Tsürabur aser Naga nunger lenir taoba Nagaland Chief Minister aser taoba Goa, Gujarat, Maharashtra aser Odisha Governor Dr. S.C Jamir arishi küm 90 ajungba nüngtem District Congress Committee Mokokchung (DCCM)-i pa asoba anogo Oct 17, 2021 nü parnok party office nung sentong tajung ka ayongzüka mungogo aser Orphanage, district jail, Covid-19 Hospital aser Covid-19 Care Centre-tem semdanga chiyungtsü kar ajanga lemsatep.
Iba sentong nung taoba MLA aser tang NPCC Vice President – Supongmeren, NPCC Vice President – Alemjongshi, NPCC Legal Advisor – Maongkaba, NPCC Secretary – Sashimar, DCCM President – Watimongba, MDCC President – Chubala, MDCC Vice President – Rongsenla parnoki shilem balala agia tepela o den tayongzükba o tulu bener arua tesentepertem ayongzük. DCCM General Secretary (Admin) – P. Aley-i Dr. S.C Jamir indang taküm otsü tatsüka metetdaktsü.
Sentong nung NPCC ketdangsürtemi anir DCC ketdangpurtem, DCCM advisor-tem, Mahila, DYC, ACCC, Seval Dal, Arkong Ward yimden aser temulungertem arua aden. Taoba MTBA pastor Rev. Luin ajanga lenir Dr. S.C Jamir asoshi temoatsü meshia sarasademtsü.
Jangratemtsü kaji; Dr. S.C jamir tasoba anogo tenüng nung Congress teloki Sabangya nung Care & Support Society-i anepaluba Orphanage, Mokokchung District Jail nung puoka alirtem, Covid-19 Hospital nung shiranga amungertem, Covid Care Centre (CCC) nung amungertem semdanga chiyungtsü tapu balala ajanga lemsatep. Iba den Dr. S.C Jamir ya Mokokchung town kübok Arkong Ward nungi asünung, Arkong Ward nung tambusang aser tantsütila nem senpet sen terara senpettsü.
Ungma nunger Dr. S.C Jamir ya asür Senayangba Jamir aser asür Takatula na jabaso lir. Pa 17th October, 1931 nung Ungma yimdak aso. Pa Mokokchung, Kolkata, Allahabad nung zünga B.A, LLB renem. 1958 küm Imkonglemla den kibong aküm. 2017 küm University of Cambodia-i pa nem Honorary Doctorate agütsü, nübur tenzükba mapa nung pa nem 2002 küm GoI-i konang tulu aketba ‘Padma Bhusan Award’ agütsü.
GoI o Naga nunger tsüngda tenangzüktep yangluba koba dang “16th Point Agreement” ta ajar, iba otsüsütsü aket nungji Dr. SC Jamir ya meyongnem agir rongnung ka lir. Member of Parliament ka ama 1961-1970 tashi inyak aser iba mapang Union Deputy Minister of Railways, Labour & Rehabilitation, Union Deputy Minister of community development & cooperation, Food & Agriculture mapa inyak. Iba den Prime Minister Jawarharlal Nehru indang parliamentary secretary inyak. 1962 küm GoI tenüng nung UN delegation züngsem ka ama shilem agi.
Iba sülen Nagaland chief minister pungben tashi inyak (1980, 1982-86, 1989-90 & 1993-2003). Pa ya Rajya Sabha nunga Nagaland state nungi 1987 nung ao saka 1989 nung iba mapa toktsü. State politic toktsür 2004-2008 Goa governor inyak, aji sür 8th July, 2008 nung Maharashtra governor shim aser iba mapang July 2009 nung Gujarat governor dena repa aben, aser 9th March, 2013 nü Odhisa Governor shim. Joko tain akümerji pa akhi ama politic nung yakyakabo meinyaker saka pa ya congress party asoshi state aser national level nung nüktang tajung ka lir.
(Source: Tir Yimyim)
The Nokinketer 