~ Maong Jamir

Jila Arogo ka nung Youth Director ka shimtsü asoshi lemtet. Youth Director shimtsü asoshi Arogo Yindi  mungdang nung tasadangba yamai lateta yutsü:

  1. Pa recognized College ka nung BD mesüra M.Th. azünger asütsüla.
  2. Pa kenten tajung asütsüla, kokra Note shia alir shimtsü.
  3. Kibong maküm aser tebur asütsüla
  4. Khrista akaba asütsüla.

Iba tasadangba nung ajemdaker shimtsü asoshi committee ka shim. Mapang tatsüka lir committee pur ajaki par kinunger, yimer, tsükong tenüngtem bener aru. Committee purtem tsüngda parnoki bener aruba nisung 5 rongnung shiba shimtsü memeteti kanga mangmangtep, kechiba süra parnok ajaki pei bener aruba nisungji dang shimdaktsünü.

Talangka tekolok mangmangtepba jembiteper Wapong Merenba Youth Director inyakdaktsütsü asoshi shimtet. Arogoi lazüka yutsüba tasadangba ajak pai tongtet. Pa kanga tokolok techira asünung M.Th. mezüng menden nung takok anguba nisung ka liasü. Pa kentenmenü nung onsara tajung aser Note kanga junga shia liasü. Aser tema tereprangtsü aser jembishinü nung pa Khrista akaba nübu tajung ka liasü.

Merenba küm tatsüka tenzükdang, pa indang shitakba sentsüji adok. Pa dak tashimaitemji itemi liasü:

  • Lanurtem tsüngda tejak repranga mapa inyak.
  • Külem toklang tenzükertem den meputepteter.
  • Lanurtem den meputepteter.
  • Lanur tebilemtsütem mangateter.
  • Pai mulungba dang inyaktsü meranger.
  • Ajemalu mali; kümli tatsü.
  • Tangar atsüzüktsütsü shisatsü keta lir.
  • Tangar dang junger ta meshitetba jakla ka liasü.
  • Anungdang 10 am meta nunga saker.
  • Sodi tali agir.

Arogo nunger mepelai aküm aser küm ishika tsüngda iba Arogo nung lanurtem jenti tanela sama. Lanurtem arogo nung shilem agitsü mejangra.  Youth Director masü, “Youth dictar” ta nemnema jembi. Arogo tebilemtsütem asoshi pa/la shim, saka pa/laji arogo asoshi tebilemtsü akümer. Süra Arogoi lateta yutsüba tasadangba dak ajemdaker shim masü no?  Süra, koba nung Arogoi aibelen?

Tanü asen nüburtem tangatetbaji                        

Ken junga tenra…Youth Director

O Junga jembira…Pastor (Tetsür Pastor dena)

Tetsür ka o tanep agi  jembira…Child Director.

Tangatettsü

Asenoki meteta alitsübaji ya; Degree, kentenba, O junga jembibaji ‘sempet ter rongnung ka’. Pa/la dak iba sempet keter tanga sempet tuko-ji (9ji) melira; pa/la ajanga loktiji rajang kümdaktsütsü. Ken junga metenaka nisung ka dak tanga sempet tuko aliba ajanga lanurtem tejakleni aniba Youth Director-a lir, Tsüngrem-O tsüngro songa mejembiaka pa/la dak tanga sempet tuko aliba ajanga Arogo tejakleni aniba Arogoa lir.

Tenzüker shiba kechi mapa nung shimdir shimang, tebushir committee-i kanga dang professional süa shimtsüla:

         Yisu Khrista tajangja akaba

         Pei taküm azüoka tatishitsü taküm ka litetba

         Tangar, aser külem tenzüker den amalitepa inyaktetba

         Rongsen, konang bushiba nisung masütsüla

         Tila kümtetba

         Tangar nungdak metetba and timtem toushi nung külemi noktakba

         Mapa tasen asateta arok ajungtsü asoshi inyakba

         Tangari temelenshi/tajungshi o ashiba pela agizüktetba

         Meranga inyakba – zülutsü, jembitsü aser mapa tasen inyaktsü merangba

         Degree aser sempet akaba

Arogo tejakleni taküm aser tanela rangpen liromedema aintsü asoshi tenzüker shimba nung asen Arogotemi khen junga shisadangtsü nüngdaker.

Lai tesayuba:

Gal. 1:10 Kechiyong tang nisung mulung chidaktsütsü ni bushir asü? Mesüra Tsüngrem? Mesüra ni nisung peladaktsütsü meranger ama? Ni nisung peladaktsüra,  ni Khrista lar masü.

2 Tim. 4:3-4 Kechiyong koba mapang nung parnoki adangji sayuba maremzüktsü, saka pei-i anganüba dang angatsü pur küma, pei azüapongba amato pei sasa asoshi tesayur telong telong ayutsü, aser ochi nungi parnok tenarong meyipa otsü dangi mashi leni aotsü; ibala mapang arutsü.