LOKTI TAKÜM NUNG OCHIMASHI MAPA ASER LAISHIBA

~ S. Temjen Imchen

Okila:

Agüja aliba onük ya asen Aor lokti tentet ka “Yanglushidi Sensaksem Sabang” (YSS) webinar nung Oct 29, 2021 anogo nü ni jembiba onük ka lir. Lokti tuluba dena lemsateptsü bilema iba maongka ya aginür.Onük metenzükdang, nungtugu Arogo lenir kati tawa toang jembiba olen ka yamai asenok den lemsateper:

“Teraksa mapa nung nai koma jashitsü memetetra, sensaker nem agütsütsü aliba sen (rakzüka agiatokba nung), saka tashikar nisung süpoki iatoker, süra nenoki amangba Khristan yimsü nungji tai ka lir. Nisung tajungpuri kecha meinyakra, tamajungbai kokatoktsü.”  

    – Archbishop Socrates B Villegas (Dagupan City, Philippines, Aug 30, 2020).

(If you don’t know how to get angry at the corruption, at the money that should be given to the poor, but goes to the pocket of powerful people, then something is wrong with your Christianity. The evil will triumph when good men do nothing!)”

Tanü asen aliba lokti taküm ya ochimashi aser teraksa agi süngogo. Iba indangji Laishibai kechi ashir aser asen teinyaktsüji kechi iba onük tatembanglen lemsateptsü sarasadema tenzüker. Taoba YSS shisatokten nung asen nübur koma Arogoi teinyaktsütem aser asüngsashi tenungdaktsü iba indangji junga jembitepogo. Iba jenjangji nguteter külen tanü lokti taküm nung ochimashi mapa anema koma inyaktsü khuret lir ta asen temulungjang nung yudi.  Iba onük shilem asemsü küma lemsar jembir.

1. LOKTI TAKÜM NUNG OCHIMASHI TEBILEMBA TANGATETSÜ O

• Ali rongsen aginübayong yazü jembiba

(Lies motivated by desire for material gain)

‘Ali rongsen aginüba agi nisungtemi tiyazü jembitsü mulungtetdaktsür’ ta loktilibaren shisadanger mongin nisungtemi ashir (Wiltermuth, Newman and Raj, 2021).  Iba tetezü, kodang iba (ali-rongesen) penbuba jagi yazütsü mulungtetdaktsüdir, tatalokbatemji meshitak asütsü– tangar kelakoktsütsü merangba, iba nung nisungbaji dang masü saka nübura dena taileni anir. Kodang nisungtemi pei tejangraba ajanga yazüdir, parnok kelakoktsüba jaklaji lokti yimya ka kümdaktsür. Tiyazü jembiba ya lokti nung menatepa aor, kechiba ta süra, kechi atalok ibaji tim mapa aser yimya amai bilemer. Temalen shia akaba nisunger mulungsentsü, jakla aser yimya ya tanü asen Naga lokti/yimjak nung lenirtem jakla mesüka lir. Joko, yazü jembiba nisungba jagi, pa/la mulung nung bilembaji mapa küma inyaka aor.  Yazü jembitsü bilemdangba aser jembibajia lokti taküm nung ochimashi mapa ka aser lendong.

• Ali rongsen aginübayong teraksa mapa inyakba

(Corruption motivated by a desire for material wealth)

“Ochimashiba agi lokti aser juri anatsütsülen mejungi menatepa ogo” (Ayal, Gino, Barkan and Ariely, 2015).  Anosa item meimchir mulung aser shisatsü bushirtem (psychological scientists) teloki ashiba agi, tanü lokti  tendak süpokrem aser kelakketem mapa tulu nungi dokan nung auyatepba tashi nung rongsen tulu takoksa ajurubaji shisabulutsü ka lir. Saka, iba dang nungi tebilemtsü tulubaji loktiliba nem tsübudaktsübaji asütsü. Naga lima nungbo süpokrem dang masü, odi-odia dang sorkar tenzüker aser yimden yimsüsürtemi teraksa tulu aser ochimashi mapa jenti inyakba angur. Temalen shisemba ama, meimchir mulung aser shisatsü bushir  teloki ashiba nung ajemdaker, tanü asen Nagaland state nung lokti aser nübur ochimashi aser teraksa mapa inyakba maparen kar reprangdangdi.

