~ Dr. Meyu Changkiri (Shillong)

North East Christian University (NECU) aser Yanglushidi Sensaksem Sabang (YSS) lungjemer Webinar sentong ka June 14, 2021 nung liasü. India lima nung kin ajak Hindu yimsüsüba kübok lidaktsütsü tasa metettsü merangba indang onük nung olemsatepba liasü (Understanding the politics of religious nationalism in India). Tongti o jembir Rev. Vijayesh Lal liasü; pa Evangelical Fellowship of India nung General Secretary lir. Aser iba Webinarnung Moderator Rev. Wati Longkümer liasü; pa India Missions Association nung General Secretary lir.

India nung pei kin ayak jangja ayutsü nükjidong nung ajemdaker temelenshi jenti adokba ya, tongtibangsa 1920s nungi balaka jangja-a meteteta arur. Sangh Parivar ajanga item otsü zülushitsü merangba, item tasa balala ya tanü alimai meteta arur. Parnoki India lima rangben Hindu yimsüsüba kübok ayutsü merangba, aser iba ama yimsü ka kübok lidaktsütsü merangba (Religious Nationalism) ya metettsü kanga dang tongtibang. Religious Nationalism ya anasü agi sadangtsü akok: yimsü ka politize asüba, aser yimsü ka ajanga politics aniba. Aser iba ya India nung dang masü saka alima tesem aika nung angutsü, tatishitsü agi, USA, Turkey, Western Europe, Latin America, post-Soviet states, Indonesia, Phillipines aser Pakistan amala.

Vedic Age nungi iba ya India nung amshia aruba tangatetba ka lir. Iba ya Brahminical Vedic Tradition nung yimli jagi yimsü kümzüka ayutsü merangba aser yimsü lenirtemi yimliji wazüka ayutsü merangba yimya ka lir. Tanü tashi iba shisatsü ajanga India nung yimsüsüba aser yimsü teloktep aiben mepilateter. Hindu yimsü aser Indian Politics loktepba amshiba ya aiben India yimsüsüba nung adoka angur. Tongtibangsa, 1990s nungi India nung iba tangatetba aser maparen ya sashia adoka angutsü. Aser iba ya India limaji Hindu yimli (Hindu Rashtra) ta angatetba nungi ya adok. Yamaji, Hindu Nationalism tangatetba ajanga Hinduism-ji yimsü ajak rongnung mezüngbuba aser tulutiba yimsü ka ta sayur. Tangartem ajak Hindu yimsü kübok second-class citizen ama parnoki angateter. Nungdakra, tanga yimsü nung amangertemjia tashiyim amshia Hindu kümdaktsütsü merangtsüla ta parnoki inyaker. Aser yamaji, India lima nung Hindu yimli (Hindu Rashtra) ka yangerteta Hindu yimsüsür (Hindu Theocracy) kati yimsü asütsüla ta parnoki angateta meranga inyaker, tatishitsü agi, Yogi Adityanath, Vishwa Hindu Parishad (VHP).

Iba Hindutva tangatetba aser tasa ya aiben India nung Khristantemi angatettsü memerang. Aiben Hindutva aser Hinduism tena tebendang makai aibelena angatet. Anungji, India nung tongtibang tatalokba mapang nung Khristantemi shilem tajung aika magiteti aruogo. Tanü India nung “Farmers Protest,” Article 370, Citizenship Amendment Act, National Register of Citizens, National Population Register, Demonitization, GST, Unemployment, Underemployment, pandemic, “sliding rupee,” “crony capitalism,” aser yamala mesükba onüktem aika ajanga nüburtem kangshir. Iba denji külemi, India nung Religious Nationalist ajanga Media House amshia parnok mapa aser tenüng merüka sayutsü meranger. Item onüktem Khristantemi kanga junga meteta alitsü nungdaker aser nübur dak mapetba mapatong anema noktaktsüla. Tangar civil society balala nung dena lokti ajungtsü külemi noktaktsüla.

Ano Covid wara aser pandemic tia ajanga lokti nung tebendang aser tepila aika adokdaktsüogo. Takar aser sensaker tetsüngta (Rich versus poor), jila nung alir aser yimtsüng nung alir tetsüngta (urban versus rural), high caste versus Dalit & Tribals. India nung Religious Nationalism sashia ainba shia item tebilemtsütem tiemba züiner. Iba den külemi India nung urbanization sashia züinba ajanga lokti nung nüburtem atema timtem aika bener arutsüdaki. Linük nung Religious Nationalism ali tashi item timtem tiemba akümtsü. Kechiyong parnoki machinery aliba ajak amshia Religious Nationalism-i mulungba ama bilemtsü, jembitsü aser inyaktsü nüburtem tokolok shisatsü nung inoktsür.

Anungji, akokba lemang ajak nungi arogo aser Khristantem dang item tebilemtsütem angateta ashitsüla. Tila tanurtem aser lanurtem dang Indian Constitution, Hindutva aser yamala onüktem rateta sayutsüla. Item onüktem ya jangjaa lira, Religious Nationalism tashitak nungi jenbua litettsü. Ibajagi nübur jenti yaritettsü, aser lokti tejakleni aotsü. Arogoi akok tashi lokti tentet balala den (civil societies) yaritepa alitsü merangtsüla. Kechiyong iba Hindutva Ideology ya tanga kecha agia masü saka Hinduism ajanga dang koktettsü. Aser iba ya koktettsü asoshi India telungtet nungi adoktsüla.

*****