Arogo Inyakyim aser Lenisüba

~ Limatula Longkumer

Iba onük asem-sü küma lemsar jembinür: Arogo, tenzükba yayim (structure) aser lenisüba.

“Arogo” tetezü Khrista dak amanger arok teloki akümba telok. Iba nung ya tetsür-tebur, tanur-tain, takar-sensaker, temenenpur-temeshipur, tabensa-matamabensar kecha tebendang mali Khrista nung ka küma longjemer amanga inyakba telok tentet ka lir. Arogo ta ajabaji Greek ojang ekklesia nungi meyipzükba lir, koba tetezü ajaki longjemer akümba mungdang. Iba mungdang nung Khrista tekolak lir. Elizabeth Schüssler Fiorenza-i ekklesia tetezü ‘Radical Democratic assembly of Equals’ ta lai züluba kaket nung shia lir. Anungji arogo nungji Khrista dak amanger ajak dena lir, shinga jentoka mali, ajak kasasa shilem agitsü aser telongjem nung ochi aser tekümtet mapa Khrista tenüng nung inyaktsüba nungloktsȕba telok lir. Arogo yabo Khristai jatetba telok asü nung, alima sobaliba yimden yimli inyakyim yayimji benoka mamshitsüla, Laishiba dak ajemdaker arogo yabo yangertsüla. Saka tia maka Aoli arogo tenzükba inyakyim nungji sobaliba yimden yimli yimsüsüba yayim aika enoksema arogo nung benshia arudaki. Ibayongji tetsür aser lanurtem arogo inyakyim aika nung mayangi marutetsüsa ozüngtem lir.

Ao arogo nung dang masü, arogo otsüren tatongsenji reprangdangra chuba yimli yimsüsüba inyakyim aika enoka arogo yanger-a arua lir. 16^th century nung kodang King James Version – English Laishiba meyipzük, England chubai ekklesia ojangji mamshi-i Greek ojang Kyriarchy amshitsü ozüng agütsü, kechiaser kodang arogoji lokti akümba mungdang koba nung ajak kasasa lemsatepa alitsü ta südir England chuba tashi ajema akümtsü aser nüburtemi pa anema nokdaktsü amai tsübua bilem. Anungji `kyriarchy’ tetezȕ “kü kibur”, “tesayur”, “chuba” ta tangatetba nungji ekklesia melen kyriarchy ojang amshia arogo (church) ya meyip. Kechiyong Anglican church nung England chuba/chubatsürji highest authority lir. Iba ojang melenba nungji arogo ta asüba noksaji angur koba nung takar, yimsüsürtem temaba jenjang nung aser sensaker aser tilartem teküpokba jenjang nung ta telemsa angur. Iba tangatetba nung arogo structure aser tenzükba wadang amenloker aru. Tanü arogo inyakyim nung tetsür-tebur tebendang lir,  Ekklesia tetezüji aibelena amshidar ta metetdi aser tanübo kodasür iba tetezü shitakba ya arogo nung amshia arogo yanglushitsü iba nükjidongji asütsüla.

Arogo yimsüsüba yayim (structure) koma tenzüka aru?

Arogo nung tenzükba inyakyim yayimji bushidangra, arogo inyakyim ya  tebur yimli aser chuba yimli temeyoktep yimya nung amenloker kümyonga aru (Political and monarchical male structure):

• Tebur yimli yimsüsüba (patriarchy)
•  Alima chuba yimli (monarchical/Empire influence)
• Tebur theology (patriarchal theology)

Anungji Arogo inyakyim ya tebur yimli aser chuba yimli temeyoktep yimya nung amenloker kümyonga aru. Iba kimong (foundation) nung amenloker Lai ratet ajakji iba tangatetba tsünga rateta arur. Anungji iba structure nung tetsür aser lanurtem asoshi sadema tenzükba wadang nung meinyakteter.

Tejen Lai mapang

Yirusalem tenla ki yangluba aser Putir inyakba maparen – tamaren chuba yimli yimsüsübaren  tamangba yimsü aser putir mapa tenteta aru. Iba denji putir sobu-solemtsüjia, talisa temaba putir subotsüji chubar sobutsü denji tera agi dang tajemba lir. Lokti telong junga tamangba yimsü tekülem sentepji Yirusalem tenla ki yanglur külen tenteta aoba angutsü (centralized religious institution and worship). Hau, Tejen Lai putu inyakyim ajakji Tsüngrem tanela ajanga zülu ta shia lir, saka Laishiba ya Kotak tenyartem alur zülu masü saka Tsüngrem nisungtemi Tanela Temeshi teyari ajanga zülu. Anungji parnok sobaliba, yimden yimli inyakyim, yimsü yimpong, oshi aser alima tensa aser nükjidong nung amendaker Laishiba zülu ta angateta Laishiba ratettsüla. Aji masü nungbo Laishibaji meshitaki rateter.

Tasen Lai mapang

Tenyartem putu nung Yisu Khrista dak amanga Pai sayuba tsüngsü nung jajartemi arogo (ekklesia) tentet. Iba ya tamanger telok kecha telemsa makai liromedema tenzük (Apostolic church), kidang telongjem sentep agi (house church), aser parnok ya teimba ka sensakertem aser Yisu nütsüngtemi anir tenzük. Saka chichiba ekklesia tangatetba nung arogo kimong tenzük.

Putu anabuba aser asembuba (2^nd and 3^rd centuries) nung arogo renloka aoba den külemi arogo inyakyim yayimji tenteta ao aser aji nungdak isab nung tenzükba wadang balala tenzüka ao. Anungji Bishop, Presbyters, Deacons aser Tesayur ta tentet aser item yayim nükjidongji nüburtem tekümtet lemang nung timi anitsü meji item officetem tentet. Saka putu asembuba nungbo arogo aika nung Episcopacy aser rigid hierarchical structure tenteta ao.

