~ Bendangtemjen

Okila

Iba ocet nung ‘Election Campaign’ melena “Tatar Shimtetba Arakzüyim” aser `Politics’ dang “Yimdenyimpong”, “Alima Yimden”, “Arogo Yimden” ta masü saka “Alima Yimli” aser “Arogo Yimli” ta amshiba angutsü.

Iba ocet ajanga lemsatepnüba tongtibang kaji, kechiba Arogo-i “Tatar Shimtetba Arakzübayim” nung ochi atema noktaktsüla? ta iba tasüngdangba nung kü tangatetba kar tongmelang agi lemsateper.

Arogo shilem nungi tangatettsü kar

  1. Mezüng tangatettsü kaji, Arogoi temerük Tatar-Shimtetba Arakzüyim atema kanga dang tasü itta noktaker, saka Arogoi Tatar-shimtetba (Election) and Yimsüsürtem (Politicians) anema menoktaker ta mezüngbuba nung angatetdaktsüner.
  2. Tanabuba nung, Arogoi Temerük Tatar-Shimtetba Arakzüyim nung shilem agir dangashi, Arogoi party Yimdenyimpong (Politics) asayaba nung shilem magir ta iba ocet azünger ajaki ajang-ajanga angatetdaktsüner.

Kechi koda nisung ka temang ranagben anema alitsü koda tongtibang, yamaji telatetba-yimden (political-system) nunga maparen-rangpen (Whole system) timi ochi agi yangertet nung dang nisunger arakzüyim ajak nung telemsa mesüra telemdang makai letettsü akok. Iba yongji Arogoi party balala Tatar-Shimtetba Arakzüyim nung teka amoka shilem agitsüba masü saka nüburtem (public) dang, Arogo tangatetba aser shisatsü tajungtiba agi tim tuyuyim sabang balala ajanga tangazüktsü sayutsüji Arogo shilem kar ta angatettsüla. Iba nungi arogoi tashiyim aser ochimashi lenir aser Govrnment anema ola madoktsüla ta mangatettsüla. Arogoji ochi  angatetdaktsütsü jatet.

Nüngjatet Arogo telok Baptist-i amangba

Nübur aikati, temerük Tatar-Shimtetba Arakzüyim ya kanga junger aser Arogoi iba arakzüyim nung shilem tajung agitsüla ta jembir. Aser ano aikati bilemer, Arogoi temerük Tatar-Shimtetba Arakzüyim nung shilem agiba ajanga teimla (hope) kar ta amanger. Engraji oshi nung ashi ama “Church should not only as a barking dog but a watchdog that is feared and revered”. Anungji Arogo kaji asang-a (barking) aliba azü kisüng masütsüla saka mita ataba azü koba ajanga tetsübu aser akhüm agütsür yamaji asütsüla. Idakji tangatettsü aika kar, saka tongtibang kaji, Alima-tsütsü nunga aser Tanela-tsütsü nunga Arogoji nüburtem nem teyongya atalokdaktsüba senden ka ta angateta amangtsüla. Kechiyong nübur aikati Tatar-Shimtetba Arakzüyim nung kechiba Arogoi shilem agitsüla ta ola aiben adoker aser nemnemer. Temalen shisem ama, Arogoi party Yimdenyimpong (Politics)  asayaba  nung  shilem magir  saka Arogoji,  Khristanpurtem senden,  asü nung nübur atema mita aliba senden asütsüla ta angateta iba Arakzüyuim nung tamanger ajaki shilem tajung agitsüla. Tsüngrem denbo tamanger tajung, saka nübur aser alima teraksa nungibo Pilat yimjak nung teka shitokba ama masütsüla, saka tamanger shiaji meyongnem maparen ajak nung senso tajung ka ama pei temeten shitak tata shilem lir ta angateta tangar-i rakmoka meyutsüi pei pei shitak shilemji inyaksangshitsüla.