• LOKTI TAKüM NUNG OCHIMASHI MAPA

1. Nagaland state sorkar kübok ochimashi aser teraksa mapa:

Iba onük nung ya asen state kübok politician-temi public sen chitsüba (public funds siphoned off by politicians) kar shisadangdi. Politician-tem ta süra Nagaland Legislative Assembly kübok elected representatives, Chief Minister nungi shir MLA tashi; Nagaland state kübok political party lenir aser teinyakertem ta angatetdi.  State yimden aser sorkar yimsüsürtemi asen Nagaland state atema developmental project balala jenti centre nungi mapang shia meshir aser agizüka mapa meinyaki dang sen dang chitsüba report aika lir. Tat. Agi: State Stadium Project (Dimapur), Nagaland State High Court Building Project (Kohima), Failure of Road Projects, Backdoor appointments, aser ano aika lir.

• State Sports Stadium Project (Dimapur) tamakok:

State Stadium Dimapur, mesüra Multi-Discipline Sports Centre (MDSC) koba Lotha Colony, Dimapur nung lir, iba project ya Nagaland state kübok tamakok tulu anguba development rongnung ka lir. Ashiba agi, iba project ya 2006, tang aliba CM initiative agia tenzük. Iba kümji küm ka shilem 10 crores agizük. Yamaji küm trok (six) shia crore 10 senji tashi agüja arur. Iba sülenbo GoI-i financial sanction ji anentsü. Ibaji kechi tai ta sürabang, Nagaland state sorkari ochimashi mapa inyakba ajitetba ajanga lir. Joko sorkar aser nübur ajaki kanga aroka bilemdangtsü mapangbaji tang ya lir!

• Nagaland State High Court Building Project tamakok:

Gauhati High Court (GHC) menjenti ji Gauhati yimtiba (Assam) nung amenloka lir. Iba ya 1948 nung tentet. Tang GHC kübok Bench asem tashi nung o bendang aser tzüzüng ozüng state asem tashi nung mapa inyaker. Itemji yamai (through Re-organization Act of 1971): Kohima Bench for the State of Nagaland (1.12.1972 küm amenlok), Aizawl Bench for the State of Mizoram (5.7.90 küm amenlok) and Itanagar Bench for the State of Arunachal Pradesh (12.8.2000 küm amenlok).

Nagaland State High Court (NSHC) balaka nungdakbayong, Nagaland state sorkar-i NSHC new complex building project-ji Meriema yimdak (Kohima Dist.) 2007 küm nungi yanglua tenzük. Iba project tenzüker külen joko küm ter pezü (14) jungnüa süiaka, tang tashi tasenba NSHC complex kiji merenemteti yanglusar dang yua kar. Sen ochimashi amshi, ajia agi, kiji merenemteter ta angazuker. Iba tasenba court complex building project meyong sen tim mesüi amshibayong, Gauhati High Court ajanga CBI nem ibaji bushitsü nungloktsüogo. Iba court inquiry ji May 2, 2018 küm tenzüka bushitepdaki ta osang kaket nung zülua angutsü (see ‘HC asks CBI to conduct probe into Kohima HC complex scam’ https://www.business-standard.com/(accessed on October 5, 2021). Ashiba agi, küm ter tsüngda nung mapaji 35% dang inyak, saka senbo Rs 52.63 crore agizüka chitsü ta Bench jagisa ashi. Mezüng DPR (detailed project report) nung building project ji Rs. 161.10 asü. Saka, project menubayong (as per 2016 rates), revised total costs ji Rs. 200 crore asütsü ta affidavit ajanga metetdaktsü.

