Squadron band züngsem K. Lanu Aier & Wati Imchen den sensaksem

Longsolongben atema dang masü musician nem tagütsütsü tim agütsütsüla

Nagaland nung music ya jenjang kangabo meketi wawa-menü aser longsolongben (entertainment) nükjidong atema dang amshir, iyongji Naga nunger musician-tem tejakleni maor. Ken bushidang – mapang, nübu shisatsü aser rongsen intokbaji musician-temi dang metet aser concert/show ka atema ken bushidang nübutsük den rongsen atama intoker masü aser music dak sentakba osettsüset ajakji senotsü sentaka lir, music luyim ya jenjang kanga tasak, anungji, musician-tem nem tagütsütsü tim bo agütsütsüla aser parnokji ajungshitsüla, ta nüngtugu Squadron Band nungi Bassist K. Lanu Aier aser Vocalist Wati Imchen nati iba osangbener den sensaksemdang metetdaktsü.

Musician-tem adoktsü atema dist shia nung tetoktepba ayongtsüla

              Nagaland nung music luyim renloktsü atema tebilemba kar lemsatepdang, Hornbill International Beat Contest ya tesüsabuba atema ayutsü, saka iba lenla nung küm piyong district balala nung kentener aser kongki atemer/awar (musician)-tem talisa yimdak yimtsüng (grass root) nungi anitentsü aser ajungshitsü atema tetoktepba tapu balala ayonga akatsüla aser iba nung jagi tajungtem shimteta sabang tuluba nungji shilem agidaktsütsü aser musician-tem tejakleni aotsü atema lenmang balala sayu nungbo kanga ajungtsü. Item mapatem ajanga  sempet aketertem jenti adoktsü imlar, ta Wati Imchen-i sorkar nem inyakdaktsünüba o kar ashi. Naga nunger music tsütsü sempet aketer jenti lir aser maneni adokdar, anungji, music industry ka kümdaktsütsü asoshi tim lenmang nung sen ji shitak intoktsüla (invest asütsüla), ta paisa shisem.

Entertainment kisüng masü paid musician ka südaktsütsüla

              Nagaland sorkari mapang langrara music tongtibang indang ya mangateti aru, menurang angatetba ajanga tanü asen state music jenjang iba tashi dang lir. Anungji, tangar menepa tejakleni aotsü asoshi ano mapang talangka agitsü, ta K. Lanu Aier-i tajitetba kar lemsatep. Nagaland nung musician-temji benjong longsodaktsür ka dangbo masü saka parnok nem tagütsütsü tim shitak agütsütsüla, saka tesasatsüka tanü nüburtemi music jenjangji kanga jungabo mangatet, ta paisa shisem. Yimya agi music luyim ya jenjang kanga tasak, yangi senotsü intoklen aika sentakba lir, anungji, ibaji nüburtemi angatetsüla, aji mangatet tashi asen lima music tsütsü kodanga maintsü, ta paisa kuli kar dena ashi.

Musician-tem tejakleni odaktsütsü ajungshiteptsüla

Asen lima music tejakleni odaktsütsü atema mezüngbuba kati ka nungittepa ajungshiteptsüla. Na musician ka mesüaka kenten sentong (concert/show) balala jagi arua reprangtsüla. Taoba mapangbo tang amai kidang mapang intokdak aika maliasü, iyongji, concert reprangnür aika liasü, saka tanübo tesasatsüka concert reprangi arur mali kümogo, ta Wati Imchenisa ashi.

              Tanü lanur musician tajung aika adokdar aser sempet aketer jenti lir, saka asen lima music tsütsü ngujem (scope) kanga temesü asüba ajanga tapu aika merangdanger saka tsükdakradang balala ajuruba ajanga alizüng metongteter, ta K. Lanu Aieri ashi.

1990’s mapang tetoktepba nela agi sünger liasü

1990’s mapangbo Mokokchung nung band-temji tetoktepba nela agi sünger liasü, iyongji memeteti band tajung aika adok, saka tanü reprangdangra lanur musician-tem ya teimbaka peipei meten dang aser online nung dang temulung agütsür. Ashiko, tanga kulijia alitsü akok saka Nagaland nung band tajung madokbaji ibajia kuli ka asütsü südi. Band tajung ka adoktsü atemaji ajurutepa ken tenteptsüla/temshitsüla, aji mesüra peipei meten dang ao nungbo kija (individual) bo tajung adoktsü akok, saka band sasep bo tajung adoktsü lenmangji kanga temesü, ta Wati Imchen aser Lanu Aier nati ajitetba kar lemsatep. 1990’s mapang nungji musician tajung aika liasü saka music metsünga reta (serious süa) agir aika maliasü, iyongji band aika metitemi motet anenatokba kuli kar tenatisa shisem.  

Governor’s Award for Excellence in Music 2020

Squadron band ajanga Nagaland nung rock music tsütsü mezüngpur süa nüngtugu kümdakja shilem tajung agiba reprangteta konang tulu aketba Governor’s Award for Excellence in Music 2020 senpet agütsüogo. Squadron band ya 1990 nung tentet aser par band asoshi mezüngbuba show-ji 15^th August, 1990 anogo liasü aser par band küm 30 shitak abensadang  iba award ya agizük. “Iba award angutsüsa temoatsü ya ozü band member O. Temsü Imsongi onok nem yutsür ao amai onoki agir”, ta Wati Imchen-i ashi. “Iba award agizükdang medemer ka malibaji tepela agi meperir aser sasaa bilemer”, ta Lanu Aierisa menungraseta ashi.

Squadron band züngsemtem

Squadron band nung züngsemtemji; Wati Imchen (Vocal), K. Lanu Aier (bassist), B. Bendang Jamir (guitar), Imtimar Tzüdir (drums) aser Lt. O. Temsü Imsong (guitar) parnok lir. Guitarist O. Temsü Imsong 17^th June, 2020 nü cancer agi shiranga asü. Squadron band wangshiba mapang parnoki Nagaland kübok yimti balala nung dang masü, North-East India tesem balala den Chennai, Bhopal, Pondicherry, Goa amala nung ken tena jajaba par band otsü nung lir. Nagaland nung rock music nüngtugu kümdaktsübaji par band ya lir ta tanü tashi züngshir aser nüburtemi jembir. Adangji Squadron band memeteter aikabo malitsü. 

Squadron: For the love of life and music kaket

Nagaland nung Squadron band-i music luyim nung shilem tajung agiba reprangteta Task Force for Music and Arts (TaFMA)-i “Squadron: For the love of life and music” ta sür kaket ka taküm 2021 March ita nungto adokogo. Iba kaketji senpak 300/- yong Nagaland nung tongtibang kaket ayokdak angutsü. Iba kaket nungji par band koma ajurutepa tenzük, parnoki ajangshiba timtem balala, tesem balala nung shilem agia jajaba aser temenungratsü otsü aika shia angutsü. Kaketji ka alir züngdang nung dang nai hau asütsü!

(Source: Tir Yimyim)