~ Mar Imsong

Asen YSS nungi asen lima koma ordain asür aser ministerial certificate koma agütsür shisatsü tajung aika angazüker. Nenok ajak dang kanga pelar. Aiben sabangpur den sensak semner saka mapang madoker. Idaki, tatsü agi American Baptist Churches USA (ABCUSA) nung koma ordain asür lemsateper. America limaji context balaka lir anungji, aika asen lima context den meputeptsü akok saka tangazüktsü kar danga lira agitsü lemsateper. Asenok ajaki metet American Baptist ya asen CBCNEI, NBCC aser ABAM den direct relationship aliba protestant denomination lir. Southern Baptist inyakyim balaka lir saka iba ocet nung ABCUSA inyakyim indang zülur.

Southern Baptist aser ABCUSA tepila

Southern Baptist aser ABCUSA na tepila olen ka shiner. Asen nüburi aikati American Baptist aser Southern Baptist ya kasa dang amai bilemer, saka inyakyim aser tesayuba kenyongi balala. Tatsü agi yamai: Roger Williams-i first Baptist church in America-ji Providence Boston  anasa  North nung 1638 nung tenzük. 1800 tashi nung North aser South nung Baptist churches aser Association 40 dak tema liasü.  Saka iba mapang Convention structure kümteta mali asü. 

Congregational church denomination nungi Adoniram Judson aser Luther Rice foreign mission society teyari ajanga 1872 nung India tonga aru. India tonga arur Judson aser Luther Rice tenaprongla Baptist akümtsü mulungtet aser William Carey shiba Serampore nung missionary inyak liasü, pai Calcutta nung baptitsü. Joko tena Baptist aküm nungji missionary mapa inyaktsü congregational church-i meyaritsü asünungji Luther Rice America-i meyipa aru aser American Baptist Foreign Mission Society tenzük.

1845 nung American Civil War ano junga metenzükdang American Baptist Foreign Mission Society-i alar ayurbo (slave owner) missionary mapa inyaktsü meyoktsü ta lemtet kechiba süra tanak-temesüng ajak Tsüngremi pa mesükba nung yanglur aser alar ayubaji temenen ta aitsü, saka Southern nung aliba Baptist arogotemi ibaji magizük. Alar ayuba tangatetba nungji India tashi nung missionarytem rongnung telemsa adok. ETC nung tesayur karbo iba issue ajanga meinyakteti aoba otsü asenoki meteta lir. Souther Baptist teloki alar nüchi küma meyoknü nungji Southern Baptist Foreign Mission Society balaka tenzük.  Anungji Northern aser Southern Baptist churches alar ayuba mechi nung convention ana küma pila. Yamaji Northern Baptist Churches nung alar mayu aser ecumenical convention ka amai aküm. 1945 nungi tenzüka Northern aser Southern Baptist Convention balala kümer aru aser 1950  nung Northern Baptistji American Baptist convention ta melen. Ano 1972 nung American Baptist churches USA (ABCUSA) ta melen.

CBCNEI, NBCC aser ABAM ya ABCUSA den sentaktepa lir kechiba süra alar ayuba aser tetsür tebur tebendang maka Khristar arogo shilem kar ta agizüker. Tanü American Baptists ya ecumenical (tetezü arogo telungjem nung Khrista kulisüba tesayuba agizükba)  aser Baptist World Alliance nung tena lir, aser tetsüra ordain asür, aser immigrants, refugee aser lisopur (indigenous people)  ajak agizüker kechiaser parnoki jentoka aliba pur nüchi asoshi Yisu Khristai arogo jatet ta agizüker. Tanü Myanmar nungi Baptist refugee aika  arua  lir aser arogo 300 dak tali tenteta arogo kanga kara renloka odagi.  Tongmelang agi, North East India nung Baptist ajak ya ABCUSA nung sentaka lir ta metetdi. India nung Southern Baptist teloki arogo aika lapoka lir aser fundamentalist doctrine sayur. Item nungji memeteti oa mazüngtsüla.

