~ Esther (Khar)

Adangji arogo ya tamang aser telungjem ka sür tanela khuret bena indaktsüdi süra, o lemtepdak aser telemtetba agidak, deacon board meeting nung senior pastor den associate pastors, youth, music aser Christian education director  ajak adentsüla. Iba team work jisa tajungba asütsü.  Ano ni angatetba kaji, deacon board nung tebur dang asütsüla mesüra tetsürtema  adentsüla ta jembiba ya santem asoshi tanela khuret bena inyaktsü atema masü power aser social status aginür amai bilemer. Adangji angati nübu agüja deacon inyakbaji tenla tulu asütsü, saka deaconba mesüra deaconlaji shinga kidangia sarasademia maor aser shingaia sarasademi majar ta asüba nisung ka süra koda ta bilemer? Santem taküm aser kibong jenjang memetet aser mangu sür arogoi inyaka aotsüba telemtetba agitsübaji koda? Khen khen tesem kar nungbo, pastor aser deacontem pei arogo nunger asüba funeral agitsüba ki memetet  bushia senzüba osanga angashir. Iba funeral nung kechi jembitsü? – K. Temjen Jamir

Arogo anitsü asoshi fulltime contribution kangasa tongtibang aser iba temoatsüji arogoi magiteter. Anungji Board of Deacon nung fulltime ta tenüng jaa itasen agüja ayurtembosa anioka arogo mapa aser khuret ajak yaritepa bener ao tajungba asütsü – Lanukümzük

Tetsür nem, parnok temeten agütsütsü asoshi jembidang, temeten magütsüdang yongi tetsükdaktsütem jembibaji, asenok ano old mindset nung aliba sayur. – Imli P. Lemtur

BCM ya ola aser tenüng tuluba saka tagitsü aser tamshitsü tilaba ta nibo bilemer. BCM ya okila/introduction dangashi Structure aser functions tejangja makaba document ka ta nibo angur.  BCM ya amshitsüsa ta süra, drastic revision ka nüngdak. – Tiatoshi Longkumer

Mapang aser tensa den apet asenoki otsü-olem balala jembir. Aluchidang iba otsüji jembir, aser alurudanga iba otsü jembiba mesüka YSS sabang nung tanü nübur asoshi  tang tang nüngdakba onüktem benoka lenir, Tsüngremlar, aser tashitemeteter aikati  shilem tajung agia arogo nung tetsürtema Deacon menden nung anioka inyakdaktsütsü nüngdaker ta shisalen aika agüja lemsatepa liasü.

Baptist Arogo nung Deacon ta asüba ya kanga dang tongtibang Menden mesüra Board ka lir, kechiaser asenok ajaki metet Deacon medeni Arogo yimsüsüba liru medema bener aotsü makok, kechiaser Baptist Arogo ka nungji ajak dang tematiba tokolak committee-ji Deacon Board (Tenzüker Menden) ya lir, iba Deacon Board ajanga Baptist Arogo ka nung tenüktelen teinyaktsü sentongtem ajak telemtetba agia Arogoji inyakyima bener aor. 

Ajangla adianutem ni shinübaji kechi?  Kodang nenoki külemtsü asoshi senteper, nenok nisung shia tenüngsang ken ka,  tesayuba ka, jungkai atokba Arogo yangertsü asoshi lidakjang.  1 Korint 14:26.

Arogo Deacon ayuba tangatetba

Town arogo tulu tashi nung deacon board nung ministry /department pastortem medendaktsuba yabo kangasa nemjema bilemer, aser tadener pastortem jagi danga jembitsuba sür nung ta sa mangmanga bilemer. – Tiatoshi Longkumer

Deacon Board ya akhi mapangbo tebur dang shima tenzüka aru, aser yangji parnoki kechi lemtetdir yangji dang Arogopur ajak anitaka inyakyima aru aser aji oda tetsürbo iba Deacon Menden nungji meshim mesüra magi, kechiaser tetsür Deacon shimra yangji tetsükdaktsü aika lir ta bilema aser aija tetsürbo maongka magütsüi odang toktsü, aser iba tangatetbaji dang nüburtemi shitak asütsü südi ta bilemloka yangji dang tangatetbaji anenatokba angur. Tetsür Deacon nung magitetba kuli agütsübatemji kar yamai lir:

  1. Tetsür Deacon nung shimra aini aodang timtemer, tat agi. La Arogo nüngdak aini aotsüsa kümra , La den ano tebur kabosa anitaktsüsa akümer, Arogo Expenditure tali.
  2. Deacon Mendenji yimsüsüba Menden, anungji Aor yimli nung tetsüri yimsü süa maru.
  3. Tetsür Deacon nung shima temeshi mapa, tat. agi, Kibuba Benjong amala anganüdang laji ita shilem aoba mapang tenjira aji kanga dang timtem tulu.
  4. Tetsürtema women ministry nung peria kar, anungji pei ministry nung dang rangloka temulung agüjang.
  5. Ano Arogo kar nungbo Arogoibo maongka agütsür saka tetsürtemi tasü maiter.