Baptist tamangba Arogo nung tamanger shiaji putir kaka ta tangatetba akangakanga liaka, ano item putirtemji ketdangsütsü aser nüburtem tajungba nung Tsüngremi mulungba nung bener aotsü nükjidong nung Arogoji mita ataba Arogo ka-ka asütsüla. Yisui Tasen Laishiba nung yamai jembia aliba angutsü, “Ajangla kechi Kaisar meyong aji Kaisar nem agüjang aser kechi Tsüngrem meyong aji Tsüngrem nem agüjang.” (Matt. 22:21; Luke 20:25) Iba Lai tesayuba nung ajemdaker, nüngjatet Arogo telok Baptist-i (Baptist Denomination) alima yimsüsüba den Arogo Yimden balala ta agizüker. Aser iba Laishiba tesayuba dak ajemdaker, Yisu Khristar Arogo aser Alima Yimli, iba ana ya pila-a ayutsü atema taküm bendanga agüja noktakba alima aser Arogo otsütem nung angutsü. Iba tesayuba nungi pila-a Arogoi yimdenyimpong asayaba (politics) nung shilem agir masü saka tamanger shiaji Khristar Arogo nung kechi koda züngsem kaka lir yamaji Alima yimli nunga senso kaka lir ta tangatetba nung shilem agir to angatetdaktsüner.

Alima Yimli nung Arogo teinyaktsü Laishiba tetuyuba kar

Kechi koda nüburtemi Yisu Khrista dak jangja amanger, yamaji tamanger shiai Arogo aser Alima Yimli anapronglaji Tsüngrem-i tenzükdaktsü ta angatettsüla. Saka ya angatetdi: nükjidong aser inyakyimbo balala. Item inyakyim tebendang indangji Laishiba nung jangja janga lateta yutsüba angutsü. Alima Yimli teinyaktsü atema Rom 13:1-7 tashi nungji angutsü aser Arogo teinyaktsüji Matt. 28:19-20 nungji angutsü. Anungji iba telok ana yagi kati ka madak yimsü asütsü makok. Saka ano tamanger kija shiaji Alima Yimli aser Arogo Yimli anaprongla nungji senso kar ta jangja angatetdi. Anungji Yisu Khrista dak amangertemi Alima Yimli tashi itdaktsütsü asoshi; ochi inyaktsü, temeim sayutsü, tata shilem mapa shitak inyaktsü, azüoktsü, pei sünütsü masütsü, aser tindang shisatsü agi nübur meima tenzüktsü (service), yamala temetongshiba agütsütsü akok. Laishiba nung I Timoti 5:20, yamai shia ngutsü, “Tamangertemia tsübutsüsa temenen benshirtem yimjak manung arürjang”. Ano 2 Timoti 4:2, “nai oji sayutsüngiang; mapang nung aser mapang masüdang jangra-ang; talangka aremzükba aser sayuba ajak agi arürjang, metongshijang, ajungshiang”. Kechiaser pa/laji Alima Yimli nungji senso tajung kaka ama inyaktsüji kanga dang tim aser shilem tulu lir ta ajaki angatetdi. Alima Yimli yangerba nung ochi kuli Arogo kuli mesütetra, idangji arogo kuli samar.

Arogo Yimli aser Alima Yimli tesentaktep aser tepila ratet

Arogo ya Yisu Khrista dak amanga Pai sayubatem taküm yimya aser tamang nung benshia amangba lokti ka lir. Iba telok nung ya Yisu Khrista kibur aser tekolak lir (Ef. 1: 22-23; 4:4; 5:23; Mat. 16:18). Anungji Arogoji Yisui lateta yutsü ta idaki angur. Yamaji Arogoji Tsüngremi Yisu Khrista nung ayongtepba nüburtem mesüra amangba purtem lir. Iba telok dangji Tsüngrem nübur mesüra Tsüngrem Arogo ta ajar. Aji Khrista ajanga Tsüngrem kinunger (Ef. 2:19) aser Khrista Tamang nung ‘tenük-telen’ lir. (Rom 12:4; 1 Kor. 6: 15).

