~ Imlibenla Aier

Arogo sobaliba sülen masü, Lai tesayuba dak ajemdaker yangertsüla. Tenzükertem aser evangelist/missionary-tem takok tashi ministerial license yabo kera agütsütsüla. – Takatoba

Structure nung tebilemtsü: Associate Pastor (Women) ta asüba yagi arogotsür kisüng asoshi shimba amai bilemer. Tebur pastor-ji arogo ajonga asoshi (tetsür, youth, tanur ajak madak temaba) aser APW ya tetsür kisüng atema balaka shima ayuba amai bilemer. Anungji, ordain asütsü nungdak mali amai ta jembir. Anungji, temalen YSS nung Co-pastor indang jembiogo aser iba tangatetba tasen nung APW ta asüba ya-a Pastor ta dang melener, arogo rangpen nung külemi Pastor den külemi pastoral khuret agütsür inyakdaktsü nung koda? Tetsür dang masü tebura fellowship tenzüktsü aser kasa shilem agitsü. Tenati melentepa sentep agitsü aser yamaji arogo administration ajak kasa responsibility agütsütsü.  APW tetsür kisüng asoshi shimba amai bilemba aser inyakyim ya melenshi nung dang tetsür tenzükba mapa aser ordination nung satema lapoktsütsü ta bilemer. – Wati Longchar

Yanglushidi Sensakasem Sabang (YSS) tesep ya asen Aortem lenla balala nung tashi temeteter aser Arogo nung tenzükertem lokteper kija, lokti temenen nungi nüchi dangi meyiptsü asoshi yimyim ayonger telok lir. Iba ama sabang ka nung shisatsü anguba aser shilem agibaji University ka nung enrolled sür angazükba dang taoba ta züngshir. Tanü rongdak nungdak lemsatepba onük “ORDINATION” sentakba nung ajemdaker tajangshiba, tebilemba aser inyakyim koda tajungba yanglushitsüla lemsatepogo. Iba sensaksem onük nungi olong kar tarutsü nung shisadangtsü lemsateper.

Ordination ya kechi aser koda tenzük?

Latin oshi nung ‘ōrdinātiō’ mesüra “ordinare’ ojang Engraji oshi nung `ordination’ ta meyipzük, koba tetezü shimba/tatongsen ta shia angur aser ‘ordain’ ojang ya kanga metsünga reta amshiba olong ka, kechiyong iba ojang ya lemang anasü nung amshitsü akok. Mezüngbuba nung, tamangba putir maparen nung aser temeshi mapa asoshi shimdanga/shimteta ayuba. Tanabuba nung, ashi  külaker aser tasütsü langa aliba mapa nunga amshir. 

Laishiba otsü nung Ordain/ed ojang ya amshia mali saka “Minister” ta amshia angutsü aser Grik oshi “diakoneo” koba tetetzü “kilir”. Yisui nütsüngtem dang shiba tulutiba lir pa/la nenok tenzüker asütsüla (Mathi 23:11-12).  Tanabena Yisui nütsüngtem tetsüng shitoktsü, koba tetetzü tenzüktsü shimtetba kilir ajanga khuli süa mapa agi inyaka sayuba temaitsü inyak (Yohan 12:14-17).  Ordained minister kaji tamanger Arogo ajanga (Church elect) (Efesa 1:4-13) mezüja shimtetba, Tsüngremer mangdang nisunger rongnung Yisu Khrista ajanga ataloktsüba  kilir Khristantem rongnungi shimtsü agüja angur. Ibri oshi nung ‘yare’ Engraji nung “Reverend” tetetzü tushiba, tsübuba, külemba ta ka shia angur koba ojang Laishiba  nung aiben  amshia angur, iba olong ya tematiba Yehova Tsüngrem dang külemba, akhüm agütsüba nung amshi (Lipok 3: 10, Anitet 15:11). Onük rajemtsü mechi item terasa kar enoktsür.

