~ Meyu Changkiri

India Hindu yimli akümtsü takhangba

Alima ajak nung tamangba yimsü ka tongtibang sür anir, tat. agi, Europe nung Khristan yimsü, Israel nung Yihuda yimsü, Middle East lima aika nung Islam yimsü, India meketa anüdoklen aliba linük aika nung Buddhist tamang yimsü tesayuba ama bener aor. Saka tanü ama India nung Hindu yimsü tesayuba ama yimden yangera bener aoba alima kata mali. Temalen Nepal nung Hindu Kingdom liasü, saka tanü democratic linük kümogo.India ya Hindu yimsü tesayuba ama bener aotsü Hindu Rashtra yangertsüla ta Mughul, British nunger yimsüsüba mapang nungi Hindu yimsü lenirtemi talisa Rashtriya Swayamsewak Sangh (RSS) teloki jembia aru.Aser parnok nükjidong atalokdaktsütsü asoshi Bharatiya Janata Party (BJP) ya political tashikang ka ama tenteta bener arur. Parnok tangatetba tamendakdak, Wati Longchar-i yamai ashir,

  1. India ya Hindu lima (Hindu state) ta agizüka, Hindu tesayuba nung yimden, temzüng, tsüzüng-ozüng, sobaliba ajak bener aotsü noktaker. Muslim aser Khristan shirnoki Hindu yimsü magizüker aser sobaliba mebenshiner, aser shirnoki Hindi mejembir, Hindu yimsü mebenshir parnokji India nunger masü ta ashir.
  • India nung tamangba balala, sobaliba balala aser oshi balala malitsü.  Ka dang alitsü. Lokti teimbai kechi benshir, tetezü Hindui, aji ajaki tashi angaa benshitsüla ta ashir. 

Anungji Hindu yimli (Hindu Rashtriya) akhang akhanga yangertsü asoshi Hindu fundamentalist BJP aniba sorkari akhangba yamai angur:

  1. India nüchiso ngur temzüng nung “secular democratic country” ta agizüka bener aru, saka “secular” ta zülua alibaji entoktsü asoshi noktaker. Tetezü, Hindu yimsü-yimpong dang amshia bener aotsü asoshi “secular’ ta alibaji entoktsüla ta akhanger. 
  • Kaket riju azüoka ayutsü merangba. Tanü India nung kaket riju, Govt.i tenzükba dak alaka, RSS-i tenzükba Vidya Bharatya tulutiba aser teimba lir. Yangji Hindu tamang yimsü aser sobaliba sayur. Iba den Government school nunga text book Vedas-i sayuba ama, Hindu yimsü-yimpong, otsü-olem, sobaliba züngdaktsüla ta akhanger. Vishva Hindu Parishad (VHP) ajanga Bhagavad Gita ya national book declare asütsüla aser school ajak nung sayutsüla ta takhangba lir. Iba den tanga tamangba yimsü tesayuba aija züluba angutsü. Tat. agi, Gujarat nung school nung class 9-pur text book nung Yisu Khrista mojing (demon) ta zülua aliba angur.
  • India lima ajak ka küma lungjemdaktsütsü aser alima dang Indiai iba tetsü oshi ya jembir ta sayutsü asoshi Hindi oshi angazükdaktsütsü aser jembidaktsütsü akhanger. India ya “Hindu, Hindi, Hindustan” ta alima dang sayutsüla ta ashir.  
  • Tamanger telok tilaba pur azüoka ayutsü, renloka mekümdaktsütsü asoshi CAA (or CAB) benoka India nung tamanger telok tilatem ainer kümdaktsüba sendong lir.
  • Tanga yimsü mamangdaktsütsü asoshi anti-conversion law state balalai yangluba. Tanü tashi nung state ti tashi nung anti-conversion law yanglua Khristan aika rishikangshiba ajurua arudagi.

