~ Tiatoshi Longkümer & Imtimatsüng

Nagaland Assembly Election tonga arudar. Covid-19 ajanga alima rongsen ketsüng kanga raksaogo. Kibongtem aika koda masüba jenjang nung lir. Govt. ajanga nüburtem yaritsü lemang mali. Lokti senden aser Arogoi kodanga sen lema mejajatsü. Nüburtem aika asoshi ya-tzüra aser makamait ajak kübzükdakji aruya aliba election ya alitsü shibai metet! – Zülu Jamir

Senso candidate meshimtsüla aser senso candidate shimba timtem tera aser lendong nüburtem nem shisadokden agüja tang yongi tesayuba tajung agüja tenzüktsüla. Tanabuba nung, nüburtem dang vote mayoktsü, sen meshia machitsü saka onok nem lokti arok terenlok, tat. agi, lenmang yanglujang, hospital, tzü, light aser tanga terenlok adokra kua ta ashitsu shisatsü tajung tang nungi agütsütsüla. Candidate canvassing arudang item terenloktemji akhangtsü. Electioneering miima masü yimjak nung public speech aser candidate visions and mission, aser koma inyaka aotsü  iba indang yimjak nung ayimoktsütsüla aser nüburtemi aji akhangtsüla. Sen amshia kibok nung dang saiba yagi lenir tajung meshimteter. – Limatula Longkumer

Okila

1963, December 1 anogo nung Nagaland ya India nung state 16 buba ta züngok. Aser iba sülen India Election Commission-i state tasen atema January 10 – 16, 1964 küm election agitsü metetdaktsü. Iba masü dangbo Naga nunger teimbai meyongnem agütsüa election agiba inyakyim ya mangashidangi  liasü. Aji oda, 1964 küm Nagaland nung mezüngbuba general election agitsü sangdongba sülen Naga nunger yimden tenzüknürtem aika election nung shilem agitsü jangraa tenzük, aser iba election agiba nung Naga nungertemi yimsüsür shimba inyakyim kheni tasen ka angu.

Nagaland nung mezüng election ana-asem agiba tashi tsüraburtemi election ya kangarabo sapua maliasü. Yimtsüng nung aluyimertemi election agiba anogo nunga alu-i oadok kechiaser alui moi meyongnem (vote) agütsüa/ajena amongba jagi alu mapa jenti anüngzüker ta bilem. Anungji tsürabur aikati voting day nung meyongnem magütsüidang aluiang oadok.

Mezüng election agidangbo dal ontsü ka molur election achayangertem kar chiyungdaktsübaji-angsüng taoksatsüka süa reprang aser lokti chiyungdaki mao. Election temer külen tatokeri pa nungiter nem Government mapa  agütsübaji tenya-tenponger (peon) mapa inyaktsü ajar ama bilem. Angazükba agi, sorkar mapa inyakertemji  “tzümar aouso menekertem” tasa tetshi ta ashir.  Saka oda-oda item nisungtem tu jenjang tajung ngua takar küma rongsen jendi angudang nübur mulung melenshitsü tenzük.

Sen aser rongsen meimba tamendakdak

Aluyimertem jenti meyongnem (vote) magütsüi  alui oadokbaji election nung toktepertem atema kanga takoksa ta ajiteta tetoktepertemi parnok voteji angutsü mechi sempet agütsüyonga aoba otsüsa lir. Vote agütsüdaktsütsü mechi sümeren süsa sempet amai alemdang ibaji joko ajaki nükshia tenzük. Aser tanem-tanemi item amaji amshia tanübo candidate kati sen crore aika voters dang entokba indang jembir. Tanübo voter kati sen lakh aika meshia agibajia tim dang ama kümadokogo.  Atangji 1964 nung Nagaland-i mezüngbuba Indian Election yayim aruba nung Naga nunger rongnung sen penbuba aser süpokrem agiba (corruption) yimya tasen ka bener aitba joko ibaji election shia tuluba-tuluba aiener. Aser iba ya joko asen taküm dang nungi tuluba kümadok nung tanübo election inyakyim nungi adokba temenen yimyatem ya asen tepseter tulutiba kümogo.

