~ Tiatoshi Longkümer, Kohima

Taküm tzünglu tsüngküm mapang tongja tongaka tzünglu junga mesüra kheni maruba ya Naga nübur ajak asoshi tebilemtsü tulu lir. 17th June 21 osang kaket aika nung Nagaland government-i tang tashi nung Naga lima nung tzünglu koda arur mesüra marur ibaji asadanger asenok nem metetdaktsüogo. Atangji, Mon district dak alaka districts ter prongla nung tzünglu junga marur aser tesem kar nungbo taoba mapang dang nungi kangasa ajemba ajanga alima akonger.

Nagaland nung tzünglu-mopung asadangertemi ashiba nungji, Mon district bo tang tashi nung 48% agi taoba mapang dang nungi tajungba tzünglu arur. Ano asenok Mokokchung aser Longleng distirct-a kanga majungbo masü. Asen Mokokchung district ya -6% agi dang tajemba aser Longleng-ji -11% agi tajemba tzünglu tzü angur. Aser item yabo tzünglu-mopung asadangertem asoshibo “normal” dang lir ta ashir. Saka Naga lima nung nütsüng yongsük kanga longsoa alidang districts, Dimapur aser Kohima ama nung tang tashi nung tzünglu arubaji kangasa ajema arur. Dimapur district nung tzünglu maruba ajembaji -66% lir aser Kohima nung -47% lir. Item yabo joko serious lir, aser yamai dang ita ishika ora asenok meimchir aser taküm aliba osettem tia aser jenjang kanga majungtsü.   

Nagaland nung tzünglu tarutiba town-ji Kohima liasü. Saka joko taoba küm ishika tzünglu junga maruba meteter. Aser taküm kümsa tamajungba akümer. Joko ya June ita talangba arur saka tang tashi tzü alia ajemer (2000 lits@ 1200/-). Sen agi alitsü ang süng aiben kanga rakteper kechiyong ayong nung tzü mayimer, mesüra tzüpu (ring well) nung tzü mait. Anungji, Kohima town anasabo tzü ayokertem tzü atadak makai akümer. Kasaji ni bilem nung Dimapur nunga  tesem aika nung tajemtsü tzü agi timtima alitsü. Tanü asüngbo Dimapur nung joko company tzü ayokba dang alia ajemer amai ni angur.

Kohima nung Angami youth organization-i joko ali perepa ir tzü atsütettsü memelar (water drilling or water pump). Kechiaser tesem aika nung tzü ali telung nungi machine agi atsütetba ajanga süngdong aika tera agi tzü metongteti asür. Ano alu aser atsü nung ali nung tzü maitba agi tsünü-senpongtsü memeir. Atangji, alibo tajung saka ali nung tzü maitba tesem aika akümer. Ali nung tzü maitba tongtibang kuli kaji, joko asen lima town-tem nungbo tesem teimba ka cement agi ki yanglur aser tawa ajak cement agi menokbang adoker. Gari senzütsü lenmangtema black topping agi aibangatoker aser tanungba ali tesemtemji cement agi menokbangogo. Aji asünung, tzünglu aruakasa, ali telungi tzü aidak maka, tzü ajak ayong nung dang yimoker aser tzüma lenten leni yima luatoker.

Asenok tebang nung bangbet küma modern development aser technological development indang jembir dang ashi, mekümdangra modern development jagi asenok taküm alitsü mejungi tepsettsü aser asen lima ya tuluba ka yakta lisem lima akümtsü. Modern development tangatetba ya cement agi yangerba ki, mokozü longa senzüba gari tekara aser tulu, black topping agi tepbangba lenmang aser kima, aser mobile phone ajanga sen benshitetba aser oset alitetba indang ya dang bilem nungbo, asenok item ajakji amer alima nung talidak makatsü. “Cement ki aser lenmang mentality” nung dangbo asenok modern development mebilemtsüla aser meinyaktsüla.

