(Introspection in bringing about a social change today)

~ S. Temjen Imchen, Jorhat, Assam

Okila:-

Tanü asen putu tensa nung Covid-19 wara ajanga, alima rangpen nung, lokti, kija aser kibong nung temelenshi balaka bener arutsüogo! Iba indang anogoshi asenoki kilung nung, lokti ajak nung jembir aser taneptsü lenmang bushiteper! Ajidang masü, asen meimchir temang anepaluba yimya (all-round healthcare system) nunga temelenshi tulu ka bener arutsüogo. Saka, iba temelenshiba nungji, meimchir timtim toushi aser tasüba jenti ajuruyonga odagi. Iba wara tesashi ya kodang-ang anentsüar ashitsü makok. Kasa mapang nungjisa alima aser lokti tulu-tila ajak nung corona wara mapang aser ano post-corona wara sülen kechi inyaktsü ta shisatokden electronic media sabang balala tat: TV channel, webinar, WhatsApp group, Facebook ajanga shilem jenti agiba angur. Item sabangtem nung jembiba nukjidongji kodasür asen lokti takutsüngsen (social rejuvenation) bener arutsü ibaji ka lir! Terajemba nung angatetsü mechinung asen Aor lokti nunga nukjidong tajung yur shisadanger aser inyaktsu mulungteter ibaji tatsü agi reprangdangdi. Temelenshi asoshi kechisa lemsatepdir mesüra jembidir, ibaji tajung. Saka, kechi onüktemsa jembidir jembiang, ibaji  ochi mulungsentsu agi, asen telongjemba aser terenlok nung aotsü nukjidong yur lemteptsula aser yamaji inyaktsu junger ta bilemer. Electronic aser social media sabang balala nung teintetbor telok, lanu-asensor telok aser lokti tentet balalai asen lima nung temelenshi ka bener arutsü mechi nung meranga inyaktepba indangji ken reprangdangdi aser nisung shia shilem kechi, ibaji tatsü agi shisadngdi.

Electronic media nung lanurtem aser taintem sensaksem akaba nükjidong

Lockdown mapang nung television (tv) channel, Facebook group, Webinar, WhatsApp amala nung telok-telok tenteta alima nung temelenshi bener arutsütsüba indang onük jenti lemsatepba angur. Alima aser lokti osangtsüsang angudak sabang (social media) nung o-lemsatep akaba nukjidongji corona wara aser lockdown-i bener arutsuba temelenshi balaka indang jembir. Yimya agi, micro-social media platform/WhatsApp telok ka nung züngsem 10, 20, 50, 100, 200 aser iba tema agi tenteta amshir. Ni-a iba ama lokti ishinaka ka nung tena lir. Ano, asenok Aor züngsem dang aliba teloka jenti lir. Iba nungji tener anogoshi alima nung tatalokba otsü, kiji-kina, kiyonger, kinunger, aser medemertem osang yak-yakta agitepa aoer. Social media nung anguba osangtem den, ano maneni anogoshia mesüra mapang aben, iba sabang nung onir-i tongtipang onük ka-ka benoka o lemsateper. Iba social media telok ya 2020 national lockdown mapang nungi tenzük aser tang tashi aoer. Iba sabang nung tashi-temeteter aika lir: secular teachers and theological educators, journalist züngsem tajung ka-ana jika, yimten-yimli lenir kar, mungdang aser arogo nung tenzüker, missionaries and freelance evangelists, mungdang aser arogo tenzükba mapa nungi sodi agir alirtem (retired persons), item amala nubor densema anogoshia züngsem kari/onir-i benokba onük ajakji tatsü-talang ajakji jangratema o-katüper/lemsateper. Iba Whatsapp group nungji tongtipang telok ana tena lir. Itemji: lanu-asensor telok (youthful members) aser tainbor telok (seniors). Tatsü agi iba telok ana indang ji ajidangdi.