Yakob 1: 14 & 15nung ashir, “saka nisung shia kodang pa pei azüabong agi atsüdir, aser mesüzüka odir pa atidanger. Idangji azüabongji kodang mashisa kümdir temenen asor; aser kodang temenenji tain kümdir tasüba adokdaktsür.” Yangi Tsüngrem O ashiba ama, mezüngbo azüabong mapa tila ka dang tenzük saka tangbo iba temenen mapaji asen temulung nung bener sodaktsü nung joko asen taküm dang nungi tuluba aser tashi taitba kümadokogo. Joko risk tulu agia iba temenen tepsettsüba dak alaka tanga lenmang kecha maka.

Election aser Naga nunger Tamanger

Amangpaburtem madak temeneni takok tulutiba angubaji tamangertem tamang samadakjaa tekülem sentepi marunüi kümdaktsüba ya masü saka memeshiba aser ochi-mashiba mapa den sadem-sadema lidaktsüba ya lir. Edmund Burke-i yamai shia liasü, “Kodang temeshipurtemi temenen mapatem anema ola madoki toktsüdir iba jagi tamajungpur dang tali züindaktsür.” (The only thing necessary for evil men to succeed is for good people to do nothing.) Aji oda, temenen mapa onsara aremzükba jagi asenok rongnung temenen tali-tali züindaktsüba dang masü, asenoki tajung inyaktsüa dena samadaktsür. Aser Laishibai Yakob 4: 17 nung “Tajung inyaktsü meteter meinyakbaji temenen” ta aijaa angutsü. 

Tamangba yimsü tulutem rongnung Khristan yimsüisa ochishia aser meshiteta alitsü taroktiba nung sayur. Aser yamaji asen Naga nungera 92% Khristan aliba lima ka lir, kong tanela revival jangraba arogotem jenti lir. Saka asen nüburtemji asadangra, süpokrem mapa aser sen meimba tanela tulutiba aliba limaji asen Naga lima lir. Süra, kechiba Tsüngrem O ya asen tamanger rongnung taküm aliba o mekümteter? Ya tesayur tai asü, tangashir tai? Lai O taküm aliba O küma mamshitetba tera ya kong nungi tenzüker?

Laishibai ashir, aseni amangba Tsüngrem yabo ochishir aser temeshi Tsüngrem lir: “Kechiaser Kibubaji temeshi lir, pai ochi meimer; tindangeri pa jak angutsü” (T. Ken 11: 7). Aser ochi aser temeshi Tsüngrem kati pa dak amangbapurtem ajak kasa jaklaliro nung alitsü akhanger. Aser shiri iba takhangba nungji mejajalir, pai merenshitsü ta Isaia 61: 8 nung “Kechiyong ni Kibubai ochi meimer, aser tai menaa rakzükraktemba sempar” ta shia angur.

Clean Election Yimyim aser Naga Khristan

Arogo nung tenzükertem, tenzükba wadang balala nung alirtem asenok khen tama yakta clean election indang ya süoki ia angatetter meranga inyaktsü, nungittsü, amaliteptsü, commitment tejangja agitsü nüngdaker. Hau, asenok kanga junga clean election atema inyaker tenzükertem lir, saka ano aikati aroka magir. Anungji khen tenzükertem kümkümshitsüla. – Temsüwati Kichu

Aji oda, tanü asen Naga lima nung tamangertem asoshi mission tulutibaji – ochi pukhüm – ochi mashiba anema raraba mission ya lir (Fight against injustice). Aser iba ochi pokhüm mapaji election merüktetba nungi tenzüktsüla.

Temalen shisemba ama asen Naga society nung ochimashi mapa tulutiba adokdaktsübaji election maparen ajanga lir ta asenoki ajaki metet. Mezüng election nungi tenzüker tanü tashi iba ochi mashi mapa ajanga asen lima aser nübur raksatsüogo. Saka electionbaji tai masü, asenok tai lir.

