Osang Zülur ~ Limasangwa

YSS nung “Lokti taküm nung ochimashi temenen: Arogo teinyaktsü” onük nung September 24, 2021 sensaksem aka. Shilem ana küma lemdanger  lenir anati jembi. Rev. Dr. L. Kari Longchar-i lokti taküm nung ochi mashi temenen indang aser Dr. Imlirenla Walling-i lokti temenen yanglushiba nung arogo shilem indang jembi. Tali aroka bilemdangtsü asoshi yangi tongmelang agi tejembiba kar lemsar.

Lokti taküm nung ochi mashiba temenen: Dr. Rev. L. Kari Longchar:

Zephaniah ainkar mapang lokti nung teraksa tesüngmangtsü ka adokbaji tanitakertemi raksaba masü saka tanishirtemi raksaba ajanga liasü. Lenir, putir aser yimsüsürtemi rishikangshiba ajanga nüburtem tesünep meli-i aküm. Arem nung aliba molusongzü ama parnok tasa tamajung nung nüburtem timtemi yok. (Zephaniah 3:1ff) Iba tia den medemdangra tanü asen lokti tia kasaji lir. Yamai dang ola matoki yutsü nungbo, asen chirnur aser semchisemnurtem asoshi aiatai mapang ajurutsü. Tanü ozüng raksartemi yimsüsüba mapang ka nung alir asünung, tesem ajak nung shirangba ola angashir.

Raksaba ya aluyimertemi/yimtaklirtemi masü saka temaba jenjang nung lenirtemi nungi raksayonga aruba angur. Tesasatsüka asen lima nung ochi inyakba asadangra yamai shitettsü: Nüburtem 90 shilemji ochishir saka, yimsüsürbo 100 nung 5 shilem kati dang ochi meimer. Yamala yimsüsüba mapang ka nung koda sür alima tiptema alitsü? Leniri anir raksar nung koda sür melenshitsü? Tanü arogo, kibong aser shisaliok riju ajak ya ochi shia inyaktsü sayuba lokti tentet kaka sütet nung dang item telok jagi ochishia inyak nung dang ochimashi temenen ya koktettsü.

  1. Lokti taküm nung ochi mashiba temenen
  2.  Lokti tentet aser kija kibong khenyongi raksatsüba tashiji Election ya ka lir. Iba ya ajanga asenok tamanger ayak khenyongi raksaja asenoki küm piyong ochi sayua arubato amajok kümtsür. Yimsüsürtem shirnok ket nung alima yanglutsü tashi lir parnok ochi nungi pila aoba mapangji election mapang ya lir. Iba mapang nung yimsüsür tajungtem ishikajia (5%) ayarterm nung amokmerena adoker asünung ola madokteti tamajungertem den sakuku akümer.
  3. Alima nung terenlok bener arutsü asoshi tashi akartemji office nung amener tulurtem ya lir. Saka perangpong bener arua amokmerenba ajanga ochi meimba lenirtem-ia tepang melapokteti tiyazü mapa nung külemi ochi mashiba temenen benshitsüsa akümer.
  4. Public leadertemi parnok tsüngda nung tajungertem mesüzüka onoki abentsüar, na tai mali-ar, ta mesüzüka nüburtem asoshi terenlok mapa songtema ayuba.
  5. Mapa ka inyak nung meinyakba taah shilem (percentage) balala meshir. Süra koba sen agi mapa inyaktsü.
  6. Ochi mashi tentenzükdakji State government ya lir. Mapa ajak nung pei ajungtsü tebilemba nung dang inyaker asünung, alima terenlok asoshi rongsen aser mapa ajak ochi meshi-i  inyaker. Yimtsüng nung aibelenbaji temaba nungi aibelenba ajanga lir.
  7. Tanü grass root nungi tera junga yanglua atutsü saka temaba menden nung ajakji raksatsür.
  1. Ochimashi adokba tera (root)
  2. National workertem ajanga tashi amshitsü agütsü nung yimsüsürtena tamajung nung tasü itaktsüba.
  3. Pangdak amertem shirnok dak ochi inyaktsü tashi lir, parnoka telung nung alirtem den amteper inyakba.
  • Ochimashi temenen taah (wages)
  • Nagaland nung High Court office, Airport, Medical college, Kohima to Dimapur four lane, District lenmangtem, Yimtsüng lenmangtem, Government hospital, aser school tem temeimtsü jenjang nung lir.
  • Foot hill lenmang koda? 30 crore aruogo. Yabo civil society inyakerji terabo teyimla lir, saka asen lima nungbo kecha meteta maka.
  • Ochi obendang angutsü ata aliba ken o (case) aika nempanga yuja lir.
  • CBI, RTI, Lokayukta item lemang balala agi tanga state nungbo ochimashi mapatem bushiteta tapet temerenshi agütsür; saka ochimashi lenirtemi parnokji alizükatok nung nüburtemsa akoksa-a lir.

