~ Onenlemla

Arrtsü atena oa inyakba missionji akok tashi inyaktsü, saka iba den külemi human development aser social concerns/member care ya arogotemi khen temulung agütsü nung kanga ajungtsü. – Takatoba

Lai bushiba aser angatetdaktsüba nung arogoi rongsen, nübu aser mapang intoktsüla. Tetezü Sunday sermon driven church dangbo masütsüla. – K. Temjen

Tsüngremer mission-ji `local arogo kingdom’, `Aor arogo kingdom’, `Naga nunger arogo kingdom’ mentality nung masü saka “Kingdom of God” tangatetba nung inyaktsüla. – Chuba Longkumer (Nepal)

Arogo tajabaji tenyaba mapa inyaktsü asoshi jatet. Arogo tenyaba mapa meinyakra iba arogoji tasü lir. Yisu Khristai pa nütsüngtem dang, “Anungji nenoki oang aser kin ajak nütsüng kümdakjang, Tebu, Techir aser Tanela Temeshi tenüng nung parnok baptijang” Mathi 28: 19 ta nungloktsüba nungi bendang lima oa tenyaba mapa inyakba dangji dangbo majar. Iba nungi atepdang aser arrtsü atena oa tenyaba mapang ajak dena lir. Asen lima atepdang mission nungi tera temulung magütsür amai ta ajiteta `Atepzüng aser arrtsü atena or inyakba tenyaba mapa koba nung  temulung tagütsüba? Koma atepdang tenyaba mapa tashi itta kümdaktsüba ajanga arrtsü atena oa tenyaba tashi ita kümdaktsütsü ta YSS nung sensaksemba nungi bilemdangtsü asoshi olong kar lemsateper.

Tenyaba indang Lai tesayuba

Bendang lima talang nung sama aliba tongtibangba asü, asen atep nung sama alibaji tongtibangba? – Zulu Jamir

Tenyaba mapa koba dang `mission’ ta ajar iba Tsüngremi nungi tenzük. Tsüngremi pei ajaso chir Yisu Khrista alimai yok, tetezü Tsüngrem ya “missionary God” ta ashitsü akok. Tsüngremi kija aser telok putu balala nung jateta Pai nungloktsüba ataloktsütsü yokba angur. Tsüngremi Israel kin alima dang ochi kulisür asütsü jatet. Tejen Lai putu Tsüngremi Mosa aser Aron, Obendanger, Aikartem aika ochi sangoktsütsü jatet. Yisu Khristai pa alimai aruba tenyaba mapa nükjidong yamai sangoktsü:

Kibuba Tanela kü dak lir,

kechiaser sensaker dang osangtajung sayutsüngitsü pai ni mezüja shimtet.

Puoka alirtem dang techiokba sangoktsütsü,

nükpokertem tenük lapoktsütsü,

Ajemrepba nisung nüji küma yoktsü.

Kibubai agizüktsüba küm sangoktsütsü asoshi pai ni yok. (Lk 4:18-19)

Yisu Khristai sayuba tenyaba mapa nung tongtipang kaji, jendoka alir, ajemrepa alir, nüchi makai alir nem nüchi agütsüba tenyaba mapa ya tongtipangtiba lir. Khristai nungloktsüba ama Khristan teloki “mission” ta asübaji takari, takar arogoi tanga limai oa amangdakja, tzü nung tzüsenja aser arogo tentetja aoba den school, kaket-ken-o, hospital aser lokti nung ajemtepba tia nung alir nüchi asoshi inyak. Mission ya takari inyaktsüba mapa amai dang bilem. Saka tanü atepdang tenyaba nung tashi maitra aser temulung magütsüra, arrtsü atena oa inyakba nungji temoatsü malitsü ta angateter. Sendoka alir dang nungi mission indang tangazüktsü aika lir ta angateter. Mission ya Tsüngrem meyong, temeshi mapa ka anungji iba tenyaba mapa nung ajaki ochi shia shilem agitsüla. Ochimashi rongsen ajanga tenyaba mapa inyakra temoatsü malitsü aser Tsüngrem mepelatsü, anungji amangba pur ajaki ochi nung shilem agitsüla. Tenyaba mapa tapu ana lemsatsü akok:

  • Aepdang Tenyaba mapa (home mission) koba Naga lima telongtet nung Aor, Naga nunger rongnung inyakba.
  •  “Arrtsü atena or inyakba Mission” koba Naga lima atena oa ana aser talang nung kin balala aser oshi balala den inyakba.