Alima Yimli ta kodang südir yangi yimli ka inyakyim aser inyakren ajak dena lir. Tzüzüng-ozüng latetba aser aji timi achaayanga inyakba mapa ajakji Yimden Yimli mapa lir. Asen Aor Jungliyimti putu mapang nungi yimtsüng shia pei jurila, tangar dak memetaloki yimli yimsüsüba timi bener aru. Iba ama yimsüsüba tazüokba küpok nüburtem azüoka yimjung, tesünep, azükaru, teputep, akhümtsübutep, telungjem aser tesendaktep adokdakja inyaktsü Alima Yimli dak tashi ka-a benshia aru. Tanü-a Alima Yimli ya ajaki akhüm keta asüngteta ayutsüba menden ka ta agizüker, anungji külakkeponger, ochimashir, nübur memeimer mesüra mashimalur nem iba Yimli menden nung shilem magütsü. Ochi mapa ajanga Alima Yimli asüngteter aser ajongketer. Yamaji iba alima yimsüsüba ya alinük ajak nung tanü tashi amshir aser iba alima yimli tashiji nübur nungi angur. Anungji Yimden Yimli ochimashir, kelakkeponger ket nung meyutsütsü arogoi sayutsüla.

Arogo aser Alima Yimli anaperongla kati ka yaritsü metongshitsütsü nükla tasen agütsütsü nükjidong asütsüla. Tetezü, temetongshitep, teyaritep aser nükla tasen agütsütepbaji Arogo aser Alima Yimli tesendaktepji lir. Alima Yimli-i lokti terenlok asoshi kechi sendongsa yanglur idakji Arogoi yaritsüla, nüburtem ajongmesotsüla, ochi nung takok ngudaktsütsü lemang sayutsüla aser takok ngudakjang ta sarasademtsütsüla. Arogoji Tsüngrem temeim aser taochi dak tera yanger inyaker asü nung Tsüngrem O-i kechi tuyur yamaji bangtak ochishia timi inyaker asü masü aji mita ochimashi lira metongshidaktsütsüjia Arogo shilem rongnung ka ta angatettsüla. Yamaji süaka kati ka dak temetongshiba agütsütepaka, kati ka dak tashi mamshitsüla.

Arogo aser Alima yimli anapronglaji Tsüngremi tenzükdaktsü, saka nükjidong aser inyakyim balala. Alima Yimli-i senso atema dang sayur, saka Arogoibo anaprong alima aser kotak senso atema sayur (Fil. 3:20). Alima Yimli teinyaktsü Rom. 13:1-7 nung angutsü “nisung shiai yimsüsürtem kübok liang, kechiyong Tsüngrem ain alema tanga mali. Aser kechi bangdak lir aji Tsüngremi shimtetba, anungji shibai iba bangdak anema noktaker, pai Tsüngremi shimtetba anema noktaker…’ Aser Arogo teinyaktsü Mat 28: 19-20 nung angutsü ‘anungji nenoki oang aser kin ajak nütsüng kümdakjang…aser ajiang alima matem tashi ni nenok den teti tena lir’. Anungji iba telok ana yagi kati ka madak yimsü asütsü makok, saka kati ka metongshitepa alitsüla.

