(Upholding Christian Spirituality Amidst Corruption In Public Life)

Dr. Imkongmeren

YSS Wibenar presentation, August 2021

Okila

Ochi mashi ajanga yimden yimlitem aika laoba asenoki ngudar. Lokti ka mesüra linük ka yimden temzüng aser tsüzüng ozüng anema tai inyakbaji ochi mashi mesüra corruption asü? Tai inyakba ajakji ochi mashi mapa ta asenoki shitetsü na? Süra yimden mesüra lokti ozüngji lokti kar sobaliba anema yangluba süra koda? Kar atemabo par tamangba yimsü den mapet talenba ozüng agütsüba asünungbo koda süla? Pie tamangba yimsü tsütsü aser sobaliba anema yangluba tsüzüngozüng tashi mangaka tanela nung merükteta litetsü aser yangji molungsentsü yiruba mali ta aikati bilemer. Ochi mashi mapa ya alima ozüng anema met (crime) menaba kadang lir ta aikati agizükteter saka küsa mapaji tanela tsütsübo kecha aibelen mali ama agir. Atangji Tsüngrem aser nisung tsüngdang tagizüktetsü mapa nung ochi mashi inykababo tanela nung terak kütsür, sobaliba tajung samatsür, linük nung yimchiyimjung tarenlok rajang kümdaktsür, alima dangi Tsüngrem terasaba arudaktsür, azü tokshi, melangmepu ajak temai adoka inyaktepter. Süpokrem ‘corruption’ lokti ajaklen benshiba angur, saka lokti tabu balala aika lir, iba indang jimbitsü alu shi ulura anungji tenren ka ana tang shimteta jimbidi. Lokti nung ochi mashi onük ya Government aser yimden yimli kübok lokti tenzükba indang atsünga lemsatepdi. Khristan kati lokti nung ochi mashi agi meketbanga liaka pai/lai iba lokti tenzükdang pie tanela asüngteta litetsüla ta iba onük yaki aginür.

Ochi Mashi – Tetetzü Ratet:

“Lokti tashi amshia pie ajangzüktsü atema ochi mashi inyakba”.

  • UNDP-i yamai rateta amshir: “Agüja aliba tashi pie jungjitsü atema mashikoshi amshiba,” mesüra nongloktsüba tashi mashilen amshiba (misuse of entrusted power for private gains).[1]
  • Transparency International (July 2009)[2] teloki ahsir: “Yimden lokti tenzükertemi (politicians/civil servant) ochi meshie parnok atema mesüra anasa alirtem asoshi tajangzük angutsü meji pa/la nem amokja aliba lokti bangdak tashi mashilen (misuse) amshiba.”

Ochi mashi ya ozüng anema, sobaliba anema, yimsü tesayuba anema, pie molungsentsü anema aibelenba. Yangji item maparen ya sendaktepa lir- ambangyim amshiba, külaküponga alepzüka ayuba, nokmelep ulura lepzükba, lokti nung yangkho semer awazüba ta angateter. Supokrem, tashiem amokmeren, bensaa amshiba, agüja aliba tashi mashileni amshiba, taihla tesendaktep yur tangar jilohktsüba, pie kinunger meteta alir apia mapai yidaktsüba.

Corruption Anema Koma Nokdaker:

  • Government-i yimden ozüng tesashi yanglua nokdangba (Anti-Corruption Act).
    • Ochiyimsüsüba yimden (good governance) puküm maparen, tat. Tim masüba anema ozüng yanglua nokdangba (sanctions);  Temurüktet pututsüng agiba (clean election); Lokti atema ajaki ngua tajitetsü maket lijaliyongba (transparency in public procurement).
  • Molunget lokti (NGOs aser civil society) ajanga takangba yokba:
    • Ochi mashi anema yimyim ayimoktsüba; Ochi mashi nokdangba molunget teloki asameyang balala lenla ajaklen atongba.
  • Rongsen tashi tulu telok ajanga (corporate sectors):
    • Ozüng shidak ametsü terenemba takang (regulatory compliance); Ochi mashi anema telok balala longjemer shilem agiba (collaborative anti-corruption activity); Molungsentsü temerüktet ozüng (ethical codes).

Lokti Ochi Mashi Kongsa Alir?

