Mosa taküm otsü nungi tangazüktsü kar

~ Temsüyanger

Okila

Tanü tensa lenisüba (leadership) aser lenir taküm indang shisadangra, pei indang, pei asoshi dang bilemba aser inyakba lenirtem aser lenisüba agi sünga kümogo. Talisa iba ama tangatetba aser inyakyim ya tanü libaliru yimya ka kümogo. Tanü putu nung pei peria alitsü tangatetba ajanga, lokti tenzükba lenir aser lenisüba nungi pei asoshi ang tenzükba lenir kümogo. Mosa taküm nungi temelenshi adokdaktsüba lenisüba tangazüktsü kar bushidi. Aikati bilemtsü, Laishiba nung aliba par putu aser tanü asen putu kenyongi balala asü nung Laishiba nung aliba lenisüba tangatetba tanü asen asoshi kecha menüngdak. Saka kodang asenoki Laishiba Tsüngrem O jung junga shisadangdir, alima yimsüsüba lenisüba menden asüyonga, tanelar wadang lenisüba menden asüyonga, alima aser tanelar wadang lenisütsü asoshi Laishiba nung tesayuba aser tetuyuba tajung aika angutsü.

Lenisübaji kechi?

Lenisüba ya meimchir lokti tentet ajunga nung kangasa tongtibang asü nung tanü kaket balala aika adoka kaket nang sünga lir, aser shisadokden balala agitepba agi süngoko. John Maxwell-i ashir, temelenshi adokdaktsüba lenisüba jagi nüburtem anishir (influence), aser ibaji maneni ainer, anungji lenisüba jenjangjia maneni ainer. Pai ano ashir, lenisüba takümji nüburtemi pa/la lenir ka asüba agi anitakba masü, mesüra ozüng agi anitakba masü, saka odang nüburtemi pelashishia anitaknüba, ibaji chichiba lenisüba. Pai meneni ashir, lenisüba ya tangar madak tashi amshiba masü, saka tangar ka nem tashi agütsütetba dang melenshidaktsüba lenisüba ta ajar. Lenisüba ya menden jenjang ka masü saka ibai esendaktep lir. Lenisüba ya yimya ka (process), lokti nung lenisüba ajanga lokti ka anishidaktsür (influence), aser iba jagi lokti alizüng tongdaktsür. Jack Welch-i ashir, melenshidaktsüba lenisüba yabo yimya-yimpong ka lir, iba yagi nisungtem taküm jenjangtem, temulungjang nung tebilembatem, libalirutem, aser tarutsü alizüngtem, item ajunga melenshidaktsür. Melenshidaktsüba lenisüba jagi talisa influence asür, kechiaser iba yagi tanidakertemi imlaba dang nungi tali ajangzükdaktsür. P. G. Northouse-i melenshidaktsüba lenisüba indang maneni yamai ashir, melenshidaktsüba lenisüba ajanga lenir aser tanidakertem kati ka ajungmesoa kati ka jaklaliro ajungketdaktsür. Iba ama lenisüba yagi lenir kati tanidakertem taginübatem aser teyimlabatem meteta parnok nükjidong ajangzükdaktsütsü asoshi meranger aser yarir. Melenshidaktsüba lenir ka jagi mangdang tajung lokti nung agütsüteter. Chichia nüburtemi pa/la dak temulung lemteter, kechiaser pa/la taküm aser mapa ajanga nüburtem nem tetezü tajung agütsür. Pa/lai nüburtem taginübatem, mangdang aser nükjidong angateter, aser yamaji nüburtem den putepba alitsü meranger.