Southern Baptist teloki tetsür ordain masür

Alar ayuba ya shitak ta agizükba asüba dang masü, tetsür ya Khristar arogo nung ordain asütsü malang ta sayur. Parnok tangatetbaji yamai: A year after the formation of Women in Ministry, the Southern Baptist Convention adopted a resolution entitled, On Ordination and the Role of Women in Ministry. This resolution stated that women should be excluded from pastoral leadership “to preserve a submission God requires because man was first in creation and woman was first in the Edenic fall.” The resolution concluded by encouraging “the service of women in all aspects of church life and work other than pastoral functions and leadership roles entailing ordination.” Southern Baptisti sayuba aser inyakba ta Lai tesayuba masü  ta  aitsür aser parnok iba tangatetba memelenshira arogo telungjem nung metendaktsür. Mapang talangka dang country shirnoki racism aser alar ayu, parnok sport balala nung metendaktsü. Tanübo South Baptist telok nung atener Laishir telok aikati item tangateta aija arudaki aser tarutsü nung temelenshi adoktsü imlar.

Commission on Ordain Ministry (COOM)

American Baptist (ABCUSA) tesayuba tejangja kaji kecha tashishi makai tetsür ordained asütsüla ta angateter.  American Baptist Churches USA ya region 8 shi lemsaa lir aser iba region ajak nung COOM structure lir. Aser COOM jaki approve süra ABCUSA jaki kecha mashishi agizüker. COOM ya Committee asem küma lir:

  1. Ministerial Preparation Committee: Iba committee yaki minister tasen mesüra M.Div final year asüdang nungi pa/la ordain sünera iba committee ajanga inyaker. M.Div azünger ajak ordination track meshimer. Saka M.Div azüngdang “Na Ordination track” tenzükra na azüngdang American Baptist Church nung internship inyaka tenzüktsüla. Internshipji kar itasen angur kar itasen mali. Aser candidate-ji Baptist Theology and Polity 3 credits course agia pass asütsüla.  Iba course ya kanga dang Comprehensive aser American Baptist history, theology and Polity lir. Iba course agidang requirement-ji exam züluba mesüra paper züluba danga masü,  koma baptitsütsü by immersion aser denominational leaders Executive Secretary, Mission Secretary, Minister Council Executive Director mesüra Association leader ajak ajurua arogo inyakyim ajak angazüker.  Aser ano Professional Ethics course Arogo nung inyakdang komala ethics benshitsü aser arrtsü koma lateta ayutsü item ajakji keta aliba course ka nung pass asütsüla. Aser Arogo kati candidate nem License to Preach certificate meshia Regional Ministry dangi abener.  Aser iba Arogo nungji License to Preach Certificate denji Arogo nung pastoral aser deacon aser sayutsungitsü angazüka practical work inyaker. Arogo kari itasen agütsür karibo magütsür.

Itemji temer külen ordination track nung alir ajak Watch Care Pastor ka ka shimtsüla.  Watch Care Pastorji ner arogo pastor masü saka tanga Arogo nungi American Baptist inyakyim ajak meteta aliba ka shimtsüla. Watch care inyakyim maparen ya ita 6 nungi küm ana tashi agir. Aser iba Watch Care mapa ya kanga dang comprehensive aser step aika agia candidate aser Watch Care pastor den one on one sessions hapta nung kenbo gonda 1.5 agi nungang ita trok nung atemer. Iba processji ordination mapa nung kanga dang tongtipang ta agizüker.

Aser iba training takidak nung Career Development and Assessment test aika agir aser anogo asem Clinical Psychologists aser Clinical Career Counsellor den ajuruteper. Iba Assessment-ji test aser paperwork aser candidate indang objective report zülutsü alinungji $1800 (India sen Rs. 1,30,000 shi) fees meshir. Aser iba reportji Ministerial preparation committee dangi yoker. Iba report nung red flag kar danga lira candidate ordination process moteter mesüra iba report nung kechi recommendation agütsü tatishitsü agi mentor den church administration koma inyaktsü, stress and anger mannagment lira koma inyaktsü iba processji inyaker.

Item ajakji takok ngua inyaktetra Candidate Faith Journey kechiba Arogo mapa inyaktsü paper ka zülur Ministerial Preparation dangi submit asütsütsüla. Ministerial Preparation Committee dangi abenba application nungji ne indang academic diploma, transcripts, commendation certificate-tem lira aser 4-character references (confidential) committee nem agütsütsüla. Aser Ministerial Preparation ajanga Candidate ordain asütsü tetemsü ta süra Association nung ano Ministerial Preparation Committee lir parnok dangi refer asür.  Tatitishitsü agi NBCC, COOM Committee nungi ABAM Ministerial Committee dangi aruba amai. Iba committee mapa tongtibang baji Ordination Paper (Theology, Polity and Practices) zülur iba paperji approve asütsüla. 

