~ Tayong Lemtur

Clean election nung tamakok tulutiba anaji senso candidate shimba aser sen lemtsüba, iba ana ya yanglushitet nungbo alima dangi temelenshi bener arutsütsü. – Matsüng Pastor

Naga nunger asoshi sen ta süra süjia oadoker. Sen meimba shisatsü aser sen lu ayimba ali tashibo Nagaland corruption free asütsü tamakoktsü…. Nagaland Assembly election tonga arudar. Covid-19 ajanga economy kanga raksaktsüogo. Kibongtem aika koda masüba jenjang nung lir. Govt. ajanga nüburtem yaritsü lemang mali. Lokti senden aser Arogoi kodanga sen lema mejajatsü. Nüburtem aika asoshi ya-tzüra aser makamait ajak kübzükdakji aruya aliba election ya alitsü shibai metet. – Zülu Jamir

Okila

2023 küm Nagaland Assembly election nükla nung “My Vote, My Future” omen nung ajemdaker clean election campaign alitsü August 6 nung NBCC-i lapoktsüogo. Naga nunger lokti ajak ajungtsü mechi nung aser Arogo yimden yanglushiba nung shilem kar ta angateta Arogo-i clean election ayongzüba nung shilem agiba ya yimden yimsüba mendenji Tsüngremi nüburtem tiptema ochiba lokti yangertsü asoshi mezüja shimtet ta asüba tangatetba ajanga lir. Ano tamangertemi yimden yimsüsüba nung shilem agibaji Tsüngremi mulungba inyaktsü aser pa dang tashi angaba (Obedience to God) kuli ta sayur.

NBCC aser ABAM kübok Ao Arogotemi achaayanga clean election campaign ya inyaka arudar. Election nung corruption/temenen mapa inyakba ya tanü tasen masü. Nisung pa/la melenshiba kisüng agi election tongpang ya makoktsü ama bilemer. Küm aika election yimya majungba (corrupted) ajanga iba tashi agi nubur meyokadoker. Anungji iba tongpang ya Arogo kisüngi masü saka yimden aser lokti (civil society) arok tibelemtsü khuret ta anagateta inyaka arudar. Democracy yimden yimsüsüba nung tashi (Power) ji nüburtemji lir. Shisemba ama iba telok asem, Arogo, Yimden aser Lanur teka lungjemer iba tongpang asoshi nokdakra takoktsü aser temelenshi asoshi lemang lir. Yangi Clean election campaign asoshi tongpang nung ajurutsü khuret kar lemsateper. Iba den külemi Arogo, Yimden aser Lanur telongjem ajanga inyaktsü YSS nung lemsatepba mapa kar lemsateper.

Kechiba election agir?

Senso candidate meshimtsüla aser senso candidate shimba timtem tera aser lendong public nem seminar agüja tang yongi tesayuba tajung tenzüktsüla. Tanabuba nung, public dang vote mayoktsü, sen meshia machitsü saka onok nem ibala development adokra kua ta ashitsü education tajung tang nungi agütsütsüla. Electioneering miima masü yimjak nung public speech aser candidate visions and mission Naga lima atema adok nungbo ni yamai inyaktsü ta public debate public-i demand asütsüla.  Sen amshia kibok nung dang saiba yagi leader tajung meshimteter. – Limala Longkumer

Nübur ajak tenüng nung tatar senden nung asenok nungdak ken o benoka jembitsü yimsüsür shimtsü atema election agir. Nüburtem liromedema tejakleni odaktsütsü tatar senden nung yimsüsürtemi pei lima terenlok mapatem, sobaliba, saisapong, rongsen amshiyim aser tamangba yimsü tsütsü nüburtem asoshi temzüng ozüng yanglutsü. Tatar ka asoshi teinyaktsü tulutibaji (1) lenmang yanglutsütsü (2) Electricity peria agütsütsü, (3) Nüburtem kümzüka ayutsü (security) aser temzüng yanglutsü (4) Tanga lima – India nung state aser foreign – den shishilemba aser terenlok mapa balala lemang bushitsü, (5) Industry balala lapoka inyakba (6) Lanurtem asoshi mapa balala koda purateta alima tejakleni anitsü asalendong,  asoshi inyaktsü atema shim. Aseni shimer yokba yimsüsüri itemji koba tashi inyaktettsü aser inyaka ali aji shisadangtsüla.  Anungji senso shiai iba tata shimba nungi pei melen tatar senden nung pei nüburtem nungdak rasaa shiteta jembitsü aser shisa tasen bener arua nüburtem asoshi terenlok mapa inyaktettsüsa pei nük agi asüngba tetemsü nübü shimtettsü asoshi lir. Anungji nübur shia meyongnemji (Vote) kanga senti aser nisung shingaia aji rakzüktsü makok. Sen agi alitsü makok, sen yong ayoktsü makok aser tashiyim agi rakzüktsü makok.