  • Yimdenren: Governemnt (public) yimsüsüba inyakyim, mitkar telok-police/military, bangdak ozüng amshidak, kaket shitsü ruju, anema alitsü ajiayangren- (public health), aser tzü-mopong rongsenketsüng, ano aika.
  • Loktiliba molungetet lokti tended, Kin longjem, amangba yimsü arogoden, ano yamala.
  • Mapa Tulu nung aser Tila nung ochi mashi (grand & petty) lokti sanen yangeryangpong nung ochi mashiba (systemic corruption).
1

Mapa tilateri nung ochi mashiji mapa kar agütsüba inyakdaktsütsü atema government office-tem nung süpokrem amshiba, office nung tebenja inykayim (red tapism) akhayitsü atema süpokrem amshiba. Transparency International-i ashiba agi India nung Police-temi süpokrem bendenbaji maparen kar nug Talis inyaker tat. agi- Passport verification, traffic violations, khu abenba truck-temi kümshia police nem ₹222 crore asüpokrem agütsür, parnokdang lemang ozüng raksaba atemer meshibaji 60% jibo tashim agi rakzükba sen (extortion money).

Ochi Mashi Tulu:

Yimden: Yimsüsüba Yimli (Political Regime) nung ochi mashi mapa corruption tulutem inyaker, alima kin shia linük arakmoka ayuba yimdenren tapu balala alir.Democratic: Yimli nung nebur ajaki shilem agitetba yimden koba nung (Rule of Law) zülua aliba ozüng kübok yimsüsüba maparen ajak inyaker. Arakmok yimsüsüba (Autocratic/Dictatorial/ Oligarchy- Rule by the Law of the ruler) yangi shirnoki yimsü asür parnoki ozüng yanglur, parnok molungka agi ozüng amshia nüburtem azüoka yimsü asür. Yimdenren asameyang (Public Policy) mahsileni yangluba ajanga linük sensak tendaktsür. Ochi mashi yimsüsürtemi rongsen yong pie yimli anemer telok keraklongraker (terrorists) dang yokdoker. Scientific experiment laboratory tapok ketsüba (WMD/virus leakage) ajanga lendong tulu bener arutsütsü tsüputeper. Tanü asenok tesa nung China lima Wuhan virulogical lap leakage ajanga Corona Pandemic poktetaktsüa alimai China Govenrment tang atonger. Indialen (mainland) Northeast nisung aikadang China nunger ta jalokja mezüngmeshiba aser meketmeseni benshiba agi timtim ajurugo. Government asayeyang meshidakba ajanga tzü-mopung (environment) raksatsüba (man-made disaster) ataloker.

  • Anema alitsü asameyang (Healthcare policy) tashi maitba agi Covid-19 wara mapang oxygen meperi nisung aika asür.
  • Alima nung taker 1% kabu nung tanüngba nisungtem ket nung aliba dang timba rongsen lir.[3]
  • India nunga takar 1% temi India rongsen 58.4% yua lir. Saka 29% sensakpu küma lir (below poverty line).[4]
  • Chiyongtsü lemyatsüya meshidakba agi North India nung alu nungi züsentetba jentang agi masem lalushiponga benshiadang (surplus godown waste) India tesem külenbo ayawara agi nisung asüba mapang aiben ataloker. Economic nung Nobel Laureate sempet angusang Amartya Sen ‘Economic Theories of Famines’[5] agi angtetbaji, “Democracy limatem nungbo ayawara malitsüla’. Kodang government rongsen kettsüng lemyatsüya meshitakba ajanga linük nung sensak jaok tendir iba linük nung democracy yimsüsüba tongshitem henshia laoa lir ta meteter.
  • Pandemic mapang takartem takaba akümdang sensaker tajitsü maka talidak maka mapa (job lost) million aikati ajurogo.

Afghanistan aser Myanmar Linük nung Democracy Yimli Laoba.

