Ao oshi nung meyipba NDPP temzüng NLA Speaker, Sharingain Longkumer-i sayatsüba mapang Advisor Medo Yhokha densema NDPP ketdangsürtem kar noksa nung angur. Mokokchung, August 14, 2021 (Nokinketer Image)

Aug 14, 2021 nü Nagaland Legislative Assembly (NLA) Speaker, Sharingain Longkumer-i Nationalist Democratic Progressive Party (NDPP) temzüng Ao oshi nung meyipa adokba ka NDPP Mokokchung Region office nung sayatsüogo.

                Pai iba sentong nung jembidang, NDPP ya regional party ka lir, anungji, regional party kaji tera (root) nung sentaktepa alitsübaji kanga tongtibang lir, ta Ao oshi nung NDPP temzüng meyipba nükjidong lemsatep. Ao oshi nung meyipba NDPP temzüng Naga nüchiso amungba anogo sayaba ya jangratemtsüka aser ibai Tsüngremer sentong südi, ta metetdaktsü.

                Iba mapatong ajanga Mokokchung district kübok assembly constituency 10 nüburtem tongteta party nükjidong angatetdaktsütsü aser iba ya ajanga taruba election nungji lenmang aisü nung teyari angutsü imlar, ta pai ashi.

                Tanü PDA sorkar ya “telungjem sorkar (united front)” ka ama kümogo, ibai tatishitsü tulu lir, kechiyong asenok asoshi Naga yimden tebilemtsüji kanga tongtibang lir. Tejakleni aotsübaji Naga yimden keno ya tama latet nung dang ajungtsü ta angateta telok ajak obang ka sür Naga yimden asoshi jembitsü meranger, ta pai shisem.

Tawa tembangba assembly nunga Naga yimden tebilemtsü atema dang khuret süa jembiogo, aser iba dak sentakba nungsa Aug 18, 2021 nüji tribal hoho-tem den telungjem mensem ka akatsü ayongzüka lir, ta paisa PDA sorkari Naga yimden tebilemtsü atema süoki ia bilemba indang kar lemsatepa liasü.  

Iba sentong nung Advisor for Technical Education & Elections, Medo Yhokha densema liasü aser paia mapang tatsüka agia jembidang, NDPP temzüng pei tetsü oshi nung koba NDPP Mokokchung Region-i inyakogo, ibai otsüsütsü mapa ka lir, anungji, tanüngba district-tem nunga kasa mapa ya ajizüka inyak nung ajungtsü, ta paisa pelaba metetdaktsü.  

                NLA Speaker, Sharingain-i shisa tajung agütsüba den NDPP temzüng Ao oshi nung meyipa adoktettsüsa rongsen tulu tenlaba atema aser temzüng meyiptsür (translator) tsürabur Alempokba (Ungma)-i anibelem jenti agia inyaktsüba asoshi NDPP Mokokchung Region President, N. Bendang Jamir aser NDPP Youth Organization President, Bendang Walling nati pelaba lemsatep.      

~ Source: Tir Yimyim