~ Temsü Jamir

Tsürabur mapang nungi tanü tashi nung Aor dak aketba wainshin aser jakla-liro yimyatemji shisadangra, asen Aorji lokti tsübuba kin. Lokti nungjibo akhümtsübu agütsütepa teindang taküm ka sayutsü meranger, saka iba jakla ya anemsü jakla ta ashitsü akok. Tamangbarenji tematazütsü dang (superficial). Anungji asen Aortem, majangi alutsü aser nükmen aibelena alibaji yanglushitsüla ta bilemer. Ni aser na ya koba ama tsürabur nungi jakzüba chirtem ta shisadangtsü nüngdaker. Asen lima nung ochimashiji ENDEMIC tashidak lir. Kechiyong asen lima nung kija, kibong aser loktiji ochimashi den tiptema dang lia aor. Onük benoktsü meji, kü tembang shisatsü yari, ojang kar lemsateper.

  1. Asen Tsürabur Mapang Ochimashi: Asen Aor-i ochi ya süngkhüm ana kübok dang benshi, yim amung atener mebenshi ta kuli aika angur. Asen Aorji ochishir kin ta pei sasa nalok-nara-a ken tena jembia aru, saka asen Aor aika dak ochimashi jaklaji tsürabur mapang nungi liasü ta tatishitsü asem den shisadangtsü ka shisemner.
  1. Asen Kin Tenüngji Ochimashi Inyakba Nungi Adokba Tenüng: Kechiba asen kin dang Aor ta aja? Tzü atendanga aortem dang Aor ta aja. “Ao” mesüra “Aor” ta asüba ya asenoki asen tedi-tenu nungertem, asen sülen anidaka arurtem marudaktsütsü asoshi, apu alangdanga yutsür aoba ajanga “Aor” ta aja. Iba ya ashikülak ochimashi mapa inyakba lir. Anungji asen kin tenüng tetezüji ochimashi inyakba nungi adokba tenüng ka ta ashitsü akok. 
  • Mangkhu Abenba Yimya: Aor yimtsüng arogo ana nung tenzükba mapang, tamburtem den otsü-olem asüngdanga angazükba nungi kar lemsateper. Tsüraburi mangkhu abenba yimya ya kangasa anemponga inyak. Asen Aorbo yim o yim na leptepji, osang agütsür yim amak, mesüra lepteptsü jazüker leptep. Tenüng, yim, kin kidong asüngdanger lepzüka bener aru ta jembir.

Ya shisadangdi! Alima nung tongpang rara aika raraba otsütem kaket ken-o zülua lir, aser item tongpangji kin ka asoshi alinük amangzüktsü aser yimden yimli ulushitsü asoshi kati ka tongpangi jazüker raraba otsütem lir. Asen kinbo yimsüsüba yimli ulushitsü atema mesüra yimli litsü ulutsü atema raraba mali, saka asen tsürabur nok otsüjibo pei kija naroküm (selfish motives) asoshi tiemba liasü. Anungji koba yimya nung südir süang, shibai mangkhu bener arudir, pa kija narokümji agi. Iba yongji tanü Aor yimtsüngtem nung mejembiba “ashi mangkhu” aser “miim mangkhu” otsütem miimbanga yua lir.

“Ashi mangkhu” mesüra “mim mangkhu” tetezü, lendang mita atsüka atar, meimlaba mapang nung, alu nungi belemseter adoker rongnung tangar memenüpbapur lepzük. Tashikartem alui oseper lia toruto nung leni-maor kidangmonger kolak lepzüka aben.  Anungji kija-i mangkhu abenba nungji tebilemdangtsü lir. Adangji asen tsüraburtem, antipong mejitepba raraba ama, nokinketer walunirtemjia liasü südi, saka ashi-külaka mangkhu lepzüka bener arua mangkhu terongi atubaji ochimashi mapa lir.

  • Ayangleni Aoba Mapang: British sorkar kübok aliba mapang, asen tsüraburtem tzüma lenden len ayangleni ao. Nemzü nemponger portis wala aika liasü. Tzümalen ayangba mapang, ashi-külak mapa aser auya-a chiyungba indang otsütem lir.

Tatishitsü agi, tzümalen ayang dang, tzümar meyong nashitem ashi-külaka tepseta chitsüba otsütem lir. Nashilang nung nü (spear) rüküttsür külen meita atatsü, aser anogo ana asem lir külen nashiji kodang südir, nashi kibur dang nashiji ali nung rema yutsüdi ta meshizüker, ayangba semtui bener arua nashiji sensa-a awazüa achiba otsü lir. Shishilembaba (barter) mapang, ochimashi mapa kulak-küponga shishilembaba otsütem lir. Ni tzüma rongpang nung mapa inyakba mapang tambur kati tatalokba otsü ka yamai ashi. Tzümalen shishilembai aludang asen Aor shishilembar kari arem nung anguba manü kanga tobur junga merüktetter tebeshi manü-a ta ashi-külaka inyak.