Ano talila bilemlokbaji tetsür Deacon shimra parnoki amokbangtsü tsübur, ano kari bilembaji tetsür aitra iba Deacon Board Menden tali benjatsütsü ta bilemer.  Item mesükba kulitem bener Arogo aika nung tetsürtem nem tim shilem magütsüi arubatem lir.

Protestant telok tamendakdak rongnung tongti kaji “Priesthood of all believers” ya lir. Tanü Protestant Arogotemi ibai mangateti “all” ji inyakyim nung “teburtem ajak” ta dang angateter. Tetsür ordain asütsü masütsü? Dikon inyaktsü temsü metemsü? a.a., ajakji iba doctrine ya angatetra aser ibai shitak benshitsü ta teburtemi mulungtetra kecha o makatsü südi. – Menjiwabong Jamir

Tetsürtem putusa putu kidang nungi tenzüka lokti ajak nung mokorai liang,  nenok tetsür tanur ta shia anitetba tashitak agi kangshir, anungji item talenpangba nungi atoktettsü asoshi maneni kati ka nem shisatsü agütsüteptsüla aser ajungshiteptsüla.

Yanglushidi süra aser Tsüngrem wadang nung shima shima odi süra  taka tait, sati kuli tajung akar, moko sali machir, yi majemer, nüktapangdaa mesenzürtem,  lokti nung jembishinü tajung yamala mesükba sempet ajak tapetji tetsür nungia lirko. Hai!  Ao arogotem, kati ka tashi mait bushitepa tenzüktepra aseni aniba Khristar arogoji tejakleni odima?  Ne lenisüba mapang telemsa Arogo ka masü, longjemer Khristar arogo tejakleni odaktsütsü merangangma, nai tangar dak tashi mait ajitetba amaji ne daka tangari tashi mait ngudarko, telongjem Arogo südaktsütsü merangdi arungma.

Tanü tendak Arogo tangatetba

BCM ji senpong kisüng centralized asütsü ta angatetba Arogo kar lir. Senpongbo ka aküm saka Ministrybo ka maküm. Eg. Deacon Board/Board of Deacon inyakyimbo BCM maküm. Ano akhi ama dang lir.  – Imli P. Lemtur

BCM inyakyimji pastorbai anir nüburtemi angateta inyakra onsara tajung. Iba nung discrimination kecha malitsü. Asso. Pastor Women kati yamai ashi “Ozü Arogo Pastorbaji station nung liaka, funeral service agitsü maongka kü nem agütsür. Ano aener arudanga deacontem liaka Arogo tenüng nung sentep kidang welcome asütsüjia kü nem maongka agütsür. Iba amala tangatetba tajung lenir nüngdaker. – Tiarenla Longkumer

Deacon board nungja ya melentsüla. Arogo nung deacon board ta tenüng amshi tashi, pastortemji second class decision maker dang board nungji asütsü.  Deacon board nüngja ya ABAM-i amshir küm ishika dang. Yimtsüng arogo aika nung ano “Tenzüker menden” etc ta dang tenüng amshir. Fulltime ministerial staffs aser deacon-a ta külemi lungjemtetba tenüng ka amshitsüla. – Tiatoshi Longkumer

Akhi tsüraburi asen limai Khrista yimsü arur külen ya joko Arok khu lir anungji aroki yaritepa bener odi ta asüba nungi Arogo ta jateter benshia arur, yamaji iba Arogo ya Arok khuret asünung külemi khuret lemsatepa abentsü asoshi tanü tendak joko Deacon ya tebur dang masü tetsür dena shimtsü/agitsü junger ta nüburtem aser amangbapurtemi  tangatetba kati arudaki, aser tetsür adenbaji dang lemang aisü nung ajangzüker ta Sannüker aikati kuli agütsür.  Anungji Tanü tensa nungbo tebur dang masü saka temsüa dang lira tetsüra dena shimoka inyakyima aotsü junger ta jembiaa Arogo kar nungbo joko shimoka benshia arubatem angur.

