AROGO NUNG TEBUR-TETSÜR

~ Rev. Ayu, Pastor

Okila

Arogoji Khrista temang, iba nung Yisu Khrista azüi alangzükbapur/kümzüka alibapur ajak  dena lir. Iba Arogo ya alima nung khenpika dang alitsü, kodang Yisu Khrista tanaben arudir iba mapang nungibo teti tatem makaba yimli ka (Kotak Yimli) nung iba Arogo aotsü. Alima nung aser Kotak nung Arogo madak tekolakji Yisu Khrista lir. Yisu Khristai Arogoji meim nung pei taküm tenla agütsüba agi Arogoji tentet.

Alima nung Arogo tentetbaji Tsüngremer mapa tulutiba. Arogo ya khenyongi balaka nung jatet ta metettsü asoshi Pai tamasa bendangertem semdang. “Bendangertem rongnungi Tsüngrem tenüng atema nübur telok ka anitettsü asoshi koda Tsüngremi tamasa parnok semdang…” (T. Mapa 15:14). Item jatetbapur Baptiba ajanga Khrista nütsüng akümer aser Khrista temang nung adener.

Arogo tetezü

Tasen Lai nung ibai Tenemnü Benjong nung Tanela Temeshi semdangba anogo nungi tenzük, Temeshipur ayipa atuba aser Yisu Khrista tanaben aruba anogo tashi iba Arogo alima nung alitsü. Arogo Church ya Greek o Ecclesia nungi adokba koba tetezü “Khrista den lia par nütsüng asütsü asoshi alima nungi jatetba rogo” dang ajar. Tangar alipur (Taküm Tsüngrem dak mamangertem) dang nungi khenyongi balaka alitsü, temenen nungi temeshipur asütsü jatetba, Yisu Khrista taochi nung Pa sülen anogoshi pei kangki apur anitaka taküm khuli tajung yutetbapur jatetbapur dang Arogo ta ajar ta angateter. Tatsüba agi temenenpur ka temeshi nisung asütsü Tsüngrem taochi agi jatetbapur dang Arogo ta ajar.

Arogo tentetba

Kodang Peteri Yisu Khristaji ‘taküm Tsüngrem chir’ ta nangzük idangji Yisui ashi “… iba lungma nung ni kü Arogo yangertsü; aser tasüba aintemi ibaji makoktsü.” Mat. 16: 16-19. Ibai ajanga Yisu Khristai Arogoji tentettsü nangzükba tejangja sayur. Kibubai iba Arogo nung künüamati kümzükbapurtem züngsemdaktsü, T. Mapa 2: 47. Item kümzükbapur mapang shia aser amungnü nung pei kidang aser tenla kidang sentepa lungjema Kibuba külem; T. Mapa 1:13; 5:12; 2:46; 12:12; 20:7. Ibai alima nung Yisu Khristai Arogo tentettsü nangzükba ama Khristar Arogo Tanela Temeshi ajanga tentetdaktsübaji lir. Anungji Arogo madak Yisu Khrista Kibur aser tekolak lir.

Arogo nung Telungjem

Yohan 17 nung Yisui sarasademba nungi Arogo telungjem indang kanga junga angateter.

1. Telungjem: kechiaser asenoki kasa Tebu dang külemer, Yohan 17: 1-5
2. Telungjem: kechiaser asenok Techir Khrista meyong, Yohan 17: 6-10
3. Telungjem: kechiaser asenok Tanela ka agi süngdaktsü, Yohan 17: 11a; 16:7; Rom 8:16.
4. Telungjem: kechiaser Tebu aser Techir lungjema lir iba amaji asenok lir, Yohan 17: 11b.
5. Telungjem: kechiaser kasa o agi asenok taküm alir,  Yohan 17: 14-17
6. Telungjem: kechiaser ibai ajanga mamangertemi amangtettsü, Yohan 17: 14-17
7. Telungjem: kechiaser Kotak ka dang yangji külemi alitsü, Yohan 17: 24

Khrista nung ka dang:

“Tanela telungjem wazüka yutettsü asoshi tesünep ajanga alentepdaktsütsü, temang ka aser Tanela ka lir. Oda nenoka nenok ajaba teimla ka nung aja, Kibuba ka, tamang ka, baptiba ka, asen ajak Tsüngrem aser Tebu ka, Pa ajak madak, aser ajak ajanga aser ajak nung lir.” Efe. 4: 3-6. “Kechiyong Khrista dak tamang akaba ajanga nenok ajak Tsüngrem chirtem lir. Kechiyong nenok shirsa Khrista nung Baptiogo, nenok Khrista dak sübuogo. Yihuda nungera masü, Greek nungera masü, alara masü, nüjia masü, tebura masü, tetsüra masü, kechiyong nenok ajak Khrista Yisu nung ka dang lir.” Galatia 3: 26-28.