Item mission anaprongla nung lim arogo aser Mungdangi rongsen aser nübu agi ana aser talang nung inyaka arudagi.  Lim arogo kari Naga lima telongtet nung aser kari Mungdang den semloka  parnok lenisüba küpok shilem agia arudagi. Tebilemdangtsü kaji: Ao arogotemi home mission nung temulung tagütsüba asü, arrtsü atena or inyakba mission nung temulung tagütsüba? Ana rongnung koba  mission nung arogo rongsen teimba indoker? 

Atepdang teinyaktsü mission

70s aser 80s nung ainer aika brain washed süa lir amai bilemer. Devotional nung special prayer ajakto China, Arunachal, Nepal, Bhutan, Russia, etc. atema dang sarasadem. Yimtak makamaiter ajaki arokoshia tenla agütsü. Yimtaklir tekümtet anguba kuli kodanga mangashi. Tangar lima nung temulung meyipa reportbo angashi. 70s aser 80s ainer tulur, takar lir. Parnok dang asen nisung teyarir maliba shira hau ta mali saka Burma, Arunachal nunger timtemba shira sponsor asütsü mulunger.  Tangar yaribaji dang mission mapa ta brain washed süa lir. – Imtijungla Longchar

ABAMi mission “Back to Village” ta sür home nung temulung terabo agüja arudagi, saka ano teinyaktsü aika lir. Bendang nung indokba aser home nung indokba medemdangra seret shitak matutsü. – Imliodang Aier

Tanü alima rangpen yimtsüng ka ama dang akümba putu ka, mission mapaji jaka mashika aser mapang mashika nung inyaktsü akok. India lima state ajak nungi tamangba yimsü balala amangba purtem office, hachirawala, shishilembar  aika Nagaland nung arua lir. Anungji home mission asoshi iba ya temoatsü ka amai lir.  Bendang limai oa mission mapa inyakba ama, anogo shia asen den alir dang kulisüba mapa inyaktsü lemang adoktsür. Lim arogo kari  item pur atema Pastor, Evangelist inyakdaktsübaji kanga junger, saka Khristan ka ama asenokia taküm yimya agi sayutettsüla. Baptist tamanger kümang ta mashiyonga, Naga nunger Khristani yamai ochi inyaker, temeim inyaker ta sayutetbaji kulisüba nung tongtipangtiba ka lir ta metettsüla. Non-local nisung ka Khrista jilo ajizüker ora par shilu (same culture, same language and same people) aika tongtettsü aser ibaji asenoki missionary ka yokba den saku lir.

Mungdangi ayongba “Mission back to village” takok ngua aoba angur. Arogo tilatem yariba, lim arogo asüngsashiba mapatem ka kanga tongtipang. Asen aliba meküta Aor, Naga nunger aser non-local yi jemer, mozü achir aika angur, parnok taküm aser tanela jenjang yanglutsütsü home mission wadang tulu lir ta sayur. Mungdang, arogotem aser telok kari rehabilitation, detox center lapoka inyaka arudagi aser aji kanga junger. Saka tang aliba dang nungi tali tajungba aser talila kar lapoka aotsü nungdak ta ajiteter. Ano noklang shilem nung kar dang rehabilitation, detox aser counselling centeri arur anungji tanüngba nisungtem ajurutsü sendong balala akatsüla.  Arogoi item asoshi rongsen indoka anebaluba den counseling agüja tanela aser shi kümzüktsü lemang sayutsüla. Ano parnok shia dak aketba sempet tajung meteta training balala agütsüba ajanga tarutsü nung parnok jenjang kakabo angutsü.

Lim arogo ajak nung Khrista makaba Khristan aika lir. Tamanger kibong nung aso, mapang tatong nung tzü nung baptia arogo züngsem aküm, saka tekümtet maka aser tenlaki mangudangba (limapur Khristan) aika lir. Tanü lim arogotem nung tashidak tulutibaji ya ka lir, parnoki arogoi ayungba revival, retreat, camp memetet aser mangashi. Item nisungtem küm nung ken anaben ajurua sarasademer yutsüba agi kodanga memelenshitsü, saka parnok nem Lai O tesayuba tajung angatetdakja Khrista dangi anir arutsü nungdak,  anungji arogoi item mapa asoshi rongsen aser nübu indoka inyaktsü lemang bushitsüla.

