~ Imliodang Aier

Okila

Mezüng Ao limai Khristan Yimsü arudang limapur sobaliba nung amendaker Arogoji tenzük. Aortem atema Osangtajung dang nungi sobaliba tambo (older) asünung aiben sobalibajisa temaba aser tashi tuluba südaktsür tamangba lokti (talisa Arogo) iba nem yimsüsüdaktsür. Hau, Aortem asoshi sobaliba tajung kechi lir aji wazüka ayutsü kanga tongtipang saka sobaliba koba Laishiba den meputeper itemji botamanger lokti nung joko mamshi nunga ajungtsü amai bilemer. Arogo nung küm ter (10) shi inyaka arudang temulungi magizükteti sasaseta bilema jembiyonga kecha mesüteti aruba Ao Baptist Arogotem inyakyim ka kü mulungi kanga aitsü nung yabo joko melenshi nung aika asoshi tajangzük aser temoatsü asütsü ta bilemba ka YSS nung lemsateptsü maongka agütsü nung kanga pelar.

1. Talenba (binding)

Ao Baptist Arogotem  lenisüba (guideline)  kaket nung “kidong lembur arogo nung züngsem magizüktsü aser Arogo nung züngsem küma lira atsüngtsütsü, saka apuani küma melira Arogo nung agizüktsü”, ta ozüng züngbanga ali nung, iba nungji amendaker tang Ao arogotem teimba nung kidong lemburtem arogo nung züngsem magizüker. Iba temzüng ya Aor tamanger ajak lungjemer yangluba ka lir.  Arogotem nung sannükertem aiben tekolak menüdaktsüba timtemji ibai ka lir. Nüburtemi arogo nung tenüng züngokner saka guideline-i memelar asünung lim arogotemi aiben iba maparen nung lemtet alema meinyaktetdang nübu tajung aika arogo nung magizük tanela samaa aoba khuret agi tanü Ao arogotem menepa lir. Iba telatet teraji (root) kechi ta reprangdang nung iba ya Aor sobaliba nung amendakba inyakyim ka dang lir ta angateter. Aortemi kidong raksar yimdak nungi senchi chir aridok, aser parnokji kibong kümteta lira tanaben yimdaki marudaktsü/marudaktsür.

2. Libaliroren Asadangba (ethical consideration)

Meimchir liyonga aodang lokti aser arogo nung tensa tia balala ajurur aser tensa tendak apet mapang nungji telemtetba balala agia inyaka aor. Tekalen (above) shisemba onük nung libaliroren asadangba (ethical consideration) tebilemdangtsü kar yamai.

2.1.  Lenisüba kaketi ashibaji, kidong raksar külemisa kibong kümteta lira arogo nung khensa magizüktsü, saka kibong kümteta melira agizüktsü. Kidong kasa aser balala alir ajak apuaninaji meimtepba agi kibong küma shi nung ka kümer alir, iba den chirnur agi sosema tesendaktepji kanga akanga kümadoker. Tebur ka aser tetsür ka joko taküm libaliro jenjang (moral value) raksaa kibong kümer, saka oda meimtepa pelateba alidang nena kibong süa teli ta ashitsüji Tsüngrem tsüngdang aser nisung tsüngdang kodaka temeten asütsü mesüra kodaka tai asütsü? Tanur ka tsürabur mabensa kümang ta ashitsüji asenoki kodaka metena agizükteter? Temeimteper ana sembatepang ta ashitsü asenok temeten kong lir? Indirectly tanü arogoi yamaji inyaker masü no? Ano kidong aliba chirtembo arogo toklang tenzükba nung magitsü ta telemtetba lir. Chirnurtemi kechi tai inyak?

2.2.  Meimchirji lokti nisüng asünung, metenser Aortem teimba Baptist Khristantem asünung nisüng shia Khristar arogo kaka nung züngsem süa alitsü tim ta ajaki angateta lir. Saka asen aliba tesem nung aliba Baptist arogoi na züngsem asütsü magizükra nai kechi sayangtsü? Kechi südir süaka nia arogo ka nungbo atentsüla ta asüba tangatetba nung nai na anasatiba Khristar arogo kobai na tesüiba temenen kecha mashishii temulung meyipba aru nung agizükdir iba arogo nungji na oa atentsü. Iba arogo nung na tanela chiyungtsü angutsü. Iba telemtetba agitsü asoshibo kecha arogoia na nokdangtsü makok. Na anisüngzükdak, na agizükdak, na tanela chiyungtsü angudak na oa atentsü ne mulung.

