Kr. Oshyajem-i züluba sangro kaket ‘Ineffable Muse’ tesayur Bendangsenla-i sayatsüdang sangro zülur den lar kinunger aser sentong nung shilem agirtem noksa nung angur. Mokokchung, 30th October, 2021

Sangro zülur kongro Oshyajem Longkumer-i English oshi nung züluba ‘Ineffable Muse – A poetry collection’ ta sür sangro kaket ka 30th Oct, 2021 nü Fazl Ali College (FAC) nung English sayur Bendangsenla-i Urban Hub Café Mokokchung nung meraketa sayatsüogo.

               Iba kaket nung sangro 85 lir aser item sangrotemji tapu pezüsü küma lemsar angutsü. Mezüngbuba telemsaji – Lockdown Love Series (sangro 31), tanabuba telemsa –  Lockdown Phase 1, 2020 (sangro 21), tasembubaji – Life’s Encounter (sangro 23) aser pezübubaji – Nature Inspiration (sangro 10) keta angutsü. Sangro teimbaka Covid-19 wara mapang zülutemba lir.

               Iba sentong nung sangro kaket zülur kinunger nungi teko Nagaland Housing & Mechanical (PWD) Minister, Tongpang Ozükümia mapang tatsüka agia tepela o den ano tarutsü nunga sempet maneni amshia zülutsü ajungshia liasü.

               Mokokchung nung alir English temeja nung sangro zülua kaket küma adokbajibo ibai mezüng asütsü, ta osang ajanga angazüker. Iba kaket ya amazon nungi mangatettsü (order sütettsü) aser Nagaland nung tongtibang kaket ayokdak senpak 299/- agi talitsü angutsü. Ineffable Muse kaket ya Blue Hill Publications-i menüngtsü.    

               Ungma tsür Kr. Oshyajem Longkumer ya tesayur ka aser la ya Assam Don Bosco University nung research scholar ka lir. Lai sangro azüngtsü aser zülutsü kanga jangrar. Iba kaket ya sangro zülur tsürabur nüngtem nung züluba ka lir. La indang tali metetnürtemi Insta@oshy.longkumer.poetry ajanga reprangtettsü.