Teinyaktsü

  1. Mokokchung District nung coordination monitoring cell ka yimtsüng shia nungi bendanga agütsüba nisung kaka shimteta Mokokchung district nung sub-division shia coordination cell kaka tentettsüla. Iba telok ajanga Nagaland nung department ajak (77)  nung mesüaka, ishika nung danga sen koma bendener, entoker aser tajangzük koba lir parnoki osang tejangja agütsütsüla.
  2. Tribe ajunga nungi temaba tentet temang ka (highest body) teyakyak aser tetangshi ishika alitsü aser item jagi mita reprangtsü. Yamaji süra state government mesüra linük tenzüker ajakji merüktettsü. Anaji merüktetra asen lima nung tesünep aser yimjung atoktsü.
  • Tebilemdangtsü: Nagaland koba Khristan teimba aliba state lir, ya tang tashi nung tajung jenjang asadangba nung 20 buba  lir. Shitakba agi asenok ya mezüngbuba asütsüla. Anungji kin ajak dang ochi aser teindang ta sayutsü asoshi  asenok ochi jembia asen nübur azüoktsüla.
  • Lokti taküm nung Arogo teinyaktsü: Dr. Imlirenla Walling

Arogo ya ochi nung azüitba, noktakba tamangertemi akümba lokti tentet ka asünung, temenen anema inyaktsü asoshi tanga lokti dang nungi tashi tuluba ka lir. Arogoi shilem agiba ajanga dang asen lima nung ochimashi tashidak ya samadaktsütsü akok. Anungji ochi mapa inyaka alima süneptsütsü asoshi arogo khuret tulu lir. Temelenshi ajak arogo nungi atoktsüla aser arogoi iba khuretji angateta inyakra, asen lima sünepa alitsü.

Lokti takum nung arogo teinyaktsü pezü

Mezüngbuba nung Lenir shimyim:  Arogo nung tenzüker shimba nung tejak repranga bensabenria meshimtsüla. Kechiaser bendanga agütsübaji tenzüker ka mezüng qualificationji lir. Ochi tenzüker adoktsü asoshi arogoi mezüngbuba nung taküm libaliru nung asüngteta aliba aser mangdang aliba shimtsüla (Clean and visionary in leadership). Yimtsüng nung talisa nübo malia ta sür temesepba chiyungtsü achi ajemer mesüra nüktapangta benshirtem meshimtsüla.Akhi yimya abenba, melenshitsü mejangraba lenir (Traditional leader) mesüi joko tensa angateta lenitsü angatetba lenir (contemporary leader) shimtsüla. Akhi mapang inyakyim nung akhanga ameter inyakba ajanga tanü talisa lanur taküm aika para churches nungang oa adener asünung, kibong nung lirumedem tamang aiben makateter.

Tenzüker ka taküm: Tenzüker kaji ajak asoshi tatishitsü aketba taküm ka asütsüla (Role Model). Mahatma Gandhi-ia ashi, “My life is my message” kasaji, lenir ka libaliruji pa/la sabang nungi jembiba onük dang nungi tongtibangba.Tenzüker kaji sadok sadoka (comfort zone) aliba inyakyim nungi adoktsüla. Tatishitsü agi, tesem onsara tulu asünung ajak dangi mouteter, anungji akok tashi sabang nungi Tsüngrem Oji tajungba anganüdi ta asüba nungi ya kü shilem ta angateta nübur tia asadanga nüngdakba pur tongtettsüla.

Arogo teinyaktsü: Samaba san kaji Kibuba asoshi kanga dang senti liasü (Mathi 18:10-14). Tanü arogotem nung yimsü agizükba dak alaka taküm melenshiba pur aika mali. Item santem bushitsüji arogo mezüng teranglokdak asütsüla.ABAM Biblical Church Model-ji rongdak nüngdak ka lir. Amangbapurtem telemsa makai ajaki Kibubar mapa nung shilem agitettsüsa arogoi lemang sadema lapoka ayutsü nüngdak. Joko tenyaba mapa asen kibong nung inyaktsü mapang ka lir.Tenla kidang pulpit nungi sayutsüngiba aser office nung kütdangsüba mapa (administration) khen toktsür inyakyim melenshia (Change of model) tenla ki alema asadangba yimya (survey format) kong san kwi, ter shilem agütsür kwi, taküm melenshir alirtem kwi, yamala ano aika khen asadanga aotsüla. Iba asoshi tenzükertem suit ya khen agizükdi, cari nungi tetsüng dangi meyipdi, office nungi kiboki meyiptsüla.

