~ Matsüng Longkümer (Osang Zülur)

Okila

AD 1872 ya Naga nunger, talisa Aor, yimsoshiba nung kanga tongtipang küm ka lir.  Iba küm America nunger Missionary Dr. Edward W. Clark ajanga Naga lima Yisu yimsü mezüng amenlok. Yisu yimsü arur kum 150 ajungba benjongmung 2022 nung amungtsü ABAM kübok aliba Arogotem yongyaseta ataba aser renemtepba mapang ka lir.

Nisunger yimya agi lokti mesüra nija jenjang ka alangteter külen iba sülen kechi inyaktsü ta tasüngdangba arur. Yanglushidi Sensaksem Sabang (YSS) nung tongpurtemi iba tangatetba ya ABAM 150+ nung rangloker bener arua anogo asem tashi sensaksema aruogo. Onüki aginübaji ya liasü, Jubilee-ji Tsüngrem taochi asoshi tenüngsang agütsüba küm, taoba mapatem meyipa reprangshiba, mabensai inyakbatem reprangshiba, tai nangzükba aser tadok agütsüba, temiem sayuba küm. Ano Jubilee sülen kobala tenyaba mapa tasen inyaktsü ta Tsüngrem dang mangdang tasen meshiba küm. Anungji 150 Jubilee sülen koba mangdang nung ABAM aser Ao arogotem aotsü? aser inyaktsü?

Iba dak ajemdaker shisa lemsatepba Aor yinti teshisadangba lenitsü aser bilemdangtsü asoshi tatsü agi iba ocet lemsar.

ABAM 150+ aser Rangben Anepalu Tenzükba (Holistic Ministry)

Ao Arogotem Khrista yimsü agizüker küm 150+ sülenbo ministry ya khen meyipa reprangtsü kanga nungdaker ta lemsatepogo. Tang teinyakdak mapa ya majung ta masü saka alima densa mongpu den apet reprangshia amangbapur sümedema indaktsütsü asoshi jenjang tekaba nung mapa inyaktsüla. Ministry ya nisung, lokti aser alima rangpen amsemba (Holistic) nükrangdong yur inyaktsüla. Tanela kümzüktsüji Arogo ka asoshi tongtipang. Iba tanela kümzüktsü asoshi nisung aser lokti rangpen arakzüdaktsüba shilemtem mesendoki anepalutsü nungdaker. Yangi shisaliokdak (schools, universities), manemer anelapudak (hospitals), nübur asoshi ayangdak (employment), alima tzümopung wazüka ayuba nung shilem agiba, aluyimertem nungitba mesüra sobaliba tajungtem, amungtsümong tajungtem wazüka ayuba nung rangloktsüla. Item ya kata mesüdoki liromedena indaktsütsüla. Khristan telok balala den amalitepa tenyaba mapa inyaktsü lemang sadema lapoktsüla. Mokokminertem sadoka külemtettsü sa policy yanglutsüla, alirongsen nung sensaker, shi nung shiranger, shisatsü nung tangar memeneper, LGPTQI+ amala shirnok jendoka lir parnok ajungketba tenyaba mapa asentenshitsüla. Teti benshiba yimya nung jangaratema alidang densa den apet melenshitsü amadokra asen lokti tejakleni maor ta metetdi.

 ABAM 150+ aser Lim Arogo inyakyim

ABAM ya Ao Arogotem tebuti/tetsüdi ama shisangshisanga alitsü kanga tongtipang. Iba ya ataloktsü asoshi Mungdang nung inyakertemi anir Arogo aser tamanger ajaki ABAM ya pa tata akhüm aser sentsüji wazüka yutsütsüla.

Baptist tamangba nung lim arogoji jurila yimden (autonomous) ta meteta kar. Saka Mungdang ka küpok alitsü aidangji iba jurila yimden inyakyim ya koba tashi amshitettsü mesüra atsü-anem katettsü? Joko ABAM 150+ nungbo ABAM Centralise asütsü nungdaker ta ajiteter kechiba süra mapa tuluba aser teimba adoker aser ajak arok maküm tashi tebilemba mataloktettsü. ABAM, Arogotem aser Aor tamanger liromedema yinnüra ABAM inyakyim ya mapa kar nungbo lokteper aotsüla.

Tang aliba ministry telemsa ya gender mesüra kümsük (age group) dak rangloker yangluba amai lir, tat. agi, women, youth, child, a.a. 150+ nungbo item ministry den repsema densa den apet yamai yanglushi nung koda? Tat. agi mission and spirituality, public witness & justice, women and youth empowerment, Khristan literature, loktiliba aser rongsen-ketzüng mission amala. Iba ya ajanga wadangji sadema inyaktettsü aser tetsür tebur mashishi inyaktettsü lemanga adoktsü.