  1. Kechiba Afghan sepoy 3.50 lakh liaka Taliban keraklongraker tsükchir merijang 70 dang süka parnok den tongpang menokdaknü? USA-i par lima anüktsü raraba oset (Military Arsenal) aika toktsü- tanks, prongpong, injang boom, aser tayimtsü, parnok ket nung tokja liasu. Saka ajak toktsür ajen, pie tetsü taso lima asoshi parnoki taküm agutsütsü tenangzükba kodasür yamaji zübazübaadang senzüka toktsü? ta alimai asünganger.
  2. Neburtem- terrorist yimsüsüba kübok alitsü kanga atentena tsübuseta lir.  U.S. Special Inspector General for Afghanistan Reconstruction (SIGAR)” ajanga afghan yimsüsüba aitsübaji-  küm 20 tsüngta, US nungertemi yimden saru bendenba nungi  (tax payers money) sen 2 Trillion US Dollors yokba  menüngdakba kiojen (infrastructure) atema lalushibonga amshi. Governmenti tapokleni senzüka yokba (misappropriation) ajanga anogoshi US $ 8 million laludaktsü, iba dak alaka Government sen Taliban telongpur kati ao.[6]
  3. Tesuiba Afghan Ambassador to London Ahmad Wali Massoud-i ashiba agi, Government-i Sepoy-tem nem chiyongtsüa sünga peria magütsüi toktsü, ajiasünung sepoytemi ochi mashi yimsüsüba yimden ka kümzüktsü atema raratsütsü Afghan sepoy-tem dak keja tarungba maliasü, meyiper parnok aika Taliban den aten.[7]
  4. Afghanistan yimden linertemi süpokrem mateni mapa kecha minyakli asü. Sepoytem aika tazüngla sepoy (ghost soldiers) tiyazü tenüng amer itasenbo agirbo aika liasü.[8]

Myanmar:

  • 1st Feb. 2021 nü Myanmar Democracy yimli lao military yimsüsüba (Military Junta) tanaben tashim agi putu atsüngdok. Iba linük ya kanga dang alitemo aser alitelong rongsen senti oset tena aliba lima ka süaka nübertembo kanga sensaker lir. Ibaji putu yimsüsüba asameyang (worng Government economic policies) majungba ajanga lir.
  • Küm jenti lisopur temeden (ethnic tribal rights)  magütsüi tashiyim agi ajemokja arakmoka yimsü süa aru.

Kechiba Yimden Yimli Mapang Shia Anokshir?

  1. Süpokrem agitepbaji sobaliba küma yokba, US $ 300 tashi agütsübajibo süpokrem ta mezüngshir.
  2. Yimsüsürtemi rongsen tulu shishilembartem (big businesspersons) aser contractor nem project tulu mapa inyaktaktsütsü atema shiri sen timtiba supokrem agütsüteter item dangji ayok.
  3. Government nungi temalaba (licensem permit) kejisa meshidir süpokrem agütsür külendang nguteter.
  4. Senti perem long (Jade stone trade) ayokba ajanga par linük rongsen tesadang ka shibo küm shia arur  (48% of GDP) saka yimsüsertemi par molungka agi item longji tuteta yokdoka amshir.
  5. Mokhonarolu (opium cultivation) ayimba nungi mozü tesashi shi belenba manener, sungti tulu tsünga belenba agi arem min samadaktsüba, sen aruba company aika madak Junta government linertem kibur.
  6. Nuburtemi Government ashi mangatsü ta ayongba lokti tendet (Civil Disobedient Movement –CDM) ajanga  military government kübok joko parnoki metenzüktsü ta longkak aiter, yimti yimdong nung azü tokshiba agi nisung merijang junga militarytem-i  kasetogo.
  7. Pie yimtsüng toktsür jena aortem (Refugees  IDPs) UNHCR ajanga ashiba agi 680,000 (Internally Displaced Person-IDPs) dak tali July 2021 tashi nung liasü.  Salai Lian Luai, Chin State nung Chief Minister pa den linük lenir MLA 23 dena Mizorami jena adok.[9]
  8. India Government-i Myanmar refugeetem meyipa yoktsü Northeast state-tem dang tutuyuba agütsü. Saka iba India Central Government-i ashibaji magizüktsü ta parnoki metetdaktsü saka Myanmar nungertemji kesa miemchir asünung taochi sayua (Humanitarian ground) anebalutsü nungdaker ta  telangzüba. Mizoram nungi Khristan linük linertemi tasüita Indian Parliament House tashi nung yamala tsüzüng ozüng Mizoram State-ibo mamshitsü ta ashi. Khristan yimsüsür ka ochi nung nokdakba temaitsü aser teinyaktsüji itemji lir.

India nung Ochi Mashi Adokba Lushi[10]

Yimsüsüba nung- Administrative:

  • British yimsüsüba inykayim metangdangi benshiba.
  • Yimsüsüba nung temelenshi bener arutsü merangba  nung tamakok.
  • Yimsüsuba kongsang nung amenertem nem ita sen ajema agütsüba aser temabai atutsü lemang sadema melapoktsüba.
  • O bendangba bangdak nung ken o süshia benshiba aser obendang yakta magütetba.

Yimsüsütsü toktepba telok rongnung– Political:

  • Temelen saru (Tax) magütsüi bendenba sen election mapang amshitepa.
  • Lokti anema met nenaba nisung yimden lenir kümdaktsüba, yimsüsüba kongsang ajaklen  tashi toktepa menden raktepdaktsüba.