Ochishir kin ta, yimtsüng telungtet nungbo au met senchi tulu liasü, saka yim süngkhüm atener külenbo tangar indang auya-a, ashi-külak mapa inyakbajibo kecha masü ama züngshi.

Iba ama jakla asen Aor dak, mesüra Naga nunger dak temesüng nisungtemi ajitetba yong, WC Smith aser JP Mills-i züluba nung Naga nunger tim libaliroji yim süngkhüm atendanga maor ta zülua yutsübaji atangji o lir. Asen Aoribo pei sasa ochishir kin ta naroküma jembia aliba mapang, tangaribo asenokji ochimashi kin ta zülua yutsü.

  • Tetsür-tanur aser Tebur Tain Bendangba Yimya: Tashimaiter nemzüka yutsübaji tashiiter tajangzük asoshi lir, aser ibaji ochimashi mapa. Ochimashiji pei juri atema tashi amshibaji lir (abuse of power for personal gain). Anungji tetsür-tanur ta asüba tenüngji bener tebur taintemi, tim mesüi benshibatemji liasü südi ta tsürabur otsü nungi angatetter. Tatishitsü agi, tetsür-tanurbo mechidaktsüba chiyungtsütema liasü. Ya ochimashi mapa ama nibo bilemer.

Asen tsüraburi atet-apongba aser ashibangba yimyatemji ashiko par mapang nung tatalokba kar ajanga yamaji inyaka aru südi. Kü tangatetbabo, kechisa ashipanga inyaker, itemji tetsür tebur tebendang makai kasa ashipanga inyaka chia-jema arubajibo tim dang ta ashitsü akok. Saka kechiba bendanga amshi ta bilemba agi, shisadangtsü atema tatishitsü kar yamai agütsür.

Tanur sorep tangrep sotetta lir ta sür tip maketba tesola angotem, alo-ponglu ama, meür ama, angolang ama tetsür tanurtem nem mechidaktsü saka tebur tainibo achi. Ozütem rongnunga tachitsü tajung posü ozü ya ka lir, saka tetsür tanurtem nem mechidaktsü, kechiyong posüji kotaklar-a ta aser iba shi achirtemji pongmang makar-a ta sür mechidaktsü, saka tebur tainibo achi. Arem shiruru tila shi rongnung poür shi ya onsara tajung, saka poürji tenük tila aser ali telung nung dang alir, anungji iba shi chira, alima mangu sotetta lir ta sür mechidaktsü. Kechiba teburbo achi aser tetsür tanurtembo mechidaktsü? Ano an kolakbo teburi machi, kechiyong ibaji chira süngdong kolaki atudang manganu agi meiner ta jembi. Koba yimya inyaksangshi südir süang, jenjang aser tashi amshia pei junglangtsü inyakba mapa ajakji ochimashi lir. Ya shisadangtsü atema dang tatishitsü bener arur.  Aibelena lira metongshijangma.

  • Khristan Yimsü Agizükba: Asen Aortemi Khristan yimsü agizük saka Yisu Khrista magizük ta tanü asen Aor lokti ajanga sayur. Kija tamang masü saka lokti tamang dak sotter aliba Khristantemji asen Aor tamangertem ya lir. Yimsüji yimya agi lokti-i kechi shitaka ta amanger aser kechisa lokti jagi shitaka ta agizüka benshir ta asüba nung aor. Yangi tebilemtsüji, lokti mandate-ji tuluba aser Laishiba tesayubaji tilaba mesüra pei ajung asa-a meyipzüka benshiba adoker. Anungji tanü asen Aor tamangertemji yimsü benshirtem. Kangasa religious saka spiritually bankrupt. Anungji tamangertem jakla yimyatemji kangasa majung (too evil).

Tanü asen Aor tamangertem Khrista chichia akartem kwi ka lir? Tema tazütsü agi Khristan yimsü benshirtem teimba asüba agi, lokti nung ochimashi jungkai adoker masü na? Khristan yimsü dang agizükba yong, ochimashi jakla yimya inyaksangshi memelenshi ta kuli angur.

  •  Religious Refugeeism: Arogo rajang akümba aser yimsü benshiba arogo akümbaji iba ya ka lir. Lokti aser sorkar mapa nung ochimashi inyaka pei sünütsüsa alitsü, aser tamangba yimsü dak yimya balala agi jenoktsü meranger. Sorkar mapa nungi pension ngur külen lokti nung atongoknerji, arogo nung atongsema inyaktsü. Arogo nung tamajem tenzükbaji alima yimya nungdang, lokti nung recognition alitsü atema inyaker. Tanelar mapa masü saka alimar yimten yimli sorkar mapa ama inyaktsü meranger. Arogo guideline-jia sorkar mapa ama yanglutsütsü meranger. Ibaji ajanga arogo tanelar wadang aser mission nükla ayurepa (ajeprepa) kümdaktsür aser tetsükdaktsü adokdaktsür.

