~ Watimongla Jamir

Tesayur, iba nisung tenükpoker asotsüsa, pai asü, pa tsüraburi asü, shibai temenen benshi? Yisui langzü, iba nisung süshia, pa tsüraburi süshia, temenen mebenshi: joko pa dak Tsüngrem mapa jungkai adokdaktsütsü asoshi. Yo. 9: 2-3

Okila

Mokokmin, shirang ya temenen temerenshi ta Lai meyipzükba aser tesayuba ya melenshitsü nungdaker. – Matsüng Longkumer

Arogo aser lokti balala nung sendoka aliba aser tim shilem magütsüi aliba telokji “Persons with Disabilities” yaa ka lir. Ao oshi nung matamabensar, tenük telen mabensar, leni maor, mokokmeiner, sowar yamaji nüngja balala nung ajar. Parnok ya tagidak makaba nisung ama bilema lokti aser arogoi maparen aika nung mamshir, züngdoker aser aikati parnokji züngshia mali. Parnok taküm ya reprangdangra kanga temulung zürepa aliba angur. Alima nung nüngtugu scientist Stephen Hawking’s shiba matamabensar/mokokmeiner nisung ka liasü (motor neurone tashitak liasü pai ashi, “Mokokmeiner/Matamabensar takümji kanga tununuh (vulnerable) kechiba süra parnok taküm nung tenokdangtsü aisü nung arur: nisungtem yimya liru nungi, temang timtem ajanga, aser rongsen tsütsü. Item tenokdangbatem agientsüji asenok mapa aser asen teinyaktsü. Kodang item tenokdangtsü ainshidir parnok dak aketba sempet tajung aika ajanga alima nem tajangzük tulu agütsütsü.” (People with disabilities are vulnerable because of the many barriers we face: attitudinal, physical, and financial. Addressing these barriers is within our reach and we have a moral duty to do so. Addressing these barriers will unlock the potential of so many people with so much to contribute to the world). Mokokmeiner/Matamabensar koda lokti aser arogo nung tim shilem agütsütsü aser tejakleni odaktsütsü ta YSS nung jembiba onük nungi kü tebilemba kar lemsateper.

Nütsüng yongzük (Census)

Mokokmeiner süaka  aseni ajungshira, sayura aser yaritepra lemang balala nung renloktsüba aser inyaktettsüba pur aika lir. Parnokji lokti aser arogo nung tejakleni anir aruba ajanga alima nem temoatsü aika bener arutsütsü. – Sashikümla Longkümer

2011 nütsüng yongzük agiba nung mokokmeiner/matamabensar 26.8 million (2.21%) India lima nung lir aser item rongnungi asen Naga lima nung 29,631 shi lir. Küm ter tsüngda nung tali dang züiner alitsü. The Rights of Disability Act, 2016, ajanga mokokmeiner/matamabensar telemsa (category) 21 tashi agüja lir. Naga lima nung matamabensar teimtibaji küm 10-19 tashi nung lir. Social Statistic Division: Ministry of Statistics and Programme Implementation (GoI) ajanga ashiba agi India lima nung mokokmeiner/matamabensartem azüng zülu memetet aliba nütsüng yongzük medemdangba nung, States 35 nungi Nagaland 32 buba (tesülen nungi pezübuba) nungang lir. Ano kasa osang ajanga ashiba agi school-i kodanga moudangba tanur (küm 5-19) metemdangba nung, Nagaland ponglang (35th rank) nung lir. Iba yagi asen Naga lima nung mokokmeiner/matamabensartem jenjangji jangja jangja sayur.

Mokokmeiner /matamabensar taküm aser jenjang

Mokokmeiner ajungkettsü asoshi temelenshiji kibong nung tenzüktsüla. Anungji arogoi tsüranur adianutem atema awareness and education seminar sentong yanglua parnok nem importance and valuesa of mokokmeinertem angajemdaktsüra temelenshiji kibong nungi tenzüktsü ta bilemer. – Imliodang

Tanü asen lima nung mokokmeiner/matamabensar taküm aika taochitsü tia nung lir. Tebilemtsü tulutiba  kaji nüburtemi mangatetba ajanga parnok takümji aiatai tia nung yutsür. Kodang kibong nung tanur tenük telen mabensa mesüra tera meshitak ama sora, parnok kibongji atakatem kibong ama züngshir. Tetsü-tebou menen, tsürabur menen ajanga atakatem anguba ama bilema parnok amala kibongji aikati ashishir. Iba yongji yimjak nung jembira kinungertemi aaker aser miimbangtsü meranger. Kibong kar nungbo tsüraburi dena parnok mesenmetui amshia sendoka toktsüba tenük kuli lir. Aji saka kibong kar nungbo parnok kanga junga anepalua, mebendangi amshiba lir.