Tanabuba nung alizüng ka ayutsüla (Goal setting): Tatishitsü agi, küm 10 nungbosa temesepba chiyungtsü achi ajemertem, sentepi marurtem mesüra telempet tamangertem tazünglai bener alutsü ta asüba tasa ayutsü mapang (getting to zero policy). Iba mapaji nübur tsüngdang tenüng küptok (name sake) ka asohi masü, saka atangji tanela tarongba nung temeim bener ni san paikaji anir aruogo ta kuli tejangaja agütsütetba tasa asütsüla. Arogoi joko nütsüng ajak dak oa kongshia anebalutsü mapang kechiaser tangshiba ajanga asenoki alima melenshidaktsür (When we touch life we change the world).

Tasembuba nung Arogoi mapa meranga inyaktsü sayutsüla: Aor azümesenba ajanga sensaker akümer. Sensakba ajanga ochi mashitsü mapa tenzüker aser joko teküp ayokba, election nung sen agia mapa inyaktsüsa akümer.  Azümesena mapa meinyakertem chi techiyungdaktsü ta Lai nung shia lir (2 Thessa. 3:10). Aortem dak yimya tamajung kaji, pa/la dak mapa tilaka dang apet saka iba asoshi nüma matanger. Pei den apet mapa tila ka mesüra tulu süaka meranga inyaktsü arogoi tangatetba agütsütsü tim kechiaser ajaki temülung alemba loktiji arogo ya dang lir. Tatishitsü agi, Kohima nung aonsotsü tokan lapokertemto masters degree aser karbo Doctorate agir alirtem aika lir. Aortemi mapa mali ta kazüba nungi pei sasa inyaktetba mapa inyaka taküm alitsü sayutsüla. Tang ABAM-WM Vocational Training cum Production Centre (VTPC) ajanga skol tatem tashi mouteter aiürchanutem asoshi training balala agüja aika jangratema lia odar. Yamaji arogotemi lemang balala ajanga mapa inyaktsü sayutsüla. Tang Mokokchung Town nung Watsü bazaar lapokba ya mapa tajung ka lir, saka yangia tayokeri ochi mashiba aser talirtemi auyaba aiben angashir. Anungji arogoi tayokertem den aser nütsüng nübur ajak den ochi inyaktsü sayutsü kanga dang tongtibang lir.

Pezübuba nung Arogo ya ochimashi mapa anema noktakba lokti ka asütsüla: Arogoi joko tai dang tai aser shitak dang shitak ta tsükong aser yimer ta mesüi shitettsüla. Linük terenlok mapatem aruba nungi ochi mashiba dang masü saka sensakertem asoshi sorkar sentong balala aruba ajak nung teinyakertemi rakzükraktemba aibelen mapa anema ochi yimyim ayimtsüla. Lokti telungtet nung reprangdangra, lokti tebilemtsü (Social issue) tatishitsü agi, sati benjung nung yi amshiba aser asüama nung yi amshiba ya sobaliba tentet ka ama inyaka arudar; anungji iba anema ola adoktsüla. Ano Yi ayoker aser ajemer asoshi ola agütsübaji dang masü arogoi joko kibok tonga oa tanela mapa inyaktsüji rongdak nüngdak lir. Iba mapang nung arogoi ola matokra shibai atoktsü? Lokti merüktettsü asoshi sorkar tenzüker temesepba chiyungtsü achi ajemer magitsü ta shitettsüla aser contractor aser Members of Legislative Assembly (MLA) ajakji Ochishir aser Tsüngrem tsübur mesüra magitsü ta yimyim ayima ola atoktsüla.

Tebilemdangtsü: Arogo nung tenzüker dak temulung malemba ajanga tanü santem aika para churches-temi aor. Yamai lira asen chirtemi asen Khrista yimsü magizüktsü. Arogoi ola matokra ochimashi mapa kodanga manentsü aser aji asen tamang tongshi laoba mapang ka asütsü.

Tebilemtsü shisalemsaba

  1. Ochi jembiner aser inyakner saka kidangi perangpong bener arua amokmerener, karbo pur aor, azüker. Iba ama tensa ka nung koda ochi inyaktsü/kechi koma ochi jembitsü? Nüchiso bushiri tebilemtsü bener arutsüba ya koda? Arogoi koda shilem agitsü?