Laishiba nung Mezüngpur Ordained asürtem

  1. Mosa-i Yihusoa  Israel nüburtem madak Tsüngrem mapa asoshi ordained asü (Züng. 27 aser Anitet 34).
  2. Ter anati parnok tenet ordained sütsüba khuli angur (T.Mapa 6).
  3. Paul aser Barnaba Antiok Arogoi missionary mapa asoshi tenla tera agüja ordained asü (T.Mapa 14:23ff )
  4. Mariam, Deborah, Hulda (2 Chu 22:14) Poebe Junia ano aika tenzüker balala ajanga Tsüngrem mapa asoshi ordained asü. (Anitet 15:20, Oben.4: 5-6, Esther 4:15,  Rom 16:1)

Tsüngrem mapa atema mejeta shiteta ayuba tsütsü nungi amshiba tenyartem mapang nung Tsüngremer sayatenya dena parnoki nübürtem tanela nung mesü. Kecha taa makai tenzüktsü, parnok kibong toktsütsü kecha shisa bulu makai, linük kobai yoktsü kecha tashishi maliasü aser parnok mapang kecha tatakzük makai ordained mapa nung takok angu. Parnok akaba ajak agi Tsüngremer tetuyuba, shisatsü aser tanela sempet agi taküm bendanga agüja tenzük.

Arogo Otsüren nung Ordained mapa

3rd Century mapang Arogo kanga züina aküm aser Arogo nung kibur/tanüker makateti ali, tamanger Arogo nung lenir shima ketdang asütsü nübu kanga nungdaka aküm nung parnok rongnung ordain asütsü temsüa alirtem nem mapa nungloktsütsü asoshi Bishop Ambrose of Milan ajanga Arogo tenük lapoktsütsü, timi achaayangtsü aser model church structure küma pai yanglutsü apiteta tenzük. Protestant teloka yamaji 16th century tashi nung Roman Catholic  nung Luther ajanga inyakyim nung temelenshi bener aru. Quakers telok kati inyakyim nung ashishiba ajanga Ecumenical telok aso, ibayongji tetsürtema Arogo, lokti nung  shilem jenjang agütsütsü tenük lapok. 1853 küm Congregationalist church nung Antoinette L. Brown  mezüng tetsür ordained asü. 19th century tatemlen Baptist Arogo nung tetsür ordained asü. Ao Baptist Arogo kübok mezüng asür Supongwati, Changki 1919 nung ordained asü aser tetsür mezüngbula Noksangla, Yaongyimsen, 1992 küm ordained asü. Ao Arogo nung tebur tetsür  ordained asüba tetsüngdaji küm 73 (putu ana süier külen) lirang tenük lapok. Tia maka, putu aika dang Ao Arogo nung tebur dang ordained asütsüla ta tangatetba nung mapang talangka lia aru. Ashiko, tanüa kasaji karibo bilemya alitsü.

Tanü Arogoi koda Ordination jenjang angateta aru?

Tetsür ordain mesütettsüsa aser tenzükba mapa nung satema meinyaktettsüsa alenpanga ayubaji shibai? Amangbapuri asü, deacon boardi asü, mesüra tebur pastor aser tenzüker ishikati suiteter. Khristar arogo Laishiba tai ratetja, pa/la ordain süra kü mendem atsüngdoktsü ta tsübuba ali asü? Shisadangtsü mapang. – Wati Longchar

Taoba putu nung par tangatetba tongmelang saka akhüm tulu agüja, tambur kümer, asa tao nung retirement title amai ordained süa aruogo. Karibo pension angutsü mapang promotion ama agüja aru, kar teinyakdak nung agütsü saka tain kümer asü nung jangratema meinyakteti aru. Iba yongji parnok nem akhüm tulu agütsü aser tai menatsü kecha lemang maliasü südi ta  bilemer. Tanübo Mungdang ajanga küm 45 tema nungibo lim Arogoi pa/la ordain asütsü tetemsü ta ajiteta inyakba alitsü, saka teimbaka yimer jubilee nüngtem, küm aika pastor mapa inyakerji ordination move asüba lir. Arogo kar nung agütsütsüla-magütsütsüla ta canvassing aoba, kar nungbo  ordain süra retirement sür arogoi pension agütsüsa akümtsü anungji ordain masütsü ta jembiba, nisung karbo ordination paper tangari zülutsüba/copy asüba otsü amala ano aika indang angashidang/jembidang tsüah! tsüah! ta Tsüngrem dang kanga akseta ya tashiang amangbapur aser tenzükertemi atong no, ya koda ta nemjemseter. Arogo meshitettsü asoshi mejeta “National Repentance Day” sarasadem ayonga Tsüngrem dang Aor Ordination mapa inyakyim aser Tsüngrem tenzükba wadang nung backdoor/quota/favoritism/yimer system nung aibenlenba atema tatok meshiba akatsüla.