Ya metetdi: Centre-ibo state nem sen sanction asü, saka state sorkar-ibo sen dang chitsü aser building project jibo tamakok nung yutsü. Kishikina state purbo – Manipur aser Meghalaya – kasa mapang nung building project tenzükba, pibo Manipur State High Court, Meghalaya High State Court ta yangerteter aor. Parnokibo renemtet, Nagaland state dang kechi asü? Lokti nung ochimashi mapa agi asenok kangshir!

• Road Projects Tamakok anguba:

• Jotsoma-Phesama road project tamakok:

Asen sorkari inyaksaba mapa rongnung kuli kaji Jotsoma to Phesama public lenmang – fourlane – yanglutsü centre-i approve asü. Ibaji road project atema centre-i Rs 542.47 crore ajanga state sorkar nem agütsü, saka mapabo meinyak ta taoba CM aser Opposition Leader T.R. Zeliang ajanga sorkar dang ayimoktsü (see The Outlook India, Oct. 28, 2020).

• Nagaland Foothill Road Project:

Nagaland state nung public road building project tongtibang rongnung, Nagaland Foothill Road Project yaa ka lir. Iba project kangasa tongtibang – kechiyong iba lenmang renemtetra, Nagaland o Assam artsü nung Disturbed Area Belt jaka aser yimtem paitoktsü aser Nagaland litsü nung dang asenok jajatsü. Iba NFHR asadangba nung 400 KMs shi – Khelma, Peren district nungi Dimapur ajanga Tizit town, Mon district tashi otetba lenmang ka asütsü. Naga nunger asoshi kangasa tongtibang lenmang ka asütsüba sürnung Nagaland sorkari 2013 küm earth cutting, Doyang bridge, item amala ajak yanglua tenzük. Saka mapaji anenatok. Kechiba ta süra: tang aliba state leadership jagi temulung magütsü (may be its not within the state capital!), sen peria sanction masür mesüra, contractor-i mapa meinyak, item amala timtim aser ochimashi mapa aika keta lir. Tanü tashi iba Foothill Road project anosa taküm aliba ya Nagaland linuk Civil Society Organizations (CSOs), tat agi, Nagaland Foothill Road Coordination Committee (NFHRCC), Ao Baptist Arogo Mungdang (ABAM), aser ano tasensa Rising People’s Party (RPP), etc, item amala loktitemi nungitba ajanga lenmang yanglutettsü teimla lir. Tawa toang, Nagaland Chief Minister – financial aid agüja yaritsü ta nangzükogo. Iba tenangzükbaji kodang ataloktsü ashitsü makok! Kechiyong, nüburi state leadership dak ochimashi aser teraksa mapa tulu inyakba mapang talang ka nungi ngua arudagi. Ano tanga centrally sponsored schemes (CSS) aikasa tamakok anguba indang teti angashir!

            Ya metetdi: Tanga linuk (outside or within India) nungbo, centre aser state sorkari pei nübur asoshi public road, healthcare, educational reforms, etc, item amala junga inyaktsür. Saka Nagaland nungbo CSOs ABAM aser RPP telok yagiang NFHR lenmang sen teyari aser crowd-funding asütsü apusor. Tamalen ABAM-i iba ‘state expressway’ yangluba nung agitsü tenla tajung – Rs 36,56,282 Nagaland state sorkar nem 2019 küm agütsüba nüburi meteta lir. 2021 küm RPP political party-i foothill road project ji crowd funding ajanga Rs 10 crore sarudentsü teimla yur tang fundraise campaign odagi. ABAM aser RPP inyakba mapaji kanga tajung, saka teraksa aser ochimashi sorkarji teraksa dang tali inyaktsü temokdaktsütsü akok!