Rongsen Ketsüng:

  • Linük rongsen ketsüng aser shishilemba nung yimsürtemi sen yong teshimtet takar ishika nem maongka tulu agütsüba aser parnok lenjie oa temzüng ozüng aser rongsen ketsüng asayemang yangluba (rony capitalism).
  • Nisung rongnung takar makar tebendang tetsüngda tapok ulua kumdaktsüba.
  • Shishilembaba maparen nung tazüokba lirumedem ka maka.

Loktiliba aser Molungtang Molungsentsü:

  • Nisungshia pie pie meten dang litepba aser rongsen dak metalokba sobaliba.
  • Kaket ruju nung temolung atangtsü tesayuba agi anüngba.

Teransparancy International teloki kümshia adok nung country 180 lokdi yimden yimli aochi mashi asadanger paroki indang “Corruption Perceptions Index (CPI)” nung India  lima ya January ita nung 86th buba liasü.[11] India lima tia asadangba nung lemang aisü nung süret matuba kulitem maneni yami lir.

  1. Lokti timba dak metaloker yimsü asüba (Majoratarain Democracy yimsusuba) putu nung yimli tangitba tongshitem  ajak tarak ketsüba.
    1. Telok tila (minorities) ola nembanga toktsüba, ajibo nunga ta ola adokertem (dissents voices) dang linük anemertem ta ajaba, mesüra yimtilir keraklongraker (urban naxals) ajaba. Khristan liner Father Stan Swamy jail nung puoka yua lia asüba asenoki angashiogo.
    1. Schedule Caste nungi Khristan akümertem asoshi Government mapa menden balaka yuja aliba moangka agienba parnok government job reservation quota nung metendaktsüba.
    1. Tamangba yimsü telok tila anema tesemba o jimbiba (Hate crimes) ajanga nüburtem rishikangshi ajurudaktsüab.[12]
    1. Lok Sabha 17th buba 2019 menden latetdang MP noklang nung 50% (ie. 233 MPs)[13] yimüsürtem tarak keter parnok anema criminal cases met mena aliba liasü..
    1. India lima Hindu nunger meyong ta akanger telok (Hindu Nationalist Groups)  Centre nung tang Governrment linertemi teka amtepa inyakba ngua World Watch List (WWL) ajanga Khristan rishikangshiba linük asadangba temaba 10th  nung yua lir.[14] United States Commission on International Religious Freedom (USCIRF) ajanga linüktem nung yimsü sadema mekülemdaktsüba telok nung balaka shimteta ayuba (Country of Particular Concern)[15] rongnung 2020 nungi tokja lir.
    1. Pie sasa sademsadema yimsüsüa aliba nungi mesademi aliba linüktem nung tokja lir, democracy jenjang ludaktsüba.[16] Human Freedom Index nung India jenjang 17 agi tajemba aludaktsü.[17]
    1. Yamaji 2020 WPFI (World Press Freedom Index) nunga India lima nung osangtsüusang belentsü mesademi akümba linuk rongnung dokja lir.
    1. 2020 Global Hunger Index, yaatsura aliba linük asadangba nunga alinük 107 rongnung India 94 buba lir.[18]
    1. Alima ajunga nung pie linük kümzüka ayutsü atema rongsen timtiba indoker rongnung tasemba, USA mezüng tanabuba China aser India lir.[19] Saka anema alitsü asameyang (healthcare atemabo sen peria meindoker t ajiteta lir.
    1. Kaket reju nung Hindu yimsü inoksema kaketshitem nem apuoktsükba (Safronisation of Education).

Nübur timbai molungba yimden ajanga nübur ajak asoshi tajungba lemtet samadaktsür(Well of the people vs General Well).

  1. Opposition yimsüsürtemi Government den longjemtsüsa akümdang parnok putusen tamendakdak omen (political ideology) nungi leplalepshir. Iba government jagi joko (Legislative Bill) o lemtep tajung meteni telemtetba agir.[20]
  2. Ali rongsen (Natural resource) amshibayim nung lalushipongba (exploitation) ali–telong nungi rongsen tim mesui agiteta amshir, kin tila (tribal-Adivasi) nisungtem linuktem nung takartemi Government alizükka ozüng yangludaktsüba.
  3. Covid-19, 2nd wave mapang medical scientistemi lendong arutsü metetaktsüba ishilisa toktsü saka Kumbh Mela Hindu yimsü asentenshi sendong tulu nung nisung aika sentepbabo menokdang.
  4. Farm Bill passed asuba agi aluyimertem longkak aitdaktsür, takartem asoshi lenjie oa yangluba agi ta nemnemer (capitalist economic system). Indian economy aintsu melen tajemba ludaktsüba-7.7% (2020-21) agi ishiba jenjangi alu.[21]

Nagaland Ochi Mashi Jenjang

Income aliba department nung inyaker takar küma konang tetoshi agia ochi mashi inyaker.