Kechiba asen nüburi sen yong meyongnem ayoker. Kari ashitsü akok, sensakba agi. Aji lemang ka nungbo shitak, saka aseni metettsüba kaji nüburtemi meyongnem ayokba ajanga asen lima sensak atener, development mapa meinyakteter. Meyongnem ayokba jagi pei jurila TV, Refrigerator, Mobile, a.a alitsü, saka lokti songjem ajungtsü atema, tat. agi, lenmang, mozü ki, electricity, tajemtsü tzü, aluyimba nung terenlok, shisaluyim tasen, a.a meinyakteter. Tatartemi sen kwika indoka lir aji meyipa angutsü meranger aser tarutsü tata shim atema sen bendener. Meyongnem ayokba, alitepa ajanga mangdang akar meshimteter aser ibaji ajanga alima rajang kümdaktsür ta angatetdi. Item lenirtemi adokyonga nüburtem asoshi mapa tajung meinyaktsü ta metetdi.  

Kechiba sen agi vote alir? O tasü agi “Kechi südir süaka adoknüba agi.”  Auyaba sen aika aliba agi mekurui yimden tashi alitsü meranger. Nübur tenzüknüba agi masü saka yimden tashi amshia takar küma linüba agi. Yongji yimsüsür aikati goonda telok tenteta amshiba ajangshia arur.  Political party nung leniri sensakertem nem sen aser yi agütsüba, Putu yimsüsürtem alizükba,  bendanglen alir tera temeteter aser tanishirtemi candidate o yimtaklir na tsüngda agent kümer sen chitsür aser yimtaklirtem anisar. Yimtaklirtembo vote ayokba agi TV mesüra fridge-ang alitetter saka bendanglen alisangbo election sen agi ali dena alia ki asür. Tat. agi, candidate ka sen crore 5 endok nung shitakba voters ketbo crore ka agidang atonger. Ano maparen ka nungbo election maparen ya arogo nung lenirtemi tasü ita ochi meshitetba agi menentsür.  Anungji nüburtem ajak kümkümshitsüla.

Tatar asadangba

Tatar kobalaka shimtsü? Sen agi shimtetba tatar jagi kodanga nüburtem temulung süa yimsü mesütettsü. Shiba yimden tata menden nung mena lir aser shirnok tata menden asoshi tokteptsü jangrar, parnok declaration aser convassing mapang item tasüngdangba ya asüngdangtsüla:

  1. Candidate-bai kechi inyaktsü nangzük? Aji inyakteta lir asü masü? koba tashi inyakteta kar?  Nangzükba ama meinyakteti lira tanaben shimshitsü nungdak madoker.
  2. Nübur nungdakbaji lenmang, tzü, electricity, rongsen ketsüng terenlok mapatem ya lir – item mapa atema kechisa inyakja ali? Itemji renlokdaktsütsü kechi nükla?
  3. Naga nunger ajonga terenlok, yimjung aser alima tanga den rongsen ketsüng atema kechia inyaka lir? Kechi nükjidong lir aser koma inyaka aotsü?
  4. Naga lanur mapa balala asateta aser nguteta (Govt. mapa dang masü) inyaka aotsü kechisa inyaka lir? Nükjidong kechi aser koma inyaka aotsü?
  5. Pei yim mesüra pei constituency candidate ama dang mesüi Naga nunger yimkong terenlok atema kechisa Assembly nung jembi, lokti senden balala nung jembi aser inyaka ali? Nükjidong kechisa lir aser koma inyaka aotsü?, ano aika.