Election inyakyim nung ochimashi temenen mapatem anema Nagaland Baptist Church Council anir 1972 (36th NBCC Annual session) nungi tenzüka election merükteta agitsü atema campaign-bo tenzük saka takok tulubo mokokteti aru. Tongtipangsa, 2011 küm nungi tenzüka NBCC-i consultations aika lia, ano tali temerangba inyaktsü nangzüker Clean election campaign inyaka arur. 2011 nungi tenzüker state election anaben tashi agia arudang Clean election campaign ajanga temelenshi aika bener arutsüdar. Hau, yimlaba aser bilemba ajakbo mapa küma moteter. Aji saka, arem mein nung süngdong tulu aser talang jenti liakasa, item kübok süngdong tila aser ayitema  pei sasa meyia ainba ama, tanü temelenshi tuluka bener arua mangurji ta sür tezü tanga melei, tanü ka asüng ka ta melenshia aotsü mangdang mesamai yur inyaktsüla.

NBCC-i anir Nagaland clean election campaign inyaka arudang, taoba election mapangtem nung inyaka aruba yimya kar temelenshi ajitetbatem kar:

  1. Clean election campaign metenzükdangbo Nagaland nung election agitsü ano ita tenet-ti jilia lia, lanurtem party kimen yanglur yangji anogo tepiyong mongtepasa aru. Item youth camp-tem nung candidate-temi sen jenti entoka chiyungtsü agütsü, yi jemdaktsü, mapang shia sen lema lanurtem election asoshi mesüa ayu. Aji oda, election tsüngküm nung youth camp lapokba ajanga raratep aser jabojari mapa jenti adok. Saka taoba election ana tashi nung iba inyakyim ya samaa aoba ajiteter.
  2. Mezüng-mezüng election nung meyong nem agütsüdaktsütsü mechi sempetsa agütsüa tenzükba joko tanübo kibok shia nung candidate-temi sen lemaa aoba aiben liasü. kibong nung lemer-a ano pooling day nunga vote shia sen Rs. 500 – 1000 agüjaa party workertemi inyakba liasü. Saka clean election campaign ajanga nübur aikati sen bener kidangi aidang “ma” ta ashiba, mesüra sen bener kiboki maitdaktsütsü atema wago temesüng kima nung songa ayuba kibongtem jenti liasü.
  3.  Clean election campaign nung tongtipang yimyim anaji, pei vote sen yong mayoktsü, aser pei temeten vote pei sasa agütsütsü. Pei vote pei sasa agütsütsüla ta aiben yimyim ayimba ajanga tain rogotem jenti aser ano arogo nung tenzükertem aika vote agütsüi modangi alibapurtemi vote agütsüba nung shilem tajung agiba liasü. Iba ya clean election tajangzük rongnung ka lir.
  4. Pei sasa pei temeten vote agütsüba den külemi ano nijai shiba nem vote agütsüner pa mesüra la nem agütsüba inyakyimjia clean election sentong nung atenba ajanga adokba lir.

Temelenshitsü kar

Asenok clean election indang deobar sentep ka ana agiba agi makümtsü. Asen nüburji sentepi marur  teimba. Clean election awareness mesüra participatory seminars akatsüla, aser khen yongi mesüi target group lemsar akatsüla ta bilemer. Takok ngua inyaktsü asoshi mezüng Arogo lenirtem aser yimden yimsüsürtem nungi tenzüktsüla. Iba sullen parnoki balala target group den sentong agitsüla. – Maong Jamir