Mokokmeinertemji aiben pa/la tenüng agi masü saka parnok nem nüngja balala agütsüba ajanga jashidaktsüba lir. Tatishitsü agi nükpola, narong jakla, sowaba, tera mabensa ka to, ta yamala nüngja balala amshir. Pei tenüng masü iba amala nüngja amshiba ajanga pa/la shi-azü ajak lorepdaktsür aser aji tetepset den sako. Parnok mokokmeinba ajanga masü saka tongtipangbaji nüburtemi meshimejungi parnok reprangba, züngtokba aser mezüngmeshiba timtemji tulutiba. Iba yongji parnok sademsadema kecha nunga metenteter aser pei sempet mamshiteter.

Aikati bilemer mokokmeinerji shiranger aser taneptsü bushitsüla, saka aji masü. Karibo taneptsü angutsü atema prayer centre-i aotsü ajungshir, lumir, healing crusade bushir, temenen nangzüktsü aser tamang ulushitsü ajungshir saka aika taneptsü mangur. Iba yongji taliang shisabulu bendenloker aser nisungtemi meshi-i repranger.

Tanga state nungbo mokomeiner shia nem ita shia sen Rs. 3000 agütsür.  Asen Nagaland government-i ita nung sen 500 agütsütsü ta lir saka teimbaka küm piyong nung khen dang agütsür, iba mapang kar 4500 kar 5000 tasa agizükba kuli lir. Yamaji mokokmeiner pei angutsü tim dena mongutetba tia nung alir.

Mokokmeiner/matamabensar aser Arogo

Mokokmeiner ya alakteta anepalutsü asoshi arogo ministry balala alitsüla. Aji mesüra, shirnoki parnok anepalur item telokji arogoi nungittsüla. – Jungshimanen

Khristar arogoji tabensa pur atema dang masü saka mabensar aser tabensar ajak atema liru medema inyakba arogo. Alima nung alir ajak Tsüngrem chir aser Tsüngrem meyong kechiyong nisung ajak Khrista Yisu nung ka dang (Galatia 3:28). Aji saka, tanü Khristar arogo nung süoki ia mebushiba (search) telok kaji mokokmeiner telok ya lir. Parnok anitentsü, anioktsü, shilem agidaktsütsü, aser arogo nung züngsem tajung ka ta agizüktsübaji arogo mapa aser khuret. Koba arogo nung nütsüng (shiba südir süang) züngdoker mesüra mebushir iba arogoji “Mabensa arogo” (disabled church) aser iba arogo jagi Tsüngrem sentong matalokdaktsür.

Küm shia mission mapa balala asoshi arogotem ajaki sen jenti entoka inyaker.  Saka pei atepzüng nung alisang/la (mokokmeiner) asoshibo budget balaka mali. Ao arogo aika nung Mokokmeiner Amongnü (Disabled Sunday) koba ABAM-i latettsüa lir iba anogo dak alaker parnok asoshi kecha balaka meinyaker. Sentep ki kar dak alaker parnok otettsüsa sentep ki yanglua mali. Arogo kar dak alaker parnok shilem agitsü mangur. Tanü Khristar arogo aika nung parnok züngdokadoker aser arogo nunga züngsem mali. Tesasatsüka mokokmeiner nisung aika tzümasen (without baptism) iba lima nungi pilaogo.

Mokokmeiner/matamabensar aser lokti

Mokokmeiner ka sotet nung kibong rangpen maksü ama bilema pa/laji shibanga miima yuteper. Aji kechiba? Loktii kechi ashitsü ta tebilembaji onsara sashi, ibayongji lokti tangatetba nung meyipshishi kangasa nungdak ta nibo bilemer. – Bendanglemla Longkumer

Mapang ka nung yamai atalok. Tetsür chanu tenük tapok kati sentep nung Lai azüngtsü pelashishia langzük. Anogo tonga arudang tsüraburi mezüngdaktsü. Ano tetsüng tatsük kati ken atentsü ta ashi saka adianui nokdang. Tsürabur adianu mangatet sayur. Parnok nem angatetdaktsütsüba ta kanga tongtipang. – Mapula Lemtur

