~ Talimoa Longkumer
Okila
Tsüngremi moatsüba rongsen ketdangsüri timi ketdang masüi rongsen intokba dang `lalushipong’ ta Aor-i jembir. Laishibai ashir,“Shisa takar alidakji senti rongsen aser totzü lir; saka tamashi nisungi aji meyoka adoker (A.Shin 21:20). Adangji lalushipongba ya temenen aser tamashir mapa ta Lai ajanga angateter. Tanü reprangra kija aser telok aikati senti mapang, rongsen etc. aika amajok nung lalushiponga amshiba angur. YSS sabang nung iba dak sentakba tebilemtsü onük ka yamai benok: “Ordination, installation amala nung rongsen jenti laluba, sati mapang decoration, Christmas New year amala nung decoration yangluba nung rongsen jenti lalushipong asür. Ya lokti nung tebilemtsü tulu lir. Koma ka inyak nung ajungtsü?” Iba dak sentakba nung sabangpur aikati shisa lemsatepba tatsü agi yamai:
Rongsen ketdangsüba
Kodang rongsen ta asür yangi mapa inyaktettsüsa tashi itta anema aliba, mapa balala inyaktettsüsa mapang peria ngutetba aser tangar dak memetaloki, sentsühtsür mesüi pei peri ali rongsen/sen akaba ajak dang `rongsen’ ta ashitsü akok. Item ajak ya Tsüngrem temoatsü aser Tsüngremi nungi dang rongsenji angur. Sayutsüngir kaket-i yamai ashir, “Nisung shia shiba nem Tsüngremi rongsen aser takaba agütsü, aser aji achitsü tashi agütsü, aser pa tia agizüktsü aser pai inyakba nung tepela angutsü, ibai Tsüngrem sempet lir.” (5:19). Rongsen ya kanga dang tashi (power) akaba temoatsü ka lir, saka pei ajung asaa rongsen tashiji amshia nisung kar alar kümdaktsüdir, ajemoka yutsüdir iba jagi lokti kaji raksaktsür. Ano rongsen ya dangar den melensatepi pei asoshi dang rizünga ayutsüba masü, saka lemsateptsü, yariteptsü Tsüngremi moatsü. Ano kodang rongsen amshia pei tenüng ajungkettsü asoshi amshidir, iba dangji temenen ta ajar. Tsüngrem shibai moatsür, Pa sentsüwangshi atema dang amshitsüla. Aseni tangar den lemsatepba, timi lalushipong mesüi ketdang asüba ajanga Tsüngrem sentsüwangshidaktsür ta metetdi. Rongsen lir ta sür chidiyungdiba, taka shisanga sayuba, lokti arok meyong rongsen auyaba, pei ajung asoshi dang bilemba, pei khonang atema rongsen agütsüba, telok sen ta sur mapayui amshiba, ajak ya rongsen lalushipongba nungji dena lir. Yamaji arogo nung sobaliba mapa abensadaktsür ta asüdang, Christmas and New Year benjong tulutiba anungji kecha mapayui decoration amala nung rongsen mashi lalubaji tim masü. Ibala jagi Tsüngrem sentsü mewangshidaktsür. Tatishitsü amai Installation, Ordination, Sati, Christmas aser New Year decoration nung rongsen lalushipong kar temelenshitsü ajitetba lemsateper.
Installation sentong
Arogo nung ordination/installation mapang nung Ao lima yimtsüng arogo aika nung rongsen jenti laluba aseni angur. Secular mapa nung interview kodang takok ngudir joining report agütsürbo mapa tenzüka aor, yamaji arogo nunga office nung teinyaktsü inyakerbo installation atema sentep nung sarasadem ka dang agütsür tenzüka ao nung jungdisü? Devotional sentep Tsüngrem tenüng sanga külemtsü melen meimchir tetushitepba farewell/installation agibaji tera shisadangtsü lir – T. Imti Jamir
Shiba install asür, pa/la den arogo nungi kuli ka or ana dang aja nung jungdisü ta bilemer” – Imti Longkumer
Sobaliba ya kanga tongtibang aser koba Khristan tamang den apet aji benshitsü tim saka sobaliba benshidang khuret kümdaktsüba ya tim masü. Sobaliba koba arogo sentongtem nung mapet ajibo melenshitsüla. Arogo nung toklang tenzüker installation mapang sobaliba onsara anitaker. Nisung 50, 60 (khen khenbo 100 tema) tashi kin kidong, anük apang ajak abensa-a bus hire süa bener arua sobaliba oshi jembia installation agir. Taru tao expenditure ajak par/lar (shiba install asür) kibongi abener. Iba den arogoa rongsen aika lalur. Iba inyakyim ya melenshi nung jungdisü? Arogo ka nung Christian Education Director aser Choir Master installation sentong nung tajaba taküm kuli tatsü den sarasadem ka dang agütsür mapa nung aniokba kanga tubor junga angu. Ibala inyakyim benshia tenzük nung ajungtsü ta lemsatep.