Lim arogo kari member care ministry takok ngua inyaka arudagi. Pei sasa litetsüsa lemang lanurtem nem sayua training balala agütsüba tali tajungba aser teimba inyaktsü ajungshitsüla. L. Lima Jamir-i DABA nung inyakba ka yamai shisem, “MEMBER CARE ministry ajanga tang tashi nung item ya arogoi full sponsor süa  inyaka aruba kar shisemer. Item ya onoki inyaktet ta asüba nung masü saka skill development training ya arogoi home mission budget nung inoker lanurtem yaritsüla aser akokba tashi nung self-employed süa self-reliance  aser self-sufficient sütettsüsa aser ibai ajanga  unemployment tebilemtsü ya kangabo malitsü ta bilema yamai inyakdagi. Item ya tang teinyakdak lir. Ano lemangtem bushia arogo züngsem lanurtem yaritsü arogo tangatetba lir. Tang Covid wara ajanga online classtembo agidaki. Training yamai agütsür:

Rehabilitation for alcoholic & drug addicts, 

Electrician,

Computer training,

Montessori training,

JCB Driving,

Art of cooking,

Cutting & tailoring,

Hair cutting,

Hospitality,

Aviation,

Carpentry,

Mason,

Iron bar binding for construction, etc 

Item ajak ya govt, registered certificate agütsür. Local arogotemi nüngdakba trainingtem ya lanurtem nem home mission nung tongtipang shilem ka ama budget nung peria inoker agütsütsü. Nüngdakra shisatsü agütsütepa yariteptsü lemang peria lir.” Atepdang mission sendakba nung Mayang Longkumer ano yamai shisem, “Arogoi professional career and counselling center lapok nung koda? Mission hospital branch ka ka asenok Aor tzükong ajak nung lapok nung koda? Aoli arogotem nung inyaker chirtem (timtema alirtem) atema Mungdangi Mission School ka Impur nung lapoker (with boarding) class 5-10 tashi free education agütsü nung koda?” Ibala tenyaba mapa dang temang rangpen atema atepdang nungdakpur asoshi inyakba ta ashitsü akok.

Tanur sempet tajung aketer aika kibong sensak tia ajanga school/college mezüngteti aliba angur. Tangar kin asoshi mulungsoa yariba angur aser yamaji parnok school/collage azüngtsü asoshi züba zübar, aika free of cost azüngba nguogo saka college aser seminary balala nung asen nisung timtemer teyarir mali aika lir. Asen Aor dak timtemer yarinüba mulungsentsü lir sürnung asen atepzüng senzüka toktsüba aika ajiteter anungji arogoi scholarship agüja mesüra kibong kar teyari agia, arogo ajanga yamala tanur sempet tajung akaba yaritsü lemang sayuteptsüla.

Ano atepdang tenyaba mapa ta asüba nungji yimtsüng nung tenzükertem ita sen tepok sünga magütsüba yaa dena lir ta angatettsüla. Tepok sünga magütsüba agi tanur school nung mezüngtetba, kibong nung timtem ajuruba, arogo mapa nung tamakok  aluba ngua arudagi. Anungji tangar mission agency-i inyakba ama arogoi mesüra Mungdangi school kar den tesendaktep yanglua tenzüker chirnurtem asoshi hostel aser achool fees tera tajemba nung azüngtettsü  lemang bushitep nung ajungtsü.

Lokti terenlok asoshi lim arogo teinyaktsü

Koba arogo nung home mission asoshi temulung agütsür iba arogo tanela aser rongsen nung aintsü. Iba temoatsü yimzüka aluba ajanga arrtsü ajanga oa asenoki mapa tuluba inyaktsütsü ta imlar – Menji Jamir

Lim arogotemi Mungdang den yaritepa ABAM mission school tajungba kümdakja Tsüngrem tenzüker chirtem aser Aor tanurtem züngtetdak school tajung ka küma yanglushitsü nükla tajung ayutsü junger. Tanabuba nung, Impur mission hospital tajungtiba küma yanglutsü asoshi  lim arogotemi Mungdang den yariteptsü kanga tongtipang. Kechiyong iba mission hospital tajungba küma yanglushitetra asenok asoshi dang masü anasa aliba district ana-asem asoshi kanga teyari asütsü, anungji ajak lungjemer iba mapa takok angutsü nükla yudi. Tasembuba nung, mission center nung sen aika indoka guest house yangludagi, au Impur ya Naga nunger asoshi dang masü alima ajak tenük ranglokdak asünung guest house nung sen  indokba sasa-a mebelemli saka mission center nung nungdakba mapa inyakdang mission tamakok maludaktsütsü tangatetba alitsüla.

Lim arogo karbo tenlaki yangluba agi mission meinyaki anena ataba nguogo, lim arogo development aodang mission boardi mission sen agi arogo general yariba angashiogo, mission boardi mission sen ajak amshia pei arogo nung revival, youth camp aser retreat agütsüba arogo osang kaket nung züngogo. Tsüngremi Pa mission ataloktsütsü asoshi lim arogo jatetba amajok mekümdaktsütsüla.  Lim arogo kati mapa tajung aika inyaktsü akok, saka mapa tajung ajakbo mission mapa masü ta tangatetba aser mapa tajung agi mission küpdoktsü makok ta tangatetba nung nungloktsüba mapa inyakysüla.