Nagaland nung theological college aser ministry balala aika tenzüka aoba mapang ka lir. Kanga junger. Arogoi mayimjemba aika ministry balalatemi inyaka aoba angur. Saka tanela mangdang tejangja makai, survival atema ministry-tem ya tenzük südi ta kuli angur. Ano karbo sarasadema, shin o jembia, meshi-metsüa jajartem lir. Item ajak ya yimsü dak metalokba noksa lir. Iba ama yimsü dak jenokba aser yimsü benshiba jagi tanela asüngtetta aliba takümtem adoktsü makok.

  • Arogo Züngsem Akümba: Khristan kibong ka nung soa intet asünung, arogo nung züngsem akümtsüla ta tangatetba kisüng agi tzü nung baptia (ritual) züngsem akümer teimba lir. Tekümtet tejangja kar, Yisu Khrista-ji pei taküm nung Kümtetdakba aser Kibur ta amanga aser agizüka, angatetter baptibaji noklang nung ka ana dang asütsü ta bilemer.

Tatishitsü: Ni sannükba mapai aiter külen baptitsüpurtem nem Khrista agizüka tekümtet jangjatsü Bible Study agütsür. Tang tashi nung ni ajangshiba agi kari dang chichiba pei taküm nung Khrista akaba indang pei sasa kulisüa baptibapur lir. Bible Study agia arur külen asangur kati baptitsü atema ano tanela taküm merenem ta sür mebaptiba khen ajangshia lir.

Tanü asen Aor tamangertemi, arogo nung züngsem akümtsü asoshi baptibaji ritual ka ama benshiba agi züngsem akümtsü qualify sütsür. Kija kibong shia majangi lua nükmen aibelenbaji yanglushitsü shisadangtsüla ta bilemer.

Tanabuba nung, arogo nung züngsem akümbaji pei taküm nüngdak kar ataloktsü asoshi baptiba lir. Tatishitsü agi kibong akümtsü atema baptir, aser Christian University nung admission ngua azüngtsü atema baptir. Anungji arogo züngsem akümba nunga pei sasa ochimashi benshir.

  • Tanü Asen Aor Tamanger Jenjang: Yimsü benshiba agi laktetta aoba mapang ka lir. Kechiyong too much religion but spiritually almost bankrupt. Anungji tsüraburtemi yimsü benshia sayuba aser taküm libaliro jakla-yimyatemji khenyongi meputep asü nung, asen jala-jabasotemi maginer. Tema tazütsü danga ta parnoki angur. Asen Aor tamangertemji pei sünütsü süa alitsü aser tasütsü mapang nung tatok meshitsü ta bilembapurtem teimba ta angur. Anungji iba ama lokti nungji ochishiba adoktima?

Temetetbabo onsara alinungji, sermon-temjibo khenyongi up-to-date shisa tarok aliba intellectual sermon-tem dang anganür. Tenarongjibo mongin narong aten nungji, Tsüngrem tenzükertemji parnok tsüngdang entertainer mesüra performer ama küma lir. Yamaji Tsüngrem O taret anganü-a ka, Khristan meraket jenjangtemjibo (Christian values) taküm nung mebenshir. Ochimashi mapatembo ajak tamangertemi inyakmar.

  • Taküm nung Ajangshiba Tatishitsü Kar: Asen lokti nung ochimashiji  tzüyim nung rüjep lung (iceberg) ama dang lir. Tzüyim ma nung tila ka dang pongdaka angur, saka tzüyim telungjibo rürjep lung jagi amokpanga aliba ama, tanü asen lokti nung ochimashi yamaji lir. Temaba yimsüsüba jenjang nung, sorkar menden nung, aser lokti temaba jenjang nung sen crore menden nung ochimashi inyakbaji toktsür, asen atepzüng nung ochimashi benshiba kar shiner.
  1. Asen lima headmaster küm talang ka inyakba mapang, asen Aor tamangertemi ochimashi inyaktsü asoshi, tiyazü certificate atema, tiyazü recommendation atema, sen agi mesüzüktsü jenti bener aru. Ochimashi mapasa asüyonga tesüngmangtsü ka aser temenünütsü ka inyaktsü mepishia aruba ajangshiogo. Tamanger tajungtemi nüchiso bushir telok tena ayongsemer amokmerenogo. Idangto ni kü pen-ji kirak asübo tanü ni tasü ita mejembila.
  2. Assam nung Nagaon anasa ni headmaster inyakdang, students teimba ka Muslim, Hindu, aser limapurtem liasü. Künü danga ochimashi inyaktsü kü office-i parnok tsüraburtem aruba ni mebilemtetter. Asen lima den khen metemdangang.
  3. Ni pastoral mapai aiter külen ochimashi tiyazü certificate meshii aruba ishikabo ajangshiogo. Tatishitsü agi, Old Age Pension atema küm agi mabensa tiyazü recommendation meshir. (Old Age Pension atema Nagaland sorkar concern department-i arogoi agütsüba recommendation meshir). Christian university nung azüngtsü asoshi tiyazü tzüsenba certificate meshir.
  4. Arogo office nung amshitsü atema osettsüset donation agütsüdi ta arur, saka par meyong masü, lokti sorkar meyong agütsütsü ashiba  metetta aika turn down sütsüogo. Ano tatalokba aika lir.