Yamaji Hindu yimsü media ajanga sangdongba, shisashiba azüoka ayuba, yoga, astrology, nashi ambulance a.a. inyaka arur. Nagaland nunga tetsür kari sepoy campi oa Hindu nunger yimsü benshia rakhi mesüloktsüba, Naga Mother Association aser NGOs aikati aija züluba nguogo. Iba amaji tamangba maparen amshia yimden tashi azüoka ayutsü merangba mapatem ta angateter. 

India nung Khristan rishikangshi

Tawa tanü, India tesem aika ka nung Khristantem tiptema alitsü kanga tasak akümba kuli aika angutsü. Khristan yimsü meji nüburtem timtem tekangshi jenti ajuruba, mezüngmeshiba, pei tata shilem manguba, temeten samadokba, taküm samaba, a.a. Rishikangshi balala sashia adokba den, ano mapa tamajung inyaktsü telong nung mima mapa inyaktepba, item ya aiben Khristantem anema inyakba tasatem ta ajitetter. Information Technology amshia Khristan tamangba yimsüji bendanger tamangba yimsü ta tiyazü osang prokbatem yaa ka lir. Item ajak ya India nung Bharatya Janata Party (BJP) yimsüsüba menden arur külen tesashiba akümbatem angur. Kechiyong BJP yimsüsüba arur külen Hindutva tangatetba nung Sangh Parivar ano tali tashi taitba aküm. Far-right Hindu telok balala ajanga India nung lokti tentet jenti amokbanga India nung tamangba yimsü telok tilatem (religious minority) alitsü kanga tasak kümogo.

Tanga tamangba züina modaktsütsü asoshi yimtsüng kar nungbo kibongtem nung sarasadema aliba mapanga sünga azükba, ki rongdoktsüba aser mangsa yimdong nung maksüa jajadaktsüba aika ajuruogo. Hindu tentet teloki, Bajrang Dal teloki 1999 nung Australia nunger leprosy hospital nung doctor Graham Staines aser par chir ana gari telong nung mi senloka rongseta südaktsüba, ano 2008 küm Kandhamal nung Khristan tamanger 39 tepsetba, tenlaki 395 rongdoktsüba, 600 yimtsüng rongdoktsüba, 5600 kiojen, dokan nungi oset-tsȕset rakzüka bener aoba aser nisung merijang aika ki maka kümdaktsüba atalokogo. Item ya asaa Khristan mekümdaktsütsü amokmerenba aser rishikangba lir. Ita ana tejaklen Delhi nung tenlaki raksatsüba osang nguogo. BJP yimsüsüba arur Muslim aser Khristan dak tashiyim amshia rishikangshibaji küm shia 800-1000 ka shibosa asür ta ashir.  India nung BJP yimsüsüba arur religious mob kümteta, Government tazüokba  kecha mali ama, Muslim aser Khristan attack süyonga, tetsür dak tashiyim agi medemer tepseta yutsüba osang angur. Saka aiben Govermenti tenük amor yutsür. Ano tesüngmangtsükaji RSS and VHP telokibo India ajunga nung Ghar Wapsi, tetezü tanaben meyipa Hindu yimsüi anir aitba poja inyaka aoba angur. Assam Chief Minister Himanta Biswa Sarma-ia India nunger ajak mapang ka nungbo Hindu liasü anungji lungjema alitsü atema meyipa arutsüla ta jembiba nguogo. Ozüng balala ajanga aser tashiyim mapatem ajanga yamaji Khristan mekümdaktsütsü nokdanger. Kechiba süra, India ya Hindu yimsü amanger lima ta angatetba ajanga yamaji inyaker.

India nung tamangba yimsü telok tilatemi (religious minority) ajuruba timtemji aiben Media nung osang magütsür. Tamangba yimsü meji taküm samaba, temang yiruba, lokti nungi jendokba, mapa agienadokba, rongsen aser kiojen samaba, kibong nungi pilaa alitsüsa akümba, tila tanurtem tsübuseta ainba, tangar matsüngdang maksüdaktsüba, aser yamala aika ajurur.