 Arogo aser Alima Yimli ana inyakyim aser nükjidong tepila kar

  1. Alima Yimli dak tzüzüng-ozüng latetba, ozüng agütsütsü tashi lir aser ozüng tashi ajanga nüburtem ajonga azüoka ayur. Saka Arogoi ozüng agüja nüburtem azüoktsü mesayur. Laishiba ya Arogo asoshi tematiba ozüng koba ajanga nüburtem temeim, ochi, taidoktep aser teyaritep ajanga kecha tebendang mali lokti ajonga ajungtsü asoshi inyaker.
  2. Alima Yimli tongtibangtiba teinyaktsüji alinük telungtet ka nung aser nütsüng tasazük telok ka koda tejakleni tindang agi ochi shia odaktsütsü aji nükjidong yur asa-meyang ajak yanglur.  Saka arogo teinyaktsüji alinük ka telongtet aser nübur telok ka rongnung asazüka ayutsü makok. Tsüngrem Yimli-ji masadangtet aser asazüka jembitsü aser ayutsü makok.
  3. Alima Yimli-i ozüng yanglua iba jagi nüburtem obendang agütsür, saka Arogo nung temeim aser taremzük ya ozüng tulutiba lir.
  4. Inyakyim balala asünung kati ka mapatong nung meinprong masür, saka tamakok aser teraksa adokdang metongshidaktsütsü akok.
  5. Alima Yimli-ji nübur tashi aser shisatsü agi yimsu asür saka Arogo nung Khristaji tekolak, Pa dak tera yanga nüburtem tanela jenjang aser libaliru yim nung tejakleni odaktsür.
  6. Alima Yimli-ji lokti mulungba yimli (democracy) opang aser tangatetep agi yimsü süa bener aor, Anungji iba lokti yimli nungji Arogo nung züngsem tamanger ajak senso tajung kaka ama shilem lir. Saka Arogo yimli nungbo Alima yimli nung inyakertemi tashiyim agi teka ait-tsü makok. Koda masü tensa tia ajuruba mapang Arogoi asüngdangra yangji shisatsü agütsütsü akok.

Item ajak jakai jangja jangja sayur, Arogoi “Tatar-shimtetba Arakzübayim”, nung matidaki ochiba pokhümer ka ama shisatsü tajung agi shilem agitsüla.

Otsüren nungi tangazüktsü kar

Yimsüsür tajung shimba agi alima tejekleni odaktsür aser nüburtem yimchiyimjung nung lidaktsür, saka ochi mashi, tashiyim aser pei atema dang bilemba lenir alima telongi ludaktsür. Yangi lenir ana tatishitsü shiner:

Gregory, the Great

Alima nung Khristar Arogo nung Arogo tongti lenirtemi shilem agiba otsü nung Gregory the Great yagi shilem tajung aika Arogo Yimli nung dang masü saka Roman Yimli nunga shilem tajung agiba angur.

Gregory the Great ya 540 CA küm Rome nung aso, aser pa ya Tsüngrem akhümtsübuba aser tetemjen kibong ka nungi liasü. Pa tenüng Gregorius Anicius liasü saka pa mapa tajung ajanga pa dang Gregory the Great ta ajar. Pa tebou (great-grandfather) jia Arogo nung tongti lenir ka shiba Pope Felix III liasü. Aser Gregory küm 32 asüdang Rome yimtiba nung Tongti lenir ka ama shimtet. Iba mapang tia maka pa tebu-a süadok, saka pai Rome nübutem asoshi mapa tajung aika dang inyaktet. Item rongnung tongtiba kaji Rome aser Silcily nung Putir Rüjutem (Monastries) trok (six) tashi pa mapang mesümtet. Item mapa tajung inyakba ngua, Pope-i pa dak temulungtetba aser tindang mulungsentsü tajungji ajitet nung pa Anüdoklen Constantinople-i tongti tenzüker ka ama küm pongu (578-583 AD) atema yok. Küm pongu Constantinople nung tenzuker külen, pa Rome-i ano tanaben meyiba aru aser Rome nung Putir Rüju nung Putir Tekolak (Abbot) asütsü shimtet. Iba ama Putir Tambusang mapa nung tenzükdang pai rongsen, konang aser alima tashi indang mebilem saka pa mulungjang nung teti Tsüngrem-i mulungba kechi aji angateta aser Tsüngrem jashidaktsüba mulungjang nungi pila tenzüka liasü.

Iba mapang 590 CA nung Pope Pelagius II kodang asü, nüburtemi Gregory Pope asütsü shimtet. Pa nem Nüngtet (Title) Gregory the Great ya agütsü. Rome nung Pope aikati iba ama nüngjatet tajungji monguteter saka pa nembo iba nüngtet ya agütsü. Pa ya Latin Arogo nung shisa-rajmer (Doctors) par pezübuba Ambrose, Jerome, Augustine and pa liasü ta Arogo otsü nungji angutsü. Aser pa 604 küm Rome nung asü. Pa dang ya “Tsüngrem Tenzüktem rongnung Tenzüker ka” taa züngshir (Servant of the Servants of God).