  • Nagaland süngküm (entry gate) nung telok balalai tax agir- police, telongpur tax, DMC, Union tax etc, Government aika nem alimelen saru agütsür (Multiple taxation layers).
  • Government mapa atema pie kinungertem, pie nisung ajia yariba.
  • Lokti lenirtemi yinti meyong rongsen miemzüka agiba (misappropriation).
  • Private telok maparen nunga ozüng anema taihla (scam & illegal job) mapa inyaktepa.
  • Motor Vehicle Act dak alema registration atema sen talila telok aika nem agütsütsusa akümer.
  • Aputsüputepa nung sen tetemlok (interest percentage) alakyia tua meshiba NGO- tem ajanga mashilen nungi sen bener aruba (money laundering). Nagaland ya independent linük ka asünungbo ochi mashi ajanga  anaben asem  yimli laoadoker lila ta bilemer.

Nagaland nung Ochi Mashi Anema Apusor[22]

2

India-i Ochi Mashi Anema Ozüng Yangluba (Legal Steps)

3

Ochi Mashi Anema Nuburtemi Ozüng Tesashi Akanger

4

Nagaland nung Ochi Mashi Tera

Tsürabur Putu Yimsüsüba aser British Yimsüsüba tajeptep Yimdenren:

  1. British yimsusüba (1880s) mapang Naga lima arakmoka yimsüsütsü atema o meyiper aser teyariteper Dobashi (interpreter) aser Gaonboras shim. Saka British yimsüsüba temzüng agi Naga kin yimdenren memelenshitsü aser Naga nunger sobaliba nung mekongshi toktsü (Non-interference policy).
  2. Kodang India nüjiso 1947 nung angu iba sülen Nagaland Statehood 1963 angu, Nagaland government-i yimtsüngtem putu menden recognised asü.
  3. Indian Constitution Article 371A kübok Nagaland pie sasasep yimsüsüba benoka legislature bill ka yanglubaji “Village and Area Council Act (1978 revised 1990) ya lir).
  4. Anungji kodang Indian parliament nung 73rd Amendment nung Panchayati Raj Act, aser  1993, ajanga Town/municipalities atema 74th Amentment 1994[23]  Act yanglu.  Iba ajanga local government yimtsüng nung Gram Panchayat, tsükong (Block-level) nung Panchayat Samiti aser District nung Zilla Parishad ta tenteta item senden reju nung nubertemi election agia liner shimteta Government tashi lemzüktsüja yimüsü asütsü tashi angu.
  5. Saka iba inyakyim ama election agia putu tentetsü ozüng nungi Nagaland, Meghalaya aser Mizoram (Exemption) salazüka yoka lir.
  6. Nagaland asoshi tapet yimtsüngtem terenlok akatsü nükjidong nung VDB Act 1980 aser “Nagaland Communitisation of Public Services 2002 Act”, Nagaland Government-i benoka lokti sasep teka amtep mapalem aser nüburtem kibur kümdaktsüba inyakyimji Panjayati Raj  melen amshiba yimsüsübaren lir.
  7. Saka Nagaland nung Village Council ya political administrative aser development agent ka dang lir, senotsü amshitsü tashi kanga tila.
  8. Block aser District level nung inyakertemi development aruba madak kibur küma parnok amshinütsü amshir. Tulurtemi tagitsü, senotsü amshiyim aser koma amshir miembanga ayur.
  9. Indian Consitution-i melaba tashi mahshileni angatetba aser yimsüsürtemi pie jungjih apia amshir aser India nunger bangdak ozüng inyakyim (Indian legal system) asen lima yimüsüba nung benjatepa lir.
  10. Yimtsüngtem terenlok (Rural development programmes) India government-i agütsüba (GOI sponsored) Nagaland Government-i aiben mashilen amshir. Ajisaka ochi mashi inyakertemji income tulu anguba officer asünung arogoden, yimden aser lokti ajak nung parnokji sentsüwangshia tushia amshir.
  11. Inyakyim temelenshi ka atema yimtsüngtem Putu menden Gram Panchayat den mesüktetpa inyakba amaji, Tsükong Mungdang nemji Panchayat Samite nem agtsüba tashi  aser District level nung Zilla Parishad nem agütsüba tashiji Ao Senden ajanga tentetba telok ka nem tashi agütsütsüji  Nagaland Government bangdak lemtet ka küma yanglutsü (Bill pass asütsü) koka dang lir. Nagaland asoshi tapet yimsüba aser terenlok inyakyim atema India Constitution Art. 371A nungi tashi agia 73rd aser 74th mesüka yanglutsü akok. Panchayati Raj 73rd Amentment aser Municipalities Act 74th Amendment nung tuyuba kesaji inyakerang masü. Saka Nagaland Communitisation Act, VDB aser Village Council Act inyakyimtem nung temelenshi Amendment Bill ka Nagaland Legislative Assembly nung yanglua  District, Tsükong aser Yimtsüng sasep kejisa development arudir aser yimsüsüba tashi aguja lir  item maparen ajayanga bener aotsü. Iba ajanga tulurtemi development sen meimzüka agiba anendaktsütsü aser nübertemi pie sasa yimsü asüba Democracy inyakyim shitakba benoktetsü.