Mosa Taküm

Mosa taküm nung meimlaba mapa ka agi pa taküm tenzükba asenoki Laishiba nung angur. Mosa tetsü shisa akaba ajanga Nile ayong nung melok ka nung Mosa taküm kümzük. Faroa jalai chubar jabaso südaktsütsü asoshi mulungtet, anungji chubar shisaliok angazükdak tajungtiba nung tangazükba tajung Mosai angu. Anungji pa Ijip nunger sobaliba aser par yimdem yimli tangatetba kübok aien. Yamaji tarutsü lenisüba mapa tulu asoshi Tsüngremi iba tia nung Mosa renemtsü. Pa yamaji chubar yimli kübok aser chuba taküm libaliru nung aliyonga par nüburtem kechi tia nung lir pai meteta liasü aser pei nübur metoktsü (Ani. 1:13).

Kodang Ijip nunger sepia kati Ibri nunger ka tepsetba Mosai angu, pai pei nüburtem dak tashiyim aser azütokshiba ngua jashi aser maremzüktet. Pai khenyongi iba anema sashi sashia noktak aser kasa temerenshi Mosai Egypt sepai nungba nem meyipba agütsü. Pai chi-chia kanga sashia noktak ta ashir (Ani. 2:11). Kodang Ijip sepai shibai Ibri nunger tepsetba Mosai angu, pa asoshi lemang ana dang liasü; kecha mesü-i dang toktsür oadoktsü, mesüra pa nük-i anguba tashiyim anema noktaktsü. Pai nungnanga liasü (Ani. 2:12), saka kodang pa kisüng-i iba azütokshiba angu ta pai metet, pai sepaiba dak mang ayang aser pa temang lisem nung rema yutsü. Mosai tasümang meyima ayutsü merangba jagi pai ochi inyaktsü temulungtetba ka liasü ta angateter. Mosa taküm-i tashiyim aser azütokshiba anema ajem ajema melitet. Ibai Mosa taküm jaklaliru nung aketba ka liasü.

Saka nüburtem shirnok pai kümzüktsü merang parnoki pa kuli magizük, anungji pa nisung tepseter ta anemtsü tenzük, aser parnoki pa kümzüktsü memulung. Farao chubai Mosa jendok, anungji pa jenjang khenyongi samadok. Mosa pa kisüng kümadok nungji Midian limai jena aotsüsa aküm. Kodang pa Midian lima atong, sannüker tetsür tenet kari sensamatsüba nungi pai kümzük. Tetsürtem asoshi pai temeten jembitsü, pai parnok yari, aser parnok asoshi pai noktak. Anungji parnok santem asoshi tzübu nungi tzü angu. Item tetsürtemi tebu Ruel dangi arua iba tatalokba indang ashi (Ani. 2:17-19). Iba tatalokba nung ano meneni Mosa taküm nung aketba yimya ka angur; tangar asoshi aser tangar yaritsü asoshi tangatetba tajung Mosa dak liasü. Talisa shirnok timtem toushi nung liasü, shinok sobaliba ajanga amokpanger tashi maitba tia nung liasü, item nüburtem pa teka ajanga yaritsü tangatetba tajung pa taküm yimya nung angur.

Mosa santem nüka alidang Tsüngremi pa aja (Ani. 3:7-12). Iba tajaba nung Mosa lenisüba mapa aser Tsüngremer tenyaba mapa tenzük. Laishiba nung pa tajaba yamai zülua angur:

Ano Kibubai ashi, “Ni atangji kü nüburtem Ijip lima nung ala-ashiba nguogo; parnok tanükertemi timtem agütsüba nungi kümzüktsü ajepba ola ni angashiogo. Parnok otia ajak ni meteta kar. Ijip nunger ket nungi parnok kümzüktsü, aser iba lima nungjagi aniteta alinük tajung aser tesadem ka mamatzü and ninang mojitzü yima aliba lima; kong Kanan nunger, Het nunger, Amor nunger, Periz nuger, Hiv nunger, aser Yibus nunger lir, ajagi parnok anir aotsü ni alu. Tang Israel purtemi nünga ajepba ola ni angashiogo, aser Ijip nungeri parnok rishikangshiba ni nguogo. Anungji tang arung, kü nübur Ijip lima nungi anitettsü asoshi ni na Farao dangi yokdi. Saka Mosai Tsüngrem dang ashi, “Farao dangi or Ijip nungi Israel chirtem anitettsüsa ni shiba?” (Ani. 3:7-12)