Telangzüba: Babel ki asüba ama pei pei yangku asüngtsü merangdang telok balala küma nisunga aika tepsetogo. India Sorkar-ia ajiang ajungshir kechiaser parnok asoshi par kübok ayutsü asoshi aji tamettsü jenjang tulu ka lir. Arogoi nenok lungjemang onoki ya magizüker ta tasü itta shia Tsüngrem dang sarasademtsüla. Political ideology balala asüba ajanga lokti jenti aküm ta angateta parnok rongnunga tangateter telok ka alinung arogoi tulurtem den ajuruyonga aotsü aser kokra revival ama agüja Tsüngrem tenüng nung lokti nem timtem agüja rakzükraktem masütsü ta tenangzükba agidakja lungjemdaktsütsü mapa inyaktsüla. 

  • Naga lima nung ochi mashiba teraji (root/cause) kechi aser kechisa?Arogoi koda shilem agitsü?

Telangzüba: Tsüngrem makaba  kija taküm shirnok dak tashi (power) lir, parnoki merumerua inyakba ajanga ochimashi adoker. (Obendanger, rongsen ketsüng inyakertem, ozüng amshirtem). Arogoi tashi mangartemji ozüng agi alentsü asoshi ola adoktsüla. Azü mesenba ajanga ochimashi atoker. Anungji  arogoi mapa inyaktsü asoshi mongintem anir arua seminar agütsütsüla.

  • NLTP Act 1989 ya joko küm 30 tema arur. Süra ya total failure asü partial failure or successful Act? Failure süra shiba tai? Mokokra withdraw asütsü asü koda? Or, takok ngua aotsü asoshi lemang tasen (New strategies) kar koda?

Telangzüba: Iba ya khenyongi tamakok mesüra takok masü saka partial failure. Arogoi sabang balala nungi tangatetba agütsüba den arogo nung tamangertem ajak ya chichiba Khrista agizükdaktsüra takoktsü lemang lir.

  • Kijai ochi jembibaji ka; iba  den people’s movement for justice tashi tait tentet ka alitsü. Collective resistance movement against injustice akhang akhanga tenteta ali nung dang temelenshi bener arutet. Yi tongpang amato arogoi anir social change atema social movement tenzüktsü nüngdak. Shiba, koma anir tenzük nung ajungtsü?

Telangzüba: NBCC kübok aliba association ajak aser tamanger lokti ajak lungjemer Christian forumji tenzüktsüla. Iba sülen shisatsü agütsütepa mapang talang agia tejembitsüpurten jembia inyaktsüla. Aser iba loktiji NBCC nem anitaktsütsüla.

  • Takar-tulurtem ochimashi agi bendenba rongsen (today’s topic) ya kodang arogo senpongi aitir ya arogotem asoshi temoatsü masü saka timtem aser atakatem masü südi?

Telangzüba: Tagütsürja atakatem aser arogoi metetsümonga agizükra arogojia atakatem.

  • Arogotsürtemi yi ayoker pua bottle jaksatsütsüba ya kechi ashir?

Telangzüba: Arogoi joko kibong telungi ia survey format yanglur bushia aotsüla (tangatetba agüja, concern agüja kokra rongsen tsütsüa tanga lemang sayua) aser tetsürtemi miem sarasadem agitsüla. Lenisüba ya kanga tongtibang lir. Anungji mapa ajak nung lenirtemji temesepba chiyungtsü achi ajemer joko mamshitsüla. Aser “tazüngla tonga aluba asa lendong” (getting to zero policy) arogoi ayutsüla. Iba mapa takok ngua inyaktsü asoshi arogoi temesepba chiyungtsü achi ajemer nisungbaji tonga oa anebaluba ajanga dang takok angutsü.

Otembang

Iba sensakem ajanga Naga lima koba jenjang nung lir angatetogo. Lokti yanglushi tamendakdakji ochi ya lir. Arogoi tasü itta ochi kuli sütettsüla. Naga lima nung tebilemtsü tulutibaji leniri ochimashi inyakba ya lir. Tarutsü lima yanglushinüra ochi meimer, nübur meimer shimtsüla. Achi-ajemer, nüktabangdar, pei ajung dang bilema inyakba lenir meshimtsüla. Yanglushitsü ola arogoi pulpit nungi dang masü, kiboki aitsüla, kija atongtsüla aser ochimashi  inyakba anema civil society balala den teka amteper mapa agi aser ainkar ola  agüja anitsüla. Ochimashi anema noktaktsü Tsüngremi mangdang tasen aser tasü tait lenir asen lima nem moajang ta sarasademdi.

*****