Asen nüburtem ochimashi den satok satoka alir asü nungji, ochi jembitsü ya onsara tasak. Ochi jembiba nungji consequences aika lir. Temulung mepelatep adoker. Asen dang kanga jashir. Alishi tsütsü bilemdi süra, asen atemabo aisü lemang temesü akümer. Asen anemer teimba akümer.

Otempang

  1. Ochimashiji ochi nungi pilaba. Tanü post-truth putu nung ochi nungi pilar temeten aika yangluba putu lir. Ochimashiji pei ajung asa-a dang tashi bangdak amshia, ochimashi süaka temeten agütsüba ya lir.
  2. Ochimashiji lokti nung tenzüker masü saka meimchir kija mulungsentsü shia nung tenzüker. Aser kasa mulungsentsü atenbapurtem külemi bangjemer, lokti yimten aser arogo nunga ochimashiji inyaker. Iba yongji, Malcolm Muggeridge-i ashi, “Ochiji kanga tobur tajung… saka kong nisung ana mesüra tali senteper bangtak amshir, yangji ochi tepseter.” Anungji ochiji yimtong nung melaodang, asen mulung nung tama laodaktsür.
  3. Ochi nung noktakerbo, aisü nung, sentokba taküm akümer aser kija azüngmeyaka noktaktsüsa akümba, tajangshiba lemsateper. Kechiyong ochiji komo züpubang asoshi metsü (salt) mesük. Züpubang mesüra komobang nung metsü kodang inoktsüdir, tashi marem nützü alur. Yamaji ochi o jembidang tashi marem ateptendang asen mulung yirutsüsa ola angashir aser angashiogo. 
  4. Tanü asen Aor loktiji reprangra, mangkhu tajem melen sen mangkhu bushir. Centre nungi mesüra department kar nungi development bener arura, mangkhu lepzüka bener, mangkhu terongi molushia atuba ama, pai lepzüka bener aruji pei sünütsü asür. Senso candidate ka adokdaktsütsü merangbaji, yim kati yim ka mangkhu bena akokba ama ochimashi temenen mapa aika inyaka adokdaktsütsü meranger.
  5. Koba ama ka auya-a ki-ojen ali-limang alitena yanglua ka, yim süngkhüm amung atenerbo ashikülaka auya-a inyakbabo au met maliba ama, sorkar aser lokti meyong auyabaji kecha hau ta mali züngshir. Sorkar mapa nung tali shia liogo ta dang jembir. Yimtsür yimer aika yariogo ta jembir. Saka yimtak yimtsüng mesüra colony nung mozü yi lartemi an chanu ka auyababo teploka teper külen, panchayat hall nung alena yur, mesüra shi ki nung yur, tenangzüktepba agia meyongnema yur, ak ka agi senchi achir.
  6. Yimsü benshiba telok asü nung, Tsüngrem meimba aser Tsüngrem tsübuba mali saka arogo loktibo tsübur. Ibayongji an-i scü chir tebang meshitetba ama, arogoi mangudakbo pei sünütsü asür saka arogo tsüngdangbo meshitetta sayutsü meranger.
  7. Laishiba tesayuba nungi pilar arogoji alimar yimden yimli ama, mesüra Aor tebur yimden yimli ama, kar tsütsü atsünga inyakbajia ochimashi inyakyim lir.

Aortemji yimsü benshibapur masü, saka kija taküm shiai chichiba nung Yisu Khrista agizüker, pei mulungsentsü melenshir, taküm libaliro jakla melenshiba ajanga dang lokti taküm nung ochishibaji adoktsü ta amanger.

Isaia 59:14 – Ochiba tesüleni atsüngzüka ogo, aser temeshiba talang nung oagi lir; kechiyong yimdong nung ochiba laoa lir, aser tindang jakla aitsü makoker.