Lenir Wati Longchar-i shisemba ama Ao kin Khristan yimsü arur joko küm 150 ajungdang ordained minister, tasür aser tang teinyakdak alirtem, ajak senteper 256 lir, küm nung nisung ana dang ordained asüba onko sayur. Ano paisa item rongnung tetsür 15, tetezü tetsür 1 ordained asüdang tebur 17 ordained asür. Küm 150 tain Khristan saka tetsür 15 dang ordained asüba tetezü küm 10 nung tetsür ka dang ordain asüba sayur.  Ya arogo nung ochimashi mapa tulu inyakba ta sayur. Aor theology azünger tetsür-tebur nübu kasasa dang asütsü, saka tetsür ordain asütsü lemang sadema melapoktsüi aruogo. Mungdang aser Arogo nung tim leadership magütsüi aruogo. Tanga lima nungbo tenzüktsü ta mulungtetba pur pastoral training agir aser yangji takok ngura tetsür-tebur ta tashishi mali küm 3 or 4 probationary ama tenzükerbo ordain asüba  aser pastoral mapa agütsüba angur. Tebilemtsü ana: (i) Asen lima nung probationary  pastor ya tetsür-tebur ta kecha tebendang mali küm 3  benok nung koda? (ii) Ordination ya koda tajungba, taretba aser tetsür-tebur ta tebendang maka asüngtetba bener aotsü? ta asüba nung ajemdaker telangzüba tatsü agi lemsateper.

Tenzükba mapa nung tali tejangjaba jenjang asadangba

Arogo aser tenzükba wadang nung alir arishi tepiyong ni aser ozü kibongibo Tsüngremsa tenzüktsü ta commitment aser dedication lirbo, tetsür/tebur mesüra Pastor/Asso.Pastor, bendang-benchi kecha makai Khristan ministerial licenses/ordination agütsütsüji tim ta bilemer. – Zülu Jamir

YSS zoom ajanga tesayur Tali Ao,  Limala  Longkümer aser Narola MacFyden ajanga “Tenzükba mapa aser Temeshi Laishiba” onük nung ajemdaker shisa aika lemsatepogo aser parnoki Lai kimong tejangja sayuogo. Iba ocet azüngeri parnoki züluba den medemdanga azüng nung tajangzük asütsü. Anungji iba ratet nungi lepshia magütsür saka tang koba onük nung ajemdaker ibaji dang lemsateper.

Probationary tetezü Tsüngrem tenzüktsü temsü asü masü aji asadangba aser taküm renemshiba mapang ka; Tsüngrem tenzüker ka jaklaliro nung, tamang jenjang ladangba/asadangba aser Lai puti tangatetba aser tensa den peta sayutsüngi sütetba, item amala tenzüker teintet ka kübok renemshiba mapang ka. Anungji pa/la probationary period nung takok ngura ordination move asütsü aser yamaji ordain sütsütsü. Tanü tenzüker teimba kati tebur, tetsür ta tebendang makai Tsüngremer lu nung santem mesütsü tim aser bendang lima Arogo inyakyim tatishitsü benoka jembiba nung rajemogo (karibo magizüker saka parnokia yasür angatettsü imlar). Yamaji tetsürtem asoshi tasü ita shilem agitsü lemang lapoktsüba nung nungnanga malitsüla ta angateter. Ano tetsürtemia tasü ita iba khuret agizüktettsüla. Probationary ya tenzüker orientation ama masü saka iba ya tenzükba wadang nung balaka tetendangba mapang alitsüla. Tang koba ABAM-i anogo 7 küm 3 tsüngda tenzükertem Arogoi aiter parnok asoshi orientation ministry akaba ya kanga junger aser iba yagi kanga tajangzük anguba tatenertem khuli lir. Iba denji Probationary mapa ya arok aroka bilemdanger tenzüktsü junger ta aikati lemsatepogo.