Asenoki Tasen Lai nungji kodang  reprangdangdir  Rom 16:1, nungji yamai shia angur.. “Kenkerea nung  Arogo  Deacon ka asen adianutsür Foibi  indang ni kü kuli agütsür” ta shia lir. Paul-i Kenkerea nung adianutsür ka Arogo deacon inyakba indang kuli ka kanga jangja shia angur, süra yamaji asen Arogo nunga tetsür ka deacon inyaktsübaji ya Laishibai melaba ta asenoki meratai angatettsü akoker.  Anungji shitakba Khristar Arogo yangertsü asoshi Arogo nung nütsüng nüburtem nem  tim tesayuba  Lai O dak ajemdaker amangbapurtem nem tangatetba aser tesayuba  agütsütsü kanga dang  nüngdaker.

Alima balala nung Arogo aika nung Deacon lir, aser arogo kar nungbo Deacon-temji tetsür teimba  nguogo saka kecha complain mali ta tangur aser temetetertemi ashir. Asen Lima nunga Arogo kar nungbo joko küm ter (10) dak alia Deacon Board nung tetsür aser tebur longjemer tenzüka arur, tang tashi nung iba jaki Arogo nung kecha tetsükdaktsü bener aruba melika, saka parnok tetsürtem atenba jaki Arogo nüngdak tajungba jembitetter aser tapensaba inyakteter ta ashir. Meimchir shia nem Tsüngremi sempet balala agütsüba ama teburtemi merajemba lemang aisü nung tetsür Deacon-temi tajungba rajemtsür aser Khristar Arogo iba jaki ano tali tashi itdaktsür.

Mapa tasen ka atema arendaka bilemtsüji tim dang, saka tajunga ta chidangteter aliba Arogotemi anir temelenshi ka atoktsü asoshi merangdangtsübaji kanga dang nüngdaker. Asenok küm aika sobaliba den sütepa inyakyima aruba agi melenshitsü mapang agir, aji saka Arogo ishika nungbo Deacon nung tetsür anioka lir ta asüba tetezüji temelenshi aliba tamaitsü lir.  Inyakyim angateta arua melenshitsü mapang agir ta asüba nungji ajemdaker ano melenshia aotsü aremzüka tesayuba agütsüteptsü kanga tongtibang lir ta angatetdi.

Tanü putu nung Arogo ka tejakleni odaktsüdi süra Deacon Board nung tebur aser tetsür anaprongla alitsü nüngdaker, aser Ministry balala nung toklanga tenzüker ajak Deacon board nung atentsübaji kangasa tongtibang lir. Asen Ao Arogo kümsük 150 jubilee amongtsü renemteper, saka biblical church Model (BCM) tenzüker küm asem pezüka dang aor ta jembir.  Koba church Model ka südir süaka Khristar Arogo structure nungbo tetsür-tebur kecha tebendang melii amshitsübaji kanga dang tim lir. Anungji tetsürtema Arogo shia nung Deacon Board nung shimtsüla. Aser Deacon board nung dang masü saka tenük-telen ajak nung kasa shilem agitsüsa lenmang lapoktsütsüla. Arogo kar nungbo tetsüra mapangtsür inyaka aruba angur, teburtema mapangser inyaka aruba sülen Arogo khuret aser mapa angazüka meteta arur külen oda temsüa alibapurbo Deacon Board nunga shimoka amshir, iba ama tetsüra mapangtsür inyaka arur külen temsüa dang lira Deacon shimtsüjia kanga dang tajung asütsü ta bilemer. Hau! Deacon inyaktsü atema mapangser/mapangtsür inyaker alitsüla tabo masü, saka Arogo mapatem angazüka  khuret angateta alibajisa Deacon inyaktsü asoshi tajungtiba nübu, takümji asütsü ta bilemer.

Akhi asen Otsüla-oboula nunger aser asen tsüraburtem mapang nung amshia aruba tamaitsü ka indang khen shisadangdi, par putu nung talisa kanga nüngdak süa amshiba kaji parnoki kidang, Alu nung, aser arem meta balala nung sorochioka taküm chiyungtsü renemba koba meshi-Lung asem külemi tekolak medema azünger yangji jangratema kechisarina ajak tazü nungi tamen küma sorochioka chiyunga taküm nung tepela angubaji koda tesüngmangtsüka liasü; asenoki khen aroka shisadangra meshi-lung asem tetezüji Tebu, Techir aser Tanela Temeshi mesüka lir. Akhi mapang nunga oda Tsüngrem dak mamangaka pabo asen den teti liasü ama iba tamaitsü jaki angatettsü akoker.