Tsüngremi pa nem mapa ka nungloktsü aser aji par nüburtem Egypt lima nung alar tia nungi anitettsü asoshi khuret agütsü (Ani.3:16-17). Tsüngrem den ajurutepba ajanga pa mabensabatem Tsüngremi jungkai adokdaktsü, aser pa mabensaba taküm ka ta pai meteta aru. Tsüngremi kodang pa nem ozüng agütsü, Mosai Tsüngrem dang tasüngdangba kar asüngdang. Mosa asoshi kechisa timtem pai ashitsü asoshi Tsüngremi pa nem lemang lapoktsü. Mosa shiba? (Ani. 3:11); Pa taküm nung aser lokti nung jembishinü majungba (Ani. 4:10); Nüburtemi pa dak mamangtsüba (Ani. 4:1); Pa masü tangar ka yoktsü asoshi asüngdangba (Ani. 4:13), item tasüngdangbatem angutsü. Ibai Laishiba nung Tsüngrem den sensaksem talangtiba angutsü. Ibai Tsüngrem aser Mosa tsüngda kanga dang odi odia jembitepba sensaksem ka lir. Tsüngremi Pa shiba Mosa dang ashi (Ani.3:14). Mosai pa temulung raksaba rakpoka sayutsü asoshi Tsüngremi temelaba pa nem agutsü (Ani. 4:14).

Yamaji süaka ni na dang shimtetogo ta Tsüngremi kodanga Mosa dang melangzü. Tsüngremi Pa shiba Mosa dang ashi, “Niji shiba aji Ni”, iba jagi Mosa nem tashi agütsü, Mosa taküm shiba iba jagi jangjatsü, anungji Tsüngrem leniba Mosa den liasü. Tsüngremi Mosa jembiba nung yaritsü aser kechi jembitsü Pai sayu (Ani. 4:12).Yamaji Tsüngremer tashi aser taküm ajanga Tsüngremer lenisüba wadang Mosa nem nungloktsü aser ibaji ajangzüktsü asoshi Mosai apuso. Ibai meimchir ka asoshi  kangasa wadang tulu aser mapa tasak liasü.

Mosa Lenisüba nungi Tangazüktsü kar

  1. Mapang aben nüburtem den tongtepratepa litetba lenir ka liasü: Mapang shia Mosai Tsüngrem den jembi aser aji nüburtem den jembiba asenoki Laishiba nung angur; “…Israel chir ajak dang Mosai jembiba o itemi lir” (Tazüng. 1:1), “Yordan anüdoklen Moab lima nung Mosai iba ozüng ya rasa-a ashi” (Tazüng. 1:5),  “Nüburtem dang mela-ang,..” (Tazüng. 2:5), “Mosai kechi mela aji Israel nüburtemi inyak…” (Ani 12:35), “Mosa o Aron na dang Kibubai melaba ajak Israel nungertemi tashi anga inyak” (Ani. 12:50), “Anungji Israel chirtem dang shiang, `Ni Kibuba lir, ni nenok Ijip nunger alar tia nungi anitettsü, aser parnok alar akümba tia nungi ni nenok kümzüktsü. Ni kü teka songtoka aser obendangba tulu agi nenok alangzüktsü. Nenok kü nübur asütsü aser ni nenok Tsüngrem asütsü. Aser kodang ni nenok Ijip alar tia nungi anitetdir idangji nenoki ni Kibuba, nenok Tsüngrem ta metettsü” (Ani. 6:6-7). Tsüngrem aser nüburtem tsüngda tenyar ka ama Tsüngremer tatalokbatem aser sentongtem ajunga pai nüburtem dang ashi, pa asoshi kecha nüburtem nungi meyima mayu. Nüburtemi Kibuba tsübu, Pa dak amang, aser Pa lar Mosa dak amang (Ani. 14:30).