Khristan tenzükba khuret agizükbaji khonang ka masü, saka Yisu Khrista kilir asütsü khuret agizükba mapa ka. Taküm bendanga agütsüshiba mapang ka. Pei tashitemetet, degree, taka shisangba mapang ka masü. Tsüngrem tejak repranger ajemalua Khrista kangki aputsü ta nangzükba mapang ka. Yisu Khrista tenüng uludaktsüba dak alaka tanga sobaliba porapuji amajok lir. Ano tanga lima nung inyakyim tajungtem ajizüktepa inyaktsübaji kanga tongtibang. Tangar lima nung inyaksangshibatem junger ta ngura aji ajizüka inyakba ajanga asen lima/arogo nunga temelenshi tajung aika bener arutsü. Iba dak sentakba nung Alemla Walling, shiba America nung mapang talangka alir, lai yamai ashi: “America arogo teimba ka nung talisa Baptist arogotem nung installation agidang tenzükerji pulpit-i ajatsü aser kneel down südaktsür pastorbai anir Deacon Boardtemi nemeta sarasademtsür. Lokti temulunger tashibo sarasademba mapang nung noktaker. Iba dak alia talila poraloka aoba mangu.” Installation sentepji tenzüker aser arogopur ajak Tsüngrem dangi meyipa akangshiba mapa ka südaktsütsüla.
Ordination nung lalushipong
Arogo nung special program, tat. agi ordination program ama nung kokra süngo ajemba ya lemang ka nungbo junger, saka yimkong chiyungtepba ya mapet amai. Yamai inyakba ajanga arogo aser kibur atema khuret tulu küma odagi. Sati benjong ama dang talisa kiburji sentsüh aika atsür. Arogoi ordination council agizüka anepaluba dak alaka akhi mapang special program koda akar yamaji metsüngareta dang agira kecha masü ama bilemer. Sapangpur züngsem tajung kari kanga aroka shisadanga ordination inyakyim dak sentakba nung kibur/arogoi ajangshiba shisabulu tebilemtsü khuret aser sentsüh-a dena lir ta lemsatep. Anungji item temelenshi tajitetba kar yamai lemsatep:
- Ordination nung benjung agütsütepba ya ozüng yanglua nokdangtsüla. Benjong ya khonang nüngsang temaitsü saka ordination ya khuret agizükba temaitsü.
- Tawa tanü ordination ya khuret tulu kümogo. Arogo kar nung ordain asüsangi yimer ajak nem shijep lemtsüba, arogoi sentepi arur ajak chiyungdaktsüba, kiburi ordination council nem awashi mapa inyakba, bendang lima nungi kinunger ajak jaoka amongba, ano aika. Mungdangi ozüng takhang ka meyanglura sen lakh aika entoktsü tensa kati aruogo. Sensaker asoshi ordination magitettsü mapang arudar.
- Ordination ya Mungdang mapa ta bilemer. Anungji idaki sentakba ajak ABAM-i kuli agitsüla ta bilemer. Tat. agi, China, Thailand, South India, America-i or külen ABAM ordination mapaji inyaktsü adok nung iba asoshi senzür pei sasa para agüja yoktsü na? mesüra ordain asür kibongi dang entoktsü na? Ana/talang ajak nung kechi tim (para dang masü DA dena) ABAM-i agütsütsüla ta bilemer. Iba mapa inyaktsü ABAM nung budget akatsü nüngdak ta ajiteter.
- Ordination tali tajungba agitsü asoshi aser lerumedema akatsü asoshi Mungdangi ya tashi inyaktsüla ta telemtetba tajung agütsüra tajungba asütsü
Ordination sentong ama nung sen kangabo meindoktsü ajungshitepba ya junger saka ozüng agi masü tangatetba agi inyaktsü aser inyakdaktsütsü merangtsüla. Ozüng yabo aiben tamakok angur saka tangatetba agibo akoker. Anungji ibai temeshi mapa ka ta angateta sobaliba aser lalushipong makai agi tajungba ta bilemer.
Christmas, New Year aser Satiba (Wedding) Sentong nung Lalushibongba
Materialism nem asenok meyokdaktsüogo. Arogo nung kechi sentong südir ajakji outward show aser competition dang küma aoba angur. Christmas ya Santa Claus nem meyokdaktsüogo aser New Year celebration ya Hindu nunger benjung ka ama küma odaki – Menjiwapong Jamir
Tanü asen lima Christmas, New Year aser sati benjong amala sentong ya kanga dang mera keta decoration nung rongsen aika enoka pelatepa amonger. Joko professional decoration yanglur hire süa rongsen, nübu jenti lalushipongba ajangshia arudagi. Kar nungbo decoration agi toktepba angur. Talisa Christmas benjong mapang Santa Claus lemjem, yimdong aser tenlaki kima sen jenti lalua toktepa yanglutepba angur. Santa Claus ya market symbol ka kümogo. Marketization of Christmas mesüdaktsütsü merangtsüla.Yamaji küm nung khen dang Christmas/New Year amongtsü ta sür rongsen jenti decoration nung lalur. Christmas, New Year benjong nung akok tashi tongmelang agi tubor junga enoktsü ajungshitsüla. Akok nungbo Christmas decoration amala ya asen sobaliba maparen nung angatettsüsa amshi nung tajungba asütsü, saka kechi atema südir süaka pulpit aser sentep ki nung naro tali amshia decoration nung senotsü tali entokba ya melenshitsüla. Pulpit akhümket ya mesamadaktsütsüla.