Arogo structure melenshitsüla

Tang arogo structure nungji tetsür nem ordination agütsütsü nungdak mali. – Limala Longkumer

Arogo restructure mesürabang tang Ao Arogo jenjang tashi nungbo tetsür ordain asüba nung timtemji  ajurutsüsa ta shiteter – Sangula Imchen

Tetsür nem ordination agütsüaka arogo structure aser nisung tangatetba tang amai ali tashibo menungdak ta bilemer – Narola Lemtur

Christian ministerial license aser ordination agütsüba tetezüji ano tali Tsüngrem nem bendanga agütsür Khristar mapa tali awa oa inyaktsü atema. Women’s ministry, Youth ministry mesüra Christian education ministry ajakji kasa Khristar mapa. Yangi parnok mapaji tila tulu kechi mali ta angateter. Pastortemi inyabaji dang Tsüngrem tenzükba nung shilem tuluba and tongtibangtiba ta mangatettsüla. Arogo mapaji Tsüngremer tenyaba mapa inyaker ta metet nung “co-worker in ministry” tangatetba nung ajaki shilem agi junger. Hau, arogo office administration yimya aser inyakyimji onük balaka. – Mayang Longkümer

Pastoral ministry aser office of the pastor na tesendaktep kar, saka office administration achaayangtsü kisüng atema ordination magütsür; pastoral ministry nung office administration ya shilem ka dang. Pastoral ministry nungji tanela aser temang rangpen tekümtet asoshi Tsüngrem O sayuba, Khrista kangki apur nüburtem atema tila kümer taküm piyong bendanga agüja tenzüktsü mulungtet aser yamaji inyakba dang “Pastoral ministry” ta ajar. Parnokji ordain asütsüla. Yangi tetsür pastor, youth pastor, children pastor ajak dena lir. Parnokia Yisu Khristai nungloktsüba mapa inyaker aser iba atemaji ordain asütsü nungdak. Pastor karibo “Ajak nem ministerial license/ordination agütsü nungbo lia lia Pastor dang nungi mapang kar nungbo Child ministry nung alisangjiang Pastor dang nungi nüburtemi tesapuba küma, Baptiba/Kibuba Benjung/Kiyimba item ajakji inyakdaktsüra Pastorji shiba asütsü” ta tetsübuba lir. Pastoral ministry inyakba nung menden atsüngdokba, ka tuluba, ka tilaba ta mali. Ajak saku. Aotsür ordained sür alir aikati tanü Ao arogo structure memelenshira tetsür ordain asütsü nungdak mali ta shiteter. Kuli kaji structure tai. Tanü Ao arogo tangatetba kaji arogo Yintiba nung pastorji tebur asütsüla, deacon tebur asütsü aser parnokji tekolak. Iba kübok tetsür telongjem, youth aser children ta alur. Yintiba nung tekolakji ordain süra iba agi teperi ta angatetba ajanga tetsür, youth aser children tenzüker ordain asütsü nungdak mali ta bilemer.

Teburtem atema pastoral ministry temeja nungdak

Tetsür ordination kisüng nung masü saka arogo ministry ajak nung putu tensa den putepa tajungba inyaktsü mechi arogo restructure asütsü nungdak ta bilemer. – Roseline Mollier

Tanü sentepi arurtemji shirnok? Lim Arogo ajak nung reprangdangra tetsür, youth aser tanur teimba angutsü. Kechiba süra parnok atema mejet mejeta tenzüker kaka shima lir. Shitakba agibo Pastor-i tebur tanela nungdak achaayangtsüla, saka senzüka yutsüba ajanga teburtem, talisa kijung lanurtem tanela nung lula lir. Alila Longchar-i ajangshiba ka yamai lemsatep:

Arogo nung tebur sentepi arur ya kanga tebilemdangtsü lir. Tetsür, lanur, tanur meranga arur saka out of 10 family nung 1 family tebu den aruba angur. Arogo yinti program, tat. agi, revival ama küm nung ken anaben agidang mesüra Christmas, New Year nung aruba teimba, ajisürbo mali. Women, youth, child program balala agiba agi attendance majemer saka tebur atema program agiba kanga ajema lir. Arogo sentong, sentep-senshi nungbo matener saka general meeting amala nungbo absent mesüi sashi sashia tena tesüngmangtsü otsü atalokba ali. Wednesday aser Friday sentep nungi tetsür dang atentsüla ta tangatetba ka lir…. Tebutem school lir, saka iba kisüng jagi teperi masü ta bilemer. Tebur atema mapa balala nung wholistic approach program akatsü tongja tongoko ni.  Arogo nung jendoka aliba purtemji teburtem ta ashitsü akok.