Lanu-asensor teloki social media nung lokti temelenshi indang lemsateper

Tanü asen chirnurtem – talisa lanu asensortem lokti osangtsüsang angudak sabang (social media)nung mapang timba indokba angur aser jembir. Lanurtem group discussion koba social media sabang nung agir ibaji group analytical approach tsütsü nungi angatetsü meranger. Social media impact indang before covid-19 tensa nunga tebilemtsü ka amai jembia aru. Jebnüa alidang maoktsü ama, covid-01 aser covid-02 jagi social media platform amshibaji ‘new normal’ yimya ka amai kümdaktsüogo. Idakji mapa tajung aser tamajunga lir sudi. Tajungji ya – school aser college student ajak online-class iba sabang ajanga agir. Iba nung assignment/homework kaketshiri inyakbaji information technology (IT) madak tongtipang terenlok akaba kaji asütsü. Tesayurtem-ia computer aser Whatsapp anapronglaji evaluation mapa atema amshir. Asenoki dang social media-nung mapang shitak amshitetra, information technology ajanga lockdown mapang tajangzük tulu bener arutsuba asenok tenuk kuli. Joko, IT terenlok aser electronic gadgets mekai asenok taküm melitetsü südi. Kopika yamai aotsü asenoki tang, tangbo meshitet! Saka, kümdanga lia asen taküm kümzüktsüla! Asenoki metet, IT terenlok nungji social media platform balalatemji sentaka lir. Ibaji majung ta meshitetsu! Saka ya shiteter – mapang esap mesüi amshiba ibaji tai!!! Asenoki ibaji meteta lir aser anosa asen chirnur aser lanurtem dang sayu-bentsu asütsü asenok tsürabor aser tesayur shilem südi.   

Iba putu tensa asen lanur-asensor telok dak aketba yimya aser jaklaliro tajung kaji ya lir – kechi osang ngudir aser onük jembidir, parnoki yak-yakta dang lokti sabang nung lemsateper. Asen chirnur aser lanurtemji takotet tazünger tasa. Social media ji ajaki amshir. Talisa, high school nungi tenzüka college students tashi; Government officials, tesayurtem, Govt servants, doctor aser nurse tem, sepoytem, NGO staffs, frontline workers, common citizens, item telok ajaki pei nüngdak nung amshir. Tanübo phonecall masü, Whatsapp messaging ang tekaratiba aser temelaba amai amshir. Ibaji cost-effective aser kanga tezüba.

Lanur-asensor rogo nungji tazüngertemji Graduate nungi tenzüker, post-graduate aser doctorate degree holder tem tesa lir. Parnokji secular teachers, laishir-rogo, arogo nung tenzüker, free-lance missionary aser evangelist-tem, theological educators, aser item mesükba nübortem. Item lanu-asensor telok dak aketba yimya tajung ainaka lir. Lanurtemji temulung aser shisatsuji teindang aser tesadem (straightforward and open-minded); parnoki metet asen Ao kinji tashi-temetet, meranga inyakba aser yimlibilema aser taochi sayutetba kin ta bilemer; asen Ao kin ji telongjem aser terenlok nung aoba kin ta metet; asen nubor ji sobaliba nung kanga takang; pei-pur bendanger madak aser bendang lima nung mapa inyaker mesüli tazünger asüyonga kanga keta sentepa-yaritepa liteper. Kong lidir liang, lanurtemi longjema dang alir aser linur!Ano külen, kodangsa o-lemsapang nung atenshia o lemsatepdir, parnok timbakati shilem agir. Shisatokden mapang nung jembiba onuktem itemi lir: Covid-wara indang; iba alima rangpen wara sülen kechi inyaktsüla; clean-election campaign; Nagaland state nung ochimashi mapa inyakba (corruption); Ao Baptist Arogo Mungdang (ABAM) i lokti aser sorkar yariba maparen; Arogo inyakyim; Baptist tamangba temzüng aser maparen; pastor aser co-pastor koma inyaker iba indang; pastor itasen; tangar aser aseni Tsüngremer tenyaba mapa koma inyaker, item onuktem benoka iba sabang nung sensaksem tajung akar. Aiben o jembirtemji theological educators tem asür. Ano secular professor temia jembir. Iba sabang nung o jembirji aiben international aser national level nung nungtoko laiputishir aser shisashirtem, aser voluntary organizsation/NGOs nung inyakertemi jembidaktsur.

