AOR AJAKI AO OSHI ASHITSÜLA

~ Temsüwati Kichu (Osang zülur)

Kin ka asoshi pei kin oshiji kanga tongtibang, iba oshi nungji tajung aika sendaka lir. Pei oshi mejembira iba kin nisungtemji liaka kin ka ta asübajibo aika samaa oatoker. Tangar lima nung aji taloka arudar. Oshiji kati ka den angatettepa jembiba kisüng masü, oshi jagi peiji shiba aji sayur, oshi ajanga sobaliba tajung mesamadaktsüi benshitetter, oshi ajanga temeimtep aser telungjem adokdaktsür, oshi jagi nüburtemji kin ka ta lidaktsür. Anungji asen Aor ajaki Ao oshi ashitsüla. Asen Ao kin asoshi Ao oshi ya Aor ajak külem meyong, Ao kin songjem senmang rongnung tulutiba kaji Ao oshi ya lir, ya asen ayak. Kodang oshiji wazüka Aor ajaki Ao o jembidir, idangji oshi ajanga kechisa ajangzüker itemji asen Ao kin meyong asütsü. 

Tanü Ao oshi (Jungli o) kong lir? Kechi tia nung lir? Kechiba kara mainer?

1. Aori Ao oshi mashiba ya tanü asen Aor tebilemtsü khuret tulutiba ka kümogo. Talisa lanur aikati Ao o mejembitetter, aji tsüraburi kidang mesayuba mesüra mejembiba agi asütsü akok, ano karbo tanga len azünger, mapa inyaker ta asüba agia asütsü akok, kuli aika lir. Kari anarongteta jembitetaka azüngtsü mesüra zülutsüji parnok asoshi kangasa tasak. Lanurtem aika yamaji lir. Süra tarutsü nung koda tebilemtsü tulu asütsü.

2. Tanurtem karbo Ao oshi jembitsübo toktsür pei yim tenünga meshitetba lir. Tebu na koyimer ta asüngdangdang, “Ni Ao yimer” ta langzü. Tatalokba yamaji lir. Ano kenü kati “Ni Jamir yimer” ta ashi. Katibo na kechi yimer ta asüngdangdang, “Ame Naga ase” ta langzü. Aor Ao oshi iba jenjang nung lir. Alima nung oshi samaa aotsü asadangba rongnung Ao oshia dena lir ta asadangtetba ya koda asangsang!

3. Ao o mejembitet yonga kecha masü English Hindi jembitetterbo aji agi tangar meneptsü ta tangatetba akaba Aor rongnung lir. Hau, mapa kar inyaktsü atemabo tanga oshi junga ashibaji tajangzük aika lir. Anungji tanga oshijia angazüktsüla. Ajia kanga tongtipang. Saka pei oshi mashiba tebilemtsü aika lir. Tazüngbabo kanga lir, kanga dang sempet tajung, saka pei oshi mashi nungji yimer Aor atenshidak tejak metentetter, Aor lokti nung shilem magitetter, Aor sentepdaki maruner, Ao o angazükdi ta asünung joko tain kümadoker angazük tasak. Sasar, saka tsüraburi mesayutet.

4. Ao oshi mejembitetter mezülutetter, saka Nagamese, Hindi, English yamala jembitetbajiang khonang amai bilemer. Ajibo tamashi aser maksü.

5. Ao o nung kaket adokba karbo ashishiteper aser mayoktsü ozüng tesashi agütsür. Yamala nokdangba ya bulura, iba jagi tezülur tezütangdaktsür aser oshi merenloker. Tera aibelena zülura timi metongshitsür masü mesüra tim yimya agi langzür masü senchiang achir. Karibo ashir, kaket zülunüra tamasa ak farm ka lapokerang zülutsüla. Aji asayaa ochi ashiba ka ta angatetter.

