Pastori mamatsübaji, Tsüngrem tenzükba mapa nung ni/na ya tongtibang masü. “Ministry is not about you” saka “Ministry is about God.” Yisu Khristaji tama südaktsütsüla aser asenok pa nem len anitaktsütsüla. Kechiba süra, Yisu Khristaji arogo nung tekolak aser asenok ajaki Yisu Khrista tenzüker. 

Tsüngrem tenzükba mapa nung apuani Co-Pastori liromedema inyakba ajanga arogopur nema iba amala lenisüba nung kasa lemsatepa inyaktsü angazükdaktsür. Pastor mapa inyaktsüji temela masü. Co-Pastors tsüngda mangatetep, tetoktep aser mokachi lira mapa takok mangutsü. Anungji pastor anaprongla ola (voice) aser tashi (authorityji) saku ta angateta apuani jagi inyakyim ajak nung nüburtem dang sayutsüla. Kechi nung südir süaka, tena opang ajemtsü tongtibang. Co-Pastors mapa lemsatepba inyakba aser iba khuret angateta kati ka nungittepba tenzükba ajanga tenzükba mapa nung merongjeni, takok ngua, tsüra tema, ajak temulung süa inyaker. 

Tetsükdaktsü rongnung tongtibangbaji, “Finding balance between both being present as well as not double-resourcing everything.” Co-Pastora ta sür mapa ajak nung anapronglai shilem agitsü ta masü. Koba nung anaprong atentsü koba nungbo ka dang atenyonga kecha masü ibaji benteta arogopurtem nem angatetdaktsütsüla.

Co-Pastors Mapa Lemsaba (Division of Responsibilities)  

Co-Pastors mapa lemsatepba nung tongtibangbaji sayutsüngitsü mapa ya lir. Sayutsüngiba ya Pastor ka atema tongtibang teinyaktsü mapa lir. Iba mapa ya lokti-i anguba mapa. Anungji Co-Pastori iba mapa ya teyongi alemer. Yamaji lokti nung aikati ngua shilem agiba mapa teyongi lemsaba ajanga nüburtem nem Co-Pastorji ka temaba mesüra ka tekübokba ta masü, saka kasa jenjang ta nübur nem mapa agi metetdaktsür. Meeting tapu balala nung lenitsübaji pastor ka teinyaktsü. Iba shilemjia teyongi lemsar. Kechiba süra kati dang iba amala meeting ketang süra iba Pastorjiang tongtibang ta nüburtemi mebilemtsü atema teyongi lemsar. Kiboksem, shiranger semdangtsü, sati kuli, asü-pila sentong, amala mapajia teyongi lemsar. Arogo staff management aser rongsen lemang bushiba mapatem-a Co-Pastors jagi teyongi lemsar. Yamaji Arogopur kari tasüngdangba kar lira shiba dangi aotsü aji jangja jangja lateta yutsür. 

Arogo shia pastor dak nungi aginüba aser imlabaji balala lir. Anungji na koba arogoi tenzüktsü aja, iba arogo tang nüngdakbaji kechi ibaji asüngdangtepa Arogo menden den tongteper Co-pastors sempet meteta mapa lemsar. Arogo ka nung Co-pastors inyaktsü mechi Co-pastors jagi küna mapa yamai lemsaner ta proposal bener arur ta ashir. Saka arogo mendeni ibaji reprangdanger yamai langzü, tetenzük nungi Co-Pastors anaprongji jenjang saku ta angatettsü mechi inyakyimjia yamaji saku lemsateptsüla. Yangi tongtibangtibaji kinungtsü jagi mezüngbuba arogo nung sayutsüngitsüla. Office tulubaji kinungtsü nemji agütsütsü junger. Ano arogopur rongnung tebur jenjang temaba ta bilemerjia lir asünung iba amala tangatetba melenshitsü atema, mezüng yongi Co-Pastors anapronglai shilem tongtibang saku lemsatepa inyakba den ita sen saku agütsütsüla ta arogo mendeni Co-pastors dang langzüa zülu. Iba otsü nung ya asenok tangazüktsü aika lir ta bilemer.    

Tenzükba Mapa Arrtsü (Professional Boundaries)

Tenzükba mapa aser nija taküm ana tsüngda arrtsü tajung tetenzük nungi lateta alitsüla. (Establish and maintain proper work and life boundaries from the beginning). Toklanga tenzükba mapa nung iba ya kanga tongtibang. Ano apuani Co-pastors inyakba mapa nung iba amala arrtsü ya kangasa tongtibang ta teinyakdangeri langzü. Mekümdangra pastortemji arogo mapa dak alaka nija mapa kecha mali ama arogopuri bilema imlaba ajanga toklang tenzüker shi nung lular (ministry burnout). Iba amala nungi kümzüktsü meji, mezüng yongi arrtsü (boundaries) tejangja latettsüla. Tetezü tanga mapa nung inyakertem office hours maintain asüba ama toklang tenzükertema iba amala mapang lateta arogopurtem nema metetdaktsütsüla (emergency situation inyakyimji balaka). 