Kerala nung Panchayati Raj Yimdenren Telemsa

5

Government officer-temi Local Self Government (LSG) kübok parnoki repranga inyakdaktsür. Governemnt department posts aika LSG kübok inykatsü transfer süa lir. Telok kati ka mapa inyakyim suret odangtepa (Check and balance) aser staff azüoka ayutsü tashi lir (supervisory, partial disciplinary control of the line departments). Panchayat President nem Panchayat government staff (bureaucracy) aser development maparen reprangtsü tongti shilem agütsür.

  • Local self-government nung District Collector/Deputy Commissioner (DC) linisüba nung development maparen bener aobato joko paji mapa ajayanger (coordinator) ka ama dang kümdaktsü. District Dollector Panchayat nung secretary ka ama dang kümdaktsübaji India yimsüsüba nung kangadang balaka inyakyim ta World Bank ajanga ajiteter.[24]
  • Anungji IAS yimsüsürtemi Kerala nung mapa inykatsü matanür aser decetralisaiton yimsüsüba nung shilem agitsü mejangarar.
  • LSG nung nütsüngtemi President/Chairperson ochi mashi putetra mapa nungi anendaktsütsü temeden lir, Putu Menden nungi anendaktsuba ama.

Local self-Government mendentem (Tier) ajak nung iba tashi lir.  State Government-i Panchayat lemtet ajanga ao mienyakteter, oda court dangi oa bangdak nung ken o küma jembi mesüra. State government jagi panchayat anentsütetsü (dissolve) akok ochi mashi putetra saka, parnoki yangluba ozüngji ajembanga mayur. Tesüiba mapang Cocola Company nem license tasen mekümtsüba tebilemtsü ka Perumatty Gram Panchayat Kerala nung ajuru. Hindustan CocaCola Beverages Ltd nem Palakkad district nung parnok mapa metetitemi bener aotsü memela. High Court nungibo panchayat dang parnok license tasen kümjang ta order aru. Saka Supreme Court tashi iba ken o bener oa benshir tatem nung company-i makok anentsüsa aküm yamaji iba case ya India nung dang masü saka danga linüktemia angatanga ataa liasü.[25]

Linük Asoshi Mangdang Aketba Khristan Ka

  1. Development nung nubur ajangzüktsü atema nüuburtemi kibur akümdaktsüba (people-centered development).
  2. Local self-government Menden ajakji nubur meyong akümtsü, yanglushitsü mangdang.
  3. State yimden lenla ajak- ozüng amtak sanen luden (Executive), ozüng yangludak (Legislative); ochi o bendang dak (Jucidiciary) kongsang ajaklen nübertem nem telangzüba agütsütetba (accountability).
  4. Senotsü aruba aser amshiyim aser inyakyim (guidelines) ajakji metedaktsütsü aser angazükdaktsütsü.
  5. Local government nungji kangabo (politicised) yimsüsütsü tashi toktepa alitsü menüngdaker.
  6. Yimtsüng nübur ajungketsü atema lenla balala nung training agütsütsü, koda ali rognsen, senotsü aruba  amshitsü aser litsü lika wazüka ayutsü.
  7. Arogo nungia rongsen (budget) lemzükja lokti terenlok, rongsenketsüng libaliro ajungketsü atema indoktsü nungdaker.
  8. Tribal mongdang (Tribal Councils yanglushia (reformation) State Legislative Bill yanglua local-self-govt inykayim asen lima lokti den tapet benoktsütsü.
  9. Advisory Council- telok balala tenteta development aser mapadong anebalutsü. Tetsür jenjang ajungketsü atema mapatong shidak inyaktsü.

