(Tang teinyakdak mendenpur ajak taruba kümsük asoshi shimshi)
Ao Senden 21 buba yimkong mungdang Sept 3 nü yangi Mokokchung town hall nung takok ngua mungogo. Iba mungdang ya taküm küm April ita nungto agitsüba sentong ajak renemer liasü, aji saka, iba mapang covid-19 wara 2nd wave tesashi aonba mapang ka liasü. Sorkari latettsüba inyakyim (SOP) ama shitak benshia iba mungdang tobur junga kaogo.
Tanü iba sentong nung tayongzükba o jembir Rural Development Minister, Wb. Metsübo Jamiri jembidang, Ao Senden ya Aor tebhong langer lungjema alitsü nükjidong yur tentetba lir, iba ajanga tanü Aor lungjemer aser ibai Aor akhümpok lir, anungji, asenoki iba akhümketji mesamadaktsütsüla, ta ashi.
Tanü Aor iba jenjang tongtetba ya taoba mapang asen tsüraburtemi tarutsü asoshi taküm tenlaa inyakba ajanga lir, iyongji tanü parnok maongka nung asenok anisüngzüker, aji oda, item otsütemji asenoki kodanga mamatoktsüla, ta pai shisem.
Aor bendanglen mapa balala inyaker aikati pei mapa nung sodi ngur külen pei limai meyipa marur, parnok ket nungji rongsen den shisatsü bena lir. Anungji, pei lima menungraa meyipa arunütsüsa asenoki koba tashi inyaker, ta paisa asüngdanga ashi.
Aor lenir mali ta aikati jembir saka tanü asen tsürabur aser Aor akhüm Dr. S.C Jamir taküm lir aser lenla balala nung lanurtem aika atudar, anungji, asenok kangabo mesenseni kati ka shisatsü agüja ajungshiteptsüla, ta paisa ayongzüka ashi. “Pei kisüng atema bilemba aser kati ka arishitepba yimya ya melenshitsüla aser akok tashi kati ka meimtepa alitsü merangtsüla”, ta paisa shisem.
Tanü putu joko kuli balala ajanga yim toktsür jila bushia liteper, anungji, pei maitsü (identity) samatsü ana nung lir, maitsü wazüka ayutsü atemaji oshi ya kanga tongtibang shilem ka lir, anungji, pei chirtem dang pei oshi angazükdaktsütsü aser jembidaktsütsü merangtsüla, ta paisa tayongzükba ka agütsü.
2021-2023 kümsük asoshi tang mena alir Ao Senden mendenpurtem; Tir – Wb. Chubawati Longchar (Nokpu), Tatong Tir – Wb. I. Imkong (Chungtia), Tongti Zülur – Wb. Imtipokyim (Khar) aser Repsem Zülur – Wb. Arentemjen Jamir (Akhoya), Senotsü Zülur – Wb. Maputemsu (Chuchuyimpang) aser Kimen – Wb. Aoshingang (Longsa) parnokji tanaben shimshiogo.
(Source: Tir Yimyim)
*****
The Nokinketer 