Nüburtemi metettsübaji ya:  Yimtsüng kar nung black topping inokba, yimtsüng balala nung relief terara agütsüba, mesüra mapa inyaker ta sayutsü foundation stone kar azünga yutsüba jagi teperi masü.  Tang nübur rongdak aser long-term asoshi kechi inyak/inyaker aji tongtipang. Sen kwi arur, aji lokti terenlok asoshi koma amshir aji lokti nung metetdaktsütsüla. Aji public sen aser aji koma indok aji asüngdangtsüba aser metettsübaji public right. Mangdang tejangja makara item lenir shimtsü nungdak madoker. Anungji mangdang makaba lenir shimba jagi alima rajang kümdaktsür ta metetdi.

Arogo/Tamanger asoshi Election Tongpang:

Pei nija, pei taküm, pei yimtsüng, asen Aor, pei-pei (self, selfishness) indang ya ojang dang jembir, joko asenok külem, Naga nunger songjem tangatetba dangi memeyip tashi clean election süngjang madangtsü. – Jongshimanen

Asenok clean election indang deobar sentep ka ana agiba agi makümtsü. Asen nüburji sentepi marur teimba. Clean election awareness mesüra participatory seminars akatsüla, aser khen yongi mesüi target group lemsar akatsüla. – Maong Jamir

Pulpit nungi ochiji tuteta sayutsü, jembitsü. Ni ya jembi nung kü dak mesaklokra ta tebilemba ya doktsür clean election nung yabo tasü ita sayutsüngitsüla. – Sashikümla Longkümer

Yimer candidate ali tashi free and fair election kodanga takok mangutsü. – Aowabang Ozüküm

Candidate Shimba Yimya:  Mapang talangka asen Ao lima nung election asoshi Candidate shimba yimya ya Yim aser Tsükong repranga shimer. Iba ajanga aiben nübur asoshi bendanga agutsuba aser inyaktsüba candidate meshimteter. Clean election yimyim ajanga iba yimya melenshitsü ayimoktsütsüla. Candidate shiba temsüa lir itemji shimtsü asoshi nungeta yariteptsüla.

Sen agi Election ayongba: Tanübo candidate-i dang masü nüburia sen melira election nung tokteptsü tamakoktsü ta bilemer. Tanü Nagaland nung election menentsüba kuli tulutibaji sen amshiba ya lir. Sen ajanga tamanger dena mesüzükdaktsür. Election nung sen amshiba ajanga raratep aser tsükchitep atener. Sen ajanga pei senti vote ayoker. Election nung sen endokba ya corruption teraji lir. Sen amshiba ajanga tetemsü candidate aiben madoker. Election senji koba yimya nung arudir aruaka magitsüla aser election mapang amshiba senji temenen ta nüburtem nem angatetdaktsütsüla. Clean election yimyim ajanga candidate shibai sen amshidir vote magütsütsü ta yimyim ayimtsüla.

Tashiyim agi Election akoktsü merangba (Coup system): Yimtsüng aser Town balala nung tashiyim amshia election akoktsü merangba ya yimya tasen ka masü. Election mapang coup system ya election temzüng anema lir. Ibai ajanga nübur ‘Right to Vote’ rakzüka ayur. Candidate karibo lanur tashi kar, samaro aser goonda anitena iba mapa ya inyaktsü asoshi sentong yanglur. Ano karibo nüchiso tashi amshia election coup asütsü meranger. Item mapatem ya rongsen aser tashi amshia yimsü asütsü jangraba candidate-temi inyaker ta metettsüla. Clean election campaign ajanga iba tashiyim mapa ya aitsütsüla.

Election nung pei jurila tebilemba ataloktsü merangba: Pei jurila sentong ataloktsü merangertem asoshi election ya maongka tajung ka ama agir. Nübur aika sen aser mapa (service) aginüdang pei taküm aser vote ayoker. Tat. agi, workcharge nungi regular angutsü teimla nung bendanga agüja yariba, mesüra pei chir mapa aser pa/la mapa angutsü teimla nung yariba. Yamaji pei jurila asoshi bilema election nung shilem agiba ajanga nübur asoshi terenlok mapa (development) aika samadaktsür. Lokti aser nübur ajangzüktsü terenlok mapa asoshi jembitsüla. Clean election ajanga election ya nübur aser arok ajangzüktsü asoshi ta yimyim agütsütsüla.