ABAM 150+ sülenbo ajak tentetba aser ajak inyaktetba (inclusive) Mungdang ta sangdongtsüla. Tat. agi, lim arogotem nung tenzüker talisa Sannüker tetsür 50% tashibo anioktsü pangzüngtsüla (tanü tashi Arogotem nung tetsür Sannüker inyakba aikabo mali). Mokokminer temsüa alirtem Mungdang nung mapa agütsütsü pangzüngtsüla aser mapa küma inyaka sayutsüla. Khrista nung asenok ajak kasa ta sayuba ama tetsür aser tebur, mokokminer ajak Khrista Arogo nung mashishi tenzüktsü mapang tongogo.

ABAM 150+ aser Tenyaba mapa

Arogo (ABAM) ya Tenyaba Mapa ajanga aser Tenyaba Mapa inyaktsü asoshi alir. Iba Tenyaba ya nisung nungi masü saka Tsüngremi Tenyaba Mapa lir (Mathi 28:19).

Local Arogotem sasep nung jurila mission mapa balala inyaka aoba ya Mungdang kübok lokteper ka küma inyak nung ajungtsü südi ta Zulu Jamir-i shia liasü. Hau Baptist tamangba nung autonomy ya tongtipang nükmen ka lir saka tajung ka asoshibo atsü-anem lia mapang aser densa den apet melenshiyonga aotsü menungnangtsüla. Arogo ajaki pei jurila inyakba ya junger aser takok ngudar saka item alirongsen, nübu aser wadang loktep nungbo ano kanga sadema mapa tuluba telungjunga jeta bener aotsü.

  1. Ateptsüng/lim Tenyaba Mapa

Litsü atena/Bendangli Tenyaba Mapa ya kanga junga bener odar. Arogo aser Mungdang asoshi aji tongtipang. Saka sensaksemba mapang nung ateptsüng/lim dangi meyipa tenyaba mapa inyaktsü(Back to Home Mission) nungdaker ta aikati lemsatep. Arogo ta kodang südir, tulu tila ajak nung inyakyim (structure) kasa. Saka lim Arogo aika nung rongsen agi tsükdakba yong mapa abensa meinyakteter. Iba ya ABAM asoshi tebilemtsü tulutiba ta agizüktsüla. Pei chir nungdakba, tanela aser shi, peria magütsü yur dangar yaribaji tai (temenen) masü na? Dangar meyaritsüla ta ashir masü saka anemsü jakla lira ibajibo melenshitsü tajungba.

ABAM kübok Arogotem liromedema aintsü asoshi Ao Arogotem nung tenzüker ajak kasa jenjang nung amshitsüla. Sannüker nem ita sen Rs.10000/- magütsüteter Arogotem ABAMi yaritsü telemtetba tajung mapa küma inyaka aruba ya pilot project ser yamala mapa ano inyaka ABAM kübok Arogotem sümedema yangertsü nükla ayutsü junger. Ya inyaktsü tasak saka tamakoktsü mapa masü ta tangatetba nung ajaki temulung agütsütsüla.

  • Litsü atena/Bendang Tenyaba mapa

Litsü atena/Bendang tenyaba mapa ya kanga takok ngua aodar. Bendang (international) mission telok balala den amalitepa inyakba dang masü saka asen tsüraburi kümteta doktsüba mungdangtem den ano khen asentenshia parnok den mission inyaktsü junger. Iba ya ajanga lemang aisü nung parnok ajungketba dang masü asen Aora temaotsü asütsü.

  • Arogo aser Lanurtem tebilemtsü

Arogo züinba putu ka nung asenok alir. Arogotem aika lanur dak rangloker parnoki aginüba yimya nung külemba ajanga traditional arogotem nungi lanur jendi loa odakagi. Tarutsü Arogoji lanur Arogo süra iba ya tebilemtsü tulu lir. Iba indang jembidang Tiatoshi Longkumeri lanur ministry ya ‘ABAM temulungjang ministry asütsüla’ aser parnok asoshi sendong asameyangtsüla ta shia liasü. Arogoi mapang talanga lanurtem tenyaba mapa nung senzüka yutsüba kuli aika jembi. Arogo nungeri Youth Pastortem ‘time pass’ pastor amai bilemba mesüra youth ministry ya appendix ka amai yutsüba a.a. Iba tebilemtsü alidang Youth pastor karbo tanela tejangraba/tangatetba masü shi tejangraba agi kokdaktsür lanur sentep nung südoksünem tali saka Tsüngrem O peria magütsüba lir. Member care ministry nung temulung agütsütsü nungdaker. Item ya reparanga lanur ministry ya khen restructure sür bener aotsü 150+ nungji tongti nükmen asütsü nungdaker ta ajaki lemsatep.

