~Maong Jamir

Pastor kibong akümtsüla, kibong külemi alitsüla

Yimtsüng Arogo ka nung kanga dang bendanga agütsüba aser sempet akaba lanur Pastor ka liasü. Pastor kija ali majung ta Arogoi kibong akümtsü asoshi Pastorbaji kangasa ajungshi. Küm ishika lir tanga yimtsüng Arogo ka nung inyaka aliba tetsür tajung ka pai agi. Arogo temzüng nung Pastor aser kinungtsü külemi alitsüla ta ali nung; kinungtsüji la mapa toktsür arua kinungpu den ali. Kinungtsüji tekolok tajung, degree tajung akaba, sempet akaba tetsür ka liasü, saka arogo ozüng ajanga la mapa toktsütsüsa aküm. Lar arogoi la nübu meyoknüseta sodi agütsü. Kodang la tebur arogoi aru, la mapa maka aküm. Arogoi apuani külemi liang ta asüba dak alaka, la asoshi mapa magütsü. Tanga lima nung Co-Pastor ama laa amshi nungbo koda jungla ta temeteter karibo shidang saka arogopuri mangatet aser mapa küma meinyaktet.  Ita sen magi lai tebuba yaria tenati külemi iba Arogo nung amangbapur  ajak temulung süa jangratema inyak.

Tanur school-i aotsü tenzükba

Küm ishika lir tena nem tanur tebur tajung ka moatsü. Iba jabaso küm 4 ajungdangbo Schooli yoktsü asoshi tena kanga shisabulua liasü. Tanur kong züngdaktsütsü? Boarding school tajung ka kong Pastor aser toklang tenzüker chirtem ajak sadok sadoka züngtettsüsa, Impur mesüra tapet jaka ka nung ali nungbo koda jungla ta tena jembi kechiaser iba khuretji yimtsüng nung tenzüker ajaki ajurur. Tenati par jabaso tangar meneba education tajung ngudaktsünü. Saka yimtsüng nung school tajung mali aser tanga town ka nung züngdaktsütsü asoshi tashi agi mokoki liasü. Pastorba aser kinungtsü asoshi shisabulu tulutibaji tanur education and rongsen kong nungi angutsü ta asübaji liasü.

Tanur education asoshi kinungtsü yimtsüng doktsür aoba

Arogo temzüng nung külemi alitsü ta liaka; Pastor aser kinungtsü talangka lemteper, tanur tajung kümdaktsütsü mechi, kinungtsü aser jabaso town ka nung oa lidaktsütsü asoshi lemtet. Ibaji dang masü, Pastor itasen tila asünung tanur fee aser tanga nungdaktem meperitsütet; anungji kinungtsüi kinungpu itasen den sema shishilemba mapa tila ka inyaka tanur züngdaktsü. Shishilemba mapa tila kaji tangar ashiokja inyakba mapa ka masü, saka kanga dang ochi shia aser meranga inyakba shishilemba mapa ka liasü. Iba tajangzük ajanga ki para peria aru. Saka theology zünger, pastorba kinungtsüi business inyaker na ta tilua jembitsü.

Pastorba arogo toktsütsüsa akümba

Küm ishika lir Arogo nüburtemi nemnemtsü tenzük; Pastor aiben yimtak malir, aser kinungtsüa tanur sodi mapang nungbo arutsüba sür nung marur, business nunga temulung tali agütsü; pastor kibong külemisa ali tajungba;  Pastor kinungtsüishishilembaba mapa inyakba ya tai; aser ali rongsen kanga arishir ta tilua jembitsü. Mapang shia meeting nung Arogo tenzükertemi Pastorba dang o tamajung odia ashi; ibaji dang masü nüburtemi yamaisa jembi: “Tsüngrem tenzükerji timtema alitsü asoshi jatet saka Pastori ibaji mangateter”. Saka ita sen tila asü nung Pastorba kibong kanga timtema liasü. Pastorbar kibong balala aliba ajanga timtem, rongsen agi timtemba ngua, tesayur kati Mizoram nung kinungtsü aser kinungbo külem alitsü ozüng lir, anungji kinungtsüji mapa meinyakra Rs. 15,000 wife allowance ta sür agütsür. Ibalaji arogoi awashi asür masür ta asüngdang nung, ajibo pongmang amai ta langzü. Children education allowance lir mali ta asüngdang nung ajibo anüngdang pongmang amai ta menütepa jembitep.

Pastorbai aiben nüburtem dang par kibong timtem angateta ashitsü asoshi merang, saka nüburtemi pa dang aitsüa liasü. Anungji tanur tangar menepa shisaliok tajung ngudaktsünü yong, tanur aser kinungtsü yimdaki arudaktsütsü melena,  pa mapa nungi anentsü asoshi lemtet.  Yamaji, temulung shirangseta ni kechi inyaktsü, koma kibong liyonga aotsü ta terata tulu nung Pastorbai pa mapa toktsür iba towni arua ali. Saka Pastori pa tajaba aser mapa tejangja angateta liasü; anungji iba town nung Arogo tenzükba wadang nungsa mesüaka, pa dak sempet tajung ajiteta Khristar wadang ka nung mapa angu. Pa kinungtsü tena mangdang ama tanubusangji shisaliok tajung ngua tulur ka aküm. Tanü Nagaland Government nung ochi shia tenzüker rongnung ka lir.

