Ao Kaketshir Mungdang (AKM)-i ayongzüka Aug 14, 2021 nü 75 buba ‘Naga Independence Day’ bilemteta sentong tajung ka parnok office complex nung meraketa mungogo. Iba sentong nung AKM ketdangsürtem den AKM kübok aliba unit balala nungi ketdangpurtem arua aden.
Sentong nung taoba Naga Students’ Federation (NSF) tir, Imchatoba Imchen-i Naga Independence Day amungba ratet lemsatepdang, iba ya shinga anema amungerba masü saka Naga nunger ka ta sayuba den Naga nunger otsü aser temeten wazüka ayutsü aser alima dang teimla osang peroktsü asoshi amunger, ta metetdaktsü.
Naga nunger ya libuyimpur (indigenous) nisungtem lir aser libuyimpur nisungtemji kechisarena ajak nung tangar dang nungi balaka lir, anungji, temeten asoshi maneni jembitsüla, ta pai ashi.
Naga yimden tebilemtsüji Aor kisüngi makoktsü, anungji, tangar den lenjii oa küla medema aotsübaji kanga tongtibang aser asenokia iba wadang asoshi akokba tashi shilem agitsüla, ta paisa tayongzükba agütsü.
Iba dak sentakba nung paisa AKM nem inyakdaktsünüba ka ashidang, Naga yimden temeten atema küm talangka rarayonga arudang, Naga nungeri linük asoshi bendanga agütsüba, timtem toushi aser rishikangshi ajangshibatem tarutsü lanu putu asoshi bendena yutsütet nungbo kanga ajungtsü aser iba mapaji otsüsütsü ka asütsü, ta tebilemba lemsatep.
AKM tir, Nungdokyanger Ao-ia sentong nung shilem agia liasü. Iba sentong moaja Mokokchung Town Baptist Arogo (MTBA), Associate Pastor, Rev. P. Chuba Jamir-i sarasademtsü.
(Source: Tir Yimyim)
The Nokinketer 