Ano sati benjong decoration toktepa yanglutepba ya tebilemtsü tulu ka lir. Sati mapang Arogoi kibur dang decoration simple süa dang enokang ta shitettsüla. Mapang balala, sentong balala nung amshitsü Arogoi decoration naro amala alia ayu nung kanga dang ajungtsü. Ibai ajanga rongsen jendi kümzüktsü.
‘Lalushipongba’ Laishiba nungi kar
Lalushipongba ya Tsüngremi sempaba mapa ka ta Laishiba nungi kuli aika angutsü. Luke 15 nungji tamadokba chiri tebu dang pa shilem rongsen meshizüka bener alima talang kati oa pei rongsen lalushiponga senzü. Kodang pai pa rongsen entokma aser aya-wara tulu ka adok pa kanga sensak atenba shia angur. Ozü rongsen, kü mülung, ni benden anungji ni sünütsü asütsü, shingaia ni nokdangtsü makok ta bilema amajok nung rongsen laluba ajanga tatem nung khuret tulu bener arutsür ta angatetdi. Lalushipong masübaji teka kodanga mesalaba ta asübaji masü, saka amajok nung meindokba, iba indang Laishibai jangjatsür. Tajung Samaria nungbai pa rongsen entok mesasai lemang nung timtemer yariba angur. Pa yangku nungi medical expenses, transportation, fooding, lodging & care taker fees, item ajak asoshi rongsen mapayui taküm ka kümzüktsü agütsü. Taküm ka kümzükba nung aser lokti yanglushiba nung rongsen tenlatsüla. Tanü arogotemi kechi nungsa rongsen entoker aser kechi nungsa mulungsoa peroker? Pelatepa benjong bentsü amongdang entokba rongsen jagi timtema ya-a tzüra alirtem noktakdaktsü nung Tsüngrem mepelali ma?
Yisu alima nung alidang sayatenya aika inyak. Koda masüba mapang tzü agi yi (wine) kümdaktsü (Yohan 2:1-11). Telokti yaa tzüraba mapang amtsük pongu aser ango ana agi telok meyi pongu tema peridaktsü. Saka kodanga lalushiponga amajok nung meindok. Pa nütsüngtem dang “kecha mesamatsüsa tanungba tanük-tariji bendenang” ta ozüng agütsü (Yohan 6:12). Sayatenya agi chiyungtsü molamoshia poktetdaktsüba Yisui süaka Pai amajok nung lalushipongtsü memela. Tanü benjungbentsü nung rongsen talang agi alia renemba chiyungtsütem asenoki junga ketdang südar ma? Takarsangi kenüamati benjung yanglua liasü saka par keshi anasa ontaka aliba Lazar mangu. Alima nung alidang pai tia tajung ajangzük saka sensaker tenük agi mongui rongsen lalushipong. Alima nung alidang tenük agi sensaker mongui lalushipongba tajangzük takarsangi asü yim nung angu (luke 16:19-31). Joko alima aika nung lalushipongba ya temenen dang masü saka crime against humanity ta ozüng yanglua aibelenertem asoshi temerenshi lir. Süra, arogo nung amangbapurtemi item ya meshisadangi lalushipongra tasüngdangtsü tulu ama bilemer.
Otem
Kodang tongtibang onük ka nung lokti kati atsüshitepa, shisa lemsatepa jembidir idangji tajangzük aser tangazükba aika angur, inyakyim tajungtem jangjashitsür aser melenshitsür. Item ajak ya kija asoshi masü saka asen lima arogo tajungba melenshia yanglushitsü nükjidong nung ajaki jembir. Süra kodang, shibai, koma melenshitsü? Asenoki aiben ajak angateta aser meteta dang lir ama saka temelenshi bener arutsü mapa agi sayua metenzüker. Takar tulur tashi temetetertemi anir onok rongsen aika liaka amajok nung lalushiponga meintoker ta libaliru (practical) ajanga sayua sensaker den lemsatepa alibaji koda jangratemtsü aser tatishitsü tajung? Amangba purtemi kecha tarendak makai tongmelang agi benjongbentsü sentongtem nung rongsen kanga lalushipong mesüi amungtsü tenzükdi. Amanger, rongsen aika intoka yangluba decoration ajanga agütsüba tepela dang nungi telemsatep, teyaritepba ajanga agütsüba tepelaji tuluba asütsü. Talisa, Tsüngrem dangi meyipa temoatsü tepelaji tematiba tepela asütsü. Joko tangar jilu ajizükba yimya ya intoker Tsüngremi koma aginür yamaji inyaka alitsü merangdi. Tamatokba chir-i lalushiponga rongsen intokmar tebu ki koma menungra temulung raksa-a meyipa ao yamaji Tsüngrem dang tatok meshia asenoki lalushipongba temenen nangzüka Tsüngrem dangi odi ta ayongzüker.
*****
The Nokinketer 