Kodang mokokmeiner ta südir parnokji kodanga yimden yimli nung mamshir aser lokti tentet kecha nunga lenir magir.  Akhi putu nung tensa den apet magi südi saka tanü putu nung parnok mezüngokbaji kanga tai. Mokokmeinerji lokti atema tebilemtsü masü saka lokti-i mangatetba ajanga tebilemtsüji ulua kümdaktsür. Tanü asen tendak tabensar nisungi mokokmeiner mangatetba aser metongtetba tebilemtsü tuluba. Tanga states nungbo tenük kelen agi mangur, tetsüng kelen tera tatsü mesüra nashi-ra (epilepsy) aketer (ano aika lir) ajak matamabensa certificate yanglur aser teyari balala tesem aika nungi angur. Asen lima nungbo certificate yanglutsü tashi aaker mesüra miimshir ano karibo memetet, anungji parnok atema sorkar-i teyari balala lemang agütsüba nunga parnok item maongkatemji magiteter. Rights of Disability Act, 2016 nung mokokmeiner nem  4% sorkar mapa (job employment) agütsütsü kümzüka (reserve) yuja lir aji saka iba amala maongkaji magir. Ano kasa Act-i mokokmeiner tanur tasoba küm 6-18 tashi kaket shisatsü angati (free education) agütsütsü ta renema lir aji saka mokokmeiner teimba school mazüngertemji asen Naga lima nungi lir. Ano kasa Act nung ashiba agi shibai mokokmeiner dak metetsümonga mezüngmeshi mesüra mejungi benshira pa/laji tepuokdak (jail) ayutsü shia lir.  Item ozüng ajak liaka asen lima nung mamshir mesüra memetet.

Laishiba Tesayuba

Laishiba nung mokokmeiner/matamabensar aser tabensar ajak Tsüngremer sentong asoshi amshiba shia angur. Tejen Lai nung tongtipang ainkar rongnung kaji Mosa, shiba matamabensa liasü. Asemben tashi Mosa-i pa mokokmeinba/matamabensaba indang shia lir (Anitet 4:10; 6:12, 30). Kodang Kibubai pa jatet, Mosar tensa nung matamabensar tezüngokdak maliba ajanga Mosa-i nungnang, aji saka Kibubai pa dang ashi, “Nisung bang shibai yanglu, mesüra shibai nisung meli tsükdaktsür, mesüra tenarong jakdaktsür, mesüra ngudaktsür mesüra tenük pokdaktsür?… nai kechi jembitsü aji ni ne dang sayutsü (Anitet 4:11,12). Mokokmeiner/matamabensar Mosa ajanga par nübur alar tia nungi anitet aser par putu nung Mosa ama ainkar kata madok (Tazüngkunem 34: 12).

Tasen Lai nung Paul ama nüngtugu ainkar shinga mali. Paul-i aiben pa temang mokokmein indang zülua lir (Gal. 4:13-15; 6:11; 2 Kor. 12:17). Laiputi metetertemi atangji Paul mokokmeiner ka liasü ta shia lir. Pauli asemben tashi pa timtem asoshi Tsüngrem dang ayimten saka Tsüngrem nungi telangzüba angubaji, “Saka Tsüngremi tashi temetetertem maaksüdaktsütsü atema alima shisa makabatem shimtet. Aser Tsüngremi tashi aitbatem maaksüdaktsütsü atema alima tashi maitbatem shimtet” (1 Kor. 1;27).

Asenok aikati mokokmeinerji kecha nunga tagidak maka ama bilemer saka Laishibai aji aitsür. Tsüngrem mapa jungkai adokdaktsütsü asoshi aser nisung ajak Tsüngrem tsüngdang shinga tabensaba mali ta metettsü asoshi, mokokmeinertemi meimlaba mapa jenti inyakteter.   Item mapatem ajanga Tsüngrem tashi tali jungkai adoker aser tongtipangsa tai temenen ajanga matamabensa aso ta tangatetba khenyongi aitsür.