  1. Asenok kong telidak lir (permanent residence) yangji pei meyongnem temeten ayutsübaji Indian ozüng tetuyuba lir. Election-i aiera pa/la kong permanent residence lir yangji dang tokteptsü ozüng agibo melar. Yamaji voter-tema town nung ki sür lia lira yangji pa/la vote ayutsüla. Aser yimtsüng nung alirtem-a kasaji lir. Saka election mapang atongdangbo town nung alir mesüra yimtak alir pei telidak ki aser tesem toktsür pei yimtak yimtsüng bushia oa mesüra tanga tesem kati oa yangji monga election canvassing inyakba aser vote agütsüba yimya kanga lir. Tang nungibo iba ama yimya ya kheni memelatsüla. Talisa, yimten aser arogo tenzükertemi election mapang shinga yimtaki election sendak nung taru ta shitet nungbo iba jagi temelenshi tulu adoktsü. 
  2. Ano clean election maparen nung tongtipang teinyaktsü kaji Aadhaar aser voter’s card link asütsüba ya lir. Identity cards ana ya kodang longjemdir idangjibo proxy voting mesütettsü. Chichiba voter-i dang vote agütsütsü akoktsü. Iba ama jenjang nung kodang pei vote pei sasa dak alaka tangari ne vote magütsütettsüsa inyakyim yangludir, idangjibo  tiyazü vote aliba nung rongsen laluba malitsü. 
  3. Clean election indang jembitsü asoshi Naga nunger tamangertem atema tenlaki sabangji tajungtiba lir. Arogo lenirtemi tenlaki sabang nungi küm aika clean election sentak nung onük balala kanga junga jembir saka tesasatsüka sentepi marurtem, achi ajemertem, mesüra election nung keta sena inyakertembo aika  clean election campaign jagi mamshir kechiaser parnok aika sentepi marur asünung clean electionji kechiar memetet. Saka kodang election mapang arudir, mozü achirtem mesüra yi ajemertem aser azümesenertem asoshibo iba ya maongka tulu ama bilema candidate-tem nungi angati sen jenti meshia agir. Iba ama nisungtem yagi clean election yimyim aiben tamakok aludaktsür. Süra, kechi komala maparen kati item nisungtem tongtettsü aser clean election ya takok ngutettsü? Tanü nisung ajak ket nung aliba osetji mobile phone ya lir. Nisung o nisung na ajurutepa sensaksemba mapang dang nungibo mobile phone den mapang entokba kanga agia teimba lir. Aji oda, mobile phone amshia sangdongtsü social media sabang aika dang lir (Facebook, WhatsApp, YouTube, Movies, Tweeter, E-mail, SMS, etc). Item sabangtem ya shisa kaa aser sangrasangchia amshia clean election campaign ya kanga junga inyaktet. Aser item inyakyim ajangabo sentep kidangi marurtema tongtettsü. Social media campaign den ano civil society-temia arogo den teka amteper nübur alidak tesema ajak nung yimya balala ajanga clean election osang sangdongtsüla. Clean election campaign ya arogo, yimden aser civil society külemi teka amteper inyak nungbo mapang memenui dang takok tulu ngutettsü.
  4. Asenok tribal society nung tebilemtsü tulutiba kaji pei yimtsüng mesüra pei kin senso tema nung bilemloka aotsü makokba ya lir. Pei yimer aser senso-ji dang tetenzük aser tatembang, aser tangajibo talila teloktem dang. Iba ama tangatetba bener election agia arudang, election ajak nung khuret tulutibaji Senso candidate shimba ya süa arur. Kijai bilemba ajakji yimer yimten-i tashiyim agi samatsür telok teimbai mulungba nung dendaktsür.

Saka India nunger election ozüng agi individual secret ballot ajanga dang lenir shimtsü melar ashi, senso candidate shimer tashiyim agi lokti vote agütsüdaktsüba ozüng mali.  Anungji Khristan tajung ka ama, yimeri mesüra tangari force süa masü saka ne sasa mulungsoa lemteter vote agütsütsüla. Ano iba den, temalen shisem ama, kodang pei aliba tesem nung vote agütsüdir, senso candidate ola ya mali akümtsü amai nibo belemer.

Clean election taila Yimyim

Candidate nungi oa shisatsü dak alaka kecha magizüktsü aser candidate nema nija/lokti/yimden arogoi clean vote dak alaka kecha magütsütsü tajungba. – Matsüng Longkumer

Public indang auyaba sen agi public vote alia election-i shinga maitsüla ta yimjan nung sangdoktsüla. – K. Temjen Jamir

Clean election tenüng atemer tesayuba karbo tim mesüi amshibatema lir. Anungji koba clean election campaign nung adentsüla aser koba madentsüla itemji junga benteta yur inyaktsüla. Clean election campaign nung taila yimyim madentsüla kar:

