~ Maong Jamir

Tajung dang anganür

Aor dak tajung kaji “yimer”, “pei kibong”, “pei kidong” noksa junga yunüba sobaliba yaa asütsü.  Nisung kari danga “Ao kin”  anema jembira manganür. Aor kar dang meketmeseni amshiba, lendongi yokra, ajaki shishia bilemer aser  jashir. Aor shibai Ao kin anema tenüng menük bener arudir mepilar, ajak nem maaksü bener arutsür amai shishia bilemer. “Ner yimer…” ta luja jembira mesüra yim anema inyakra yim o yim tsüngda lendong adokba otsü  aika lir. Tangari tenüng sanga “nasa tajungba…” “ner yimer-sa …”, “Aor-sa …” ta ajungket jembira ajak pelateper, aser asüküma bilemer.  Saka yimer noksa kümzüka ayutsü mechi tashir-takar, sentsü-bangtsü, aso-ajen tajung dang ajungketra, yimer noksa mechi tekübokba jenjang nung alir jenjang tamajungbai yoktsü; parnok lokti nungi züngtoktsü.

Mungdangi matamabensar anir aoba

Mapang ka nung Khristan Lanur mungdang tulu ka nung adentsü asoshi Youth Directori lanurtem 20 shimtet. Item teshimteter rongnung tetsüng tatsük, aser aso-ajin aser tereprangtsü nung tangar memeneba parnok nisung pezü liasü. Saka parnok pezüji küm tepiyong lanur sentep ka danga mezüdoki adenba lanurtem liasü. Tashi tanga aser Tsüngrem metetba lanur. Ibaji dang masü parnok pezüprongla dak Tsüngremi sempet tajung agüja liasü.

Youth Director ya kanga dang teindang aser Tsüngrem tsübuba lanur ka liasü. Iba sentong nung adeni aotsü lanur shimtsü asoshi Arogo nungi, pur medemertem nungi aser külem tenzükertem nungi tajungshiba aser tetuyuba jenti pa nem agütsü. Nisung shiangaia parnok pezüji aniang, junger ta mashi. Küm tetenzük nung lanurtem dang koba tasadangba nung pai shimtsü aji shir liasü aser iba nungji dang ajemdak.

Pa asoshi tasadangbaji yamai liasü:

  • Küm piyong, anema alidang, lanur sentepi temulung agüja aser jangrabangra arurtem.
  • Sentong nung teti tasü itaa shilem agirtem.
  • Telok mapa nung temulung agütsürtem.
  • Khrista meteta pei taküm azüoka alirtem, talisa achi-ajemba nung azüoka alirtem.

Iba tasadangba nung parnok nisung pezüji tejaklen tena liasü. Saka parnok pezü Aor lanur aika merenmerena atenshidak Mungdang tului anir aotsü aser tetoktepba sentong nung adentsü shimba angashia nüburtem kanga nemnemtep. Nübur nemnemba kuliji “Item sentong nung adenertem ya yimer noksa”, “Par yimtsüng nungbo mabensartem dang” mesüra ‘par yimtsüng nungbo tebor tamajung dang” ta tangari bilemtsü aka bilem. Youth Directori takar chir, sentsü tajung, aso-ajen aser tebor tajung aier-asangji tenüki mangura na ta asatep. Yim noksa yoka achitsüba parnok pezüji shim ta Deacon boardia ashi. Item oji angashia parnok pezüi kechi bilemer lila? Par tsürabur, adianutemi koma bilemer lila?  Saka Youth Directori “Tsüngremi tejak majir”, “Tsüngremi aso-ajem majir” ta langzüa parnok pezüprongla iba Mungdang tulu sentong nung adentsü asoshi anir ao.

