Ao Kaketshir Mungdang (AKM)-i Class 10 nung tamakok ngur alirtem atema kümshi achayanga agiba “free coaching class” tenzükba sentong 13th Oct nü yangi AKM conference hall nung agiogo.
Iba sentong nung EAC Zerutso-i jembidang, shir lenisüba mapang nung iba mapa tajung ya tenzükogo, parnok nem tenüngsang agütsür, adangji ibai jangratemtsü tamaren mapa ka lir, ta ashi.
Iba free coaching class tenzüker külen nungi tesayur shirnokisa yaritepa arudar aser yariteptsüba lir, parnok ajak nem akhüm agütsür, ta pai ashi. Chirnurtem takok angutsü aser tajung akümtsü asoshi tesayurtem dang masü saka tsüraburtema sakuku teinyaktsü shilem lir, ta paisa shisem.
Tanü alima nung takok angur nisungtem ya reprangdangra parnok aika taküm nung teti dangbo takok ngua atuba masü, saka taküm nungji khenkhen/aiben tamakok angurtema lir, anungji, taruba kümbo yangi coaching agirtemi takok angutsüsa tajungtiba agi angazüktsü aser lesson meranga azüngtsü asoshi paisa tayongzükba agütsü.
Iba ya angati coaching class ka dang ta sür shingaia pongbapongba magitsüla, AKM-i free coaching class tenzükba nükjidong angateta ajaki ret-reta agitsü asoshi paisa shisem.
Taküm iba coaching nung Maths, Science, Social Science aser English subject-tem nung takutet tesayurtemi tesayuba balala agütsütsü aser taküm küm kaketshir 30-i iba maongka ya agir. Coaching agitsüpurtem atema Mokokchung town Baptist Arogo (MTBA) Youth Mentor, Pangerjungshilai temoatsü meshia sarasademtsü.
Tanü iba free coaching tenzükba sentong nung AKM ketdangsürtem den coaching agitsüpur aser parnok tsürabur/guardian-tem arua aden. Sentong nung AKM tatong tir – Yimjungsunep, repsem zülur – Nangjenkala Tzüdir, AKM shisaliok zülur – Chubameren Imchen parnoki shilem agia liasü. Iba coaching class ya sorkari latettsüba SOP shitak amshia agitsü, ta AKM ketdangsürtemi metetdaktsü. AKM-i free coaching class ya tamakok ngur alir lanurtem ajungshitsü asoshi 1997 küm nungi tenzüka tanü tashi metitemi arur.
The Nokinketer 