Tanabuba nung, meshilung asemji Arogo Deacon Board nung tebur, tetsür aser Arogo nung toklang tenzükertem mesüka lir ta asenoki angatettsü akok, aser yamaji itemji tekolak  medema shisa obang  ka ser Kibubar Arogo kaji sarasadema bener ora yangji  Kibuba  mulung chia par sentong jenti ataloka Tsüngremer sentsüwangshi tali jungkai atoktsü südi ta amanger, aser idangji Arogopur temoatsü jenti ngua amangbapur tzüratema tepela anguba taküm  aser kibongtem asütsü yimlar.

ABAM kübok town Arogo kar aser yimtsüng Arogo kar nung tetsür Deacon shimer inyaka odagi, Arogo sasep nung Deacon Board memberji  7, 9, 13 ta yamaji pei Arogo yari balala alir, Area wise Deacon shilemji asadangra tetsür Deacon- ji noklang nung ter (10) shilema matonger  ta ashir. Saka noklang shilem nung  50% ta sa mesüaka oda parnok teyaritepji kangasa junger ta asüba kuli lir. Meimchir dangji tebura aser tetsüra kar nungibo pei shilem teyaritepji kanga junga agütsür saka kar nungibo tera tajemba ta lir.

Deacon tetsürtemji tetsür telok tenüng nung ta masü saka arok lokti Arogopur ka ama dang lir aser yamaji asütsüla, saka tetsür deacon paikajibosa alitsüla ta mayuyonga kecha masü. Saka  arok Arogo den liru medema inyakyima aotsü asoshi maneni asen Arogotem ajak nung tetsür Deacon agitsübaji temsüa dang lirbo shimtsübaji tanü Arogoi nüngdakba shilem ka  lir ta angajemdi aser Tsüngrem yimli atema arung asenoki shisadanga kinungtsüi koda kibong nung ajak asoshi tajungtiba agi anepalur, aji mesüka tobur junga Khristar Arogojia yangerdi. Galatia 3:26-28 nungji yamai shia angur, “Kechiyong Khrista dak tamang akaba ajanga nenok ajak Tsüngrem chirtem lir, kechiyong nenok shir Khrista nung Baptiogo, nenok Khrista dak sübuogo. Yihuda nungera masü, Grik nungera masü, Alara masü, Nüjia masü, Tebura masü, Tetsüra masü, kechiyong nenok ajak Khrista Yisu nung ka dang lir.”

Govt. mapa balala nung mapa yari qualification nüngdaker, yamaji mapa den sentakba sempet aketer nisung nüngdaker. Süng Lung taret ajungshitsü atema tebur nübu nüngdaker, sorochioktsü nung tetsür tajungba asünung tetsür  nüngdaker, yamaji alima inyakyimtem nung tapet nübuji nüngdaker. Arogo nung tenzüktsü atema nüngdakba qualification-ji Khrista akaba aser tenzüktsü tanela sempet akaba ya lir, tebur, tetsür ta masü, par mopu, ozü mopu, par kidong, ozü kidong ta masü saka shiba Khrista aka, shiba Tsüngrem tanela agi sünga lir, shibai ochi nung Khristar arogo tenzüktsü bendanga agütsür parnokji shima tenzükdaktsütsübaji dang Tsüngremi mulungba tenzüker ka asütsü. Aji saka  Tsüngrem O tejangja meteta yur Arogo inyakyim nung kirakdi ta asübaji meimchir tashi mait lir. Arung amangbapurtem, temsüa dang lira tebur, tetsür kecha telemdang makai shima tenzükdaktsüdi, tetsür tebur ta mebilemi pei sempet-i dang Tsüngrem tenzüktsü ta bilemdi, shiba Tsüngremi shimba lir ta asenoki sarasadema bilemdangdi  aser Tsüngremi mulungba ama inyaktsü merangdi. 

Koba church model ka südir süaka Khristar Arogo structure nungbo Tetsür-tebur kecha tebendang melii amshitsüla. Tetsürtem Arogo shia nung deacon board nung dang masü, saka tenük-telen ajak nung kasa shilem agitsüsa lemang sadema lapoktsütsüla. – Zülu Jamir