Aug 27, 2021 anogo Impur nung ABAM Clean Election Movement “My Vote, My future” omen dak rangloker ABAM Executive Secretary, Rev. Dr. Mar Pongener ajanga tenzüktsüogo, ta ABAM sangdong ka ajanga metetdaktsü.
Ochi mapa inyakdang ashiko taku aika aseni ajurutsü, saka ajakji asen lima ajungtsü asoshi ta anagateta temulung matemi tasü ita ochi nungi masetshii inyaktsü asoshi Executive Secretary-i ayongzüka liasü.
ABAM Clean Election Movement Convener, Rev. Dr. Noklen ajanga iba movement nukjidong aser teinyaktsü mapatem lemsatep. ABAM tir – Dr. I. Lolen Imchen, Ao Kaketshir Mundang aser Mokokchung Town Lanur Telungjem nungi iba mapa ya arok shilem lir, anungji, atsüayonga melii mapang ajak nung külemi tasü ita inyaktsü tayongzükba agütsü.
Iba sentong nung ABAM Clean Election Movement Committee züngsem den iba sentong nung adenertemi aruya aliba election nung ochishia pei temeten yoka mechi-i Tsüngrem tsübuba aser ochishir lenir shimtsü ta tenangzükba agiogo, ta osang ajangasa metetdaktsü.
Tanü election mapang ochi mashi inyakba ajanga asen lima rajang akümba tia nungi nüchi tia kati arutsü nükla nung iba movement ya item ranglok nung tenzüker; (i) Tsüngrem akhümtsübuba aser tetemsü lenir shimtsü angatetdaktsütsü (ii) Tsüngrem tashi nung election temenen anema raratsü (iii) Free and Fair Election agitsü atema inyaktsü, ta ABAM CEM nükjidong lemsatep.
Anungji, tarutsü anogotem nung maneni “ABAM Clean Election Movement” ajanga election merükteta agitsü sentongtem ayongba nung ajaki ochishia Khristan ayak mesamai inyaktsü ayongzüker, ta ABAM sangdong nungsa metetdaktsü.
(Courtesy: Limasangwa)
The Nokinketer 