Election nung Chidiyongdi aser Lalushipong: Youthnet report ajanga ashiba agi 2013 küm Assembly Election nung candidate-i endokba sen ajak agi 937.82 crores liasü. Küm 8 tejaklen paikaji endok süra tanü elections nung kwi endoka alitsü? Election nung sen alemba dang masü saka chidiyondi aser lalushipong ya tali akümer. Election mapang yimtsüng aser town balala nung party kimen asoshi ki ana asem mesemtepber. Iba yimya ajanga chidiyongdi aser rongsen lalushipong bulur. Clean election ajanga item yimya ya anendaktsü yimyim agütsütsüla. 

Arogo-i inyaktsü mapa  kar

Ochimashi (corruption) tera ya tanga tashi kechaia makoktsü saka moral transformation ajanga dang akoktsü ta bilemer. Kotaki aotsü indang sayuaka asenoki KODA kotaki aotsü iba tesayubabo kanga  anünga agütsür. Temeim aser tai toktepbaji tajung saka iba kisüng yagi dangbo Lai tesayuba mabensar. Yisui noklangnok bener aru ta ashibaji ochi latettsü aser ochi agi nür-ozü ta mebendang tai dang tai, shitak dang shitak ta jembitsü/inyaktsü asoshi lir. Tsüngrem nungi ochi asoshi tasü tait tanela meshia nüburtem nem ochi tesayuba peria agütsütsü nungdaker. –Menjiwabong Jamir

Clean election takok nung mezüngbubaji nisung temulung meyiptsüla. Tsüngrem dangi temulung memeyip tashi clean election takok mangutsü. Clean election nung arogo mezüngbuba shilemji nüburtem Tsüngrem dangi meyipdaktsübaji asütsüla. – S. Among Longkumer

Tsüngrem O nungi tesayuba: Arogo nung tamanger asoshi election nung shilem agiba ya democracy-i melaba aser Lai tesayuba ta angatetdaktsütsüla. Ano tamanger asoshi election nung shilem agibaji temeshiba aser ochi kulisüba mapa. Yimsüsüba mendenji Tsüngremi mulungba mapa. Ano yimsüsürtemji nübur asoshi tajung inyaktsü Tsüngremer kilirtem ta shia lir. Rome 13:1-7. Arogo aser ABAMi temeshi taküm indang jangja jangja sayutsüngitsüla.

Yimden aser civil society den apu alatsula: Arogo-i clean election nung takok ngua mapa inyaktsü asoshi yimden aser civil society den longjemer mapa inyaktsüla. Aiben election mapang yimden yimsüsüba ajanga temzüng ozüng aika yanglur. Ozüng koba ajanga teraksa bener arur itemji Arogo ajanga tuteta melenshitsütsüla. Clean election takok angutsü asoshi Arogoji dang masü yimden yimsüsüba mendenjia ochi nung nokdaka alitsü tim.

Temesüpba Yi anema nokdaktsüla: Temesüpba yi ya election mapang tashiyim agi election akoktsü merangertem asoshi tactic lir. Yi ajanga lokti menentsür aser rarapangsen puludaktsür. Election nung yi amashiba yimya ya Arogo aser yimden telongjem nung anendaktsütsüla.

Political education aser clean election seminar: Metetba aser angajemba ajanga telemtetba agir aser temelenshi bener arur. Arogo nung nütsüng/nüburtem nem ‘Participatory Democracy’ ya angatetdaktsütsüla. Arogo-i achayanga political education atema seminar tajung ayonga agitsü akok. Asenok tamanger rongnunga ano aikati election nung shilem agiba ya tai ta bilemer. Karbo tai memenatsü atema political participation nungi atsünga alir.  Iba ya kenyongi tai tangatetba. Tamanger tajung kati ochi yimden yangerba nung tim shilem magibaji tai. Küm 5 tashi yimden yimsüsüba (govt) mejungra nübursa kangshitsü.  Anungji itemi teinyaktsü ya shisadangtsü junger:

  1. Arogoi Tsüngrem dang election matongdangsa nü nüburtem mulung merüktetdakjang ta revival asoshi tang nungi arogo nunger kibong shiai shilem agitettsüsa chain of prayer sentong tenzüktsüla.
  2. Election nung yimdeni tashiyim amshiba mapatem, tat. agi, azükba, ki shibangtsüba, ki rongdoktsüba, raksatsüba, senchi achiba, aridokba aser jendokba mapatem anema arogoi nunga ta yimjak nung shitettsüla. Yimden nung meshitak inyakba anema menokdaktetba arogoji menungdaker, kechiyong yimden mapa memerükbatem merüktettsü asoshi arogo jatet. Arogo ya temeshi purtem sentepa tenüng sangtepa kazütsüba telok ka masü, saka nüburtem menendaktsüba mojing mapa anema tongpang nung nokdaktsü jatetba purtem lir.
  3. Election nung shilem agiba aser vote agütsübaji tai masü, shilem magiba aser vote enoktsüi maobajiang tai ta nüburtem nem angatetdaktsütsüla.
  4. Election anogo ya sensosanger ajak asoshi anemponga yimden nung shilem agitsüba temeshi anogo ta züngshitsüsa nüburtem nem tangatetba agütsütsüla. 
  5. Election mapa tenzüka Hindu nunger candidate-tem Varanasi ama parnok temeshi yimti aser tenla kidang oagi putir ajurua sarasadem tekülem agiba ama, asenok electioni aiertema sen aser yi masü Tsüngrem bushia tenla kidang sarasademer tenzüktsü ajungshitsüla.  
  6. BJP ama yimden teloki Ayodha nung Ram Temple yangluba aser Hindu nunger tanga yimsü dangi memeyipdaktsütsü, nashi shi meyokdaktsütsü ozüng zünga inyakba ama Khristantemia Khristan yimsu ajanga yimden nung takok bener arua Tsüngrem yimli ulushia yimsü asütsüla. 
  7. Commmunal political party, tat.agi., BJP election nung communal politics benshiba arogoi tai ta nokdaktsüla.
  8. Party candidate masü pei yim senso candidate shimbaji tai, iba yagi election menentsür ta ABAM office nungi ajangajanga yimjak nung sangdong ka agütsütsüla. Tashi angatsü mangatsübaji pei mulung, saka arogoibo tai dang tai ta shia memerük memeshiba mapatemji Yisu tenüng nung ola tulu adoka arüja aitsütsüla.
  9. Election merüka agiba ajanga tajangzük angutsübatem zülur proktsüla. 
  10. Clean election atema aser ochimashi mapatem balala anema book marker amala yanglua prokshitsüla.
  11. ABAM Principles of Clean Election Charter ka yanglur tenla kima shia signboard tulu nung zülur azünga ayutsüla. 

Clean election tajungba nung takok ngua inyaka bener aotsü asoshi “Arogo nung tenzükertem, tenzükba wadang balala nung alirtem asenok khen tama yakta, clean election indang ya süoki ia angatetter meranga inyaktsü, nungittsü, amaliteptsü, commitment tejangja agitsü nungdaker. Hau, asenok kanga junga clean election atema inyaker tenzükertem aika lir, saka ano aikati jembiyong serious süa magir. Anungji khen tenzükertem kümkümshitsüla.” – Temsüwati Kichu

Yimden Teinyaktsü kar

Aortem yimer candidate/tsükong candidate shimba yimya ya anentsüla, iba shimba inyak tashi nungbo election nungji timtem ajurutsü. – Esther (Khar)

Taoba mapang election nung clean election maparen tenzükba ajanga nübur aikati election sen magiba aser karibo meyiptsüba otsü lir. Ano tongtibang teinyaktsü kar: (a) Yimtak Yimtsüng nung permanent residents  dang E roll nung züluoktsüla. Yamaji town nung alira kasaji amshitsüla. (b) Yimer süaka town nung oa settled  süa alirtem katitsüla. (c) Election mapang bendanglen alirtemi  arua rongsen mamshidaktsütsüla shibai yamaji inyakba metetdir election matem tashi yimtaki arutsü memelatsü ozüng takang yanglutsüla. (e) Arogo, yimdemi, züngalepzük,  aser students  body longjemer takok tashi proxy voting memelatsüla. (f) Party balalai polling officer’s  team nem süpokrem agütsübatem aputsü atema lanur telongjem asütsüla  aser tim temerenshi akhangtsüla. (g) Candidate declaration asüi arudang lokti chiyongba yimya ya noktangtsü yimdeni ozüng yanglutsüla.  (h) Grassroot level nung clean election education agütsütsüla. (i) Groups balalai candidate ka nem dang vote agütsütsü ta media nung agütsüba mesüra ozü telok iba party nung atener ta sangdongba ya Newspaper nung  matoktsütsü temzüng yanglutsüla. – Imti Jamir

Pei yimtsüng aser tsükong tangatetba mayutsüla: Yimden ajanga candidate shimdang yimtsüng aser tsükong pukümer masütsüla. Candidate shiba nübur asoshi tetemsü iba pukümerji asütsüla. Yimtsüng aser tsükong tenüng aginüdang aiben candidate tajung madoker.