Gregory nungi tangazükltsü kar

Anüolen (West) linük nung kodang meren merena aliba Roman Yimli laotsüsa akümdang Gregory the Great-i shilem tajung aika agiba ajanga Roman Yimli tamajungba tia nungi kümzükba alima otsü kakettem  nung angur. Pai tongtibang shilem agibatemji:

  1. Gregory inyakba tajung kaji, Rome kübok yimti balala nung Tatar shimyim nung pai shilem tajung agiba angutsü. Pa nem Tsüngrem Tenzükertem rongnung Tenzüktem ka ta nüngjalok agütsüba tongtibang kaji pa dak tindang aser ochi shisatsü den temeshi aser nübur meimba taküm ka ama litet. Iba yongji nüburi pa dak temulung lemtetba ama pai tasü itta Tatar-shimyim nung ochi agi shilem tajung agiba ajanga, nübur meimer aser Tsüngrem meteter lenir tajung aika shimteta Rome yimli tashi maiti kümya aliba tashi itshia kümdaktsü. Nüburtem dang ochi shir liner shimtsü ajang ajanga sayu aser temelenshi bener arutsü.
  • Tanabuba shilem agibaji Roman sepaitem (armies) shimba nunga shilem tajung agi. Ajaki sepia jenjanga ngutettsübaji nükshia bilem aser raktep. Alima yimchiyimchung nung yutet atema tasü tait, ochishir aser pei taküm tenla agütsütetba sepai shimtettsü nüngdak ta sayu aser sepaitem jenti renlokkdaktsüba angutsü. Anungji ochishir, tasü tait sepai renlokdaktsüba ajanga Rome yimli tashi itshia aküm.
  • Tasembuba nung, pai alima kin-o-kin-na tsüngda nung yimjung aser tesendaktep tajung adokdaktsütsü asoshi shisatsü aser nübu tajungtiba agi shilem agiba otsü nungji angutsü. Yimjung mapa indang sayuba dang masü, mapa agi inyaka sayu.

Yamaji Gregory Arogo Yimli nung dang shilem agi masü, Alima Yimli nunga nüngdaka shilem agi. Rome yimli ama mesüaka, tensa mapang den apet Arogo-ia tim ta angateta terepranger kisüng dang masü, saka tim tuyuyim sayutetba Arogo ka ka asütsüla. Yamaji Gregory-i Arogo aser Alima Yimli yangerba nung shilem agi.

Adolf Hitler

Senator Bernie Sandersi shiba America nung par Alima Yimli nung yimsüsür tejangja ka aser lokti teyanglushi asoshi tenzüker ka (Politician and Activist), pai yamai ashiba yamai ashiba  angutsü, “A guy named Adolf Hitler won an election in 1932. He won an election, and 50 million people died as a result of that election in World War II, including 6 million Jews. So what I learned as a little kid is that politics is, in fact, very important.”  Adolf Hitler 1932 küm Tatar ka ama shimtetba ajanga alima aser nübur dangi takoksa aser tesamba jenti bener arutsüba alima otsü nungji angur. Sanders-i ashiba o nungji tangatettsü aika dang lir saka item ajak dang nungi asenoki ya angatettsü akok, Sandersi shinüba tongtibang kaji ya lir. Asenoki Tatar shimbaren nung tim mesüi, yimya masüba ajanga shimtetba agi alima aser nübur asoshi takoksa adokdaktsür ta iba indang shinur ta angatettsü akok. Anungji tatar shimba nung senso shiai kanga dang aroka shisadanger shilem agitsübaji tongtibang. Aseni koma, shiba, aser koda Tata shimyim nung shilem agir iba jagi aseni atemba süngjangji sayutsü. Tanü Nagaland kechi tia nung lir, iba jagi kechi election nung koma shilem agi aji sayur.