Tebur tsütsü pastoral ministry nung tamakok ngua lir ta sayur. Teburtem sentepi maruba atema pastori kwiben Tsüngrem dang tanela mangdang meshiba ali? Kwiben kibok tonga oa shisatsü aser Tsüngrem temeim shidanga ali? Kwiben tebur sentong asoshi süoki yia sentong agidanga ali? Kwiben parnok asoshi personal counseling agidanga ali? Pastor Temsüwati Kichu ashiba ya shitak. Pai yamai zülu,

Pastoral ministry nung teburtem asoshi inyakba mejetmejeta arogotem nung alitsüla ta bilemer. Men’s group ya kanga tongtipang. Akidangbo teburtem sentepsa deobar nikongdang ya aliba ni tanur asüdang anguba bilemteter. Shidi ta asünungbo arogo nung tetsür department lira, tebur department-a alitsüla. Iba ama church structureji asünungang, mesüra tetsür department balaka melii tetsürtemji general nung aitra idangji dang jembia aruba tebilemtsü aika iba structure jagi solve asütsü ta bilemer.

Tang 21 buba putu nunga sünga asen Aortem tashi temeteteri anir “Land of Pioneer” mesüra “People of Pioneer” to kechi aküm? Olemsabang nung lemsatepba nungji Tsüngrem tenzükertem aika ano akhi jenjang, akhi shisatsü aser akhi mapa, akhi sobaliba toagi kangpanger lir ta jangjar. Koda tesasatsü? Lai nungi par sobaliba aser par inyakyim asen kin, asen nisungtem den medemdanga tesayuba tajung aika melenshia tejakleni aotsü meranger aser yamaji ordination inyakyim ABAM-i lateta aliba nung tashi anga arur. Yongji tetsürtema Tsüngrem tenzükba nung  parnok 15 tashi züngsemba ngua nüma danga bilemer.  Saka yangi tebilemtsü kaji tang Arogo aser Mungdang nung structure melenshi junger ta bener arubaji tebur tetsür ratio medemdangba nung tetsür kanga agi tajemba lir. Külem tenzüker rongnung kasa degree, saka kechiba tetsür asoshi tenokdangtsü tali aser tebur asoshi tesademba ta bushidangra, iba ya lim Arogotem nung hierarchy/patriarchy system (male normative value system) ajanga tetsür asoshi lemang temesü kümdaktsüba angur. Arogo ya alima yimden masü, Yisu Khrista  tesayuba kimong südaktsür yangerba arogo, anungji arogo yimden inyakyim ajak ochi nung tuluba-tilaba ta melemsai melenshitsü nungdak ta bilemer.

Inyakyim nung temelenshi nungdakba kar

Arogo inyakyim nung alima yimden-yimli office mesüra army nung rank, status balala ayuba amai küma odagi. Status, rank yayim tangatetba ali ajanga külem tenzükertem karbo temetanger ka ama dang jenjang tajemzükba nung yutsüba ngua arudagi. Arogo kar nungbo pastori child director anema tashi amshiba osang lir. Temalen ashi ama, sentepi arurtem ratioji reprangdangra tetsür, lanur aser tanurtem teimba lir. Saka parnok tenzükerji temetanger (Associate Pastortem) amai kümdaktsür Deacon board meeting nunga metetdaktsüba lir.  Ano govt. inyakyim ama dang arogo aor ta asübaji, tatishitsü ka: Arogo ajak amai gari alia lir. Saka Govt. officeri ama, telok mapa senzüka yutsür, gariji pastorbar kibong jurila nungdak atema amshiba, mesüra arok külem tenzüker atemaa ta mangatetba aika ajangshia arudagi.  Yimtsüng aser jila nung sentep ki sürbo Pastor ki tajungtiba lir. Facilities süng, tzü, newspaper, phone recharge, personal peon, jala jabaso educational, medical relief fund, handsome salary, ano aika. Yamaji süaka, karibo külem tenzükertem welfare atema süoki ia mebilemtsür. Hau, ajak kasa masü saka general nung asenok tenzükba khen meyipa reprangshitsü langja langoko.