Association Ministerial Preparation jaki approve asü nungbo Pa/La License to Preach Arogo jaki Ordination Council jazüker. Aser iba Ordination Council nungji Association nung aliba Arogotem ajak nungi delegate ana jaoker. Association nung Arogo 40-50 jika lir aser Association shia parnok by-law lir aser iba meeting nung by-law nung aliba quorum alitsüla. Iba Ordination Council nungji Candidate indang Ordination paperji azünger aser iba sülen tesenteper delegate-temi question asüngdanger.  Item maparen ajakji Association Clerk aser Ministerial Preparation Chairperson ajanga inyaker. Question and answer-ji temer Candidateji jaka nungi pilaa odaktsür külen delegate-tem discussion agir ordination asütsü temsü asü metemsü ta jembitepber sacred ballot mesüra raising hands vote agir. Temzung (by-law) nung koma shia lir yamaji 100% vote manguyonga ordination council nung pass asür. Iba sülen Candidate inyaka arogo nung Service of Ordination, laying of hands agir Reverend ta declare asür. Item maparen ya aika küm ana-asem tashi karbo küma aika agir. Kanga dang tedious saka kanga dang comprehensive process lir.

Tebilemba: Asenok ABAMji regional role agitsü aser Tzükong balala mesüra temeket aliba Arogo balalai America nung Association mapa inyakba amaji inyak nung koda?

  • Ministerial Standing Committee:  Baptist tesayuba nung candidate process aika oaka lim arogo kati dang ordain asür. Yamaji America lima nung pei pei country nung ordain sür aruba aika lir mesüra danga denomination nung ordain sür alibatem iba committee dangi arur. Item candidate-temji requirement tajemba lir. Item candidate ya Baptist Theology and Polity Course pass asütsüla, Professional Ethics Course Pass asütsüla aser Ordination Certificate tejangja alitsüla, Transcripts aser Diplomas, 4 Character reference (Confidential), 3 day Career Development and Assessment including clinical and psychological assessment, aser Faith Journey paper balaka na kechiba American Baptist nung ordination standing bushir kuli tejangja agütsütsüla. Item ajakji Committee jaki approve süra candidateji ABCUSA nung ordination standing agütsür. Candidate ka kodang ordination recognize südir mesüra ordain südir American Baptist Church USA nung professional registry database nung inyoker aser candidate ABCUSA regions ajak nung (including Puerto Rico) recognize asür.

Ano Ministerial Standing nung mapa khuret kaji Ordain minister inyakyim kar mejungi inyaka nisung kari mesüra arogo kari complain süra ordination revoke asütsü atema mapa kanga tasak aika inyaker. COOM jaki Local Church jaki ordain sütsübajibo agientsü makok (Local Church Autonomy) saka denomination nung standing recognized süa aliba tobo revoke süteter. Aser yamaji revoke COOM recommendation nung ajemdaker regional office ajanga denomination dang ashir aser yamaji denomination office nung region ajak dang ashir.

  • Ministry Excellence Committee: Iba committee yagi pastortem atema koma continuing education agütsütsü, mesüra ordain minister kar tangazükatsü ajitet nungbo mentor mentee pair sütsür. Mentorship-ji area aika nung agütsütsü akok. Iba committee yaki mapa aika pastortem yaritsü inyaker.

Clergy Professional Organization

American Baptist Churches USA nung parallel organization ka lir aser iba dangji National Minister Council ta ajar. Iba ya Professional Clergy Organization ka lir, lawyer aser doctor-tem professional organization aliba ama. Iba organization ya local chapter balala lapoka lir. Aser iba organization ya membership sarur, Local Chapter membership aser National memberships ta küm shia memberships saruba agi Pastors, Chaplains, Missionaries, Ministers balala seminary nung professor-tem ajak atema mapa tajung aika inyaker. Continuing education, Sabbatical, Retreat, aser Clergy Cohort ta mapa amala aika inyaker.  Aser iba telok ajanga Pastor-tem nema Living Wage itasen agütsütsü atema Arogo dena jembir. Mapang maliba agi iba inyakyim melemsar, saka arogo nung toklang tenzüker achaayangba mapa nung ibai tongtibang ka lir.  

*****