Temalen agüja aliba onuktem jembidang, teti nung lanur tesayur aser tenzukertem yagi shilem agir aser shisatsü agutsutepa dang aoer. Lanuyim tesayur aser laiputishirtemji tashi temetet tajung nguteter alir aser tekaraburtem asünung, jet-jet ta dang (fast-thinking) onük ajakji angateta aoer, jembir aser lenji oa dang sensaksem akar. Tasa (idea) kar bo tejen, karbo tasen benoka jembir.  Discussion mapang nung lanurtem tsüngda obang-mapu kodanga madoker. Give-and-take yimya nung aoer. Ibaji yimya ji kanga tajung! Iba den külemi, tejembiba onükji osangkaket (Newspaper) nung adokdakja aser social media balala nung prokshia ano tangar a züngdaktsur. Iba osang prokshiba ajanga, asen Aor lokti, Ao Senden mesüra ABAM sabang tashi tonga tua temelenshi indang jembiba metet pelateptsu junger ta bilemer. Intellectual telok ka – through any social media platform – nung kechi lemsateper iba indang metetpelaba aser tongtepratepbaji mapa tajung aser terenlok mapa!

Tain teloki o-lemsabang nung lokti temelenshi atema shilem agiba:

Social media platform (for e.g., WhatsApp) nung tainbor telok(senior folks) koba nung züngsem ainaka tena shilem agir, ibajia lokti temelenshi asoshi lir. Lokti nung takutsüngsen bener arutsü inyakba nung shilem agirtemji nisung kar secular teachers, bangdak yimsusur, laishirtem, arogo nung tenzüker, journalist nubo tajung kar atenba, aser mapa nungi sodi (retired) agir alirtem jenti tena lir. Ni iba o lemsatepba ya group discussion koba social media sabang nung agir ibaji analytical approach tsütsü nungi angatetsü merangdi. Tejembiba onük ajak nung item tainbor-i shisa tarok aser tajung agütsüyonga aoer, ibaji junger. Saka, parnok dak timtim kaji: jembiba dak alaka melenshitsü tasak!!! Temalen agüja aliba onük tajungtem ajak lockdown mapang nung anogo munga züngsem ainakati shilem agia lemsateper. Lanu-asensor memesuk, tainbor telok timba kati sabang nung anogo, hapta junga, aser ita piyong onük tajung aika jembia aruaka, teloki kodang kechi inyaktsula (to suggest proposals) ta asüdang, parnok ishinakati practical nung nungbo meinyaktetsü ta shia noktanga (suppress) ayur! Hau, atangji print media ajanga zülur aser osang kaket nung adoktsur aser azünger. Ibaji tatem asür. Tangatetsu kaji ya: sabang nung jembidang teintet-rogotemi opang mapurjia adoker, ibaji shisatokden yimya. Saka, sensaksem telok nung tajitetba kaji ya – züngsem karibo lanu-asensor shisashirtemi ashiba o-jang kata mepaidoki dang langzur; pei metetbaji dang absolute truth; kum noklang ka tain lokti aser arogo tamang aser inyakyim ji dang noklang nung noklang shitak ta bilemer aser shioktsur; temetongshi o magizuker; aser item amala aika lir. Temelenshi indangbo jembir, saka asen taküm yimya aser lokti nung temelenshi atemabo meinyaktsu ta bilemba angur. Ibala ama jakla aser mulungsentsu yabo melenshitsula. Ano timtim kaji, tainbori tanubortemi ashiba o magizukteter; tejakleni oya alirtemji sottsu meranger, mesüra tenuk meremer; akumtsubutep mali. Ken-kenbo, ajia adar tayang kübzükteper. Aya, yamai süra asenok koma alima dangi lokti nung takutsungsen (social rejuvenation) bener arutsütsü ta bilemer! Ajak masü, nisung kar lir! Alima yanglushinüra, tangar o-a angatsula tim; alima yanglushinüra, temetongshi o agizüktsüla. Iba o zulu ya group discussion koba agir ibaji analytical approach tsütsü nungi angatetsü merangogo.