4^th century nungi Christianity ya State religion aküm, Emperor Contantine-i Roman chuba yimli isab nung arogo inyakyim yanglushi (monarchical church structure with the patriarchal ideologies). Roman chuba yimli ama arogo nung Bishopji tekolak aser arogo achaayangtsü asoshi Bishop dak tashi liasü (Episcopal church structure). Putir tola balaka chuba ama mera keta asem aser putir tolaji Tejen Lai temaba putir tola aser Roman chuba tola nungi agizüka yanglu. Putir tolaji 2^nd century nungi amshia tenzük saka 4^th century nungi arogo ajak nung amshi. Roman chuba yimli nung arogo structure tenzükbaji yamai liasü:

5^th century nungi iba structure nung arogo tera yanga aru, aser 11^th century nungi arogo nung Popeji ajak nung tematiba aküm. 16^th century Reformation mapang nung tera melenshi saka tebur tsünga arogo inyakyim yayimjibo Protestant reformers jagi memelenshi.

Missionary putu nung missionarytem kongisa ao, parnok ajak colonial tawabangba küpok nung mission mapa inyak nungji arogo structure kechi par lima nung liasü iba yayimji bener arua parnoki arogotem tenzüka ao. Aji dang masü parnok British colonial kübok inyak nungji par ozüng isab nung dang mission mapa inyak.

Naga lima nunga tebur yimli yimten inyakyim nung arogo tenzük:

Arogo             Putu Yimten

Pastor             Unger              = Anungji Pastorji tebur asütsüla

Deacon            Samen             = Anungji deacontemji tebur asütsüla, saka tanü

asüng ya arogo kar nung tetsürtema shimoka   odar.           

Mapangsür      Tenyar             = Itemjia tebur asütsüla, saka tawa tanü

   melenshidar.

Arogoji Khristar arogo süaka tebur yimli inyakyim nung arogo structure lir. Iba tebur yimli structure nung ya arogo inyakyim ajak aor asü nung, tenzükba wadang nung arok shilem nungji tetsürtem aser lanurtem arogo nung shilem agitsübaji lemang mesü mesür. Tetsüri ola adoka arok tenzükba wadang alitsü jembira aji tim masüba mapa ama aikati bilemer. Tatishitsü agi, KABA, DABA, MTABA Associate Pastors aika sector shia nung lir saka Ass. Pastor for women aser Youth Directorbo ka ka dang südi. Ano tetsür – associate Pastor arogo nung tenzükba mapa küm nung senior süaka Pastor mapai promote asüba mali, Aoli arogo nung tetsür Pastor mali, temalen anabo inyakdangogo saka tangbo mali. ABAM 150 abensa arur, Executive Secretary tetsür kata inyakdanga mali. Iba tsütsü aroka arogotemi bilemdangtsü nungdaker, Laishiba nung ajemdaker arogo structure yanglushitsüla koba nung ajaki sadem sadema inyaktetsü.

Arogo nung leadership

Leadership theory ana lir aser aji tebur inyakyim nung amenloker akümba (gender theory). Iba lenisüba tangatetba nung tebur aser tetsür lenisüba yimya balala lir ta ashir.

1. Tebur lenisüba: Iba lenisüba yimya nung ya lenir kaji tangar arokmoka aniba tashi sempet lir, tangar den tokteptsü akokba, telok control süteter, temulung temerang aser tashi amshia telok anitsü akokba sempet aketba lenir. Tebur kaji telok ayim ayima aniba aser anishitsüba sempet alitsüla.
2. Tetsür lenisüba: Tangari kechi ashir aji hai ta anitakba lenir, tangar küboki itetba, arokmoka anitsü sempet mali, temulung tila aser tasü mait lenir (Feminine mode of management). 

Iba leadership theory ana nung ajemdaker tetsür lenisüba asadanger. Kodang tetsürtemi leadership agidir, nüburtemi bilembaji tebur ama inyaktsüla. Kodang tebur ama inyakdir, tetsür sürnung tebur ama inyaker, labo tetsür ama masü ta luja jembitsür. Saka kodang tetsürji tangar kübok dang tanishir süa alir, aser telemtetba zepzep ta magiteter, temulung tila idangji yakta dang oshidang/olepdang agütsür, tetsürji tanishir asütsü malang, parnok mapaji ki achaayangtsüba dang ta jembir. Lokti anishitsübaji tebur mapa aser tetsürtem mapaji kidang dang ta jembitsür.

Iba tangatetba tsütsü nungi tanü tashi lokti angatetbaji tetsüri tebur ama inyaktetdima? Parnok temulung tila, tanük, nüngsen maremer, timtem lendong mapang nung parnoki mayangi motetsü, ayatrem, koda masü züktepshitep mapang nung tetsüri motettsü? Putu menden mesüra yimden den tongtepratep nung tetsür putu mendeni aotsü memelar. Iba tangatetba ya meintok tashi tetsürji arogo nung Pastor meshimtsü. Akhi putu tebilemba ya meindok tashi arogo nung aroki tenzüktsübaji saksaka dang bilemtsür. Iba ya Laishibai sayuba masü saka putu menden/samen menchen sobaliba inyakyim lir ta angatetdi. Arogo tejakleni onüra tebur, tetsür aser lanurten ajak külemi teka amteper inyaktettsüsa arogo structure aser leadership melenshitsüla.

*****