Ordination sentakba nung temelenshi

Khristar mapa nung taküm bendanga agüja tenzükba mapa ka ama mesüi, ordination pungpa pungpa küma odagi. Amenla Mar-i ajitetba kar yamai zülu, “1) Bendanger ka ozü Arogo Pastor talangka inyaker joko sodi meshirji sobutsü peria sobur yoktsü ta Rev. akümtsü asüngdangba, 2) Ozü yimer, par yimer Rev. baikaji kümogo ta asüba nung dang bushitepba (nisung karibo yim tila nung paikaji, saka yimtisanger sür nung mali ta tangatetba nung Rev. kümtsütsü merangba lir), 3) Arogo centenary atongerji ozü yimera Rev. ka/anabosa ordination sür alitsüla, 4) Ordinationji rank ama bilemba. Ordination ya konang, naroküm ka ama kümdaktsüba ajanga Tsüngrem senwangshi metongdaktsür, anungji itemi reprangshi nung ajungtsü:

  1. Tetsür tebur anaprongla asoshi lenmang satema lapoktsü asoshi Arogo nung seminar agitsü tenüngdaktsü, kechiyong Arogo nung deacontem dang tangatetba sayutsü tenüngdaktsü lir ta ajiteter.
  2. Mungdangi achaayanga iba course nung ajemdaker tenzükba wadang nung temsüa alirtem asoshi ordain asütsü temelaba agütsütsü lenmang tesatemba inyaktsü junger ta lemsatepba nung  (a). Küm ana course asütsüla, (b). Ministry tetendangba akaba alitsü, (c). Qualification tejangja akaba nübu asütsüla (d). Tatidang agitsüla, (e). Ministerial Certificates agütsütsüla. Iba sülen (f). Küm pungu metangtangi (credential period) Arogo nung, Theological college aser missionary tenzüka arurbo ordain asü junger. (g) Tejangja tesayur (mentorship) kübok iba ya training alitsüla.

Iba course nung Baptist distinctive, sound Biblical doctrines, bible interpretations, homiletics, preaching skills, good judgmental, sacraments, crematory, holy matrimonial, pastoral care & counseling skills, ano aika, enoksema agitsü junger ta nükla yur agütsütsüla. Sensaksem mapang ordination paper nung questions tangar teyari ajanga züludaktsüba ajangshia aruba lemsatep aser tarutsü nung iba ama mataloktsü asoshi ABAM ajanga tetuyuba aser tangatetba agütsütsü kanga tongtipang.

  • Ao Baptist Arogo inyakyim lateta aliba 2014 ABAM-i revised 2019 küm  adoka lir, Mungdangsanger ajaki inyakyim nung tashishiba makai agizüka yua lir. Iba kaket nung Ordination onük tejangja zülua lir, saka tensa mapang apir yanglushitsü lemang  lir asü nung tongtipang onüktem meinoki lira melenshitsü ABAM Sanen Luden dangi Arogo ajanga shiti nung benokra kanga tajangzük asütsü.
  • Ao arogotem nung tenzüktsüba ordain asür asü nungji Ao oshi junga jembitettsüla aser zülutettsüla. 
  • Probationary mapang nung takok nguaka pa/la title agienba yimyaji pongpa pongba masü saka arrla kanga ret-reta junga lateta ayutsüla.

Nungja : Tangar lima, most Reverend, right Reverend, holiness, bishop, arch, high priest, Saint tenüng  ajaba kisüng agi temenen tongpang makoktsü.  Nüngja denji mapa jeta inyaktetba, nüburtem tzüratemdaktsüba, tanela jenjang akasodakja tanü putu den peta tetangshi tamang walunirtemi iba nüngja nungji jaloka inyaktsü alima nütsüng nüburtemi ordain ministertem dang nungi imlar aser yongyar. Jenjang makai tenzükba aser nangzükba amajok masü saka chichiba bendanga agüja taah talang mebushii tarak meketi tenzüktetba nisung asütsüla.

Otem

Tatem nung Ordination nung sentakba aika jembiyonga aruba rongnung arogo nung lenla balala nung tenzükertem ajak nem ministerial license agütsütsü indanga lemsatepogo. Temsüa alir ajakji ngutetsüsa lim Arogo aser Mungdang nung structure ulushia yanglushitsüla. Pastoral ministry ta asüba nungji shinük ajak  dena lir. Anungji item ajak asadanga shisadanger tarutsü nung tenzükba nung co-workers teyaritep nung tali tayimjemba aser awa oa inyaktettsü khuret lemsatepba ajanga lenla ajak nungji tashishitsü maka aser tapok meketi tongteta jangratema Tsüngremer lu iba alima nung yangertettsü.  Tsüngremi shilem agirtem ajak moajang.

*****