Ochi Mashi Mapa Aser Tanela Asüngteta Aliba

Loktiliba Ajak nung- Ochi Mashi Zuinba.

Kodang meimchiri tekülak tamajung mapatem inyakba aser parnok mulung nung teti tamajung dang bilemer ta Kibubai angu, pai alima nung meimchir yangluba atema jashi aser pa temulung mepelai aküm.  “Saka Kibuba madang Noai taochi angu” Lipok 6: 5-8. Governemnt yimden dang masü, saka, kibong nung, arogoden nung, society community ajaklen kesadang. Khristan tamangertemi Tsüngrem meyoktepa külemtsü makok ta Yisui Mathi 6:24 nung ashir, “Nenoki Tsüngrem aser rongsen metenzüktet” Enoch putu teraksaba ochi mashi tendak ali saka pai Tsüngrem den jaja. Yamaji lokti liner ka- Nagaland government tenzüker kati külem office mapa inykaertemi ochi mahsi inyakaka map mienyaki itasen dang meshii aruaka ochi shir nisungba jagibo pie mapa shidak inyaka pa tanela merüketa litetsü ta laishiba jagi tuyur. Ochi shirji alimai sempatsü, transfer talangi yoktsüa akok, mesüra pai sen aika amozüka magir asünung rongsen nung takar masü, tenla tenji, donation aika magütsütetsü akok. Yohan 15: 19 “Nenok alima meyong asübo alimai pei meyong meimla; saka nenok alima meyong masü, joko ni nenok alima nungi shimtet, ajagi alimai nenok sempar.

Ochi Metongtsü Asoshi Tamager Telok Shilem

  • A.P.J. Abdul Kalam tesuiba mapang India President-i yamai ashir, “Linük ka ochi mashi nungi nüjiso angutsü atema aser tebur tajung molungsentsü alitsü asoshi, lokti nung tongtipang züngsem asem ajanga temelenshi bener arutsütsü jabi (key) lir, itemji Tebu, Tetsü aser Tesayur”.[26]
  • Arogoi ochi mashi anema mapa tulu inyaktetsü saka tamasa pa dak ochi nung tarak alibaji- metongtsüla (Corrupted church institutions, Denomitional Protectionism & Pulpit Plagiarism) aser tenzükba amapa nung tetsür tebur nem maongka bensaa agütsüba.
  • Tayimjem tenyaba mapa (Holistic Ministry) ajanga mapa balala nungi alirtem dangi osangtajung abenba (Focus Group Mission eg. Police, bussinees, administrators, corporates, students, technocrats, army) item mapa nung alirtem asoshi missionary kaka küma inyakatsü aser tenzüker kümdaktsütsü.
  • Social worker aikati “Ni Tsüngrem tenzüker ka” ta shiteter saka Govternment tenzükertemia, lawyer-temia, business corporate owner temia ni iba mapa ajanga tsüngrem tenzüker ta shitetsü na?

“Temeshibai kin ka ajungkettsür, Saka kechi kin südir süaka temenenji taktsü ka lir” A.Shin 14:34. “Nai raraba anogo nung ne nüburi pei sasa mulungteta adoktsü” T.Ken: 110:30.  “Tajung inyaktsü meteter meinyakbaji temenen”, Yakob 4: 17.  “Nisung kar mapa rongtokra, pa akoksatsü, saka pabo mi nungi jenbuba ama kümzüktsü”, 1 Cor. 3:15.

Lokti tenzükba mapa süshia, arogo tenzükba sushia Tsüngrem sentsüwanghsi atema ochi agi tenzüktsü ayongzüker.

[1]Corruption and Development, UNDP, https://anti-corruption.org/wp-content/uploads/2017/04/Corruption_and_Development_Primer_2008.pdf.

[2] Transparency International, the Global Coalition against Corruptoion, https://www.transparency.org/en/publications/transparency-internationals-annual-report-2009.

[3] Oxfam International, “Extreme inequality and essential services”, https://www.oxfam.org/en/what-we-do/issues/extreme-inequality-and-essential-services

[4] Shrija June 14, 2021, (https://www.inventiva.co.in/stories/shrija/indias-highly-unbalanced-economic-distribution-rich-buys-luxury-cars-while-the-poors-struggle-to-get-food-in-indias-pandemic/

[5] Amartya Sen, Poverty and Famines: An Essay on Entitlement and Deprivation, Oxford (23 December 1998).