Küm anaboba joko corona virus ajanga alima ajunga shibanger tim teinyaktsü meinyaktetba ajanga alima nung chiyungtsü ajemer aser mapa mangur. Talisa, lockdown ajanga India lima nung aser asen Naga lima nunga aluyimertem kanga kongshiogo. Aser kodang aluyimer aser parnok alu nung timtim adokdir, asenok anüng tom nung dang yimzürjia dena ayatsü. Covid-19 lockdown timtim den ano tzünglu anüng nungi maruba tensa ajururji, item tensa ana ya junga ajuruteptetra asenok ajak asoshi kangsa tebilemtsü tulu asütsü. Tanü tzünglu maruba agi tzü tajemtsü manguba indang jembir, asüngbo tzü tajemtsü dang masü saka aonpo nung jang aser aon asotsü kecha makatsü. Iba dangji “aya-wara” ta ajatsü. Idangjibo nisungi nisung tepseta chira aya matemtsü. Asenok tang nungi kanga sarasadema, aser shisaka meranga inyaktsü nungdaker.  

Nagaland nung tesem teimba ka nung tzünglu tzü mangudang Tsüngrem taochi agi Mokokchung aser Mon district nungbo tzünglu tzü moatsüdarji, asenok item district nung alirtemi tang ya shisa kaa inyaktsü kanga nungdaka lir. Shibai metet alimaji yamaisa ora, tzünglu aruba district-tem jagi ang nisungtem sendentsü aser chiyungtsü bushii arutsü. Tang ya asen Aoertemi aluyimba mapa merang inyakra, aser tsünü-senpongtsütem pei tzüngküm den apet yokra, itemji asen Aolima atema dang masü saka Naga lima tesema aika tongzüktetsü. Shidi süra, Dimapur aser Kohima town nung Peren aser Wokha districts nungi süngolio aser ango bener aruba agi perir. Aser yamaji yimtsüng nung dang alir süaka aluyimertem town nung alir dang nungi takarba  aika lir. Saka taküm tzüngsarosa yamai dang ora, Peren aser Wokha district aser Pfutesro nungi akhi ama chiyungtsü mangutsü. Idangji, Mokokchung aser Mon aser Longleng districts nungi adokba chiyungtsü tasen jagi item town-tem mesütsüla aser yamaji asen nüburtema rongsenketsüng nunga takaba akümtsü.

Mokokchung district rongsenketsüng nung renloktsübaji, yangji telidak nüburtemi dang inyaktsüba masü, saka iba district nung soa-intetba Aor-Aotsür aser tanga sensotem ajak külem khuret lir. Kohima aser Dimapur nung Aor aser Mokokchung town nung soa-inteter senso tajung aika ali rongsen nung aser shisatsü nung takar lir. Mapa nung anisüngzük agir alirtema aser ano tang teinyakdak ain-tashi aketer-a jenti lir. Anungji, tang district nung telidak nüburtem den rongsen aser shisa akar nübutem lungjemer, asen lima nung mapa meranga inyakba ajanga rongsenketsüng nung ajungkettsü merangtepdi. Kin-kidong aser election otsü ya masü, saka ali rongsen aser aluyimba mapa nung ya Aor ajak lungjemer yimden aser arogoi anir küm 10 danga tang dang nungi tali temerangba inyak nungbo memeteti asen lima aintsü. Rongsenketsüng dang renloktsüba masü, saka tesayur balaka meliaka asen mentality aser spirituality dena temaba jenjang nung aintsü.  

Alima nung meimchir tia aser alima tensa ajak melentepa dang arur aser aor. Saka tensa tia tajungba küma azüokba aser yanglushitsübaji tongtibang ana lir: shisa kaa sentong atongba aser meranga inyakba. Taküm tsüngsarosa tia nung ya ajemdaker asen Aortemi ali nung, ayong nung, aser arem nung shisa kaa sentong atongtsü aser ano tali meranga inyaktsü mulungtet nungbo koda temoatsü asütsü. Kar asoshi tebilemtsü amai asübaji kar asoshibo temoatsü tasen-a akümtsü akok.

*****