Pei mapa nung asüyonga mesüra yimsüsüba nung asüyonga kodang chichiba aser odia jembitepba melilir, kati ka tsüngda tesendaktep raksar, aser telemtetba tai agir. Lenirtem shirnok teratatsü taküm lir, parnok dak nüburtemi temulung malemer, kechiaser parnoki langka meyima lir ta teti nüburtemi bilemer. Saka lenirtem aikati nüburtem dang odi odia mejembi-i karbo pa/la asoshi ayu nung dang nüburtem dak tashi lir ta bilemer. Tanü iba ama lenirtem aika lir. Talisa alima yimsüsüba len kodang shisadangdir nüburtemi shimtetba lenirtem aika pei nüburtem majurudangba lenirtem aika lir.

  • Nüburtem den teti sendaktepa nüburtem teti ajungmesoba lenir ka liasü: Mosai nüburtem dang angatsü asoshi nungnanga maliasü. Nüburtemi asüngdangbatem pai angashi, pai shisadang, aser kechi tajung aji pai agizük (Tazüng. 1:22-23). Anungji nüburtem aser Mosa tsüngda tesendaktep tajung liasü. Pai nüburtem dang anga, angashi, aser parnok den maneni jembi. Nüburtem dang angadanger-ang pai telemtetbatem agi.
  • Lenisüba ozüng tajung Mosai yangerteta nüburtem asoshi yutsü: “Idangji ni nenok obendangertem dang ni shiogo, Idangji nenok obendangertem dang ni shiogo, ‘Nenok adianutem tsüngda nung o angang aser nisung kati pei adianu den süshia mesüra pa den aliba bendanger kar den süshia ochi shia o bendangang. O bendang kecha nunga tejak tereprang, tulu aser tila ajak dang kasa angang. Nenoki nisung shinga tetsübu kechiaser o bendangbaji Tsüngrem meyong lir. Nenok asoshi o tasakji kü dangi bener arung aser ni aji angatsü. Iba mapang nung nenoki kechisa inyaktsü item ajak indang ni nenok dang shiogo” (Tazüng. 1:16-18). Kanga dang tongmelang saka shirnoki iba tetuyuba angatsü mulunga liasü parnok asoshi terajem liasü. “Nenok asoshi tanishirtem aser obendangertem nenok kin shia nungi yimti shia shimtsüla, aser parnoki Kibuba ne Tsüngremi nenok nem agütsütsü aliba nungji ochi agi nüburtem o bendangtsü. Nai ochi mashiba mapa meinyaktsüla mesüra tejak mereprangtsüla. Nai süpokrem magitsüla, kechiaser süpokrem agi shisa takar tenük pokdaktsür, aser temeshipur o meyipsatsür” (Tazüng. 16:18-19).
  • Külemi inyakertem (team) aser tongtisürtem Mosai shimtetba: “Ni kü kijai nenok khu abentsü makok….anungji ni nenok kidong shia nungi tanishirtem shisa taka aser ajaki akhüm tsübua aliba nisungtem shimteta….tanishirtem yutsüogo.” (Tazüng. 1:9-15). Ibai chi-chia telangzüba aser ochi telangzüba ka lir. Ibai yagi Mosa koda ajemalu aser khuret nübur den lemsatepa abenba lenir ka ta sayur. Mosa pei asoshi bilemba nisung ka masü. Lenir ka jagi kechi nükjidong aji metettsüla aser aji ajangzüktsü asoshi arok/külem inyakertem den külemi telungjem nung inyaktsübaji  kanga tongtibang ta sayur. Anungji lenir ka taküm nung pei teka nung kechi mapa lir aser kechi nükjidong aji metettsüla, aser ibaji ajangzüktsü asoshi arok/külem telungjem mapaji kangasa tongtipang. Mosa lenisüba ajanga külem inyakertem telungjem ajanga maparen ajak koktet.
  • Tatidang nung tsüktsü lendong tekümdangtsü nüburtem dang ajungshiba: Kodang Mosa Sinai tenem nungi talangka malu, nüburtemi Aron dangi arua ashi, “Mosa shiba asenok Ijip lima nungi aniteta anir aru, pa kechi aküm onoki memetet; anungji asenok len anitsü asoshi tsüngrem ka yanglujang” (Ani. 32:1). Idangji Kibubai Mosa dang ashi, “Yakta meyipa luang, kechiaser ne nübur shirnok nai Ijip nungi anizüka anir aru; parnok raksa-a kümogo. Ni melaba lemang nungi parnok meyipogo, parnoki hon agi nashi süngyanglu ka muluteta iba nemji tarongba tenla agüja külemdaki. Ibaji parnok tsüngremtem; shibai parnok Ijip lima nungi anir aru ta parnoki ashir. Ano Kibubai Mosa dang ashi, iba nübur tekong temerang ta ni ngugo. Anungji kü ain tulu parnok anema adoka parnok samatsütsü asoshi tang kü kija tokjang. Aser ni na agi kin tulu ka kümdaktsüdi” (Ani. 32:7-9). Kodang Aroni nüburtem jabang mayimi kümdaktsüba ajanga tsükchirtemi sensatsüogo ta Mosai angu (Ani. 32:25). Anungji Mosai nüburtem dang ashi, “Nenoki tetsübutsüka temenen menaogo. Saka ni tang Kibuba dangi tua nenok asoshi temenen pungitsü atema ni pa dang mepishitsü” (Ani. 32:30).