6. Zülumen liromedem masüba tebilemtsü ya kanga tulu. Zülumen medemtsü asoshi tesayuba nübur nem agüja aruogo. Aji kanga junger saka ano teinyaktsü tulu ka lir. Olasü, osü, oren yangluyim yamala ya yim mesüra tzükong balalaji balala aika lir, saka kodang tezüluba dangi arudir, zülumenbo liromedema kasa dang asütsü nungdaker.

Asen Ao oshi indang senso ajaki tebilemdangtsü kar yamai

1. Pi tangar kinbo Naga nunger rongnung “Tenyidie” oshi nung Ph.D tashi agiteter. Asen Ao oshi küm aika jakdang nungi asen Naga nunger kin aikati jembia aru, tanga jembidar. Naga nunger oshi rongnung Ao o ya tangar kina den nisung teimbai jembir rongnung ka asütsü, mesüra teimtibaa asütsü akok. Süra, kechiba asen Ao oshibo academic nung tangar ama masü? Süoki ia shisadangdi.

2. Ao lima nungbo bazaar nunga tanga oshi masü Ao o jembidaktsü nung Ao oshi renloka aotsü. Aji takoktsü asüng masü? Ataloktsü atema kechi inyaktsü nungdaker? Garo nungerbo bazaar nunga Garo dang jembir, tzümar sünga Garo mejembira business meinyaktetter.

3. Toklang tenzüker Ao Arogotem nung inyaktsü bushidang Ao o jembitetba aser zülutetba yaa tetendangba rongnung ka südaktsütsü koda. Tenzükera aika jembiba, züluba nung renloktsü nungdaka lir. Ano Ao Senden nungi tenzüker Aor lokti tentet balala nung lenir asütsü shimdang temetetba aser tazüngba tulu liaka Ao o mejembitetra meshimtsü ta renemtsü koda?

4. Pei yimeri amshiba ojang mesüra peii o tasen ka shisatet nung ibaji dang shitak ta ajaki aji amshidaktsünüba, tekong meranga iba asoshi nokdakba, züluba, jembiba yamala jakla ajanga ojangji ajaki meima kümdaktsür masü meyiper asen oshi junga telong mekümdaktsür. Yamala ajanga meputep aser telemsa taliang adoker masü no? Kechiba peii amshiba ojangsa amshitsüla mesüra pei tangatetbaji dang shidak ta asütsüla? Tebilemba balala süra, lenji arutepa ajuruteptsü lemjem lir masü na?

5. Asenok Aori talisa jungli, mongsen, changki item otem jembir, ano yim balala nung jayajako, jembiren, aika nung ojang balala lir, yim ka telungtet nunga asüng mepu balala nung balala alitsü akok. Saka item ajanga ya telemsa masü Ao oshi ya item ajak nung jagi tapet bendena oshi takar kümdaktsütsübaji takoktsü. Iba ama o aika balala aliba ya oshi takar akümtsü asoshi tzüpokdak ta angateta inyaktsü koda? Ano tangar oshi nungia apua amshitsü koda? Ao o nung tzümar o English o aika enoker jembidar. English ojang aika tanü alibaya reprangdangra tangar oshi nungi agizükba lir, ano tanga ojang tasen English nung bendenlokdar. Asenoka Ao ojang teimba akümtsü asoshi kong nungi kobasa bendenloktsüla?

6. Clark Theological Collge nung Ao oshi agi C/DipCS, BCS, MCS, D.Mn, BD agitettsüsa inyak nung koda? Theological kakettem, Bible Dictionary, Commentaries Ao oshi nung meyipzüktsü, ano Aor Theology azüngeri züluba thesis pei university nungi temelaba agia Ao oshi nung meyipzüka amshitettsü. 

Mulungdangtsü shitakba kuli kar yamai

1. Kibong ka nung tebuji France kinungtsüji Aotsür Zürich nung alir. Par jabaso ana, tenati Ao jembir. Parnok denji Aor tangarbo shinga malisür nung yamaji jembitetter. Koda jangratemsü!