Khen bilembo, CSO telok balalai sen teyariji asen NFHR project atema magütsü tajungba! Kechiba ta süra, public road yanglutsüji sorkar mapa. Saka, nüburi lenmang yanglutsü tenla sen agütsübayong. ochimashi sorkar jagi ano mapa tamajung inyaktsü tali renlokdatsübaji majung. Govt. project aika tamakok nung dang ayuba atema, lokti balalai ochi-ola adoktsü tim!

State sorkar madak lenirtemi (CM, ministers, MLAs/lawmakers) ochishia aser nübur meima inyaknungbo, tanungbapuria – bureaucrats, technocrats, Govt. servants, public leaders, contractors, aser nübur ajaki iba tatitshitsü mapa tajungji achizükteptsü. Temalen ashi ama, mapa tajung süang tamajung süang, meimchir aliba lokti nung iba yimyaji ajizüktepa aser menatepa aor. Iba amala ochimashi mapa nokdangtsü na aser ni tebilemtsü khuret kümdi!

• Backdoor appointments:

Ano tanga rongdak onük kaji, asen state sorkar kübok ‘Backdoor appointments’ employment sector nung tatalokba jenti ajangashia aser ngua arudagi. Tejashitsüka, iba ya-a asen state employment angulen tsütsü nung ochimashi aser teraksa mapa ka lir. Osang kaket aser ACAUT (Against Corruption and Unabated Taxation), RPP, Nagaland  Tribal Union Chumoukedima Town (NTUCT),  report ajanga tanü Nagaland state employment jenjang asadanger ashiba agi, Police aser tanga departments nung ‘tezülen-kishi ajanga mapai aiba’ (backdoor appointment) nübur jenti lir. Ibaji lokti nung ochimashi mapa. Ola adoker telok, tat.agi:

• Asen Ao Students’ Union Dimapur (ASUD)-i ashiba agi Home Department nung

nisung 994 backdoor appointments ajanga mapa angu ta ayimoktsü. Anungji, concerned authority ajanga ibala taila mapaji agienang (revoke) ta anung (See “More-come-out-against-backdoor-appointments-nagaland” at https://morungexpress.com/ March 19, 2020).

• Ano, NTUCT telokia sorkar dangi terenemba shiti ka zülu. Iba nungji, 1200 nungi 992

candidate bo Recruitment Tests magidang, Police Training School aser Nagaland Armed Police Training Centre (NAPTC) training agitsü enroll süogo ta metetdaktsü (see at Nagalandpost.com 2/11/2020).

Kasa ochimashi mapa atema tanga Nagaland tribal union aser political party balala –Tenyimi Students’ Union Dimapur (TSUD), Lotha Students’ Union (LSU), The Janata Dal United (JDU) Nagaland, ano aika lir, ajanga yamala ‘tezülen-kishi ajanga mapai aiba’ khenyongi anenjang ta ola agütsü. Home department nung dang masü, tanga department nunga taila lenmang agi Govt. service anguba aika ajangshia arudagi.

Ya metetdi: Asen state kübok alir lanu asensortem  degree tajung ngur (university ana aser talang nungi) aruagi service/mapa bushir. Saka, noklang shilem nung nisung ka-ana dak alaka, tanungba miyirijangsa-meyirijang ‘educated unemployed’ tia-i idaktsür. Ibaji tebilemtsü tulu ta bilema, ochi-puküm nung na aser ni noktakdi!

