September 8 ya “World Physiotherapy Day” lir. Iba anogo amungba den külemi Mokokchung nüburtem asoshi osang tajung kaji Arkong Ward kübok Nepali Baptist Church anasa ‘Physio Ki (Your Home to Recovery)’ ta sür physiotherapy clinic tajung ka Mokokchung Town Baptist Arogo (MTBA) Associate Pastor, Sentimeren ajanga meshiteta sarasademer lapoktsüogo.
Tanü asen lanurtem zünger mapa mengui alir aika lir, saka physiotherapist Dr. Olemjungla PT-i India len zünger bendang tesem balala nung inyaka lir, pei taso limai arua pei nübur tenzüktsü tejangraba nung iba mapa tenzükba asoshi pelaba den iba tesem ya nüburtem taneptsü anguba tesem ka südaktsütsü asoshi Tsüngrem akhüm tsübua tajungtiba nung achayanga aotsü asoshi Assoc. Pastor Senti-i moatsü.
Dr. Olemjungla PT-i mapang tatsüka agidang, Mokokchung nung physiotherapy clinic kanga apara, anungji, nüburtemi physiotherapy clinic nüngdakba reprangteta aser anema aliba tsütsü (healthcare facilities) service tajungtiba agütsütsü nükjidong yur iba clinic ya tenzüker, ta ashi.
Iba “physio ki” nung ya treatment agibaji ajaki agütsütetba (affordable) jenjang dang agitsü, rehabilitation service, tantsür tambur akümdang ngoya-ngoshiba tapu balala, stroke patients-tem reprangtsü. Physiotherapy tapu balala atema machine teperi bener arua amenoka lir. Jangratemtsükaji; tantsür tambur küm 60 tema pur atemabo ‘consultation fee’ magitsü aser ano treatment mapang talang agirtem atemabo sen tajemba agitsü, ta Physio Ki lapokla Dr. Ajunglai iba osangbener den jembidang lemsatep.
Iba clinic ya 9th September, 2021 nungi tenzüktsü aser Deobar dak alaka anogoshi anepdang 9:00 ako nungi nikong 5:00 ako tashi lapoktsü.
Changtongya tsür Dr. Olemjungla PT ya West Bengal nung azüng. La züngtemer külen Fortis Memorial Research Institute Gurgaon, health care at home Delhi nung inyak. Aji sür, Qatar nung küm ana shi liasü aser yang nung jagi pei limai sodi aruba alima tensa tia mesüngjemba ajanga meyipa moteti liasü, iba mapang Mokokchung nunga ibala clinic nungdakba ajiteta Physio ki lapoktsü telemtetba agi, ta laisa shisem.
Temang ajetshiba (massage) o physiotherapy ana ya balala lir, kopiras-i temang ajetshitsür saka physiotherapist-i arakzüba (movement) aser exercise amala treatment agütsür, anungji, nüburtemi iba tetsüngda anaji metettsü nüngdaker, ta laisa jangjashitsü.
Physio ki indang kari danga osang tejangjaba metetnüra iba mobile number (8787300847)/physioki21@gmail.com ajanga tongtepratep sütettsü.
(Source: Tir Yimyim)
The Nokinketer 