Temalen lemsatepba onük nung ajemdaker, kü o-mulung ishika idaki lepshia agütsür. Lokti temelenshi bener arutsü merangba nung shilem agir ajak: teintetbor aser lanur-asensor shilem agitetsü lenmang aisu nung langur. Lokti temelenshi ka mesüra mapa tasen ka inyaktsu merangba nung ajak longjemer aotsüla! Iba nungji tarishitep agi masü teyimlatep, tesempatep masü tazüzüktep, telemsatep masü telongjem, tekirak mulungsentsü masü ochi mulungsentsu, asüküm masü ajemalu, sempatsü melena temeim mapa inyakba, itemjagi lokti tejakeni anir. Nukjidong tajung yur, tenla ki sabang (pulpit) nungi dang masü (when the regular gatherings are temporarily suspended), saka tanü social media platform balala nung debate tajung akar aser iba sabang nung o-lemsatepba ajanga tanü alima tongpang tulujia kokteta bener otetsu! Iba nung nung telongjem, ochishi mulungsentsu, teyimlatep aser temeim mapa sayuteptsula ta angateter.

Lokti teyanglushiba nung mapa küma inyakbaren

Covid-19 wara mapang aser iba sülen asenok teinyaktsü mapa aika angur aser lenmangtema sadema lir. Lokti temelenshi indang lenmang aisu nung akaba rongnung, ishika tuyutsü tenüngdaktsü. Tangari ngudaktsütsü osang prokshibaji masü (not show-off news and activities), saka temelenshi aruyimji mapa tila kar inyakba ajanga tenzüker. Nisung ka dang-a ajangzukba mapajia  kanga tongtipang. Ano, taka-taiteribo mapa tulu atemzuka inyaktsu akok, rongsen tenlaba ajanga. Tangar dak temeim mapa agi tangshia inyaktsu senti mapangji tang ya lir. Lenmang pungusü nung bilemdangdi:Sayutsungiba ama mapa küma inyakba (practicing what we preach)

1. Sayutsungiba ama mapa küma inyakba (practicing what we preach)

Asenok tamangertemi laishiba nung sayutsungiba den külemi mapa küma inyaktsüba indang tesayuba jungjunga shia angur. Osangtajung Mathi 23:1-12 nungji Yisui tezülurtem aser Farisitem aitsüba shia angur. Yihuda nunger lenirtem jagi Mosa ozüng nung kechi shia ali item ajakji kanga junga metet, saka mapa maka! Idangji, Yisui parnok aitsu “kechiaser parnoki jembir, saka meinyaker” (v.3). Tanua kesaji Naga lima nung arogo aser lokti kari langpang nungibo kotaki tangsa ayipa atutsu amai sayutsungir! Ajida asüyonga, mapa mekara tamang kisungji tasü den saku (Yakob 2:14-26). Sura, itemji anemsübapurtem asütsü. Khrista sülen anidaker asoshi ya tongtipang –  Mathi kaket nung zulua aliba ama Yisu ji asen tatishitsü kümdaktsür, Pa sülen anitakdi. Asenoki jembiba aser inyakba jagi asen tamang jagi sayutettsula.

2. Ner lokti nung angati agütsüba (volunteer in your community)

Arogo aser lokti nung shisatokden akaba aser telemtetba tajung agiba metsüji asen jakdang tenuk kuli lir. Asen Dimapur yimtiba nunger alir Aortemi temeim mapa aiben inyakba ngua arudagi. Iba nungji, asen Nagaland state nung lokti aser arogo balalai – talisa Dimapur Area Ao Baptist Churches (DAABC) aser Civil Societies (CSs) ajanga covid wara tongpang koktetsü mechinung tenla sen, chiyungtsu teperi renemer frontline workers tem nem Dimapur yimtiba tesem balala nung lockdown 02 mapang nung inyakdagi. Tesüiba küm lockdown 01 nunga item lokti yagi kanga junga teyari mapa inyakogo. Ibala temeim aser teyari mapa Arogo mission board ajanga inyakba dangji ‘langpang nungi sayutsungiba ji mapa küma inyakba’ rongnung ka lir ta shiteter.

