~ Wati Longchar (Serampore)

Mangkolemba nung nüburtemi lenmang yanglujang ta longkak aitbaji tim aser Govt. tashi mait, tamakok sayur.  Kechiba kümsasa küm lenmang meyanglutsür,  Jangpetkong aser Japukong nungi shirnok tata menden nung mena lir parnoki nüburtem dang kuli ashitsüla.  Protest asüba ya Khristan teinyaktsü tongtibang ka lir. Kodang asenoki “Protest” ta südir, azü tokshia prangpong amer nisung kaseta, kiojen raksaja, rungtokja raraba amai bilemer. Iba dang ya ‘protest’ ta majar, saka ‘violence’ ta ajar. Khristan kati azütokshia lendong adokdaktsüba mapatemji aitsütsüla aser yimjung asoshi inyaktsübaji tim.  Saka küm aika dang lenmang meyanglutsüi yutsüba anema nüburtemi noktakbaji tim inyakogo. Ochi nung ammeter ochi mashi mapa anema lokti ajungtsü asoshi ochi matalokdaktsü tashi longkak aitbaji tim aser ibala mapa nungji arogo aser civil society balalai nungitettsüla. Political motive kecha makai Khristani protest mapa balala ayongtsü aser inyaktsü akok. Tat. agi, procession ayongba, hunger strike,  tenla kidang ochimashi anema Lai O sayuba, lokti senden balala nung lecture agütsüba,  pamphlet, sticker, a.a. ajanga  tai tuteta sayutsübaji citizen right. NBCC-i anir yi tongpang nung raraogo, aser paper nung dang asüba agi dangashi takok nguogo ta shitet. Alima otsü nung protest ajanga temelenshi bener arutsüba aika angur. Martin Luther, Calvin, Abraham Lincoln, Martin Luther King, Jr, Elizabeth Cady Stanton, Bonheoffer, a.a parnoki anir protest asüba ajanga temelenshi adoktsüba angur. Laishiba nunga lenir, ainkartem kodang ochi asoshi protest asü YSS nung Zülu Jamir-i tatishitsü aika shiogo, aika dang angutsü aser protest asüba ajak nungji temelenshi bener arutsüba angutsü.  Alima otsü nung azüklen/tekalen  alir nungi temelenshi bener arutsüba mangutsü, saka nüburtem shirnok nem basic rights magütsüi ali parnoki ola adokba ajanga dang temelenshi bener arutsüba angutsü.  Nüburtemi ochi ola madokra tulurtem aser yimsüsür asoshi tepelatsü dang aser parnoki nüburtem asoshi kecha meinyaktsü. Lokti terenlok sen  ajak parnoki dang agiatoktsü. Aji tanü Nagaland nung asangsang ataloka lir. Mapa meinyak, saka sen agiatokba state ka kümogo. Mapa kar inyakbaji leniri pei jurila donation agütsür inyakba amai konang küma jembiba angutsü, saka aji pa/la sen masü, public sen ta metettsüla. Ashiko Aor yimsüsürtem aikati kasaji inyaka alitsü shibai metet. Latin American nunger theologian Gustvo Gutierrez-i yamai ashi, “We worship God by doing justice.” Tenla kidang dang masü saka  mapa balala nung sotaka inyakdang, office  nung ochi inyakba,  ochimashi mapa ochi agi confront asüba, tasü tait ola adokba ajak ya tekülem nung shilem ka ta angatettsüla. Iba yongji Korea nungbo mapang shia arogoi nüburtem ayongtena koda ochimashi mapatem anema protest asütsü ibalaji  training agütsür aser ochi movement tenzüktsür aser ajungmesor. Asen lima temelenshi adokdaktsünüra ochi nung akhang akhanga ammeter protest mapang shia aotsübaji arogo tenyaba mapa tongtibang shilem ka lir ta angatetdi.