Mosai nüburtem temenen asoshi jembi aser parnok menen pungitsu asoshi Kibuba Tsüngrem dang mepishitsü nangzük; pai nüburtem ajungshi, saka nüburtemi taküm mesüra tasüba, temoatsü mesüra atakatem shimtsü asoshi ayongzük.Tashi angaba ajanga temoatsü, takokba, yimjung, azükaro aser yimchiyimjung, saka tashi mangaba ajanga tashitak, ayawara, takoksa, alar tia, pei senmang samaba aser taküm temoatsütem ajunga samatsü indang ayongzük. Mosai talisa nüburtem tamangba tai nung metsüktsü asoshi ajungshi. Moab lenden nung Mosai Israel nüburtem dang tatemsa ashi, ozüng akhümtsübuba ajanga kija aser nüburtem asoshi temoatsüba, saka akhüm metsübuba ajanga tasüba. Kibuba nungi Mosa dangi kechi aru ibaji nüburtem dang sayu, tarutsü pututem aser nüburtem akhümtsübua alitsü asoshi ajungshi.

Mosai meneni ashi, tenangzükba lima tonger külen Israel nüburtem Yihuva Tsüngrem dak mamangba nüburtem den alitsü. Azükarua alitsü, jangratema alitsü asoshi senti mapang aika ajurutsü. Saka item ajunga jagi ano lendongtem bena arutsütsü ta pai tekümdangtsü ashi; par sobaliba aser temangba samatsütsü, asüküm aser konang nüngsang parnoki ajangzükba nung Tsungrem par sentong nungi pilatsütsü lending angatetdaktsü. Aji saka nüburtemi Kibuba dak jenokra, par tesüibatem jagi par lemang shitak aser tarutsü lemang shitak nung anitsü. Anungji Mosai ashir; “nai parnok metsübutsüla, Ijip ajak nung Kibuba ne Tsüngremi Farao dak inyakba bilemtetang,” “…Kibuba ne Tsüngremi item küm lir lisem lima nung na koda anishi ajak nai bilemtettsüla,” “Lisem lima nung nai Kibuba ne Tsüngrem koda ain adokdaktsü aji bilemtetang aser tamadok” (Tazüng. 7:18; 8:2; 9:7). “Aser tang, Oh Israel, Kibuba ne Tsüngremi ne dang nungi kechi akhanger? Saka Kibuba ne Tsüngrem tsübutsü, pa lemang ajak nung jajatsü, ne mulung ajak agi aser ne nela ajak agi pa dang meimtsü aser tenzüktsü, aser tanü ni nenok nem nenok ajungtsü asoshi agütsüba Kibuba ozüngtem aser pa temelabatem benshitsü” (Tazüng. 10:12-13).