Arrtsü atena or inyakba mission

Aortemi kinunger, adianu, mesüra medemer o medemer longjemer, mesüra ano telok balala tenteter bendangli mission inyaker aika adokogo. Ya mapa tajung saka Arogo majangiang inyaktsüsa ya koda asü? Ya mapa tajung inyakyim nung Arogo den amalitep nung inyakbasa tajungba asütsü. – Yanger (Nepal)

Arogo mission tali tajungba bener aotsü asoshi toklang tenzükertem mission training yoka mission inyakyim angazükdaktsütsü junger kechiyong mission yabo mapa küma inyaktsüba (practical and action) mapa. Kokra lim arogo tulu nungbo mission asoshi full time tenzüker ayutsüla.

Lim arogotemi mission lushi tasen yateta inyaktsü bilema lira rongsen aser development agi mesüzüka meinyaktsüla. Nüburtem rongdak nungdak (immediate needs) dak alaka rongsen tali amshia inyakba agi tanela anir aruba mapa nung tamakok aludaktsür. Maparen ajak nung nüburtemi akokba tajungtiba agi shilem agitsü sayutsüla, ibaji ajanga mapang tatakzük nung parnok sasa nokdaktettsü tangatetba agütsür.

Lim arogotem aser kibongtemi mission agencies balala den longjemer mission inyaker. Tenzüka aliba mission nung itasen agüja nübu yoker mesüra ita sen yoka par nisung yarir.  Iba ama mission nung like-minded mission agencies asü masü metettsü tongtipang kechiyong arogo mangdang den meputepba mission telok aika alitsü aser parnok den som süra inyak nungbo lia lia mangatetep adoktsü. Tanabuba nung, kija mesüra kibong/kinunger longjemer missionary yokba, mission field lapoka inyakba dang nungibo mungdang aser arogo telungjem ajanga inyak tajungba. Kibongtem, kijai yaritsü saka arogo/mungdang ajanga inyaktsü tim.

Anogo shia yimtsüngtem nungi yimtitemi mapa bushia nüburtem meyirjang aika aor (migrates), anungji yimtitem nung kin aser oshi tapu ajak lir. Parnokji tongtettsü asoshi missionarytem yoka arogo aser sarasadem tesep tenteta inyaker saka iba mapa asoshi arogo rongsen peria alitsü nungdaker. Tanü putu nung iba urban mission ya takok ngua otagi. Arogoi iba tenyaba mapa nung shilem agitsüla.

Lim arogo aser telok balalai foreign mission tenzüka aoba angur. Asenok nübu tajung aika lir saka rongsen nung tangar memeneba state asü nung asen rongsen bener oa inyaktsü masü nübu yoka tangar teyari agia inyaktsü lemang bushitsüla. Tanabuba tebilemtsüji, India Rupee aser bendanger sen value kenyungi balala lir, Tat. agi. India Rupee ita sen ita nung lakh ka (Rs.1,00,000/-) agütsü nung US Dollarbo 1,342/- shi dang lir, aser China Yuan 8,656/- shi dang lir. India nungbo sen aika amai, saka tanga lima nungbo par taliba jenjang metongteter. Iba ama sen value masadangi missionarytem yokra aser par jenjang nungji magütsüra missionarytemi timtem aika ajurur.

Muslim, Buddhist aser Communist limatemimissionary yokba aika lir. Missionarytem taküm yimya nung Yisu ajitetdaktsütsüsa alitsü, saka  odia Osangtajung mejembtsüla. Taküm aser mapa ajanga Khrista kuli sütettsüla. Iba ama jakatem nung lim arogotem rongsen aser mapang indokba aser tajangzük, asadanga inyaktsü lim arogotemi metettsüla.

O tembang

Tsüngremi lim arogo nem nongloktsüba wadang tulutibaji mission. Taküm aliba arogo kati mission meinyaki metoktsütsü, koba arogoi mission mapa nung shilem agitsü mejangrar iba arogoji tanela nung tasü. Tenyaba mapa lirumedema bener aotsü asoshi lim arogo majangi kija aser kibongi mission metenzüktsüla, ter shilem pei aliba arogo nem agütsütsüla. Yamaji lim arogo nükjidong tulutibaji tenyaba mapa ya asütsüla, yangji atepdang aser arrtsü atena oa inyakba anaprongla lir.  Yisui sayuba aser inyakba mission nung tanela aser taküm rangben tekümtet asoshi inyakba ama timtemer yariba, taküm jenjang yanglutsüba den tekümtet jenjang angatetdaktsütsü lim arogo nükjidong asütsüla. Ano arogo nung tantsür tambur leni maor, temang nung matamabensar den day care amala tenzüka mapang ajak nung sarasadem telungjem, shisatsü aser rongsen agi arogoi yaritsüla.

*****