Yihuda nunger yimya aser yimsü nung tebendang kanga liasü. Parnoki tejak reprang: tebur-tetsür; Yihuda nunger-bendanger; takar-sensaker; nüchi-alar ta tebendang lia amshi. Iba ama tia aser sobaliba-a aliba mapang ka nung Khristai Arogoji tenzük. Arogo tenteter lia aodang parnok tejen yimsü (tradition) ama Arogo nung amangbapur rongnung parnoki tebendang lia amshi. Anungji tenyar Paul-i Khrista dak amangbapur lokti nung tebendang malitsü indang tesayuba tejangja tamalen agüja aliba Lai nungji angur (Efe. 4: 3-6; Gal. 3: 26-28). Shibai pei temenen nangzüka pei taküm nung Yisu Khrista kibur aser kümtetdakba ta agizüka amangdir pa tzü nung Baptidakja Khristar Arogo nung züngsem kümdaktsür. Amangbapurji Khrista nung tasüba ka, aremba ka aser shia aruba nung ka dang lir ta Rom 6: 4-13 nunga shia lir. Item ajak yagi Arogo nung amangbapur lungjema alitsü sayur.

Asenok Arogo Inyakyim Lai O den Medemdangba

T. Mapa 4: 32-35 nung “Aser amangbapurtem telok ajongaji temulung aser tanela ka dang liasü; aser parnok katia pei akabatem pei meyong ta mashi, saka kechisarena arok meyong dang liasü…” ta shia lir. Iba den asen Arogotem aika inyakyim reprangdangra yamai angur:

LAI TESAYUBA AROGO	LAI TESAYUBA NUNGI PILABA AROGO
Lai ajanga amangbapur ajak telungjem ka dang ta sayur.	Arogotem nung, Arogo, Arogotsür Department, Youth Department … ta lemsa-a ayu. (Department tetezü Compartment, balaka razüka aoba/ lemdangadokba dang ajar)
Ajak arok meyong	Arogotem aika nung senpong balala, ter shilem tashi pei pei lokti nung saruteper.
Tebur, tetsür telemdang mali	Arogo yinti sendenji tebur lokti ama dang bilemer asü nung tetsür madener/medendaktsürTesürtemia pei juri general meeting agir.Patriarchal Society nung loktiji teburi dang ajak ramoker alir, ibaji Arogo nungbo Laishibai aitsür.Matriarlinial Society nung loktiji Tetsüri dang balaka ramoka  alir, Arogo nung ibaia Laishibai aitsür.
Arogo mungdang ka, Külemi telemtetba agitsüla	Pei pei kimen balala, joka balala/ saru balala/ senden balala telemtetba balala…
Khristai nungloktsüba Mission ka dang	Pei pei mission mapa balala inyaker (Arogo/Arogotsür/Youth Department …)

Theology Azüngba Tsütsü nungi tangatetba:

Tanü putu nung Theological/Bible College nung Tsüngrem o bushirtem aika lir. Item nung azüngertemi Liberation Theology, Feminist Theology, Women Liberation, Diisability theology, Tribal theology, a.b. item indang azünger. Item tesayuba nung tetsürtem tajemzük tia nung aliba kodaser anitettsü aser tebur-tetsür temeten kasa dang ta sayur. Arogo nung, lokti balala nung tekübokba jenjang nung aliba aitsür kechiyong Tsüngremi tebur aser tetsür kasa Pa yimli asoshi yunglu. Ecumenical Movement tamendakdak Laji  Yohan 17: 20-23 lir, iba Lai nung yamai shia lir; “… nai ni yok ta alimai amangtsü asoshi ni ne dak aser na kü dak aliba ama parnok (tamangertem) ka dang küma lidakjang. Asenok ka dang aliba ama parnok ka dang alitsüsa nai sentsüwangshi kechi kü nem agütsü aji ni parnok nem agütsüogo. Ni parnok dak, aser na kü dak, anungji parnok jungjunga ka dang akümtsü asoshi nai ni yok…”. Ya Yisui Pa dak amangertem telungjem nung alitsü asoshi tebu Tsüngrem dang sarasademba lir. Yangi ajemdaker Tsüngremi yangluba ajak talisa meimchirtem kati ka taoba ta züngshitepa lungjema alitsü nükjidong nung Ecumenical Movement tenzük.

Sarasadema melenshitsü Nüngdak

1. Arogo ya tebur temeja telok dang ajar asü? Lai ajanga tamanger ajak ta ashir.
2. Arogo nung department lemsar General meeting balala lia pei pei tangatetba nung telemtetba agia Tsüngrem mapa inyakbaji tim asü? Lai oi ashibabo yinti senden ka dang lia külemi telemtetba agia Tsüngrem mapa inyaktsü tuyur.
3. Tetsürbo Arogo General meeting nung madentsü ta Lai tesayuba kar ali asü? Kari noktanga ali asü? Mesüra kari tou ta ashir asü? Ibaji shiba?
4. Senpong balala lemsar pei pei ketdang süa amshiba ya shitak na? Lai tesayuba kar ali asü? Temeshi Lai O nungbo arok meyong ta dang shia lir.
5. Pastor/Deacon/Mapangser ya tebur dang agiba ya koma bilemer? Laishibai koma ashir?

Tatem o

Tebu Tsüngremi meimchir nem tejak repranga tekümtet magütsür ta Laishibai sayur. Arogoji iba tekümtet ngua amangbapurtemi aküm. Tekümtet koda tejak mereprangi temulung meyipa Yisu Khrista dak amangertem nem agütsü, yamaji tenzükba nunga tebur-tetsür melemdangi temsüa alirtem shima tenzüktsü Tsüngremi maongka agüja lir. Anungji Tsüngremi mulungba ama iba maongka tebur/tetsür melemdangi timi amshitsü nüngdak ta tanü asen Aor tamangertemi angatettsüla.

*****