Teinyaktsü aser Tayongzükba

Mokokmeiner kibong tiaji kodang reprangdangdir, kibong kar nungbo tsüraburi sobu solem nungi tenzüker libalior ajak nung parnokji tim masüi amshiba angur. Koba ajanga inferior complex/insecurity developed süa tia tamajungba nung item chirtem ainer. Anungji kibong shia nung taküm ajakji tenzüker asü nung tsüraburi item mokokmeinertem ya Tsüngremi moatsüba jala/jabaso ta agizüka kasa amshitsüla. – Zülu Jamir

Shi temang nung mabensai asobaji yanglushitsü makoktsü südi, aji saka parnok taküm jenjang yanglushitettsübaji takoktsü, kodang abensaa alirtem tangatetba melenshidir. Matamabensar aser tangar memeneper ta ajartemi dang temang shitak alir dang nungi tali meinyaktetba mapa aika inyakteter. Aji saka tesasatsüka asen lima nung parnok tagidak maka ama bilema, teküboktiba jenjang nung yutsüba ajanga parnok sempettem mamshiteter. Mokokmeiner atema kechi inyaktsütsü ta tongtipangba masü saka parnok den külemi teka amteper kechi inyaktsü? Parnok taküm teküboktiba nungi koma ajungkettsü ta tangatetba nung inyaktsü mapang tongogo.

# Yh. 9 nung nükpoksang ngua nisüngtemi Yisu dang asüngdangba to kasa asenok tangatetba lir. Iba shisatsü ya memelenshi tashi majungtsü, anungji mezüngbuba nung iba tangatetba melenshitsüla aser aji pei atepzüng nungi tenzüktsüla. Asen lima nung mabensar dang nungi tabensar tebilemtsü tuluba aser ibaji chioka (liberate) meyok tashi matamabensar timatemtsü (victimized).

# Mokokmeinertemji arogo, yimden aser lokti tentet ajak nung amshitsüla. Koba lokti-i parnok mamshilir iba loktiji mabensaba lokti ka akümer. Parnok dak aketba sempet tajung aika ajanga alima nem tajangzük tulu agütsütettsü.

# Lokti balala-i teyari lemang bushia aser teyari agütsüba asoshi tsüraburi nungnanga malitsüla. Tsürabur aser adianutemia sadoksadoka alitsü asoshi tesayuba agütsütsüla.

# Temeshi sabang (Pulpit) nungi mapang shia Laishiba nung ajemdaker lokti nem tesayuba aser tangatetba agütsütsüla. Tsüngremer arogoji ajak asoshi anungji parnok anitentsüji arogo teinyaktsü. Ano parnok nem shilem agidaktsütsü asoshi lenmang sadema lapoktsütsüla.

# Parnok  arua tentettsüsa sentep ki (disabled friendly) yanglutsüla aser parnok nungdakba wheelchair, hearing aid, visual aid, Braille, ramp amala renema yutsütsüla. Tanü tashi nung sentep ki kar dak alaker item amala tenungdaktsü asen Ao sentep ki kecha nunga mali.

# Sentepi marutetertem dangi tsüngdong oa Tsüngrem O sayutsü kanga tongtipang. Ano tzüsentsü asoshia arogoi nendaka achaayangtsüla.

# Shisa tokden (seminar), o-zülu kaket balala (newspapers, books, journals, etc), mass media balala ajanga tangatetba nüburtem nem agütsütsüla. Arogo aser tangatetertemi aji achaayangtsüla.

# Yimden aser arogo-i achaayanga doctor anir arua free medical camp akatsüla.

# Pei sasa kecha mesüteter, mejembiteter, mangateter aser shisatsü nung mabensa alirtem mesendoki yaritsüji nungdak.  Tsürabur aser kinungertem dang parnok koda anepalutsü, meimtsü, tanela jenjang renemtsü itemji sayutsü asoshi arogo aser yimden/lokti balala-i achaayanga tangazükba (training) agütsütsüla. 

# O-mejembiteter aser mangashir atema jembiba oshi koba dang ‘sign language’ ta ajar ibaji amshir. Sign language ya kasasa masü, alima linük balala nung pei-pei sign language balala. India nung Indian Sign Language (ISL) lir. ISL angazüktsü aser amshitsü atema ajungshiteptsüla. Arogotemi tejangrar ISL training yoker parnok ajanga nüngdakba pur dang sayutsü aser ibaji ajanga tekülem aser lokti senden balala nung teyari tulu asütsü.

# Mokokmeinertem tangutsü tim manguba atema arogo aser lokti balala parnok den külemi lungjemer ola adoktsüla.

Otembang

Ajaki mokokmeiner ketasena meimtsüla, parnok asoshi maongka aser yimli agütsütsüla ta jembir aji saka shitakba nung mapabo küma meinyakteter. Ya tebilemdangtsü tulu. Anungji tang nungi shir o agi jembiba dang masü saka Laishiba nung ashiba ama teinyaker kaka akümtsü merangdi.

*****