2. Aotsür ka UP nunger ka den kibong aküm, Agra anasa alir. Aorbo toktsür Naga nunger shinga yangji mali. Yangji tanurtem ajak intet, saka tanurtemi mongsen o, jungli o kanga junga jembir. WhatsApp message nunga Ao o zülutetter.

3. Tanuri tetsü den aser yimer den mongsen o agi jembi aser tebu den par oshi agi jembi. Tanur tebuji Karbi nunger parji Diphu nung alir. Tanurji yangji soa intet aser tain akümdang South India nung azüng.

4. Kinungbu kinungtsü ka jungli aser ka mongsen, Naga lima nung khen danga melidang saka par tanur ajaki jungli mongsen anaprongla jembitetter züngtetter. English, Hindi aser tanga oshibo tanuri angazüktsü saka tetsü oshibo kidang mejembira tangazüktsü tasak. Parbo tanurtem school nunga third languageji Ao agidaktsür.

5. HSLC nung Nepalitsür kati Ao Subject nung distinction angu.

6. Kinungbu kinungtsü anaprongla Aor, yima kadang saka parbo tsürabur dak alaka tanurtemi Ao o mashi. Pei yimdaki arudang pei tetsü-tebou, yimeryimsanger den Nagamese agi jembir. Tansütsü!

Ao oshi renloka aotsü asoshi teinyaktsü kar yamai

1. Zülumen ano memedem aika nung lir. Züludang aikati shitak mezülur. Saka shitak mezülutetterji ta sür mezülui malitsüla. Zülua zülua tajungba züluteta akümtsü. Talisa Ao Laishiba, Arok Osep, ASLB-i adokba Ao Oshi Tensenyim, item nung jagi zülumen angazüktsüla. Ao oshi zülumen shitak metettsüba ya kanga tongtipang. Kechiaser koba oshi nung zülumen pei zülunütsü agi züluteper iba oshi jagi tangar kodanga memeneptsü.

2. ABAM aser ASLB külemi zülumen liromedema aotsü asoshi sentong kar ayongtsüla. Tenzüker, tezülur, editorial board Arogotem nungi, ano osang kaket zülurtem, tejangrartem, item ajak ya talisa zülumen nungji liromedem kati arutettsüsa tekaraba nung sentong kar agitsüla.

3. Kidang kibong nung tanurtemi Ao Laishiba züngdaktsütsüla. Kibong tekülem agidang Ao Laishiba, Ao o nung aliba anogoshia azüngba tanela chiyungtsü, item azüngba nung aser Ao ken atenba nung tanurtemi shilem agidaktsütsüla. Tanur asüdang azüngba agi Ao o züngteta akümer, kanga tajangzük angur.

4. Ao oshi nung tetoktepba balala maneni alitsüla. Ken mejema atenba, sangro yangluba, kaket züluba, zülumen, a.a. item nungya tetoktepba aliba ajanga oshi kanga renloktsü. Arogo nung Laishiba züngmar nem sempet agütsüba ya kanga junger, iba nung ya lanurtemi aikati shilem kanga agitsüla.

5. Pei oshi ashiba ajanga tajangzük kechisa lir, item ya lanur nem metetdakja pei oshi angazükdaktsütsü kanga ajungshitsüla, koda asünung parnoki jangratsü item lemangtemji bushitsüla. Pei lima nung mapa bushidang mapa kar nungbo mapai aitsü asoshi pei oshi ashitsüla ta asüba yaa joko nungdakba ka kümadokogo, anungji mapa kar atemabo pei oshi ashiba jagia pei lima nung mapa angutsü nung yarir. Ano pei oshi ashiba ajanga ajangzüktem parnok dang shia jangradaktsütsüla. Idangjiang parnoki temulung agütsütsü.