India nunger Otsü meyipshiba

India nung Khristan lenir, Vijayesh Lal, ajanga ashiba agi India lima nung kin ajak Hindu yimsüsüba kübok lidaktsütsü merangba tasa ya metettsüba kanga dang tongtibang (It is very important to understand the politics of religious nationalism in India). Nüburtemi angatet nung dang kobala yimden lenir shimtsü nüburtemi metettsü. Ya kanga shitak. Khristantem atema dang masü, saka senso pur ajaki ya meteta alitsü kanga tongtibang. India nung pei kin ayak jangja ayutsü, wazüka ayutsü aser pei oshi jembitsü, sayutsü temeten atema noktaktsüla. Sangh Parivar ajanga item otsü zülushitsü merangba, item tasa balala ya tanü alimai meteta arur. South India nung Darvidian aser North East India nung Monoploid shilu ya züngdoker otsü zülushitsü meranger. Küm 300 tema Mughul yimsüsüba indang Indian history nungi aidoktsü merangba, tat. agi Taj Mahal, Lal Qila, Juma Masjid ya Shah Jahani yangluba masü, Hindu nunger chubai yanglu ta otsü meyipshir. Aser parnoki India lima rangben Hindu yimsüsüba kübok ayutsü merangba, aser iba ama yimsü ka kübok lidaktsütsü merangba (Religious Nationalism) ya metettsü kanga dang tongtibang. Home Minister Amit Shah-i yamai ashi, “To preserve our ancient philosophy, our culture and the memory of our freedom struggle…there is at least one language, Hindi, that the nation knows. If Hindi is taken out of our freedom struggle, the entire soul of the struggle is lost,” Tetezü, tetsü-tebou otsü aser wainshin wazüka ayutsü asoshi Hindi ajaki jembitsüla. Hindi ajanga itemji wazüka ayur. Hindi jembiri nüchiso bener aru anungji Hindi mamatsüla ta ashirba. Yamaji Hindu atsünga otsü meyipsaba asenoki ajangshia arur. Hindu Nationalism tangatetba ajanga Hindu aser Hindu tamang ya ajak rongnung mezüngbuba aser tulutiba yimsü ka ta sayur. Tangartem ajak Hindu yimsü kübok second-class citizen ama parnoki angateter. Nüngdakra, tanga yimsü nung amangertemjia tashiyim amshia Hindu kümdaktsütsü merangtsüla ta parnoki inyaker. Aser yamaji India lima nung Hindu yimli (Hindu Rashtra) ka yangerteta Hindu yimsüsür (Hindu Theocracy) kati  yimsü asütsüla ta parnoki angateta meranga inyaker, tatishitsü agi, Yogi Adityanath, Vishwa Hindu Parishad (VHP).

Asen teinyaktsü

Hindutva tesayuba kobai India ajonga Hindu Yimli kümdakja, tangar shilu aser tangar telok second-citizen kümdaktsütsü meranger, ya jangja janga angatettsüla. Ya tai tangatetba ta sayutsüla. Tia maka sen dak dang rangdaker, mesüra development dak dang repranger Hindutva tangatetba aser tasa ya aiben India nung Khristantemi angatettsü memerang. Ano arok temeten atema noktakba nung Khristantemi ola madoker. Tanü India nung “Farmers Protest,” Article 370, Citizenship Amendment Act, National Register of Citizens, National Population Register anema nüburtem rarar saka Khristani ola adokba tejangja mali. Demonetization, GST, unemployment, underemployment, pandemic, “sliding rupee,” “crony capitalism,” aser yamala mesükba onüktem aika ajanga nüburtem kanga timatemer, saka Khristani shilem agiba aikabo mali. Iba denji India nung Religious Nationalist ajanga Media House arakmoker tiyazü proker sakaKhristan telok ola kanga ajema lir. David Landrum ashiba agi, tamangba yimsü nung nüchiso jagi tanga meimchir temeten aika soita ayur. Alima nung Indiaji democracy tulutiba süaka, tamangba yimsü telok tilatem kümzüka meyutetra, mesüra parnok anema tim masüba mapatem inyakra, ibaji chichiba democracy masü. Anungji democratic principle nung jajaba yimden yimsüsüba yangertsü asoshi tamangeri odia shilem agitsüla.