• Sen meimba yong pei meyongnem tashi (voting rights) ayokba ochimashi mapa

Asenoki metet, Indian Constitution kübok Article 326 nungji ‘Universal Adult Franchise’ (UAF) indang junga rateta zülua lir. Iba UAF ajanga, India linük nung senso kati pa/la küm 18 junger külen (irrespective of their caste or education, religion, colour, race and economic conditions), election nung pei representative shimtsü tashi agüja lir – koba dang ‘sensopur ka meyongnem temeten tashi’ (the power of voting rights of a citizen) ta ajar. Ibaji meyongnem tashi kanga senti süaka, tanü aliba lokti aika nung, Nagaland state nung balaka, iba temetenji senyong yoka achiba angur. Ya aiatai mapa!!! Iba inyakyim ya tesasatsü tulu! Asen tendak iba ochimashi mapa tulu rongnung ka lir. Reprangdangra, iba meyongnem temeten tashi yoktokba indang mesüra meinyaktetba ya lenmang pezüsü nung angur:

• Tatar shimba mapang (election) party worker ajanga nüburtem vote ji sen agi aliatoker;
• Electorate temia pei vote ji senyong ayoker;
• Polling day nü dominant political party-i coup asüba ajanga ataloker;
• Electronic Voting Machine tailen amshiba ajanga ataloker.

Ya metetdi: India linük aser Nagaland kübok alir ajaki iba sensopur ka pei meyongnem temeten aser tashi ji metsüngareta amshitsüla. Iba temeten wazüka ayutsü atema awareness campaign for voting rights inyaka aoba tat.agi: NBCC aser ABAM ajanga Clean Election Campaign ayongzükba nungji Naga sensopur ajaki tashi ita, ochi mulungsentsü agi, nübu aser shisatsü agi yariteptsüla. Taoba campaign nung kechi tila ka ajangzüka lir, iba maparen nungji ano maneni nungittsü kanga junger. Iba jagi 2023 NLA election nung temelenshi karbosa adoktsü imla-a atadi aser meranga inyaktsü ayongzüker!

• Sen meimba yong tangar dang pei livelihood yoktokba:

Tanü asen Nagaland state tendak, employment opportunity maka ta bilemer. Lanurtem aikati school aser college züngzüker külen joko sorkar kübok mapa angutsü dang imla-a atar. Hau, adangji meritorious candidates karbo mapa angutsü, saka tazünger teimba ka mapaji mungui atemtsü. NPSC nung adianu dang shimba, süpokrem agiba, item ochimashi inyakyim jagi asen linük ya majunger aser mainer!

Sürabangla, state nütsüngyongsük aser alima tasazük yari pei-pei sasa mapa bushiteta inyaktsü lenmang aika lir. Tat. agi: agriculture, agro-farming viz.:- horticulture, fruit plantation, fruit industries, more tea industries, entrepreneurship/businesses, MSME (micro, small & medium enterprises), yamala mesükba karkana, ano aika lir. Saka, tia maka item mapa aika, talisa small and big businesses ajakji teimbaka bendangeri dang agizüka inyakdar. Ibaji Dimapur, Chumoukedima, Kohima, tesem kar nungbo Mokokchung dist a dena, asen Nagaland sensopur masü tsümar/tangari dang inyaker. Iba jagi asen rongsen pei meyong kümogo.

Ya metetdi: Iba ama taküm alitsü mapa anguyim (livelihood) bendangeri rakzüker inyakbaji, talisa Dimapur aser Chumoukekima ana nung, bureaucratic/administrative level aser Naga sensopur mapa meranga inyakba (work ethics) sempet samaba ajanga lir. Ibaji alemli asen tsürabur mapang meranga benshia aru. Sura, ibaji bushiteta pei sasa merangteptsü angazüktsüla!

• Naga linük nüchiso bushirtem telok jenti! Ya kechi tai?

Kechi tai aji mebushidang, Naga nüchiso bushiba telok ya koma tenzük ibaji tatsüka agi bilemtetsü merangdi. Naga nübur asoshi kin balala ajakji telungjem nung alitsü ta sür Naga Club 1918 küm tentet. Iba club ji Gaonbura, Dobashis, tesayurtem, sorkar tenzüker, pastors, aser sorkar official tem dena liasü. Ibaji Naga nüchiso bushiba telok (Naga national movement) otsü nung tongtibang küm ka liasü. Kenpika lir külen, Naga lokti aser sobaliba tentet ka nungi Naga yimden telok ka NNC ta sür tenzük. Tasü agi yamai:

Tetenzükba:

• Naga Club 1918 küm tentet;
• Naga National Council 1946 küm tentet;
• 1951 küm NEFA (North-East Frontier Agency – Tuensang and Mon areas) küm tenzük;
• Ano 1954 – Tuensang Frontier Division tentet;
• NNC telok nung lenir A.Z.Phizo aser tangar lenir tsüngda mangatetep adok. Ibaji 1956 küm aser putu tensa mapang liasü. Ano Naga Hills-Tuensang Area (NHTA) 1957 küm tentet.
• 1957 küm Tuensang Frontier Division ji NEFA nungi pakzüka ao.
• 1961 NHTA ji tenüng tasen ka jatetsü;

Iba tasenba tenüngji Indian Union kübok Nagaland 16^th state ama aküm. 

Nüchiso bushir telok aika mejaksaba aser tebilemtsü khuret:

Nagaland state tenteter-a Naga nüchiso bushir telok NNC lenisüba kübok oya alidang, tia makatsüka, parent body NNC-i Shillong Accord sign anema 1980 küm National Socialist Council of Nagaland (NSCN) tasenba telok Isak Chishi Swu, Thuingaleng Muivah and SS Khaplang kümteta ao. Küm ti lir külen, ano NSCN telok tasen ka Khaplangi anir 1988 küm pakzüka ao. Iba sülenbo, joko Naga National Political Group (NNPGs) telok aika jakshia aoba asen nük agi ngua arudagi. Tanü tashi nung, Naga nüchiso bushir telok ajak agi 7 (NSCN-K; NSCN-R, NSCN-U, ano lir) tashi kümtetogo.

Ya metetdi: Naga nüchiso bushir telok aika akümba ya kechi tai? Telangzüba lenmang aisü nung angutsü akok. Tat.agi: political differences, leadership crisis, regionalism, etc. Iba dak alaka ano, osang zülur aser political scientists, political think-tank ajanga asadangtetba yamai ajuruba asenoki angur. Leadership raktepbaji sen mesüra ali-rongsen mechi nung Naga nüchiso kuli amer telok balala-i Naga nübur aser business community dang nungi multiple-tax meshia agitsü mechi nung peipei telok tilala jakshia aor ta ashir (“Taxation and Extortion: A Major Source of Militant Economy ….”  See at https://www.vifindia.org/(October 10, 2021).  

• LOKTI NUNG OCHIMASHI MAPA ASOSHI LAISHIBA TETUYUBA

Asen lokti taküm nung ochimashi mapa jenti nguogo aser lemsatepogo. Süra, asenok Khrista dak amangbapur danga Laishibai kechi ashir? Kechi inyaktsüla aser koma lidaktsünür, iba indangji Lai o tetuyuba kar lemsateper.

Sayutsüngir kaket 5:10 nung yamai zülua lir, “Shibai sen meimer sen agi tenük masüngtsü; shibai rongsen meimer rongseni tenük masüngtsü; ya-a amajok dang lir.” Sayutsüngir kaket zülur jagi kechi shiner? Tongmelang agi ya lir: rongsen penpuba agi na kodanga tenük-mesüngdaktsütsü. Hau, adangji rongsen jagi ne khuret mesüra tebilemtsü koma-aka  bendangtsüyonga, saka rongsen jagi asen taküm telangzüba magütsür. Kechiyong nisunger taginübaji kodanga tatembang ka maka. Tetezü, ne senpong renlok amaji, tebilemba tasen, taginüba tasen bendenlokyonga aor. Sen jagi kodanga ne nem tatembangtiba tenüksüngji magütsütsü. Sürabangla, ne takümi agütsütetba dak aliabo nai talila memeshitsütim ta anagatteter.