Angati oagi mulungsoa nungdakbapur nem teyari agütsübaji Yisui sayuba nung mapa küma inyakba mapa ka asütsü. Ibajia kotak lenmang!Menürem jakden!

3. Menürem jakden!

Menüremba jakden (smiling face!) ya meimchir yimya tajung rongnung ka lir! Iba ya nai mashi mapang ka nung inyaktet, idangji tangar dang meteti temeim mapa sayutetba atar. Na aliba anasa ner kiyonger dang, kiji-kina nung timtimba pur, covid-19 wara i shiranger ka, shirang tapu kati shirangbapur, matamapensar, mesüra makamaitba pur dang teyarisa magutsuteta kasa, oda nai parnok sui-supong dang kodang parnok ajurudir menurema jembibajia tuluka! Nisung ka kodang pela-a lidir, idangji la/pa anema alitsü (ta research ka ajanga ashir)!Sarasadem tashi

4. Sarasadem tashi

Lokti nung temelenshi bener aruba nung na aser kü tamang sarasadem aser rongsen agi yaritet. Meimchir telok aser lokti nung kodangsa timtim-toushi – tat.agi, covid-19 wara, ajurudir asenoki mezungbuba nung timtimba pur asoshi asen Khristan tamang agi sarasademtsur! Anitet 32: 11-14 nung asenoki Mosai sarasademba angur. Israel kin madak mezungpur Tsungrem ainkar aser putir Tsungremer mulungjanga melenshitsusa sarasadem asu aser Mosai mepiba Tsungremi anga. Yihusua-ia pai sarasademba nung, anu meludaktsui noktakang ni ta sarasadem (Yih.10:12-13). Tetsur ka tamang indang ano lai-o nung shia angur. Hannah-i tanur ka meshia Tsungrem dang mepi aser angu (I Sam. 27), maneni lai-o nung tatishitsu anosa zülua angutsü

5. Rongsen teyari

Sarasadem den külemi, ano tamang tenla rongsen ajanga na aser ni agütsütsü tanü pesaprongba tensa nung lenmang jenti nung angur. Sorkar-i madoksai inyakra, mesüra ochimeshia inyaka nebur nem sen aser rongsen agi Govt aganecy ajanga meinyakra, idangji asen lokti nung taka-taiteri rongsen agi sensaker, alaashia alirtem, shirangbapur aser parnok kibongtem yaritet. Ne rongsen tenla ji Re. 1-Rs.10, Rs.100-Rs.1000, mesüra lakh menden nung aser timba-a agütsütsü akok. Iba tenla sen amount ji kwi südir süang iba jagi, shiranger ka mesüra timtimbapur ka yaritet. Ibajia Tsüngremer tenyaba mapa inyaker ka asutsu.

O-tempang:

Lokti nung temelenshi ka bener arutsü atema kija, kibong aser lokti balala aser arogotemi temeim aser teyari mapa inyakba ajanga adoker. Tanü covid-01 aser covid-02 wara ajanga alima nung alir ajak dangi timtim toushi aser tasüba jenti bener arutsüogo. Iba wara ya alima Tongpang tasembuba (world war III) amai lir! Ibaji shitak, kechiyong iba wara tesashi yagi alima rangpen nung kija, kibong, sorkar, aser lokti ajak menüpatok, ibayongji meimchiri taneptsü bushiteper! Iba pesaperong tensa aser mapang nungji iba wara tesashiji tetsübu-dang metsübui, meimchir lokti ajonga nung teimlatep, telungjem aser temeim mapa agi inyaktsüla aser ibaji dang lenmang. Iba lenmang ngutettsü atema, sorkar den yaritepa ano social media sabang balala, lokti nung sabang kwinaka lir, aser Khristar arogo ajanga lenmangji sayudagi. Ibaji asenok ajak asoshi tepelatsü osang! Anosa, item teyari aser temeim sayuba mapatem ajanga asenoki asen lokti nung taneptsü aser temelenshi ka bener arutet! 

*****