(Miss Mokokchung 2021 Nov 6 aonung shimtsü)

Miss Mokokchung 2021 title atema tokteper kongrulartem (Nokinketer Image)
Miss Mokokchung 2021 nung shilem agitsupur
Show Director
Host
Stylist
Local Artist

‘Miss Mokokchung 2021’ sentong dak sentakba nung 4th Nov, 2021 nü Mokokchung P. Shilu Park nung subtitles shimtsü atema tetendangba ka agiogo. Taküm ‘Miss Mokokchung 2021’ ya Forerunners Mokokchung teloki ayonger aser iba tetoktepba nung kongrular parnok 11-i shilem agitsü renemdaki.

                Taküm subtitles 5; Miss Beautiful body, Miss Beautiful Skin, Miss Photogenic, Miss Talented aser Miss Runway nungertem agütsütsü. Miss Talented shimba sentong 29th Oct, 2021 nüto agiogo aser tanü tanüngba subtitle shimba tetendangba agi.

                Miss Mokokchung shimba sentong 6th Nov, 2021 nü nikongdang 5:00 ako nungi tenzüka Mokokchung town hall nung akatsü. Miss Mokokchung korang shibai bendir la nem tanga senpet den sen 50,000/-, 1st Runner up nem 30,000/- aser 2nd Runner Up nem 20,000/- agütsütsü. Miss Mokokchung title senpetji Mr & Mrs Imlikumzuk Imsong aser Mr & Mrs Rongsentushi Longkumer kibongi renemtsür aser 2nd Runner Up senpetji Anchor Medical Store-i renemtsütsü, ta tayongertemi osangbener senden ka nung metetdaktsü.

                Miss Mokokchung shimba sentong nung MLA & Advisor, Dr. Neikiesalie Kire aser Youth Resource & Sports Director Akumla Chuba na tetushi tesemdanger asütsü jaoka lir. Iba aonung artist tangalen nungi Alobo Naga aser Elementz, aser Mokokchung nungi Wapang Longkumer (Naga Orpheus Hunt), Jungshi Wallinger, Imkumnaro, Odikokla aser Akumsen nungertemi shilem agitsü, ta jangjaogo. Moalemla Aier-i iba aonung sentong len anitsü.

                Miss Mokokchung sentong nung show director & choreographer-ji taoba Mr. Northeast – Sanjeev Tamang lir aser Make-up Artist & Hair Stylist-ji Christy Tsanglao L. Thonger. Tanü subtitles shimba sentong nung tetendangertemji; Sanjeev Tamang den taoba beauty pageant Imlibenla Wati aser Sashinungla Nathan par asem liasü. Tanü agiba tetendangbatemji Miss Mokokchung shimba aonung osang metetdaktsütsü aser takoker nem senpet balala agi senpettsütsü.

                Beti Bachao, Beti Padhao (BBBP)-ia taküm Miss Mokokchung sentong nung yariteper (co-powered by BBBP) aser taküm Miss Mokokchung shiba adokdir laji BBBP Mokokchung district atema ambassador asütsü, ta metetdaktsü.

                MM sentong atema ticket jenjang yamai alitsü; donors Rs. 1000/- (admit 3), Rs. 500/- (admit 2) aser Rs. 200/- (admit 1) aser ticket-ji The Restaurant aser iba aonungjia ticket counter nung angutsü mesüra 8258078112 ajanga tongteprateptsü akok.

                Jangratemtsü osang tajung kaji taküm Miss Mokokchung nungi tajangzük anguba senji Mokokchung Covid Hospital nem tenlatsü aser iba sentong Covid-19 SOP nung ajemdaker akatsü, ta tayongertemi metetdaktsü. Lokti atema mapa tajung ka inyaktsü meranger, anungji, ajaki arua iba show reprangtsü ayongzüker, ta parnokisa metetdaktsü.     

(Source: Tir Yimyim)