Anosa iba indang Tasen Lai nunga 1 Timoti 6:10 nung yamai shia angur: “Kechiyong sen meimbaji tamajung tapu ajak tera lir; aser aji bushi nung nisung kar tamang nung mashileni anir oa, tejashi jenti agi pei temulungjang ateta tsüngogo.” Iba lai oji yamai ratetsü akoker.  Sen baji tai masü, saka sen meimbaji tai ta angateter. Kodang nai ne sen teimba akümer mesüra bendendir, iba amaji ne taginüba, achi-ajemba, libaliru, aser tebilemtsüa teimba akümtsü. Sayutsüngir kaket züluri ashi ama (vv.13-17), senji lendong! “Oda rongsen kiburi ayubaji pa timtemtsüang” (v.13) ta ashiba tetezü sen meimba aser rongsen akaba tamajung, tesama, ammang aser tejashitsü süidaktsüba indang ratettsür. Tangazüktsüji ya: asen taküm yagi agütsütetba dak aliabo temeshi!

Lokti nung ochimashi aser teraksa mapa ajakji memeshiba mapa lir. Iba indang A.Shin 14: 34 nung yamai zülua angur: “Temeshibai kin ka ajungkettsür, saka kechi kin südir süaka temenenji taktsü ka lir.” Anosa, A.Shin 15:27 nung tekümdangtsü ashir, “Tiyazü tajangzük asoshi merumerui pei kibong timtemdaktsür; saka shibai süpokrem sempadir pa taküm alitsü.” Merumeru aser süpokrembaji tai aser asen lokti asoshi tekümdangtsü tulu. Ibajidang masü ano, Naga lima ya Sodom aser Gomorah yimti ama temenen jenti, jabujari aser memeshiba agi sünga lir (Likpok 18 -19). Nagaland ya Christian majority state ka surnung, tanübo Khristan lima aser jaklai mesayuteter. Ibaji taaktsü mapa! Iba ama tia tamajungji asen nübur ajak tashimait ajanga bener aru, aser ochimashi ajanga akümba lir. Tanü asen loktiji tulusangi anir tilatiba tashi ochimashi aser teraksa jagi shiranger. Asen putu tensa nung lokti taküm nung kümkümshiba aser takutsüngsen (social rejuvenation) ka nungdaker. Ibaji Khristan shia tebilemtsü aser teinyaktsü kümdi.

O Tembang:

Yimya agi sorkar tenzüker mesüra yimden lenir ka jagi loktilibaren nungdakbaji meteta lir. Asen Naga lokti nung tulu-tila ajaki ochimashi aser teraksa mapa yagi agidang tetsü-tebou mapang nunga aser tanga mapet ta angatetsüla. Lokti nung teyazü indang temulung nung bilemdangba, jembiba aser inyakba ajanga iba sülenbo ochimashi aser teraksa mapa lokti nung jungkai adoka inyakteper ta aroka shisadangtsü tim. Asen Nagaland state ya Khristan teimba aliba lima asünung, tiyazü o aser ochimashi mapa bilemba aser inyakba tanü nungi danga anentsü angazükdi. Aji ta mesüra, Sodom aser Gomorah ama rungtoktsü, Tsüngremer terasaba arutsü menua mali!

*****

REFERENCES:

Gino, Ayal and Ariely. “Three Principles to REVISE People’s Unethical Behavior” in Perspectives on Psychological Science · November 2015).

Wiltermuth, Scott S., David T. Newman  and Medha Raj  “The Consequences of Dishonesty” in the online source at the  Society for Personality and Social Psychology (https://www.spsp.org/ accessed on October 10, 2021).

“More-come-out-against-backdoor-appointments-Nagaland” at https://morungexpress.com/ March 19, 2020

“Taxation and Extortion: A Major Source of Militant Economy ….”  See at https://www.vifindia.org/(October 10, 2021).

‘HC asks CBI to conduct probe into Kohima HC complex scam’ https://www.business-standard.com/(accessed on October 5, 2021)

The Outlook India, Oct. 28, 2020).