Political candidate (Jurila) den tezüngzüktep mayutsüla: Election matong dang nungi yimtsüng aser lokti kar nungbo candidate den tezüngzüktep agiadoker alir. Iba tangatetba ajanga ‘Free and Fair’ election nükjidong mataloker. Ano iba yimya ajanga nübur ‘Right to Vote’ maongka  maka kümdaktsür.

Free and Fair election asoshi temzüng ozüng yanglutsüla: Free and Fair election agitsü asoshi yimden tashi ajanga temzüng-ozüng takang yanglutsüla. Candidate shia iba temzüng-ozüng nung hai aura kadaktsütsüla. Election mapang sen malemtsü, yi temesepba mamshitsü, tashiyim agi votes capture masütsü, proxy vote magütsütsü, election mapang chidiyongti yimya malitsüla, etc.  Yimden ajanga voters kechi nung alir idakji pei tenüng bener odaktsütsüla. Yimdeni teküboklen agüja aliba ya inyaktet nungbo koda jungla:

  1. Bendanglen alirtem election mapang sen aser yi bener arua yimtaklirtem taküm, kibong aser tarutsü tia raksatsüba ya mepelar ta metetdaktsütsüla.
  2. Public indang auyaba sen agi public vote alia election-i shinga maitsüla ta yimjak nung sangdongtsüla. Sen agi tata menden alitsü merangertemji odia aitsütsüla aser sendoktsüla.
  3. Pei jurila masü saka pei lima aser nüburtem takar kümdaktsütsü asoshi electioni aitsüla ta jembitsüla. 
  4. Tatar senden nung o mejembitettsü purtembo electioni maitsüla, kechiyong MLA-ji tatar senden nung pei nüburtem nungdak jembitsü yoker.  

Lanur Teinyaktsü kar

NBCC aser ABAM ajanga seminar aser camping balala ayongzükera akar saka item sentong nung lanur aikati shilem magir. Lanurtem ya kanga tongtipang. Parnok ya social platform balala nung kanga sabua shilem agir. Anungji war room ajanga item lanurtem den tangatetba tajung agütsütsü nüngdaker. Aser iba ya asenok telok ka tentettsü asoshi masü saka tenteta aliba telok Naga Block, The Nagas, The Naga Mirror, lanuri sabuba telok nung shilem agitsüla. Tatishitsü agi, Mokokchung, Kohima aser Dimapur shia nungi Aor lanur 50nem shimer social media nung shilem agitsü saka ajak opang ka nung shilem agitsü atema parnok nem koba tangatetba nung shilem agitsü aji jungjunga ashitsü. Nisung 150 agi tangatetba ka nung lemsatepdang, tangara tangatetba melenshidaktsütsü ama bilemer. – Aowapang Ozüküm

Deobar sentep nung election atema jembitsü tajung saka target group matonger ta bilemer, kechiba süra Election nung ambangyim amshirtem sentepi marur! Anungji Arogo ajanga social movement ka tenzüktsüla aser yangi Social media, weekly targeted group clean election yimyim metetdaktsütsüla. Iba atema youth mobilize asütsüla. – Matsüng Pastor

Tanü alima anishidaktsübaji IT world, media lir. Tat. agi, Instagram, Church YouTube, kentener YouTube e.g. Dreamz unlimited six lakhs merijang semer asem temai repranga anidaker. Item platform tajung amshia clean election indang angatetdaktsüba ajanga nübur ajaki angateta nütsüng aika tajangzük ngudaktsütsü ta bilemer – Amenla Mar

Clean Election Mitkar: Election nung lanur ya tongtipang telok ka lir. Clean election tenüng nung lanur nübu tajung 30-50 tashi, shirnoki asen lima tejakleni odaktsüner, shimer ‘Clean Election Mitkar’ ta noktak nung ajungtsü. Iba telok ajanga election dak sendakba temenen anema social media nung tuteta sayutsü. Item telok ajanga ano ‘clean election war room’ tenzük nung ajungtsü. Social media ajanga item telok yagi nübur nem tangatetba tajung agütsütsü akok. Kusa teloki election dak mapetba sentong aser mapa balala anema raratsü akok. Iba ya ABAM tetuyuba kübok arogo aser yimtsüng putu menden/samen menden tazüokba nung Youth pastori anir inyak nung ajungtsü.

