~ N. Imsü, Moalenden

Küm 100 shi (536-432 BC) tsüngta Israel nunger Babilon nungi Yirusalemi asembenren tashi oa Tenla Ki, yimti Jara teraksa yanglushiba aser tamangba yimsü, yimden yimli yimsoshia tanela nung asentenshia taküm yanglushiba asenoki Ezra, Nehimia, Esther kakettem nung angur. Iba nung temoatsü anguba ka kuli asür.

MEZÜNGBUBA APUSORTEM:

Persia chuba Cyrus tendak 536 BC meta Zerubabil aser Shesbazzar nungeri anir telok ka apusoa ao. Cyrus chubai ashi, “nenok ajak rongnung shibasa Pa nübur lir … tuang, aser Kibuba Israel Tsungrem Ki yanglushidakjang …”(Ezra 1:3). Anungji Israel nunger parnok meyi tenem shi agi mulungteter apusoa ao. Iba mapang tesüiba Babilon yimli nung tongti yimsüsür tambur Daniel to ano Persia yimli nunga Cyrus chubai tematiba tongti yimsüsür asem rongnung ka shimtetshiba angur (Dan.6:1,2).

TANABENBUBAREN:

Persia chuba Artazerkses tendak 457 BC meta tezulur Ezrai anir parnok nisung 1754 shi apusoa ao. Iba mapang tamaren Persia yimli nung temulungjangji Yihuda nunger liasü. Yihuda tsür Esther chubatsür aküm aser Yihuda nunger Mordekai chuba den tatong prime minister kümer bendang lima nung parnok tepuokertem ama mesüi kibur ama kümer taso shia jangratema liasü. Bendangertemi Yihuda nunger dang kanga tsübu  aser aikati Yihuda senso aküm ta Esther tapu 8 aser 9 nung tatalokbatem angur. Iba mapang nung Esther tebuba Ahasuerus chubabo süatoker par jabaso (step- son) Artazerkses I chubaba mapang liasü. Chuba nem shisa agütsürtem par 7 (Ezra.7:14,15) rongnungji Esthera ka liasü ta ashir. Artazerkses chubai ashi, “… shibai Yirusalemi aotsü mulunga lir ne den aotsü akok.” (Ezra.7:13). Parnok nisung 1754 shi rongnungji Levi kin nungibo temulungteter maliasü (Ezra.8:15).

TASEMBENBUBAREN:

444 BC. Meta Yihuda nunger Nehimia Governor ka ama Persia sepaitemi meiner ao. Nehimia mulungsentsü aser pa dak sobua aliba jaklatem yamai liasü;

     * Sarasadem, tasoli meimba (Patriot)

      * Mapa agi inyaka sayuba (action)

      * Tangar mesüzüktsü tajung

      * Tasu tait

       * Tenoktangbatem liaka aremzuka maneni inyakba (Perseverance).

Israel nunger Babilon toktsür Yirusalemi aotsü mulungtetertem ya atamata nisungtem masü! Item ya par tsüraburtem tesüiba Asiria yimli tendak küm 300 shi tejaklen aser Babilon yimli tendak küm 150 shi tejaklen pur arurtem nungi aiben jakzüka aruba semchir semnurtem lir. Joko karbo parnok kong nungi jakzüka aru’ar memetetba purtema liasü (Ezra.2:59). Item ya Egypt lima nung Yosep memetetba chubatem kübok ala ashia timtema aliba purtem ama masü. Temalen shisemba ama item ya tepuokertem ama alar jenjang nung mesüi taso shia jangratema alibapurtem liasü, saka tamangba yimsü tsütsü Tsüngrem külemba nung timtem ajurua liasü. Anungji parnok aika rongnung teraksa yanglushitsü mulungteter ishika dak ya chichia Tsüngrem meimba aser pei lima meimba mulungsentsü adenbapur liasü. Nehimia dak aliba mulungsentsü aser jakla item daka sobua liasü.

MULUNGTETBA SÜLEN KECHI?

Parnok Yirusalem atongtsü ita 4 shi agia tsükchir limatem ajangdanga timtem jenti agia jajatsüla. Yirusalem meketa aliba tsükchir kintemi tasa tapu jenti agi amokmerena timtemdaktsü. Yimti tulu, mapa tulu, nisung ishika dang, parnok talidak ki ano meyanglu ( Neh.7:4). Pei taküm kibong nungdak atemabo inyaklen mapang maka. Joko chirnurtem sentsü yong alar jenjangi yoker (Neh.5:1-5). Nehimiai governor chiyungtsü mechidang nüburtem den timtem tulu nung sarasadema mapa inyak (Neh.5:14,15). Tsüngrem ajaso chir shibai asenok alangzüktsü aser yanglushidatsütsü atema temulungtetba tulu nung alimai aru, Paia timtem tulu nung Tebu Tsüngrem dang “…  kechiba nai ni toktsür” ta ashitsüsa aküm. Sakasa Pai tebu Tsüngrem sentong nung timatem. Tebu Tsüngrem sentong ano merenemjungi liasü.

TAYONGZÜKBA O:

Asen lima yanglushitsü asoshi tematiba jenjang nungi tajemreptiba jenjang nung alir ajaki shilem agia inyaktsüsa lir. Asen lima yanglushitsü mulungteter rongnung na adentsü asü meyanglushidaktsüner rongnung adentsü? Asen lima Khrista asoshi ta yimyim ayimba kija agi masü joko mapa agi kuli süa sayutsü mulungtetdi. Joko Tsüngrem sentongji asenok ajanga atalokdaktsüdi.

Ne taküm yanglushitsü nungdaka ali asü. Yimti ka nung aliba kechisarena ajak dang nungi ne takümji taoba ta Tsüngrem O-i ashir. Iyongji Tsüngrem chiri Pa taküm na asoshi bendanga agütsüogo. Teraksa yanglushiba mapaji temela masü. Idakji timtem tekangshi aser tatidang jenti lir ta nai metet. Mulungtetba sülen timtem tekangshi aser tatidang makai ang takokbajia aser tamakokjia maka ta nai metet. Nai asen kümtetdakba Yisu Khristaji chichia meima lira naia memulungteti ang malitsü. Nai Pa dang chichia meima lira naia takokbaji mangu tashi seplasepshi masütsü. Ni meteta lir, angateta lir sürnung meinyakerba dang ta melili. Joko mapa agi kuli asütsü mulungtetdi. Joko Babilon toktsür apusotsü mulungtetdi.

*****