2. 3. Aor yim shia kidong lembu-melembu yim terara balala lir. Ozü yimdak lembuba kidong par yimdakbo melembur ta asüba (mesüra vice-versa) kuli aika lir. Joko Aori kidong ren zep ta ya-a ta alangdanga benteta meyuteti alimaji küma odagi. Anungji, lemtet aliyonga town arogotem nungbo iba lemtet ya aiben shidak benteta mamshiteter. Ashiko akhi putu mapangbo iba kin kidong sobalibaren ya merükmerüka benteta yutet südi, saka tanü temeyoktep lima nungbo aiben mezübelangteper dang aliba angur. Talisa Aor-i bushisüngdangtepa arudang kidong aika akhibo adianu/lar ta jembia arubato tanübo lembular ang küma bushiteter aliba angur. Anungji, arogo iba yagi kanga tou ashir. Süra item yabo arogo nung agizükang aser item yabo tagizük ta arogo dang shibai talangdang tebendang o agütsütettsü?

3. Tanü Arogo nokdakdak (Today’s Church foothold – a survey)

Iba tebilemtsü shisadangdang laishirtem  aser sannükertem ishika tangatetba nungi medemdangba ajanga anguba kuli kar yamai (majoritarian view).

3.1. Arogoji ozüng tsütsü tali atsünga anir ama angateter. Aor sobaliba ozüngji indokra arogo raksatsü mesüra menenatoktsü.  Anungji, arogo asüngteta alitsü atema sobaliba nem arogoji anidaktsü nung dang ajungtsü. Kidong lembur arogo nungji agizükra arogoji masüngtet akümtsü ta asüba tangatetba nung Ao Baptist arogo aika anidar ta angateter. Süra kidong lembur tang magizükra tanüngba nungjibo arogo shitak asüngteta lir ta shitetdima? Nai kechi ashir?

3.2. Laishibaji dang tematiba tashi (sole authority of the Bible) nung arogo aika nokdaka mali ama angur. Laishibaibo temenen kecha mashishi ajak agizüktsüba sayu sürnung iba tashiji shitak mamshiteter, kechiyong sobaliba ozüngi yamaji inyaktsü memelar. Kidong lembuba ya arogoi tatok magütsütettsüsa (arogo nung züngsem magizüktsüsa) Laishiba koba kuli agi medentsür? Süra arogoi tanü Laishibaji arogo yimden nung sobaliba ozüng yarisemba tashi (supplementary authority) ka mesüka kümdaktsü masü no? Koma süla?

3.3. Akhi ama dang linüba (stagnancies) tangatetba lir ama ajiteter. Sobalibaji Khrista yimsü marudang nungi liasü anungji ya ajakbo Laishiba den mapeter. Akhi tsürabur mapang arogo leniba par tendak par shisa tongtet nung yanglu (kulitem asenoki mejangja), saka lia arudang tensa den apet  aika melelenshi arudagi. Tanü tangatetba karaa  ainba tensa nung alima den peta Laishibai mulungba medemdanga melenshia inyaktsü jangrar ajema lir. Parnoki kechi latettsüogo yang nungi marakzüli ta asür? Yagi tatem tongtetdima?

3.4. Laishiba o zülua aliba ama shitak (literal) dang agizüker. Laishibaji asenok tendak (context) nung peta ratettsü  kanga tongtipang aji masünungbo tamangertem aika mashileni anitsü ana nung lir.

3.5. Tamajunger merenshiba (disciplinary action) ozüngji arogo nung akatsü nüngdak, saka noklang nung 10% i ashibaji ozüngji tera atsü anem kaa taochi sayua yanglushi nung ajungtsü. Kidong lembur kodanga magizüktsü ta masü saka tanga aibelen dang nungi tera talangba arogo nungi indoka atatsü ta asüba ama arogotemi yanglushi nung tajungba asütsü.

Item tangatetbatem  ya memelenshi tashibo arogoji Laishibai mulungba arogo mekümtettsü.