Lokti mulungba yimli (Democracy) inyakyim nungji kodang reprangdangtir, tatar shimtetba (election) ya kanga dang tongtibang ka lir. Aser nüburtemi shir Tatar shimtsüar iba shim-yim yimya ya angtettsü kanga dang tongtibang. Yamaji, aiben asenoki Alima Yimli asoshi Tatar shimba-yim nung tim mesüi shimba ajanga lokti nung aser nüburtem atema aiben timtem aaser takoksa jenti ajuruba otsüren balala ajanga angutsü akok. Adolf Hitler shimba yimya yagi asenoki angateter, ochi nisung, nübur meimba mesura Tsüngrem akhümtsübuba lenir shimyim nung shimba masü saka, ozü kin, ozü telok, ozü tsükong, amok merena, takok asa-a shimtepdang Tsüngremi momulungba nübu aiben shimtsüsa akümer aser iba jagi lokti libaliru nung aiben timtem aser takoksa jenti adokdaktsütsüsa ajurutsü akok. Iba timtemji tanü Naga nungeri ajurua lir.

Ano aiben asenoki Alima Yimli nung Clean Election indang kanga jembir saka kü tangatetba agibo, clean election ta kodang südir iba yagi temerük, temeshi, mesüra merük-merüka ta angateter. Anungji Arogoi tim tuyuyim sayutsübaji kanga tongtibang ta angateter. Item rongnung tongtibang ka sayutsübaji, nüburtemi koda Alima Tata shimyim nung shimer (how to elect politicians) aji kanga tongtibang ta angateter aser nüburtem nem angatetdaktsütsüla. Kachiba süra, Alima yimli nung Tatar (politicians) and Tatar shimyim (election), nübu aser yimya ajakbo kasa masü mesüra ajakbo ano kasa tamajung mesüra memürük ta mangatetli. Lenir tajung, nübur meimer, Alima aser Arogo asoshi meima bilemer Tatar tajunga jenti kar. Iba youngji aseni ya jungjunga angatettsüla. Senso shiaji pei pei shitak tata shilem kar aser aji shingaia rakzüka mamshitsüla. Kari pei shilem meyongnem (vote) amokpanga tashiyim agi agira, pa/laji rakzükraktemer aser item mapa Tsüngremi sembar (Isaia 61:10) “Ni Kibubai ochi meimer, aser tai mena-a rakzükraktemba sempar, ni parnok nem parnok taa lepa atangji agi agutsütsü…”. Iba ama mapang shisatsü aser tangatetba tajung sayutsüji Arogo shilem lir ta angateter.

Otembang

Alima aser Arogo Yimli tepila aser tesentaktep, aser arogo aser tamanger kija teinyaktsü kar lemsatepogo. Gregory tesayubatem balala ajanga Arogo nung dang masü saka Alima yimli nunga temelenshi jenti bener aru. Pa taküm aser mapa agi sayuba ajanga temelenshi bener arutsü. Gregory-i tensa aser maparen jenti ajuruyonga pai Tsüngrem tsüngdang nungi mepila. Iba amaji nisung shiai Tsüngrem den tesentaktep tajung yutetba den teraksa yimli yanglushitsür kaka asütsüla. Kodang asenok dak iba Tsüngremer shisatsüji lidir asenok dak tangazükba jenti aliba nungji tai aser shitak, tamajung aser tajung, mashikoshi aser tindang bendangtettsü. Nüburtemi Adolf Hitler shimra takoksa aser tesama jenti adoktsütsü. Shir, Shiba, Koda timi shimtsü ibaji bendangtettsü. Teyanglushir asü, teraksatsü yimsüsür shimtsü?  Tsüngrem tsübuba, ochi aser nübur meimba yimsüsür shimdi aser iba Alima Yimli yanger mapa nung marendaki arogoi shilem agidi ta ayongzüker.