Yimtsüng arogo nung tebilemtsü

Pai toktsür aruba Arogo nung iba sülen Pastortem shingia küm talanglang meinyaktet. Kechiba süra pa ama Pastortem ajak tanur shisaluyim angutsü mapang nungbo tetsükdaktsü alua, Arogosa toktsür ao.

Iba Arogo nung talanglang melitetba kuli:

  • Yimtsüng nung aser yimtsüng anasa School tajung mali;
  • Ita sen ajemra nungji Pastori par jala jabaso education tajung ngudaktsütsü Hostel ka nung meyutet;
  • Yimtsüng toklang tenzüker chirtem arua züngtettsüsa boarding school tajung asen lima mali;
  • Tsüngrem tenzükerbo timtema dang alitsüla ta tangatetba ka lir;
  • Shishilemba mapa ya temenen mapa ka amai repranger aser angateter;
  • Arogoi servicebo aginer saka facilitybo agütsütsü kanga nungnanger;
  • Unemployment indangbo jembir, saka yimtsüng nung Pastor inyaker mali.

Asen Ao Arogotem; talisa yimtsüng Arogotemi Pastor aser toklang tenzüker kibongtem asoshi shishia bilemdangtsüla. Iba jenjang nung dang lira, kenü anogo yimtsüng Arogotem nung Pastor inyaknür malitsü. Iba ya tajaba mangatet ta masü, mesüra jenjang tajungba aser sadoka alitsü asoshi bushiteper ta masü; saka tanü tetoktepba lima pei jala jabasotem tarutsü asoshi shisadangdang towntem bushitsüsa akümer.  Tsüngrem tenzüker chir ka ama tanur junga anitettsü aser alima senso tajung a küma anitettsüba aser ochi shia tenzükdaktsütsübaji tsürabur ajak khuret.

Tenzüker sodi meshiangni ta nüburi yonga ataba

Arogoi pastor/toklang tenzüker ajak touchia yutsür ta mangatettsüla. Arogo aikati tenzüker lemang balala nung yaria arudagi – gari, ki angati, jang, telephone, newspaper, shirangdang awashi, yamala mapa tajung aika inyakba lir. Hau, tenzüker karbo responsibility, commitment mali, lesson junga merenemba, züpa züpa tenzükba tenzüker aika lir. Rongsen nung temulung agütsüba tenzüker, tangar majung dang jembitsüba, pei tai hau ta magizüktetba, tangari ashiba magizüktetba tekong temerang tenzüker aika lir. Ajak den saku, nüburtemi meimtsüsa litet nungbo teyari balala angutsü lemang aika lir sür jakla majungba agi kodangang sodi meshitsüaji ta nüburi yongya ataba aser timtemer ta ajitetaka arogoi odang doktsüba, kiyongeri odang doktsüba aika ajangshia aruogo. Tenzükeria nüburi meimtsüsa ni tenzükdar ma ta shisadangtsüla.

Lungjemer inyakra iba tebilemtsü koktet

Saka yangi tongtibang ka shinübaji, tanur education ya lir. Yimtsüng nung alirtem chirtem aser arogo nung tenzüker chirtem asoshi khuret tulutibaji koda sür tanurtem shisa riju tajung nung tangar menepa züngdaktsütsü ta asüba ya lir. Dimapur, Kohima aser Mokokchung nung alir tenzüker chirtem asoshi tebilemtsü mali. Putu ka nung arogotemi English school yimtsüngtem nung lapoktsü merangdangogo, saka tamakok alua aika shibanga ogo. Jurila yimtsüng arogo kati boarding school tajung ka, kong toklang tenzüker chirtem teyari agüja züngdaktsütsüsa lapoktsübaji tamakoktsü, saka arogotem lungjemerbo akoktsü. Yim ishika lungjemer yamai inyakdi ta tangatetbai anünga liradi. Lungjemer noktakdi ta süra, foreign lima, India lima balala nungi arua züngtettsüsa Ao arogotemi inyaktettsüba tashi lir. Mungdangia koka lir.  Iba mangdang asoshi ajaki sarasademdi. Iba mangdang dakji alaka akok nungbo toklang tenzükertem asoshi pa/la itasen dak alaka, jala jabasotem kaketshisatsü asoshi teyari agütsütsüla. Zünger alir kinungtsü mesüra kinungbo mapa doktsür külemi alitsüsa kümra “Co-Pastor” ama shim nung ajungtsü. Yamaji mesüra spouse allowance agütsütsü junger ta ajiteter. Aroka shisadangdi. 

*****