Tanela agi mesüba den külemi Youth Ministry ya lanurtem sempet rangben amshitettsüsa asameyang yanglutsü nungdaker. Item lanur rangben molutsü asoshi Impur nung mesüra tesem tajung ka nung skill/entrepreneur development centre lapoka Khristan sobaliba (spiritual, moral and ethical) nung amendaker training agütsütsü nungdaker. Iba yagi asen lima Khrista miemer jendi adoktsü aser lokti mapa nung sübokrem, ochimashi nokdangtettsü.

ABAM 150+ aser Tanela Anepaluba mapa

ABAM 150 sülenbo Lai aser arogo tesayuba nung tali temulung agütsütsü sendong yanglutsüla. Aor tamanger noklang nung 90bo baptist arogo saka ya kechiar memetet aser Lai tesayuba kimong memetetba/makar aika lir. Küm nung khen Revival jangraba aser khuret alidang Tsüngrem bushiba kisüng yagi dangbo ABAM arogotem tanela tashi maitsü. Literature aser Education Ministry ya khen restructure sür rongsen teperi enoka tanela ainba nung yaritsü literature peria adoktsüla. Tat.agi, catechism class ya Baptist Arogo aika (talisa Naga lima arogotem) nung magir aser iba ya ajanga Naga nunger Baptist tamanger aika foundation mali. Yangi tebilemtsü tulu kaji lanurtem asen lima toktsür bendang lima university balala nung azüngdang tesayuba balala denchir aser foundation tajung mali nung item tesayuba balala ajanga asen lanur tajung aika anisaer.

ABAM 150+ aser Shisaliok Tenyaba mapa (Education) 

Tamanger ka liromedema indaktsütsüji Arogo ka mapa. Liromedema ta kodanga südir yangi tanela, shi, shisatsü, molungsentsü, emotional, tekolok shisatsü ajak lir. Shisaliok tenyaba mapa ta kodang südir telemsa asem nung ABAM-i inyaktsü lemanga lir.

  1. Christian Education Ministry

Christian Education Ministry (CEM) ya Arogo asoshi kanga tongtipang nükmen ta angateta tang tashi nung kanga junga bener arudar. Iba ya mapadong rongnung kangsa tongtipang ta angateta joko 150+ nungbo CEM ya jurila dedicated ministry ka yanglu nung kanga ajangzüktsü. Iba dak sendak nung asen aser Aor sobaliba aser Ao Arogo densa den apet curriculum yanglutsü kanga tetemsü mapang lirta angateter. Asen kidanger Mungdang kar nungbo joko Postcolonial theology dena Sunday School nung tesayuba agütsür. Joko alima kanga kara ainer, aser aseni aginü-maginü ta mali university balala nung lanurtem azüngdang tesayuba balala ajurura parnok tamangba anokshitsür. Iba ama nungi kümzüka ayutsü asoshi Sunday School nung foundation tajung densa den apet yangertsü nungdaker. Apijemtsü Shin 22:6 nung ashiba ama “Tanur ka pei aotsüba lemang nungji sayutetang; aser parnok tain akümdang iba nungi mepilatsü.”

  • Theological Institution

Arogo anepalutsü asoshi Tsüngrem O angazükdak mongjen ya kanga tongtipang lir. ABAM kübok Tsüngrem O angazükdak mongjen ana tashi, Impur Bible School (IBS) aser Clark Theological College (CTC), yateta küm jendi lenir aika moluteta arudar. Iba mongjen ana ya ken junga anepalutsü mapang ta aikati lemsa liasü. IBS ya upgrade asütsü nungdaker.  Vernacular language aser English medium ana prongla course agütsütsü kanga ajungtsü ta bilemer. CTC ya ano junga khen reprangshitsü nungdaker. Faculty kanga junga develop süa odagi, saka library development nung khen temulung agütsütsü lir. Iba den külemi IBS aser CTC ya loktep nung (amalgamate) ajungtsü südi ta kari shisem. Tena ya loktep nungbo IBS nung azüngertem exposure anguba den IBS jia ano jenjang ka ajungketer asütsü. Tena ya kodang loktepdir IBS campus, Impur lima, ya Ao Arogotem asoshi Resource Mobilization centre akümtsü ana nung dang lir. IBS aser CTC senteper Pastoral Refresher Course mesüra Youth resource/training centre lapoka Arogotem yaritsü lemang bushitsüla. CTC nung Senate of Serampore dang masü tanga Accreditation dena agütsüba campus asü nung koda? D.Th aser D.Min ama course anemloktsü kanga ajungtsü.