Iba kümji tetoktep aika nung par yimtsüngi takok khonang tulu ngua bener aru. Parnok pezü adenbaji par lanur aser Arogo asoshi Tsüngremer temoatsü tulu liasü. Parnok pezüi tangar pur ajateta shilem tajung aika agi aser nüburtem kanga temoatsü ngudaktsü. Item lanurtem ya koyimer? Sempet tajung akaba lanurtem ta Aor ajaki sanga jembi. Yamaji yimer noksa ajungkettsüdang par pezü tsürabur, adianutem koda pelar lir? Parnok pezüa kotetka pelar alitsü? Tsüngrem koteta pelar alitsü? Yimtak nüburtemi nenok tangar memeneper, aso-ajem makar kechi ta luja reprangba tangatetbato yimer rongnung melenshi. Youth Directori alima, arogo nung temelenshi adokdaktsüba ta asübaji aji lir.

Tangazüktsütem

  • Tsüngremer wadang nung tejak reprangra temoatsü mali aser Tsüngrem mepelar.
  • Tsüngremi tashi maitba pur ajungkettsür.
  • Nisung ajak nem sempet balala agüja lir aser iba sempet ajanga Tsüngrem tenüng uludaktsütsüla
  • Taka, aso-ajem, tebor ajung asa inyakba jagi sensaker atsüngzüka yutsür aser yamaji arogoi meinyaktsüla.
  • Tajemrepba nisung ka ajungkettsüba ajanga lokti tangatetba melenshir
  • Tasü ita ochi nung noktakba ajanga na kodanga malutsü.
  • Lokti nung jendoka alir ka tejekleni odaktsüba ajanga teyanglur Tsüngrem toshir.
  • Lokti tangatetba tamajung aser kobala inyakyim ajanga memeteti sensaker, makamaiter atsüngzüka yutsür ibala melenshidaktsü mapa dang Tsüngrem tenzükba ta ajar.
  • Ochi mapa agi alima melenshir.

Tsüngremi Meimchir ajak Pa mesükba nung yanglu

Jaksübangsü, tebor tajung dang Tsüngrem mesükba nung yanglur ta mangatettsüla. Tekolok, shisatsü, tajung-majung radanga metetbaji dang Tsüngrem mezükba nung yanglu taa shia mali. Aor dak tajung dang aginüba jakla ka lir. Tapet training dang agütsürbo mapa tajung aika inyaktettsüba sempet lir sür nung  asen den alir matamabensar aika senzüka yutsür aser khuret ka amai bilemtsür. Tsürabur mesüra tetsü-tobou temenen ajanga atakatem kauba ta bilemtsür.  Ao arogo kar nung ner tanur ya sempet tajunga, anungji sentep nung shilem agidaktsüdini ta asüngdang nung tanuri hai ta süaka tsürabur-adianui nung ta nokdangba lir. Yimer, kibong noksa kümzüka ayutsü mechi matamabensarbo tejakleni anir marutsüla ta mashi tangatetba ka lir. Iba jagi lokti nung maka-maiter, mata-mabensar tebübokba tiai yoker. Tesayur Wati Longchar-i yamai ashir, “Tsüngremi meimchir shia nem sempet balala agüja lir – item sempet dangji Tsüngrem mesükaba nung yanglu ta asüba dangji ajar. Tsüngemi moatsüba sempetji nai/ni koda Tsüngrem sentsüwangshi aser lokti tejakleni odaktsütsü asoshi amshir iba dakji keta lir ta ashir. ….Tsüngremi taküm ajak Pa mesükba nung yanglu – tabensa, tetemjen, tenük-telen mabensar, alima rangpen Tsüngremi Pa mesükba nung yanglu. Anungji taküm ajak senti aser ajak meima aser kümzüka ayutsübaji Lai tesayuba lir.” Youth Director tenüng sangdi aser pai shitak inyakogo, pai inyakba amaji asenokia inyakdi.

Laishiba tesayuba

Lipok 1:27- Anungji Tsüngremi nisung pa mesükba nung tebur aser tetsür yanglu”.

1 Kor. 1:27 – Saka Tsüngremi tashi temetetertem maaksüdaktsütsü atema alima nung shisa makabatem shimtet. Aser tashi taitbatem maaksüdaktsütsü atema alima nung tashi maitbatem shimtet.

T. Mapa 10:34-35  – Peteri tebang lapoka sahi, “Tsungremi nisung jak merepranger ta ni atangji ajiteter. Saka kin ajak nungi shibaisa pa akhüm tsübur aser tim mapa inyaker pai agizüker”

*****