Dikhu Green Zone Project Management Committee (TGZPMC)-i 2021 küm NBSE-i agiba HSLC tatidang nung top 20 jenjang nung takok angur Longsa ka aser Ungma nunger ka nem konang tetushi agütsüba sentong tajung ka Oct 4 anogo yangi Mokokchung nung TGZPMC kimen kidang ayongzüka agiogo.
Konang tetushi senpet agizüker anaji; Longsa nunger Mokokchung town nung alir Wb. Jongpongtemsu’er jabaso Sp. Limatongzük Lkr, Straightway Hr. Sec. School Mokokchung nungi top 11 (96.67%) nung takok angu aser tanabubaji; Ungma nunger Kohima yimtiba nung alir Wb. Taliwapang Imsong’er jabaso Sp. Aotushi Imsong, Minister Hill Baptist Hr. Sec. School Kohima nungi top 12 (96.50%) ajangzükteta liasü.
Iba konang tetushi senpet agütsüba sentong ya 2015 nungi Longsa aser Ungma senso shirnoki NBSE kübok agiba HSLC tatidang nung tangar dang alakteta takok ngudir, parnok nemsa senpetja arur. Aji oda, tia junga taküm kümbo HSLC tatidang nung yimnasanger nungi topper kaka densema liasü. TGZPMC ajanga tena nem kuli kaket tajung den senpet sen (cash award) meyi ter-er (Rs. 10,000 each) agütsüogo.
TGZPMC ya Longsa & Ungma yimnasanger-i tarutsü nükla yur alima tzü mopung aser arem min wazüka ayutsü asoshi tentetba mapatong tajung ka lir. 2015 nungi tenzüka tanü tashi nung iba tetushi senpet ya Ungma nunger asem (3) aser Longsa nunger asem (3)-i ajangzükteta lir. Par topper trok (6) ya TGZPMC pur asoshi alima tzü mopung aser arem shiruru wazüka ayuba nung ambassador kaka lir.
‘TGZPMC Academic Excellence Award’ senpet agizüka Sp. Limatongzüki mapang tatsüka agia jembidang, kaketshirtem ajungshia TGZPMC-i iba ama sentong tajung atongba asoshiba pelaba den pai takok anguba asoshi Tsüngrem nem tama tenüngsang agütsü aser par tsürabur aser tesayurtem nem akhüm tetushi agüja lir.
“Lesson bushidang Tsüngrem dang shisatsü meshir azüng, class room tonger külen Tsüngrem dang tama sarasadem aser tatidang mapang tasüngdangbatem langzür külen Pa dang iba nungji nai yariang ta sa sarasadema liasü. Aser nai mulung nungbo topper rongnung tendakjang ta sarasadema liasü”, ta pai kuli kar ashi. “Topper rongnung adentsübo kecha meimlai liasü saka Tsüngremi kü sarasadem langzü südi”, ta paisa shisem.
“Tsüngremi ni asoshi sentong tajung ka renemja lir ta ni amanger, kenü anogo kü taküm nung ni medical doctor ka akümnür”, ta pai tejangraba lemsatep. “Tanü alima nung tatishitak tapu balala ajanga nüburtem timtemer, anungji, parnok taküm kümzüktsü atema ni medical doctor ka kümnür”, ta paisa shisem. Sp. Aotushi Imsong iba sentong nung koda masüba maparen kar ajanga marutet saka meyonger pa teko ka arua iba senpet agizükba den tepela o kar lemsatepa liasü.
Tanü iba sentong nung TGZPMC chairman Tia Longkumer aser TGZPMC Secretary Jongpongtemjen nati anir TGZPMC züngsemtem, Longsa/Ungma Senso Telungjem Mokokchung town nungi ketdangsürtem, Limatongzük tebu aser Aotushi’r kinungertemi shilem agia tepela o den tajungshi o lemsatep.
The Nokinketer 