Arogo aika nung co-pastortemi full time pastor ka ka ama inyaker aser arogo kar nung half time ana semteper full time ka ama inyaker. Anungji Co-Pastors anati week-days office hours lemsateper aser Deobar (Sunday) anogobo pastor anaprongla lokti sentep nung alir. Aser sendong nung maliba ajungben mapa kar asoshi pastor nübo nüngdakba mapa arura; shiba office nung ali iba pastori item mapaji agizüka inyaker.

Establishing clear professional boundaries dak sentakba ano tongtibang kaji ya; Arogopur aser Co-pastors na tsüngda taginüba aser inyakyim nung telemsa madoktsü asoshi tetenzük nungi arogo inyakyim jangja jangjaa metetdaktsütsüla. Ano nisunger yimya asünung arogopur kari Co-Pastors tsüngda tetoktep adokdaktsütsü mapa inyaktsü, saka Co-Pastors aser arogo mendeni iba amala sendong nokdangtsüla. Kechiba süra iba amala mapa ajanga arogo nung teraksa adoker.

Co-Pastors nungdakba arogotemi temetettsü

Arogo kobai Co-Pastors jatir anaprong nem tenzüktsü ajaba kuli tejangja agütsütsüla (clear and equal terms of employment must be provided to both co-pastors by the congregation). Arogo menden aser Co-pastors na tsüngda tangatettep tajung aser tejangja alitsüla. Arogoi Co-pastors nungi kechi imlar itemji jangja jangja Co-pastors den lemsateptsüla. Arogopurtem den Co-pastors inyakyim tejangja lemsatepa asenok taginübatem angatetdaktsütsüla. Aser nübu anaprongji jenjang saku ta arogopurtem nema angatetdaktsütsüla.

Co-Pastors inyakyimji asen nüburtem atema tasen asünung nübur aikati iba amala lenisüba parnok nükla aser shisatsü agi metongtettsü akok. Anungji tetsür aser tebur saku Tsüngrem tenzüktsü aja ta asüba tangatetba den tetsür pastor inyaktsü tajung ta angateta agizüktettsüsa tesayuba tajung Arogopurtem nem agütsütsüla. 

Co-Pastors teinyakdak purisa ashibaji, co-pastors inyakyim ya joko talangka inyaka arur asünung iba sannükba model ya kanga junger. Tenzükba mapa ka lemsatepba inyaktsübaji temoatsü aser tanela anir aruba mapa nung iba ama teka amteper lemsatepba inyaktsü angazükdaktsütsü tim. Apuani iba ama sannükba mapa nung teka amteper inyakba ajanga Tsüngrem mesüka yangluba tebur aser tetsür nati tena nem agütsüba sempet balala amshia Mosa aser Aron ama, Paul aser Barnaba, Paul aser Sila ama, Yisu nütsüng anana Osangtajung sangdongtsü yokba ama, aser Priskila aser Akula ama, teka amteper kati ka ajongmesoa Tsüngrem tenzükba ajanga Tsüngrem sentsüwangshidaktsür aser sannükba mapa nung merongjeni tsüratema tenzüker ta parnok teinyakdakpuri langzü. 

Otem

Laishiba otsütem ajanga tenzüktsü ajaba nüburtemi parnok tajaba nükjidong atongtsü mechi teka amteper pei taküm sama metsübui tasü ita Tsüngremi tenyaba mapa inyakba asenoki nguogo. Iba ocet azünger kari Co-pastors yabo asen lima atema masü ta bilema alitsü akok. Inyakyim tasenji aika nükla agi metongteter. Chiyungtsü tajung ka indang tebang agi rarsaa ashiba agi tangashir-i iba chiyungtsüji ajung majung meshitet. Menakdanga chidang nungang ajung majung metettsü aser shitettsü. Iba amaji, sannükba mapa inyakyim tasenjia tangaribo tajung ta amshia arur. Asen lima arogotem nunga ibai inyakdang nungang ajung asü majung metettsü asünung asenoki meinyakdangi obendang magütsüi inyakdangtsü ta asüba tanela nung arogo karibo mapa küma inyaktsü merangtepdi ta ayongzüker. 

*****