6. Tila tanurtemi Ao oshi jangradaktsütsü asoshi jangratemtsüka, tepuoatsüka, tanuri aginüba ama kentenmenü, nursery rhymes, oshi basics, yamala cartoon/animation/video yanglua sayutsüla. Idangji jangraa melamela angazüktsü.

7. Kar atemabo tanurtem school sodi mapang yimdaki anir oa idakji alirtem den jembia mongdaktsüba ajanga oshi angazüktsü.

8. Sunday School aser Impur Bible School, item nung ya Ao o agi sayuba ajanga oshia angazüker. Anungji item nung ya temulung agütsütsüla.

9. Ao Theological Association-i/telok kari/kijai asüyonga talisa Ao kaket Publishing House ka tenzüktsüla. Kechiyong tezüluri meranga züluaka talir, tazünger aser yoktsür melira mezülunetsü. Publisher aliba ajanga kaket adoktsü kangarabo tezülur atema khuret masütsü. Kodang kaket adoktsür aser yoktsür tajung lidir, idangji meimlaba shisashir nungi kaket tajung aika adoktettsü. Ano karibo Ao kaket ebook atema website lapoktsüla, ano kaketjia online nung alitettsüsa inyaktsüla.

10. Arogo kar dak alaka aika nung küm nung khen anaban Arogo osang kaket adoker, iba nungya department balala osangtem teimba. Saka Ao oshi nung ocet zülua, bendena, adoktsüla.

11. “Arok Osep” ya ano ojang teimba enoka tanaben adoktsüla.

12. Laishir Sangdong, Laishir Ola, Lanur Teimla, Khristan Kibong, ABAM Osang, Mitkar, kar anenogo kar anarongtena adokdar. Tiryimyim, Ao Milen, Lenjeter adokdar. Ao kaket azünger kanga ajema kümogo, Aori kaket alia azüngtsü mejangrar. Tazünger melira tezülur malir. Anungji, Ao oshi kakettem azüngtsü ajungshitsüla.

13. ASLB-i Ao oshi nung B.A (Diploma) aser M.A.Post Graduate Diploma (PGD) Arangtet tatitang ajanga agütsüdar. Mokokchung District nung school ajak nung Ao oshi ya compulsory süa agidaktsütsü ASLB-i ajungshia arudar, ASLB-i inyakba ajanga FAC nung B.A. nung Ao subject (optional) agidar, university level nung M.A. tashi atutsü sentong lir, item maparen takok angutsü asoshi ajaki nungittsüla. ASLB dang kanga peladi.

14. Tir Yimyim YouTube aser Instagram ajanga Ao oshi renlokdaktsütsü asoshi inyaker. Anogoshia Ao ojang anana tetezü den English nung meyiper Tir Yimyim Instagram nung angutsü. Aji lapoka angazüktsüla. Ano kari akok nungbo Ao o app kar yanglua, mesüra google translation Ao o nung sütettsüsa inyak nungbo aika asoshi Ao oshi angazüktsü lemang tajung lapoktsütsü. Anungji Internet amshia Ao oshi renloktsü asoshi inyaktsüla.

15. Alima nung oshi ka recognize asütsü atema zülutetba dang nungibo kwikati jembir aji tongtipangba asadanger. Oshi ka renlokbaji züluba dang nungibo jembiba agi tekaraba renloker. Anungji Aori asüyong tangar kini asüyonga Ao o junga mejembitet dang memenütsüi ajungshia sapua jembidaktsütsüla.

16. Asenok Aor oshi nung renloka odi ta süra, asenok tsüngda aremzükteptsüla, pi dang nungi angazüknütsüla, pei shisangren shisatsü entoktsüla, tenükmeren malitsüla, longjemtsüla.

Ao oshi ya Ao kin ayak. Anungji Ao oshi wazüka ayutsüla, renloktsüla, Aorbo ajaki pei oshi ashitsüla. Aji kong angazüktsü, kechi nungi jembia tenzüktsü? Pei kibong nungi, atepzüng nungi tenzüktsüla.

*****