TSÜNGREM MALI

Naga nunger lanur tajung ka liasü. Pa kanga dang tokolok techira aser jembishinü aser awashi temetet liasü. Interview ka nung pa koba Arogo nung adener aser Arogo nung tesentaktep koba tashi ta asüngdangdang, pai yamai langzü, “Ni atheist” tetezü ‘ni Tsüngrem dak mamanger’ mesüra ‘Tsüngrem mali’.

Iba asangur kodasür Tsüngrem dak mamangi aküm, iba indang bushi dang, aser pa iba tangatetba nung aliba ya pa tai masü ta ajitet.

Pa ya kidong chir ka liasü. Par tsürabur kidong aliba asünung Arogo nungi intok, aser taküm tepiyong Arogo nung medeni kibong lia aru. Tena sentepi maobaji dang masü saka tanurtema sentepi aotsü asoshi tasü ita tenati majungshitet. Tanurtem tain akümdang medermertemisa ajungshia sentepi anir ao. Saka lia arudang parnok dak sempet tajung liaka Arogo nung aiben parnokji ashishia amshi.

Arogo aser nüburtemi mezüngokba ajanga pa taküm nung tepela mangu aser tanem tanemi iba asangur ya Arogo aser Tsüngrem nungi talangka atsüngzüka ao. Pai taküm nung tepela angutsü lemang aika nungi bushi saka mungutet. Pa iba ama jenjang nung alidang University ka nung par tesayur ‘Atheist’ ka pai ajuru. Iba tesayur ya tamasabo Khristan ka liasü.

Iba tesayuri pa den mena jembi aser Tsüngrem mali ta tesayuba jagi ajang ajanga agütsü. Ibaji dang masü saka iba tesayuri pa dang kanga meim aser lemang aika nung teyari sayu. Asenok taküm nung timtim jenjang nung alidang shibai asen den temba ayimer aser yariteper parnokji Tsüngrem ama bilemer aser parnok dak temulung adoker. Yamaji Tsüngrem mali ta tesayuba agütsübai pa koktetdaktsü aser tanü tashi iba asangur iba tangatetba nung lir. Ashiko pa dang Tsüngrem ka lira aser Tsüngrem temiemji yamai ta taküm yimya aser tesayuba tajung agütsür lilasang aser lokti aser Arogo nung pa mesentoki amshi asübo pa iba nungjagi mepelai lila. Saka pa taküm nung tepela angutsü lenmang kecha mali aser pai yimlaa aliba lokti aser Arogoia pa sendok; iba yongji pa tepela angutsü asoshi lemang bushi aser pai ngutet. Süra san 99 rongnung samar alibaji pa ya masü na?

Yohan 8:1-11 nung tetsür ka nüktapangtaa aliba apu aser Yisu anasa anir arua ozüng nung aliba ama la long agi onseta südaktsütsü ta ashi. Iba Anogo nungji la asoshi pusemerji Yisu dang liasü. Iba anogoji Yisu mali asübo la ozüng nung aliba ama long agi onseta südaktsür lila, Saka Yisui la maitsü. Yisu asoshi tai aser temenen seret ajak saku liasü. Tanü Arogoji Yisu melen nokdaker masü no? Iba mapang nung, iba anogo nung, iba tensa nung Khristar Arogo maliasübo mesüra Tsüngrem tenzükersangto maliasübo kechi kümer lila ta ashiba otsü karbo lir mali?

Tangatettsü

1. Tsüraburi masüngteti kibalenboba ajanga tanur timtem jenjangi idaktsür. Anungji lanurtem dang sobaliba tesayuba tajung agütsütsüla.
2. Arogoi parnok tanela anir arutsü mokoktetba ajanga, ‘Tsüngrem mali’ ta tesayuba agi parnok koktetdaktsü. Yimden aser sobalibai magizükaka Arogoibo parnok tanela asoshi aria bilemtsütsü aser mesentoktsüla ta bilemer.

Laitesayuba

Mati. 18:12-14 “Nenoki koda bilemer? Nisung ka san noklang ka kara, aser item rongnung ka mashileni ora, pai tukor tukoji toktsür mashileni aoba san kaji bushitsü tenemi maor ama? Aser pai aji ngura, ni nenok dang züngpong ashir, mashi mejajaba tukor tuko dang nungibo iba dang pai tali pelar. Anungji item tilatem rongnung ka danga samatsü kotak nung aliba nenok Tebui memulunger.

J. Adok  3:2 “Na saksalemang, aser tanüngba kechisa tasü lir, itemji akangdakjang; kechiyong kü Tsüngrem madang ne mapa tabensa akümba ni kecha mangu”.

T. Ken 14:1 Suwari pei mulung nung ashir, “Tsüngrem mali.” Parnokji teraksa, parnok mapaji tesempatsü lir; aser parnok rongnung tajung inyaker shinga mali.

*****