4. Mesüktepba temenentem (similar sins – for comparison)

Aor sobaliba nung aibelenba agi lokti nungi aser arogo nungi jentokba aika dang lir saka medemdangtsü asoshi yangi tatishitsü ana bener arua reprangdanger.

4.1. Kijung arakba – Aor sobaliba nung kijung arakba ya tai tulu rongnung ka lir/liasü. Kijung arakerbo yimtsüng yimteni temerenshitsü tim merenshir arogo nungi atsüngtsü. Kar yimdak dang ali karbo town balala nung oa kibong kümteta junga lia otepba angur. Tanü kijung raka kibong kümer alir aika yimtsüng, town balala nung lir, aser parnokjibo arogo nung kecha marendaki dang agizüka amshir.

4.2. Aou met achiba – Aor sobaliba nung tekalen majunger yimdeni aou met chia joko item nisung arogo aser lokti balala nung mamshii lia aru. Iba ya-a Aor sobaliba nung aibelen tulu rong nung ka lir/liasü. Item nisungtem ya-a kasa sobaliba nung aibelenba sürnung kecha mashishii arogo nung agizüka amshir. Tanü sokar maparen, lokti maparen balala nung ochimashi inyakbatembo kenyongi mashishir.

Sobalibabo sobaliba nung dang aibelenba sürnung Ao Baptist Arogoi aibelener bensaa (discriminate) amshir masü no ya?  Telok kabo kheni jentoka (out-caste)  amshir masü no? Bilemdangtsü lir asü mali? Item temenentem ajak ya kasa talenba kübok amshitsü ajungmesor masü saka medemdangtsü atema lemsateper dang. Arogoibo temenen mebendangi dang agizüktsüla. Arogojibo Laishibasa tamendakdak asütsüla.

5. Lai tanüdangba (Mirroring Bible)

Arogoji tebendenba ongko ashi teindokba ongko inyakba lokti ka masü ta tamasa angatetdi. Meimchiri ozüng shidak meyutet nung ozüngi parnok mekümzüktet, ozüngji parnok atema atakatem dang aküm anungji  taochi kisüng agi Tsüngremi meimchir kümzük ( Ibri. 10:1-4, Gal. 3:13, Ef. 2:8-9). Süra tanü arogotemi Tsüngremer taochi tekümzükba tashiji kong yutsür sobaliba ozüngjiang arogo nung leniba tashiji kümdaktsür? Mathi 18:12-14 nung sannükbai san tukur tuku kümzüka aliba yutsür ka len aizüka aoba asoshi temulung agüja bushiba to tanü Ao arogotemi meinyakteter asü ta sasaa bilemer. Yisui kü santem nükang, kü santem mesüang ta ashiba to kong lir. Kidong raksar alirtem tanelaji shiba nem doktsür? Arogo nung magizüki item tanelaji arogoi mesütetdima? Yisu Khrista alima nung alidang par sobaliba kübok lokti nung jentokba pur agizükba kuli aika angur. Alimelen sarur Levi (Lk. 5:27-32), nüktapangtatsür Farasi Simoner kidang (Lk. 7:36-50), nüktapangta tsürla ozüngibo lung agi onseta südaktsütsü mela saka Yisuibo la maitsü (Yohan 8) ano aika lir. Par tendak lokti sobaliba ozüngi jentokba pur item nisung Yisui kecha mashishi agizük aser tatok agütsü. Süra Khristar arogoi Yisu jilo majizükteter no? Kechiba temenen bendangsaa agizüktsü mulunger?

Otem Laishiba nung tatok magütsütetba temenen (unpardonable sin) ka dang lir aser aji Tanela Temeshi anema tai menaba (Mathi 12: 31-32, Mark 3:28-29). Iba dak alaka Yisu kangki nung temenen ajak shitoktsü/shitoktsütsü. Ao Baptist Arogotemi tatok magütsütetba temenen ka bendenloka lir aser aji kidong lembuba. Arogoya sobaliba asü Laishiba nem anidaktsütsü? Arogojibo tebendenba ongko inyaker asütsüla. Arogoji sama aliba tanela bushia anepaluba tamanger lokti ka asütsüla. Aji mesüra melungi Ao Baptist Arogotem tashi maitba aser tajemba küma aotsü tsübuseta bilemer.

*****