[6] Neil Gordon , Audit Finds Pentagon Task Force Squandered Millions, Had Few Successes

January 10, 2018. https://www.pogo.org/analysis/2018/01/audit-finds-pentagon-task-force-squandered-millions-had-few-successes/.

[7] Corrupt govt, politicians have demoralised Afghan army: former envoy,” https://tribune.com.pk/story/2315026/corrupt-govt-politicians-have-demoralised-afghan-army-former-envoy

[8] Ghost soldiers emblematic of a problem that has plagued Afghanistan’s security for decades — corruption, AUG 13 2021,

https://www.deccanherald.com/international/ghost-soldiers-emblematic-of-a-problem-that-has-plagued-afghanistans-security-for-decades-corruption-1019270.html

[9] Salai Lian Luai, 23 lawmakers among Myanmar refugees in Mizoram, https://economictimes.indiatimes.com/news/india/chin-cm-23-lawmakers-among-myanmar-refugees.

[10] Source: https://iasexamportal.com/current-affairs/corruption-in-india-an-analysis.

[11] The Economics Times, May 28, 2021 “India falls to 86th rank in corruption perception index 2020,” https://economictimes.indiatimes.com/news/economy/indicators/indias-rank-slips-to-86th-in-corruption-perception-index-2020/articles.

[12]Destructive Lies, https://www.opendoors.de/sites/default/files/Destructive-Lies-Executive-Summary-DIGITAL-ODDE-2021.pdf. (Report independently conducted by LSE).

[13] India Today May 25, 2019 , Nearly 50 per cent MPs in new Lok Sabha have criminal records, https://www.indiatoday.in/elections/lok-sabha-2019/story/50-per-cent-mps-new-lok-sabha-criminal-records-1534465-2019-05-25, Nearly 50 per cent MPs in new Lok Sabha have criminal records

[14] World Watch Research, https://opendoorsanalytical.org/wp-content/uploads/2021/01/WWL-2021-Compilation-of-main-documents-ODA-version.pdf.

[15] The Impact of Majoritarianism on Religious Minorities in South Asia, https://www.uscirf.gov/news-room/uscirf-spotlight/impact-majoritarianism-religious-minorities-south-asia.

[16] Freedom in the World 2021 report ‘Free’ to ‘Partly Free’.

[17]The Hindu, December 17, 2020, “India ranks 111 out of 162 countries on personal freedom index,” https://www.thehindu.com/news/national/india-ranks-111-out-of-162-countries-on-personal-freedom-index/article33358167.ece.

[18] Global Hunger Index, 2020, https://www.globalhungerindex.org/india.html

[19] Largest Military Spender Country limatem no 3 buba nung USA, China sulenbo ($72.9 billion GDP 2.9%) .lir.

[20] The New Indian Express, 05th August 2021, “20 bills passed in monsoon session without debate”, https://www.newindianexpress.com/nation/2021/aug/05/20-bills-passed-in-monsoon-session-without-debate-2340403.html

[21] Vrishti Beniwal,  Bloomberg News January 7, 2021, https://www.bloomberg.com/news/articles/2021-01-07/india-sees-7-7-contraction-in-fiscal-year-2021-on-virus-woes “India’s GDP Set to Drop 7.7%, Biggest Contraction Since 1952”,

[22] Sarita Santoshini, 14 Apr 2016, “In India’s Nagaland, a tale of taxes and corruption,” https://www.aljazeera.com/features/2016/4/14/in-indias-nagaland-a-tale-of-taxes-and-corruption

Nagas have been .protesting against paying taxes to multiple rebel groups fighting for autonomy and a single Naga homeland in India’s state of Nagaland [Caisii Mao/AP].

[23] Constitutional Provisions, 73rd Constitutional Amendment, 74th Constitutional Amendment, https://www.tn.gov.in/tsfc/amendment_acts.htm.

[24]  The World Bank, “Kerala Local Government and Service Delivery (P102624),” June 19, 2018,
https://documents1.worldbank.org/curated/fr/106841529960342147/pdf/ICR00004319-06222018.pdf.

[25] Information on Multilateral Environmental Agreements, “Perumatty Grama Panchayat vs State Of Kerala”, https://www.informea.org/en/court-decision/perumatty-grama-panchayat-vs-state-kerala.

[26] https://www.upsciq.com/country-is-to-be-corruption-free/.