  1. Tenlaki mesüra public sabang aser social media amshia par telok nem vote tagütsü ta mesüra par telok nem agüjang ta asüba yabo clean election nung maten amai belemer.
  2. Ano clean election indang jembidang telok kari party ka tenüng teta amshia parnok tajungba kechiaser parnoki constituency atema development bener arutsütsü ta jembishinüba yimya yabo clean election nung maten ta bilemer.
  3. Election mapang kar nungbo yimer senso-i bangjemer par yimtsüng lenmang mesüra area nung development shibai bener arutsüdir pa nem yimer vote ajak temer enoktsütsüa ta nangzüktepa yimya ya clean election inyakyim nung tai ama bilemer.

Aji oda, Naga lima aser lokti merüktettsü asoshi tongtipangtiba mapaji clean election maparen ya lir. Ya arogo, yimten aser civil society-tem külemi longjemer rokasoa meinyakra, tarutsü asen Naga lima tia kanga tesasatsü ka asütsü. Anungji tang nungi tenzüker ano ajaki iba ya arok ajongtsü mechi inyaker ta angateta shilem tajung agitsüla.

Clean election campaign tanishirtemi tang jembia aru ama, kobatemsa taila mapatem lir itemjibo kümdanga shimdanga ayutsüla. Meimchir tashi maitbatem temeneni yangji maongka magidaktsütsüsa Tsüngrem dang shisatsü aser tashi ain meshia inyaktsü tanü mapa tajung lir.

Teinyaktsü

Yimtsüng shia arogo aser putu menden/samen menchen tetyuba kübok Youth Pastor-i anir “Clean Election Mitkar” (CEM) ta sür yim shia nung youth 30-50 tashi shimer mapa tenzük nung koda? Iba telok jagi sen alemba, yi amshiba amala election dak sentakba temenen anema social media ajanga tuteta sayutsü, public dang clean election indang sayutsü, yimtsüng balala nung CEM telok den teka amteper inyaktsü. Iba den ABAM tetuyuba inyaktsü. Clean Election ayonger ABAM-i level asem nung CEM  atema political education on Clean Election seminar agütsütsü (a) ABAM level nung, (b) Constituency level nung, aser (c) Yimtsüng level nung ta seminar ayong nung koda?  – Wati Longchar

  1. Candidate shia nem linük ajungtsü nükla nung ABAMi pledge card yanglur  clean election nung shilem agitsü ta nangzükba meyongnem agitsüdaktsütsüla.
  2. Senso candidate ta shiri yimi declare asür aji magizüker ta election commission nem metetdaktsütsüla.
  3. Candidate election declaration arudang lokti chiyungba yimya ya nokdangtsüla.
  4. Sen agi vote alitsü merangra iba anema ola adoktsü aser tim authority tongtsütsü.
  5. Yim shia nung Clean Election komiti ka alitsü aser sen, shi, amtsük, süoshi, blanket, etc yimya balala nung lemyonga aruba nokdangtsü. Teyari agütsünera election temer agütsütsü akok.
  6. Election mapang bendanglen alitemi arua rongsen mamshidaktsütsüla. Shibai yamaji inyakba metetdir election matem tashi yimtak arutsü memelatsü yimden den angatetepa ozüng tesahi yanglutsüla.
  7. Yimtsüng putu menden/samen mecheni party kecha dena commitment magitsü clean election nükjidong nung enoktsüla.
  8. Arogo, yimden, züngalepzük aser kaketshir telongjemi proxy meyongnem anendaktsütsüla.

Otembang Mungdang tenzüker nungi tenzüka Arogo nung toklang tenzüker ajaki pei sasa tatishitsü süa mesayutet tashibo nüburtem dang melenshitsü ashitsü asaktsü. Tesem khar nungbo Tsüngrem tenzüker ang tamajungba senzüba kuli lir.  Iba den Arogo shia clean election ludeni anir lanur densema mapa tenzük nung ajungtsüla.  Clean election makaba ajanga pei lima jenjang tamajungba küma aoba, kechiyong sen yong pei vote ayokbaji pei alima ayoker ta metetdi. Tsüngrem tenzükertemi anir clean politics atema ola adokdi.