Nagaland aser tanga northeast state-tem Assam den artsü tebilemtsü adokba dak sentakba nung khuret süa bilemba onük kar Ao Kaketshir Mungdang (AKM) ketdangpurtemi Aug 9 nü parnok office nung osangbener senden ka nung metetdaktsü.
Artsü tebilemtsü dak sentakba nung mapang talangka AKM-i ola madoki ajemajema repranga ataogo. Assam-Nagaland artsü tebilemtsü atema telok anaprongi nentaka inyakba mangur. Nagaland sorkara state politics jara nung melii iba nungi atena reprangtsüla, kechiyong Assam tsütsü nungi mapang shia Nagaland-i ali atsünga aruba atema tai tongloktsüba ajangshia arur, ta AKM lenirtemisa metetdaktsü.
Tatishitsü agi, AKM meyong reserve forest ka Aoküm nung lir aser ibaji Aor/Naga nunger litsü nung lir, aji saka, Assam nungeri mapang shia AKM Reserve Forest nungji timtem agütsür, ta AKM purisa kuli kar dena ashi.
Yaküm 2020 Feb ita nungto Assam nungeri AKM Reserve Forest nung kecha kuli makai Signboard intoktsü, anungji, tawato Reserve Forest nungji AKM-i signboard tasen ka inok, iba dak sentakba nung Assam media balala ajanga taitsüba osang balala nguogo/züngshiogo, saka pei litsü nung yamaji inyakba atema kecha tarendaktsü mali aser AKM-i iba mapa ya tang tasen inyaker masü, ta parnokisa jangjashitsü.
“Aor/Naga meyong ali inch kata shinga nema agütsütsü makok, ibaji akhi tsüraburtemi azü tenlaa alangzükba lir, anungji, kari danga aji rakteptsü merangra, AKM-i tatem tashi noktaktsü renema lir”, ta AKM lenirtemisa metetdaktsü.
“Kodang kechi ataloktsüar ashitsü makok, anungji, Ao litsü nung alir senso ajak pei lima wazüka/kümzüka ayutsü asoshi renema atatsü sangoktsür”, ta AKM lenirtemisa tayongzükba ka agütsü.
(Source: Tir Yimyim)
The Nokinketer 