Ano Covid wara aser pandemic tia ajanga lokti nung tebendang aser tepila aika adokdaktsüogo. Takar aser sensaker tetsüngda (Rich versus poor), jila nung alir aser yimtsüng nung alir tetsüngda (urban versus rural), high caste versus Dalit & Tribals. India nung Religious Nationalism sashia ainba shia item tebilemtsütem teimba züiner. Iba den külemi India nung urbanization sashia züinba ajanga lokti nung nüburtem atema timtem aika bener arutsüdaki. Linük nung Religious Nationalism ali tashi item timtem teimba akümtsü. Kechiyong parnoki machinery aliba ajak amshia Religious Nationalismi mulungba ama bilemtsü, jembitsü aser inyaktsü nüburtem tekolok shisatsü nung enoktsür. Tamangba yimsüji amshiba yimden tashi arakmoka ayutsü meranger. Tamangba yimsü aser Yimden tepila yutetba yimden ka asoshi asenoki noktaktsüla.

Iba ama mapang ka nung, media house aser social media dak tashi tulu lir. Media house kiburtem aser social media amshirtem ya angeteta tajemrep tia nung alirtem atema tajung aika inyaktettsü. India nung tamangba yimsü telok tilatem (religious minority) timtem angateta nüburtem nem metetdaktsütsüla. Social media amshirtemi inyaktettsüba mapa kar:

  1. Tiyazü osang soita ayutsü aser meproktsü meji media nung shilem agirtemi oshi balala jangja meteta alitsüla (Hindi, English, regional languages).
  2. Yimsü balala tesendaktep aser tangatettep nung junga alitsü inyaktsüla (in line with Article 20 of the ICCPR).
  3. Social Media tajungleni amshitsü asoshi yimsü lenirtem ajungshitsüla.

Anungji, akokba lemang ajak nungi arogo aser Khristantem dang item tebilemtsütem angateta ashitsüla. Tila tanurtem aser lanurtem dang Indian Constitution, Hindutva, aser yamala onüktem rateta sayutsüla. Item onüktem ya jangjaa lira, Religious Nationalism tashitak nungi jenbua litettsü. Iba jagi nübur jenti yaritettsü, aser lokti tejakleni aotsü. Arogoi akok tashi lokti tentet balala den (civil societies) yaritepba alitsü merangtsüla. Kechiyong iba Hindutva Ideology ya tanga kecha agia masü sakanem tangatetba shisatsü agütsü nung dang koktettsü.

Otembang

India ya Hindu nungeri dang akümba lima ka masü. India ya shilu, oshi, tamang yimsü, sobaliba aikati akümba lima ka. Item ajak ya Tsüngremi moatsü, aser iba ya ajanga India lima takar ta sayur. Anungji item ya ajaki akhümtsübua, wazüka ayutsü noktakba political party aser yimsüsür nüngdak. Ano alinük ka tejakleni odaktsütsü nübur teimbai mulungba yimden latettsü tim. Tanü sen agi, senso candidate, tashiyim amshia, tiyazü o proka yimsüsüba menden nung amener aika lir. Itemji tanaben shimra ano alima tali raksatsü. Lenir shibai nübur teküboka jenjang nung alir ajungkettsü merangba nükla lir itemji shilemtsüla. Asen meyongnem tashi ajanga temelenshi adokdaktsütsü ajaki merangdi.

*****