Mosa Lenisübai ajangzükba aser Pa Taküm nung Tongtibang Lenisüba kar

Mosai pa nüburtem alar tia nung aliba angu, par nüburtemi aginübatem pai meteta liasü, saka nüburtem alar tia nungi anitettsü asoshi sentongjibo Tsüngremer sentong liasü. Tsüngremi Mosa nem lenisüba khuret nungloktsü, aser aji ataloktsü asoshi Mosa dang Tsüngremer tenangzükba liasü. Mosa lenisüba ajanga par lokti taküm nung tongtibang temelenshi ana bena arutsüba: mezüngbuba nung, kin terana lungjema küma Israel kin aser par yimsüsüba yangertet; tanabuba nung, Ijip lima alar tia nungi par nüburtem anitet (Ani. 3:16-18). Mosai ajangzükbatem aser pa taküm lenisüba kar:

  1. Nübur mulungjang nung Mosa dak temulung lemtettsüsa pai mapa taküm agi sayu. Yamaji tarutsü asoshi teyimla nüburtem nem agütsü. Nüburtemi pa dak temulung alem. Khen khen nüburtemi pa dang nemnemaka parnoki pa sülen anitaktsü nungnanga maliasü (Ani. 15:24; 17:3).
  2. Tenangzükba lima arrtsü matong tashi pai nüburtem ani. Pai nüburtem dang nangzükba ama pai atalokdaktsü. Lenmang nung timtem terokrong aika ajuruaka pai nüburtem dang nangzükba kodanga medoktsü (Tazüng. 5:1-2; 7:18; 8:2; 9:7).
  3. Pai nüburtem lenmang nung ani, parnok yari, Tsüngrem aser nüburtem tsüngda pa odanger liasü. Tsüngrem nungi nüburtem pila-a pai meyok aser par Tsüngrem Yihuva mamatsü asoshi teti nüburtem ajungshi (Ani.14:31). Pai parnok den jembi, sayu, aser lendongtem parnok dang sayu. Nüburtem asoshi tatishitsü lenir ka pa liasü. Pa ochi shir lenir ka liasü.
  4. Mapa küma inyaktsü pai nüburtem dang sayu. Tejakleni nüburtem aotsü tejangraba aser parnok nükjidong ajangzüktsü asoshi pai teti nüburtem nungita teyari agütsü (Ani. 14:14; Tazüng. 1: 29-30).
  5. Pa mabensabatem aser abensabatem pai meteta liasü (Ani. 3:7-12; Ani. 4:1; Ani. 4:10).
  6. Pa kanga ajemaluba taküm aser kanga khuret bentetba taküm ka liasü (Ani.4:12-14).
  7. Kanga tenendak nisung, nükjidong matong tashi nendaka inyakba lenir taküm ka. Küm aika nüburtem azüngmeyakdak lenmang nung jajadang pa dak toachi agi sünga liasü (Ani. 14:14).
  8. Tangar asoshi aria bilemba lenir ka liasü (Ani. 18:13-27).
  9. Ajak nung pai Tsüngrem madang metaloka liasü. Tsüngrem Pa lenir aser teyariteper liasü (Tazüng. 31:7-8).