  • Secular Institution

Tamanger ka liromedema aintsü asoshi shisatsü aser tangatetba tajung agütsütsü nungdaker. Aor lima dang Land of Pioneer ta ajar saka reprangdangra iba nüngja ya otsü dang kümogo ta aikati nemjemer. Iba ya asenok ajak khuret lir. Mokokchung District ya shisaluyimdak tesem (Education destination) kümdaktsütsüla. Tanü tashi nung Aor litsü nung BA dang graduate sütetter. ABAMi achaayanga Aor litsü nung shisamuludak/angazükdak tajung lapoktsü kanga nungdaker ta YSS sabang nung jembir aikati tebilemba lemsatep.  Asen Aor litsü nung secular education asoshi top class college nungdaker. Clark Memorial Higher Secondary School ya danga junga khen molushi nung koda? ABAM 150+ nungbo CMHSS ya mission nung tongtipang ranglokdak sür university tashi ajungkettsü policy kar yanglu nungbo koda jungla? Asen lima shisaliok riju (institution) aser university tajung maliba yong lanurtem bendang leni aotsüsa akümer aser ibai ajanga aisü nung, talisa lim arogotem nung, tetsükdaktsü ajurur. Talisa Ao Arogotem nung sannüker tebilemtsü tulutiba kaji tanur shisaluyimdak ya lir. Iba yongji sannüker aika kibong balala alitsüsa adoker. Ao Arogo nung tenzüker chirtem CMHSS nung azüngtsü ajungshitsüla aser arua züngdaktsügtsü asameyang yanglutsü. Iba ya ajanga tebilemtsü aika samatsü.

ABAM 150+ aser Shi Temang Anepaluba (Medical Health)

Nisung ka shi nung anema alibaji Arogo aser lokti asoshi tongtipang. Tanela den külemi shi anepalutsüji Arogo ka teinyaktsü mapa. Yisu pa alima nung alidang tanela nung dang masü shi nung shiranger taneptsü agütsüba asenoki meteta kar. Iba tangatetba nung America nunger medical missionary arua asen lima hospital tenzükba tanü asenok tajangzük jendi angur. Tat.agi, 1900 nung Ida Scudder-i Christian Medical College, Vellore lapokba, mesüra Dr. J.R. Bailey ajanga Impur Christian Hospital 1912 nung tenzüktsü. Iba Hospital ana tsüngda küm 12 tepila dang lir saka CMC Vellore ya India nung ajaki sabua sendenba nungtoko hospital ka kümogo. Asen ICH ya koda asü aser koda asütsü?

Mokokchung District nung Hospital tajung maliba ajanga tapayutsü taküm aika anujungi asüba asenoki ajangshir. Iba den külemi bendang lima rongsen jendi laluba den, aiben sen apur, rongjenseta shikmani agiba ajurogo. ABAM 150+ nungbo iba ya tenyaba mapa rongnung ka sür ao nung kanga ajungtsü. Tat.agi, Impur Christian Hospital ya Medical College level tashi yaktasa ajungkettsü nükla ayu nung ajungtsü. Christian Medical Association mesüra corporate Hospital kar den longjemer ICH ya multi-speciality aser research hospital jenjang yanglutsüla. Yamaji takok ngua inyaktsü  lemang peria dang lir. Ibai ajanga Aor dang masü temeket kin aser bendang balala tejangzük angutsü. Tesem tezü anungji shiranger marur ta kari bilema temulung ilaa alitsü akok saka facilities dang tajung agütsüra shiranger arutsü shisabulu mali.

Iba ya kodang junga amenlokdir lemang aika nung teyari angutsü. Tat.agi, shi nung taneptsü anguba dang masü saka pastoral clinical counselling mesüra psychological counselling training agütsütettsü, mental health anepalutettsü mesüra rehabilitation center ama a.a. lapoktettsü.

Otem

Jubilee sülen kechi inyaktsü (?) ta asüba ya nisungi masü Tsüngremi asüngdanger ta asenoki angajemtsü nungdaker. – K. Temjen Jamir.

Iba ya kanga tongtipang kechiba süra Jubilee ya nisungi puratetba mung ka masü saka Tsüngremi nungloktsüba amung ka lir (Levi 25:10). Anungji ABAM 150+ nung kechi inyaktsü, koleni aotsü, mesüra mangdang kechi asütsü ta asüdang nisungi molungba masü mesüra sobaliba agi alena ayuba masü, saka Pa sentsüwangshi asoshi Tsungremi kechi inyakdaktsüner ta tamanger ajaki sarasadema shisadangtsüla. Iba ocet nung aliba ya teteyuba ka masü mesüra meinyaker ta ashir masü mesüra tesa kenyongi tasen bener aruba masü saka inyaka aliba, aser mayimjemi alibatem tajungba bener aotsü asoshi shisa lemsateper dang. ABAM 150 sesquicentennial mamung tashi aser munger külen ABAM ajanga Tsüngremer wadang tuluba nung bener aotsü tamanger ajak sarasadem südi.

*****