Media ajanga clean election asoshi jembitsüla: Election mapang Media platform ya kanga tongtipang. Media ajanga candidate aser party-i teinyaktsü mapa nangzüka onüktem discuss asütsü akok. Yimsüsür ni adokra yimai inyaktsü ta nangzükba koba tashi inyaktet, koba nung tamakok angu aser mapa tasen asateta nüburtem asoshi inyak itemi asadangtsüla. Shirnok tata menden nung toktepner parnok nükla aser koma inyaktsü itemji media ajanga ayimoktsütsü. Ano candidate joaka debate platform nung shilem agidaktsütsüla. Lanurtemi item mapa ya inyaktet nungbo temelenshi tulu bener arutettsü:

  1. Lanurtemi drama aser skit video yanglua social media nung upload sütsütsüla. 
  2. ABAM youth ministry ajanga lanur nisung teshimtet ayutsü. Parnok WhatsApp group tentettsü aser mapang shia zoom mesüra google meet nung ajurutepa tangatetba agütsütsü aser clean election atema shilem agitsü.
  3. Taoba mapang ama clean election sendakba nung ken mejema atentsü.
  4. Yimtsüng shia arogo aser putu menden/samen menchen tetyuba kübok Youth Pastor-i anir “Clean Election Mitkar” (CEM) ta sür yim shia nung youth 30-50 (yim tulu nungbo 100 tema asütsü akok) tashi shimer mapa tenzüktsü. Iba telok jagi sen alemba, yi amshiba amala election dak sentakba temenen anema social media ajanga tuteta sayutsü, public dang clean election indang angateta ashitsü, yimtsüng balala CEM telok den teka amteper ABAM tetyuba ama inyaktsü.  Clean Election ayonger ABAM youth department anir level asem nung CEM  atema political education on Clean Election seminar agütsütsü (a) ABAM level nung, (b) Constituency level nung, aser (c) Yimtsüng level nung ta seminar ayong nung temelenshi tulu bener arutsü.
  5. Election nung sen agi vote malitsü ta candidate shia nem pledge yanglua sign südaktsütsü.
  6. Couping system anema nokdaktsü.
  7. Shir party/worker tasa tamajung inyakdir, yimjak nung tuteta condemn asütsü.
  8. Election mapang shi, amtsük, süoshi, blanket, mobile phone, etc yimya balala nung lemyonga aruba memelatsütsü.

Otembang

ABAM-i anir Tsüngrem tenzükertemi kanga meranga clean election atema inyaka arudagi. Ochi ola adokba, ibai temenen mapa ta ayimoktsüba jagi asen lima yanglushiba nung shilem agir ta metetdi. Anungji lenir Temjen Tzüdir-i ayongkzükba ama (a) Iba election maparen majungba ya tebang agi dang jembiteper mayutsü merangdi. (b)  YSS züngsem shiai nübur kar dangbosa tamajungba nungi pilaa alitsü sayutetdi mesüra angatetdaktsüdi. (c) ABAM nung lenirtemi tang nungi shisa sentong tajungba yanglutsü merangdi. (d) Arogo shia Pastori anir toklang tenzükertemi pei Arogo nung yimsüsürtem nem tangatetba shitak agüja nungdak süra election mapang ochi shia shilem agitsü Tsüngrem den tenangzütepba yudaktsüdi (takoktsü süra Laishiba nung nemeta). (e) Asen kübok Arogo nung santen kibong shiai tua Election nung ochi shia shilem agitsü angatetdaktsüdi aser kokra Tsüngrem den tenangzüktepba tajung yudaktsütsü Tsüngrem tenzükertem khuret südi.

Hau lokti nung yimyim ayimbajia junger saka joko kibong shia aser nisung shia dangi tonga mora temeshi sabang aser salang nungi ayimtenba yabo asen nübur asoshi yimya ka amai dang kümogo. Anungji parnok nisung shia dangi tonga odi. Asenoki sentong aika atonga inyakdangogo aser jembidangogo saka sen aser yi tsüngdang nungi jenpur aika mali. Anungji joko lokti nungjia maneni inyaktsü saka talisa kija shia dangi tonga oa inyakdi, jembidi, aser angatetdaktsüdi. 

*****