Mosa Lenisüba nungi tangazüktsü kar

Mosa taküm aser mapatem nungi asenoki angateter; pa merumeru taküm ka masü, takokba mapa asoshi pai kodanga lemang tatsüba nung mejaja, anungji pa ochishiba taküm takang ka liasü, aser pai tangar alema tua maongka kodanga mebushi aser pa asoshi kecha mebushi. Kodang nisung ka taküm nung iba ama sempet taküm tajung ledir pa/la temulungjang, tepang otem, aser inyaksangshi sütep-sütepba alir. Kodang lenir kati yamaji tepang o aser mapa sütep sütepba litetdir nüburtemi pa/la dak temulung alemer, aser kodang nüburtemi temulung lemdir pa/la chichiba lenir ka akümer. Nüburtemi temulung lemtetba lenir kaji chichiba lenir ka lir. Pei asoshi taginübatem aser mulungbatem alema lokti asoshi tajung bilema inyaktsü asoshi Mosa taküm ajanga sayur. Tanu putu nung lenirtem aika ama, sen tashi dak rangloker nüburtemi pa/la dak temulung alemba lenirtem masü, saka Mosa ama Tsüngrem dak metaloka litetba ochi aser ajemaluba lenir taküm aser lenisüba agidang shitakba nüburtem nem temelenshi aser nüchi bener arudaktsütettsü. Tanü Naga lima sen agi tashi agütsüba lenirtem dang nüburtemi shimtetba ajanga Naga lima kechi tia nung lir bilemdangdi. 

Mosa taküm nungi maneni angazüker; lenir ka taküm nung tongtibangtiba taküm leniba kaji pa/la-i pei jenjang metettsüla, aser pa/la taküm shisatsü akhüm tsübua yamaji pei taküm nung litetta tangar dang sayutettsüla, kechiasar tatishitsü tajung aketba lenir tajung ka jagi pa/la jaklaliru aser mapa ajanga sayur. Lenir tajung ka jagi mangdang tajung shisatetta iba jagi nüburtem jaklaliru melenshidaktsür. Lenir tajung ka jagi tarutsü asoshi mangdang tajung nguteta iba mangdang tajung tangar dak benloktsür. Lenir shibai tarutsü asoshi mandang tajung angur pa/lai pei taküm nung aser mapa nung item agitsü asoshi renema alir, aser pa/lai aibelenbatem nungi tangazükba tajung nguteter. Lenir tajung kati nüburtemi temulung lemtettsüsa taküm nung liteta sayur, teyaritep tajung nung tangar den tesendaktep tajung yanglur. Lokti telungjem mapa (teamwork) aser teyaritep pa/lai kanga senti süa agir. Pa/lai lokti nung tangatetbatem balala angatettsü meranger aser yamaji lokti nung tangar akhümtsübua tangar den tesendaktep yanglur.

Mosa taküm aser lenisüba ajanga ano maneni angateter, Mosaji democratic lenir ka liasü. Khuret balala lemsatepba telungjem nung abentsübaji pa nükjidong liasü. Nüburtem nem nüchi agütsütsü asoshi pa lenisüba nükjidong liasü. Ijip Farao chuba lenisüba aser Mosa lenisüba kenyongi balala liasü. Farao chuba lenisübai tashiyim amshia takümtem aika alar tia-i yoka taküm samatsütsü merang. Saka Mosa lenisüba ajanga item teküpoktiba tia nung aliba nüburtem taküm nem nüchi agütsütsü nükjidong liasü, aser yamaji Mosa lenisüba ajanga alar tia nung aliba nüburtem taküm nem temelenshi aser nüchi agütsü. Alima aser tanülar lenisüba anaprongla asoshi Tsüngremi khuret agütsüba nükjidong aser tajabaji kasa dang, aji kechi ta süra, Tsüngremi alima nung taküm (life) yanglubatem taküm wazüka nüchi agütsütsü asoshi lenisüba tajaba. Alima yimsüsüba nung lenirtem, lokti balala nung lenirtem, aser tanelar wadang nung lenirtem, taküm asoshi Tsüngremi na/ni lenisütsü jatetba süra, na/ni lenisüba ajanga alima nung taküm wazüka nüchi agütsür asü, mesüra taküm raksaja aser samatsür? Taküm nem nüchi agütsütetba lenisübaji temelenshi adokdaktsüba lenisüba. Tanü lokti nung lenirtemi Mosa taküm aser lenisüba nungi angazüktsü aika lir.

*****